Wb/nia/Sura Ni'amoni'ö/Sura Moze si föföna/Faza 39

From Wikimedia Incubator
FAZA 39

I. Mandru Yosefo ha nomo Wotifa. II. Lö iʼoʼö, me ifaelungu ia enaʼö foʼomo Wotifa andrö, ba tekuru ia.

1 I. Ba me no laʼohe ba danö Miserayi Yosefo, ba iʼöli ia Fotifa, Dawa Miserayi, mandru yomo khö Waraʼo, högö wazuri, ihöli ba Ndraono Zimaʼeli andrö, solohe yaʼia misi tou ba daʼö. (Moz. I. 37, 36). 2 Ba itolo Yosefo Yehowa, tobali mofozu fefu hadia ia khönia, ba ba nomo Ndrawa Miserayi andrö, sokhö yaʼia sosó ia. 3 Ba me iʼila sokhö yaʼia, itolo ia Yehowa, awö wa mofozu fefu hadia ia halöŵönia, ibeʼe Yehowa, 4 ba ebua sibai dödönia khö Yosefo, ba ihalö ia ngoningoninia ba ifataro ia mandru yomo khönia, ba ibeʼe ba dangania fefu hadia ia nibayabayania. 5 Ba iʼotarai daʼö, me no ifataro ia mandru yomo khönia ba samaigimaigi nibayabayania fefu, ba ifahowuʼö Yehowa nomo Ndrawa Miserayi andrö, börö Yosefo, ba howuhowu Yehowa manö ba zi so khönia, fefu, he yomo, ba he baero. 6 Ba ibeʼe manö ba danga Yosefo gombayasö dangania fefu; lö ba dödönia hadia ia, ba ngai Yosefo, baero gönia, niʼā.

7 II. Ba no si sökhi sibai mboto Yosefo ba si sökhi göi mbawania. Ba lö ara sibai, ba ilekeʼö Yosefo foʼomo zokhö yaʼia ba imane khönia: Förö ba ngaigu! 8 Ba itimba, imane khö woʼomo zokhö yaʼia: Törö tödö, wa lö ba dödö zokhö yaʼodo hadia ia, ba ngaigu, awö wa no ibeʼe ba dangagu nibayabayania fefu. 9 Tenga sebua moroi khögu ia yomo ba daʼe, ba lö hadia ia zi lö ibeʼe ba dangagu, hatṍ yaʼugö, me no foʼomonia ndraʼugö. Ba hadia, ulau zi lö atulö andrö, sabölöbölö sibai, wamazökhi horö ba Lowalangi? 10 Ba he ŵaʼae ero maʼṍkhö iforege khö Yosefo, ba lö iʼoʼö khönia, fa orudu menaʼö ia khönia, fa mörömörö ba ngainia. 11 Ba samuza maʼṍkhö, me möi yomo Yosefo mangai halöŵö, me ha siʼaikö lö niha böʼö yomo, 12 ba iraʼu mbarunia, imane: Förö ba ngaigu! Ba iröi ba dangania mbaru, ilau moloi, isaŵa baero. 13 Ba me iʼila [alawe andrö], no iröi ba dangania mbarunia ba no moloi, 14 ba humede ia ba zi so yomo ba imane khöra: Hiza, mifaigi, no iʼohe khöda niha Heberaio andrö, enaʼö iʼoʼaya ita! No möi ia khögu si bakha, ba wemörö ba ngaigu; ba muʼiraʼira ndraʼo. 15 Ba me irongo, muʼiraʼirado, ba iröi mbarunia khögu ba daʼe, ba ilau moloi, isaŵa baero. 16 Ba ibeʼe ba ngainia mbaru Yosefo, irege so zokhö yaʼia. 17 Ba imanö göi wangombakha khönia, imane: So zawuyu andrö, niha Heberaio andrö, niʼoheu khöda, möi ia si bakha khögu, ba wangoʼaya yaʼodo. 18 Ba me muʼiraʼira ndraʼo, ba iröi furi khögu mbarunia, moloi ia, isaŵa baero. 19 Ba me irongo sokhö yaʼia niʼombakhaʼö woʼomonia khönia, me imane: Daʼö nilau zawuyumö andrö khögu! ba mofönu sibai ia. 20 Ba ifaraʼuʼö Yosefo sokhö yaʼia, ifabeʼeʼö ba gurunga, ba zi so nifakuruʼö razo, ba sosó ia ba daʼö ba gurunga. (Sin. 105, 18). 21 Ba itolo Yosefo Yehowa, ibeʼe laʼomasiʼö ia niha böʼö ba ebua dödö högö mandru ba gurunga khönia. 22 Ba ibeʼe barö mbawa Yosefo nikuru andrö högö mandru, fefu zi so ba gurunga, ba fefu hadia ia nilau ba daʼö, ba balazi yaʼia mangumaʼö. 23 Lö ifaigifaigi högö mandru ba gurunga hadia ia nilau Yosefo, me itolo ia Yehowa. Fefu hadia ia nilaunia, ba mofozu ibeʼe Yehowa.



Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Efeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior