Wb/nia/Halöŵö Zinenge/9
Famalalini era-era Zaulo
[edit | edit source]I. 1 Ba lö'ö na tebato wa'omasi Zaulo, ifeta'u nifahaö Zo'aya ba ibunu; möi ia khö ndra ere sebua,[1] 2 i'andrö khönia zura,[2] nibe'e ba Ndramaseko ba zekola, ena'ö iböbö na falukha ia zolo'ö huku da'ö, ira matua ba ira alawe, ba i'ohe ba Yeruzalema.
3 Ba ba wofanö, me ahatö ia ba Ndramaseko, ba i'ozumagö ifasui ia haga, moroi si yaŵa ba mbanua. 4 Ba alau tou ia ba danö, ba irongo li, imane khönia:
He Saulo! he Saulo! hana wa ögohido?[3]
5 Ba imane: He So'aya, ha niha ndra'ugö?
Ba imane: Yesu ndra'o, nigohiu.[4] 6 Ba faoso ba ae ba mbanua andrö, ba laŵa'ö khöu he öwisa.[5]
7 Ba labadugö ira niha andrö, awönia ba lala, lö hede-hede; larongo sa li andrö, ba lö oroma khöra niha.[6]
8 Ba maoso Zaulo moroi ba danö, ba me ifehaga ia, ba lö i'ila hadia ia; ba la'ohe dangania, lafasao ia ba Ndramaseko.
9 Ba tölu bongi lö i'ila niha, lö manga ia ba lö ibadu nidanö.
10 Ba so ba Ndramaseko nifahaö,[7] Anania döinia, ba imane ba da'ö So'aya, ba gangilata: He Anania! Ba imane: ya'e ndra'o, Tua!
11 Ba imane khönia So'aya: Faoso, ae ba newali andrö, nifotöi "sadölö" ba sofu zotöi Saulo andrö, banua Dareso, ba nomo Yuda. Hiza sa, mangandrö ia,[8] 12 ba no i'ila niha, sotöi Anania, si möi khönia yomo, sanufa högönia tanga, ena'ö ifuli i'ila niha.
13 Ba itema linia Anania, imane: He Tua, no ato zangombakha niha andrö, nirongogu, i'abölögö wamakao ni'amoni'ö andrö khöu, ba Yeruzalema, laŵa'ö. 14 Ba ba da'e, ba no latehe khönia ere sebua, tola iböbö dozi si angaröfi li töimö.
15 Ba imane khönia So'aya: Ae'e, me no fakake nituyu da'ö khögu, ba wolohe ba niha baero töigu ba ba zalaŵa ba ba Ndraono Gizeraeli.[9] 16 u'oroma'ö sa khönia, ha wa'oya zi lö tola lö göna ia famakao, börö döigu andrö.[10]
17 Ba möi Ganania, möi ia yomo ba nomo andrö, itufa högö Zaulo tangania, imane: He talifusögu Saulo, So'aya zamatenge ya'o, Yesu, sangoroma'ö ya'ia khöu, ba lala nitöröu, ena'ö ifuli ö'ila niha, ba ena'ö tehöna khöu Geheha ni'amoni'ö.[11]
18 Ba i'anema'ö abo'a ba hörönia zi hulö huna-huna, ba ifuli i'ila niha; ba maoso ia, ifabayagö'ö idanö ia, ba i'a gönia, fangabe'enia.
19 Ba so ia ma'ifu ba da'ö ba Ndramaseko, awö ndra nifahaö.
20 Ba i'anema'ö i'ombakha'ö Keriso, ba zekola, wa ono Lowalangi da'ö.
21 Ba tobali dödö dozi samondrongo da'ö, ba lamane: Tenga da'ö zamakiko no, ba Yeruzalema si angaröfi li töi andrö, ba si möi ba da'e, ba wamöbö ya'ira ba ba wolohe ya'ira khö ndra ere sebua?[12]
22 Ba itugu abölö na Zaulo, fawuka dödö niha Yehuda, si fatewu ba Ndramaseko, ibe'e, wama'ele'ö, wa Keriso Yesu.[13]
23 Ba me no ara ma'ifu, ba mamagölö niha Yehuda, ba wamunu ya'ia.[14]
24 Ba irongo Saulo dödöra andrö.
Ba manaro göi ira ba mbawa göli, bongi ma'ökhö, ba wamunu ya'ia.[15]
25 Ba latolo ia nifahaönia ba zi bongi, ladada baero göli, ba raga-raga.
26 Ba me no irugi Yeruzalema, ba itandraigö ifaogö ia khö ndra nifahaö, ba a'oi ata'u ira, lö faduhu dödöra, wa no nifahaö ia.[16]
27 Ba itolo ia Baranaba, i'ohe khö ndra sinenge, idunö-dunö khöra, he wisa wangilania So'aya ba lala, awö wa no muhede khönia, ba he wisa wamahaönia, wangombakha töi Yesu, ba Ndramaseko, wa lö aiŵö ia.[17]
28 Ba fao-fao ia khöra, ba Yeruzalema, heza möi ira, ba lö aiŵö ia, wamahaö, wangombakha töi Zo'aya.[18]
29 Ba muhede ia göi ba Ndrawa Heleni, fahuhuo ira, ba ya'ira, ba la'alui wamunu ya'ia.
30 Ba me larongo da'ö talifusö, ba la'ohe ia misi tou ba Kaizaria, ba lafatenge ba Dareso.[19]
31 Ba ohahau dödö mbanua Yesu, ba danö Yudaia ma'asagörö, awö ba Zamaria, itugu aro ira, ba latörö lala Zo'aya, la'ata'ufi ia, ba fahöna khöra wondrara dödö khö Geheha ni'amoni'ö.[20]
Ifadöhö wökhö Fetero
[edit | edit source]II. 32 Ba me itöröi ira Fetero, ba tobali irugi göi si tou, ni'amoni'ö, banua Lida.[21]
33 Ba falukha ia ba da'ö niha, Ainea döinia, si no meŵalu fakhe fa'ara tou ba zalo manö, si mate dambai.
34 Ba imane khönia Fetero: He Ainea! Ifadöhö wökhöu Yesu Keriso; faoso, ba ya'ugö mamazökhi naha wemörö khöu.
Ba i'anema'ö maoso.[22]
35 Ba oi la'ila ia banua Lida fefu ba banua Zarona, ba la'o'ö khö Zo'aya.[23]
Isusugi Dabita
[edit | edit source]III. 36 Ba so ba Yofe nifahaö, ira alawe, Tabita döinia, Doreka (nago), na la'ali, si no fahöna bua-bua si sökhi, ba oya ibe'e ame'ela ba zi numana.[24] 37 Ba tobali, me luo da'ö, ba mofökhö ia ba mate. Ba lafemondri ia, ba labe'e ba mbate'e ba zi sagötö.
38 Ba me no ahatö ba Yofe Lida andrö, ba me no larongo ira nifahaö, so ba da'ö Wetero, ba lafatenge khönia niha, darua, sangandrö khönia: Böi aragö we'amöi khöma.
39 Ba maoso Wetero, möi ia awöra.
Ba me irugi, ba la'ohe ia ba zi sagötö, ba la'ondrasi ia fefu lakha mbanua, mege-ege ira, ba la'oroma'ö khönia nukha andrö, awö lembe, nifazökhi Doreka andrö, me so ia khöra.
40 Ba ifofanö ira baero fefu Fetero, ibalöduhini tou zalo, mangandrö; ba ibali'ö ia ba mboto zi mate andrö, imane: Faoso, Tabita!
Ba ifehaga ia, ba me i'ila Wetero, ba mudadao ia.[25]
41 Ba i'oro'ö khönia danga, ifazizio.
Ba humede ia ba ni'amoni'ö ba ba lakha mbanua andrö, ba i'oroma'ö khöra, no auri.
42 Ba terongo ba mbanua Yofe, fefu, ba ato zamati khö Zo'aya.[26] 43 Ba ara Wetero ba Yofe, tome Zimoni tuka guli zaŵi.
Famotokhi ba gahe
[edit | edit source]- ↑ Faigi 8:3
- ↑ Ayati 2—9: Faigi 22:4—10; 26:9—18
- ↑ Mat 25:40,45; Luk 22:31
- ↑ KorI 15:8
- ↑ Faigi 2:37
- ↑ Faigi 22:9
- ↑ Ayati 10—19: Faigi 22:12—16)
- ↑ Faigi 21:39
- ↑ Faigi 3:2; 22:21; 26:2; 27:24; Rom 1:1,5; TimI 2:7
- ↑ Faigi 20:23; KorII 11:23 b.t.; TimII 3:11
- ↑ Faigi 8:17
- ↑ Gal 1:13
- ↑ Faigi 18:28; Yoh 4:42
- ↑ Faigi 23:12
- ↑ KorII 11:32 b.t.
- ↑ Gal 1:18 b.t.
- ↑ Faigi 4:36
- ↑ Faigi 22:17 b.t.
- ↑ Faigi 11:25
- ↑ Yud 20; Yoh 14:16
- ↑ Faigi 8:14
- ↑ Faigi 3:6; Mat 9:6
- ↑ Yes 35:2
- ↑ Faigi 10:2
- ↑ Mar 5:40,41; SalI 17:19 b.t.
- ↑ Yoh 10:42
Fabaliŵa lala
[edit source]Olayama Zura Halöŵö Zinenge: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö