Wb/nia/Sura Ni'amoni'ö/Sura Moze si föföna/Faza 34

From Wikimedia Incubator
FAZA 34

I. Ihoröni Dina andrö Sikhema, omasi ia ihalö. II. Lalimo mbanua Zikhema Simeoni ba Lewi, lafakao.

I. Ba samuza ma'ökhö, me möi mangero Dina andrö, ono Lea, ononia khö Yakobo, me möi mamaigi ono niha ba danö alawe, ba i'ila ia Sikhema, ono Ndrawa Hewi andrö, Hemori, salaŵa ba danö andrö, ba ira'u, orudu ia khönia, ihoröni. Ba molemba sibai dödönia khö Dina andrö, ono Yakobo, omasi ia nono alawe andrö, itandraigö irara dödönia. Ba i'andrö khö namania Hemori Sikhema, imane: Sofu khögu nono alawe andrö, ena'ö uhalö! Ba no irongo Yakobo, wa no ihoröni nononia Dina; ba ononia matua, ba no lafasao ba ndru'u gurifö, ba ihonogö manö ia Yakobo, irege mangawuli ira. Ba möi khö Yakobo Hemori, Ama Zikhema, ba wahuhuosa khönia.

Ba me so nono Yakobo, si otarai mbenua ba me larongo, ba abao sibai dödöra, tesao wönura sabölö-bölö. Ba dödö Ndraono Gizera'eli, ba no horö sebua nifazökhinia, me no orudu ia khö nono Yakobo; lö'ö manö sa tola zi manö mena'ö! Ba humede Hemori, imane khöra: Tödö nonogu Sikhema andrö, ba no molemba khö nono alawe andrö, akhimi; u'andrö khömi, mibe'e ia khönia, hana na olembatama ami. Mibe'e khöma nonomi alawe, ba mihalö nono alawe khöma, ba mi'iagö khöma: ya'e fönami danö, mi'iagö ba midörö-döröi, hana na tetaro ami ba danö!

Ba imane Sikhema khö nama Dina andrö ba khö ndra ga'ania: Ena'ö na falukhado wa'ebua dödö wamaigimi! Gofu ha wa'ebua niŵa'ömi, ba ube'e. He ebua sibai niŵa'ömi khögu, böwö ba buala, ba ube'e, u'o'ö niŵa'ömi; ba mibe'e fo'omogu nono alawe andrö!

II. Ba latema li Zikhema ba li namania Hemori ono Yakobo, la'onekhesi, me no ihoröni nakhira Dina, lamane khöra: Tebai matehe, ihalö nakhima niha si lö muboto; saila ndra'aga sa da'ö. Awena tola ma'o'ö khömi, na mibali'ö si mane ya'aga ami, wamoto fefu motöi matua ba khömi. Ba mabe'e sa'ae khömi nono alawe khöma ba mahalö nono alawe khömi ba ma'iagö khömi, ena'ö ha sambua soi ita. Ba na lö mi'o'ö da'ö, wamoto ya'ami, ba ma'ohe nono alawe khöma, ba malau mofanö!

Ba atulö dödö ndra Hemori Sikhema, ononia, niŵa'öra andrö. Ba i'aliogö wolau si manö ono matua andrö, me no omasi ia nono Yakobo, ba no sebua töi ia ba zi sawu ya'ira. Ba möi ba mbawa göli Hemori ba ononia andrö, ba lamane ba mbanuara: Si sökhi tödö khöda niha andrö: akha mowanua ira ba danöda ba hana na ladörö-döröi; tenga sa atö sambö nahara danö, gofu he tanö la'iagö! Tahalö nonora alawe ba tabe'e khöra nono alawe khöda.

Ba awena la'o'ö niha andrö, wangiagö khöda, ena'ö ha sambua soi ita, na lafaboto'ö ira dozi motöi matua ba khöda, si mane ya'ira, me no muboto ira. Khöda dania zi so khöra, nibaya-bayara ba uriföra, fefu. Ba data'o'ö khöra, ena'ö böi labulö'ö ira khöda!

Ba la'o'ö niŵa'ö Hemori ba ononia Sikhema dozi sanörö-nörö bawa göli mbanuania andrö, ba we'amöi baero ba ba we'amöi miyomo, ira matua andrö fefu, ha wa'ato zanörö-nörö bawa göli mbanuania, ba lafaboto'ö ira. Ba me no aefa dua wongi, me la'akhömöi, ba latuyu zi'öli ono Yakobo andrö, si darua, Simeoni ba Lewi, ga'a Dina andrö, lahawui mbanua andrö, si lö famaudu dödö, ba labunu ndra matua fefu. Numalö Hemori ba ononia Sikhema, labunu si'öli, ba lahalö Dina ba nomo Zikhema ba lalau mofanö. Ba latörö nibunu andrö ono Yakobo, larabu hadia ia khöra, me no muhoröni nakhira. Biri-birira ba saŵira ba kalidera, ba hadia ia ba mbanua bakha ba hadia ia baero, ba larabu, awö nibaya-bayara fefu, awö ndraonora side-ide, awö ndra alawera, la'oloi'ö sawuyu, ba si so ba nomo fefu, ba larabu.

Ba imane Yakobo khö ndra Simeoni Lewi: Famakao nifobörömi khögu, noa sa mibe'e fa'udu khögu niha ba danö, Dawa Gana'ana ba Dawa Weresi, ya'odo, si lö atoto niha barö mbawa; na la'osara'ö li dania, ba lalaŵa ndra'o, ba tehori ba danö ndra'odo, awö zoroiyomogu fefu. Ba lamane: Hadia, akha ihoröni manö nakhima?



Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Efeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior