Jump to content

Wb/nia/Halöŵö Zinenge/21

From Wikimedia Incubator

Moloyo Waulo isaŵa Yeruzalema[edit | edit source]

I. 1 Ba me no ma'efa'ö ndra'aga khöra, ba moloyo ndra'aga, madölöga ba Go, ba mahemolu ö, ba marugi Rodo, ba moroi ba da'ö, ba masaŵa Watara. 2 Ba me masöndra nowo, si möi ba Wönikia, ba möiga yaŵa ba moloyoga. 3 Ba me oroma khöma Gifero, ba maröi ba gabera ba masaŵa Ziria, marugi si tou Diro; ba da'ö sa labokai nösi nowo.

4 Ba me falukhaga nifahaö, ba tebatoga ba da'ö, fitu bongi. Ba laŵa'ö khö Waulo, moroi ba Geheha ni'amoni'ö, böi möi ia misi yaŵa, ba Yeruzalema.[1]

5 Ba me no fitu bongima, ba mahetaga, mofanöga, lafasaoga, dozi ira, awö ndra alawe, awö ndraono, irugi baero mbanua; ba mabalöduhini tou danö, baene, mangandröga.[2] 6 Ba fabaliga, ba möiga baowo, ba ya'ira, ba lafuli ira miyomo.

7 Ba ma'asiwai woloyo, ma'otarai ba Diro, masaŵa Wetolema'i, ma'owai dalifusö, ba ma'iagö khöra, sara wongi.

8 Ba mahemolu ö, ba mofanöga, ba marugi Kaizaria. Ba möiga yomo khö Wilifo, sangombakha andrö, awö zi dafitu no, ba tebatoga khönia. 9 Ba so nononia, öfa, ono alawe, sama'ele'ö.[3]

Fama'ele'ö Nagabo[edit | edit source]

II. 10 Ba me ara ma'ifu ndra'aga, ba da'ö, ba so moroi si yaŵa ba Yudaia zama'ele'ö, Agabo döi.[4] 11 Ba möi ia khöma, ihalö mböbö talu Waulo, iböbö gahenia, awö dangania, ba imane: Da'ö niŵa'ö Geheha ni'amoni'ö: Lamanö dania wamöbö niha sokhö böbö talu andre niha Yehuda, ba Yeruzalema, ba latou'ö ba danga niha baero.[5]

12 Ba me marongo da'ö, ba mangandrö ndra'aga khö Waulo, awö mbanua da'ö, böi möi ia misi yaŵa, ba Yeruzalema.[6]

13 Ba itema lima Faulo, imane: Hadia khömi da'ö, wa mege-ege ami, wa mibusi dödögu? No aoha manö sa gölögu, tenga ha ba wame'e niböbö ya'o, ba wa'amate göi, ba Yeruzalema, na börö döi Zo'aya, Yesu.

14 Ba me lö i'o'ö khöma, ba lö'ö sa'ae muhedega, mamane: Ya'itörö zomasi Zo'aya.

Irugi Yeruzalema[edit | edit source]

III. 15 Ba me aefa da'ö, ba mafa'anö ndra'aga, ba möiga misi yaŵa ba Yeruzalema. 16 Ba möi awöma nifahaö, banua Kaizaria, ösa, solohe ya'aga ba zi möiga tome, khö Menaso, banua Gifero, nifahaö si no ara.

17 Ba me no marugi Yeruzalema, ba omuso dödö dalifusö, me no soga.

18 Ba mahemolu ö, ba i'ohega Faulo, we'amöi khö Yakobo, ba ahori so zatua.[7] 19 Ba me no i'owai ira, ba izara-zara wangombakha, he iwisa Lowalangi ba niha baero, ba halöŵönia andrö.

20 Ba ya'ira, me larongo, ba lasuno Lowalangi, ba lamane khönia: ö'ila ga'a, ha wa'oya ngahönö zi no mamati, ba oi la'o'ö sibai goroisa.[8] 21 Ba no te'ombakha'ö khöra, ba khömö andrö, öŵa'ö ba niha Yehuda fefu, si fatewu ba niha baero, la'erogö Moze; öŵa'ö khöra, böi laboto nonora, ba böi la'o'ö gamakhoita andrö.[9] 22 Ba he wisa ia? Lö fulitö, ato zowulo dania; larongo sa, wa no so'ö.

23 Ba o'ö da'e, niŵa'öma khöu: Daöfa khöma niha si so amabu'ula li, 24 khöra ha ya'ira, mifao da'ö, fahaogö'ö ndra'ugö, awöra, ba taha gahakhöŵa khöra, ena'ö lafatöwö'ö ira, ba la'ila mötö dozi, wa no faya ni'ombakha'ö khöra, ba khömö andrö, ba ötörö sa, ba khömö göi, lala wolo'ö oroisa.[10] 25 Ba ba zamati niha baero andrö, ba no mafa'ohe'ö zura, no mahonogöi, böi lababaya gö nadu ba do ba nitögi bagi ba fohorö.[11]

26 Ba ihalö awönia niha andrö Faulo, ba mahemolu ö, ba möi ia ba gosali, me no ifahaogö'ö ia, awöra, i'ombakha'ö wa'awai mbongi wangehao andrö, irugi tedozigö ira wame'e sumange andrö.[12]

Labözi ia ira niha Yehuda ba lakuru ia ira niha Roma[edit | edit source]

IV. 27 Ba me arakha irugi zi fitu bongi andrö, ba la'ila ia ba gosali niha Yehuda, banua Azia, ba la'ekhugö niha sato fefu, ba lara'u ia, 28 mu'ao ira, lamane: He ya'ami, Iraono Gizeraeli, milului! da'e niha andrö, sondrozigö niha, gofu heza so ira, wamahaö ya'ira; bö'ö wamahaönia, bö'ö ba khöda, ba oroisa, ba ba naha andre. Ba no i'ohe na göi Ndrawa Heleni ba gosali, ra'iö naha ni'amoni'ö andre ibe'e.[13]

29 So zangila mege Terofimo, banua Nefeso, awönia ba mbanua, ba lawai ni'ohe Waulo ba gosali.[14]

30 Ba maoso dödö niha, samba banua manö, aekhu niha, ba lara'u Waulo, lasöbi ia baero gosali, ba la'okusi'ö bawandruhö. 31 Ba labunu ia ena'ö, ba terongo si yaŵa khö gumandra zi hönö, ba zaradadu andrö, no fawuka Yeruzalema, samba banua manö.

32 Ba i'anema'ö ihalö khönia zaradadu ba kumandra zi otu, isaŵa si tou khöra, fagohi.

Ba me la'ila gumandra andrö, awö zaradadu andrö, ba labato wamözi-mözi Faulo.

33 Ba irugi kumandra, ihalö ia, iŵa'ö, larate ia, dua rozi rate, ba isofu, ha niha ia ba hadia nilaunia.[15] 34 Ba bö'ö niŵa'ö zi samösa, bö'ö niŵa'ö zi samösa, ba niha sato andrö. Ba me tebai irongo zi ndruhunia, ba wagua-guasa andrö, ba iŵa'ö, la'ohe ba hati.

35 Ba me irugi nora, ba tobali la'osa'ö ia saradadu ba wa'abölö niha.

36 La'o'ö sa niha sato, mu'ao ira: Nitibo'ö ia![16]

37 Ba me la'ohe ba hati ena'ö Waulo, ba imane khö gumandra: Tola uŵa'ö khöu da'e?

Ba imane: ö'ila li Heleni?

38 Tenga sa Dawa Miserayi andrö ndra'ugö, sangekhugö niha, bohou na no andrö, solohe misa ba danö si mate si öfa ngahönö niha, sange'e andrö?

39 Ba imane Faulo: Niha Yehuda ndra'odo, banua Dareso, banua si teturia, ma'ifu, ba Gilikia. Ba u'andrö khöu, tehe khögu wehede ba niha.[17]

40 Ba me no itehe, ba i'agö mbosi nora Faulo, ifazaŵa dangania ba niha. Ba me no ahono sibai, ba muhede ia khöra, ba li Heberaio, imane:[18]

Famotokhi ba gahe[edit | edit source]

  1. Faigi 11:12; 20:23
  2. Faigi 20:36
  3. Faigi 2:17
  4. Faigi 11:28
  5. Faigi 20:23
  6. Mat 16:22
  7. Faigi 15:13; Gal 1:19
  8. Faigi 15:1
  9. Faigi 16:3; Rom 10:4
  10. Faigi 18:18
  11. Faigi 15:20,29
  12. MozIV 6:13,14
  13. Faigi 6:13,14; Hez 44:7
  14. Faigi 20:4; TimII 4:20
  15. Faigi 20:23
  16. Faigi 22:22; Luk 23:18
  17. Faigi 9:11
  18. Faigi 12:17; 13:16; 19:33

Fabaliŵa lala[edit source]

Olayama Zura Halöŵö Zinenge: 12345678910111213141516171819202122232425262728

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö