Wb/nia/Sura Ni'amoni'ö/Sura Moze si föföna/Faza 40

From Wikimedia Incubator
FAZA 40

I. Fangifi ngoningoni Waraʼo andrö, si darua, si so ba gurunga. II. Iʼombakhaʼö Yosefo geluaha wangifi andrö. III. Itörö niʼombakhaʼönia andrö.

1 I. Ba lö ara furi ö, ba mosala zamaʼoli gö khö razo Miserayi ba samazökhi kue khönia, so zalara khö zokhö yaʼira, razo Miserayi. 2 Ba mofönu Waraʼo ba ngoningoninia andrö, si darua, högö zamaʼoli gö ba högö zamazökhi kue, 3 ba ifabeʼeʼö ba gurunga ira ba nono högö wazuri, ba gurunga andrö, ba nikuru Yosefo, (F. 39, 20). 4 Ba ibeʼe ngoningonira Yosefo högö wazuri andrö; ba ara maʼifu tetaha ira. 5 Ba mangifi zi darua andrö, ha sara wongi, ba fasambua geluaha wangifira, fangifi zamaʼoli gö ba fangifi zamazökhi kue khö razo Miserayi, si so ba gurunga.

6 II. Ba me möi si bakha khöra Yosefo, sihulöwongi, ba oroma khönia, wa lö sökhisökhi dödöra. 7 Ba isofu khö ngoningoni Waraʼo andrö, nitaha awönia ba nomo zokhö yaʼia, imane: Hadia, wa mangerau mbawami maʼökhṍ? 8 Ba lamane khönia: No mangifi ndraʼaga ba lö sangombakha eluaha. Ba imane khöra Yosefo: Lowalangi mbalazi ba wangombakha eluaha wangifi — ba mitunö khögu. 9 Ba itunö khö Yosefo wangifinia högö zamaʼoli gö, imane khönia: Ba wangifigu andrö, ba so fönagu ŵeŵe nagu, uŵaʼö. 10 Ba si tölu daha ŵeŵe nagu andrö. Ba me molehe ia, ba alua mbowo ba adölö mowua sasoso. 11 Ba so ba dangagu mako Waraʼo. Ba uhalö mbua nagu andrö, ba uferaisi ba mako khö Waraʼo ba ubeʼe ba danga Waraʼo mako. 12 Ba imane khönia Yosefo: Daʼö geluaha: Daha andrö si tölu, ba no ngaluo. 13 Tölu bongi tö, iʼotarai maʼökhṍ, ba iʼefaʼö ndraʼugö Faraʼo ba ifuli ifataro ndraʼugö ba nahau. Ba öfuli öbeʼe ba danga Warao makonia, si mane föna, me samaʼoli gö ndraʼugö khönia. 14 Ba törötörö tödöu ndraʼodo, na ohahau dödöu, tolodo, wangombakha yaʼo khö Waraʼo, enaʼö öʼefaʼö ndraʼo ba nomo andre. 15 Noa sa nitagö manö ndraʼo ba danö Heberaio ba ba daʼe göi, ba lö horögu, wa no labeʼe ba gurunga ndraʼodo. 16 Ba me irongo högö zamazökhi kue andrö, si sökhi geluaha andrö, ba imane khö Yosefo: Ba wangifigu, ba tölu kambukambu kue ba högögu, uŵaʼö. 17 Ba ba gambukambu tánö yaŵa, ba so ngawalö gö khö Waraʼo, nifazökhi duka kue; ba laʼā fofo ba gambukambu andrö ba högögu. 18 Ba itema linia Yosefo, imane: Daʼö geluaha daʼö: Kambukambu andrö, si tölu, ba tölu ngaluo. 19 Tölu bongi tö, iʼotarai maʼökhṍ, ba ifaʼeŵaʼö mbagiu Faraʼo ba ifataŵiʼö ba döla geu, ba tobali laʼā nösiu fofo.

20 III. Ba tölu bongi aefa daʼö, me baŵa waʼatumbu Waraʼo, ba ibeʼe gö ngoningoninia fefu. Ba ifahalöʼö miyaŵa högö zamaʼoli gö andrö, awö högö zamazökhi kue, ba zi so ngoningoninia; 21 högö zamaʼoli gö andrö, ba ifuli ifataro ba halöŵönia, fa tola ifuli ibeʼe ba danga Waraʼo mako; 22 ba högö zamazökhi kue, ba ifataŵiʼö, itörö niŵaʼö Yosefo khöra. 23 Ba löʼö saʼae itörö tödö högö zamaʼoli gö Yosefo, olifu ia.



Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Efeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior