Wb/nia/Sura Ni'amoni'ö/Sura Moze si föföna/Faza 38

From Wikimedia Incubator
FAZA 38


I. Fangowalu Yuda. Ononia. II. Ihoröni Damara andrö Yuda. III. Ono Damara, si faero.

1 I. Me luo daʼö, ba tobali ifabali ia ba dalifusönia Yuda, ba iʼolembai mbanua Gadula samösa, Hira döi. 2 Ba daʼö dania iʼila Yuda nono Ndrawa Ganaʼana alawe, Sua döi nama; daʼö ihalö ba orudu ia khönia. (Ngaʼötö. I. 2, 3). 3 Ba manabina ba moʼono, ono matua, ba ibeʼe töinia Geri. 4 Ba ifuli manabina, ba moʼono, ono matua, ba Onani ibeʼe töi daʼö. 5 Ba furi ö, ba samuza tö moʼono ia, ono matua, ba Sela döi daʼö khönia. Ba ba Gezibi so Yuda, me tumbu khönia daʼö. 6 Ba ifatunö Geri, ononia si aʼa, Yuda, Tamara döi nihalönia. 7 Ba si lö omasi Yehowa nilaulau Geri andrö, si aʼa nono khö Yuda, andrö ibeʼe mate ia Yehowa. 8 Ba iŵaʼö khö Gonani Yuda: Ae khö ndronga gaʼau ba törö khönia gömöu, ömö zi fatalifusö, enaʼö öfongaʼötö gaʼau. (Moz. V. 25, 5). 9 Ba me no iʼila Onani, tenga khönia dania ndraono andrö, ba itema ifiligö, ero na orudu ia khö ndronga gaʼania andrö, fa böi ifongaʼötö gaʼania. 10 Ba lö omasi Yehowa wolau si manö, andrö ibeʼe mate ia göi. 11 Ba ibeʼe li Yuda khö numönönia Tamara andrö, imane: Iagö lakha baomo khö namau, irege ebua nonogu Sela! Ataʼu ia, ma mate daʼö göi, si mane ira gaʼania. Ba itema iʼiagö baomo khö namania Tamara andrö.

12 II. Ba me no ara maʼifu, ba itema mate nono Zua andrö, foʼomo Yuda. Ba me no ahöwö mbongi wangeʼesi khö Yuda, ba möi ia khö zi fahuwu khönia andrö, banua Gadula andrö, Hira, misi yaŵa ba Dimena, ba wamaigi soguti bu mbiribirinia. 13 Ba me teʼombakhaʼö khö Damara: Hiza, möi misi yaŵa ba Dimena namau, ba woguti bu mbiribiri! 14 Ba iheta mbarunia, baru lakha mbanua, ba ibalugö mbawania, iʼolohuni ia, ba mudadao ba zinga lala ba Genaʼi, lala ba Dimena. Noa sa iʼila, wa no ebua Zela andrö, ba löʼö zui mubeʼe dongania ia. 15 Ba me iʼila ia Yuda, ba iwai ira alawe sabao; me no ibalugö mbawania. 16 Ba iholeʼö ia khönia ba zinga lala, ba imane: Daʼorududo khöu! Löʼö sa iʼila, wa umönönia. Ba imane: Hadia nibeʼeu khögu, fa tola oruduʼö khögu? 17 Imane: ufaʼoheʼö dania khöu nono nambi si matua, na urugi ngawawá! Ba imane: Na öbeʼe khögu gade, irege öfaʼoheʼö ia. 18 Ba imane: Hadia gade, nibeʼegu khöu? Imane: Laedurumö andrö ba sinali andrö khöu ba siʼo andrö, ba dangau. Ba ibeʼe khönia ba orudu ia khönia, ba manabina ia khönia. (Moz. III. 18, 15. Hes. 22, 11). 19 Ba mofanö ia, möi muheta mbalubalu mbawania ba ifuli iʼobaru mbarunia, baru lakha mbanua. 20 Ba ifaʼoheʼö, nono nambi andrö Yuda khö zi fahuwu khönia andrö, banua Gadula andrö, ba wanabusi gade no mege ba ndra alawe andrö; ba lö isöndra ia. 21 Ba isofu ba mbanua daʼö, imane: Heza so galawe sabao andrö, sidaodao no ba zinga lala ba Genaʼi andre? Ba lamane: Lö si möi ba daʼe ira alawe sabao. 22 Ba ifuli ia khö Yuda, iʼombakhaʼö khönia: Lö si falukhado ia, ba lamane banua daʼö: Lö si möi ba daʼe ira alawe sabao. 23 Imane Yuda: Ba alakha so khönia, asala lö laʼigiʼigiʼö ita. No atulö ufaʼoheʼö nono nambi andrö, ba lö nisöndrau yaʼia! 24 Ba mato tölu waŵa, ba teʼombakhaʼö khö Yuda: No mohorö numönöu Tamara, ba hiza, no abeto ia ba daʼö. Ba iŵaʼö Yuda: Miʼohe baero ia, enaʼö latunu auri. 25 Ba me no laʼohe baero ia, ba ifatenge khö namania, imane khönia: Niha sokhö daʼö zi abetosi yaʼodo; ba imane na khönia: Faigi we, ha ökhö laeduru andrö ba sinali andrö ba siʼo! 26 Ba me no ifaigi sibai Yuda, ba imane: Tenga sala niŵaʼönia khögu; Hana sa göi, wa lö ubeʼe ia donga nonogu Sela! Ba löʼö saʼae orudu ia khönia.

27 III. Ba me no irugi baŵa wadono khönia, ba hiza zi faero ba dalunia. 28 Ba ba wadononia andrö, ba iʼoroʼö baero dangania si sara ono si sambua andrö. Ba ihalö mbana soyo sangamöi talu, ifaliʼö ba danga andrö, imane: Daʼe zi oföna möi baero! 29 Ba ifuli iböda dangania, ba awena böla dalifusönia. Ba imane [sangamöi talu]: Ha lö abölö öfolala ndraʼugö! Andrö wa labeʼe töinia Weresi. (Ngaʼötö. I. 2, 4. Mat. 1, 3). 30 Ba awena böla nakhinia, si so bana soyo andrö ba danga; ba labeʼe töinia Zera.



Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Efeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior