Wb/nia/Halöŵö Zinenge/27
Lafoloyo Waulo la'otarai Kaizaria larugi Melite[edit | edit source]
I. 1 Ba me no muhonogöi, moloyo ndra'aga ba Gitalia,[1] ba labe'e Waulo, awö nikuru tanö bö'ö ösa, ba danga gumandra zi otu, Yulio döinia, kumandra zaradadu andrö khö kaizaro.[2]
2 Ba möiga ba nowo Gaderamiti, sedöna moloyo ba mbanua Azia[3] misa, ba moloyoga; awöma Garisaro, banua Makedonia, banua Desalonika.[4]
3 Ba mahemolu ö, ba marugi Zidona. Ba ebua dödö Yulio khö Waulo, fahuo-huo ia khönia, itehe khönia möi ia khö zi fahuwu khönia ba latolo-tolo ia.[5]
4 Ba aefaga ba da'ö, ba matörö tou Gifero, me angi moroi föna. 5 Ba me no matörö nasi tanö ba Gilikia ba tanö ba Wambilia, ba marugi si tou Mira, ba Likia.
6 Ba da'ö isöndra kumandra andrö nowo Alesandria, sanaŵa Italia, ba i'ohega ba da'ö. 7 Ba me ara lö sökhi-sökhi woloyo, me afökhö wondrugi Kenido, me lö ibe'ega angi, ba matörö tou Gereta, tanö ba Zalomone. 8 Ba afökhö wanörö singa hulo, ba marugi naha sotöi "labua si sökhi", ba zahatö banua Lasaia.
9 Ba no ara, ba no ata'u niha woloyo, me no aefa göi mbaŵa wamoni, ba ifangelama ira Faulo,[6] 10 imane khöra: He ya'ami, u'ila, göna ita famakao ba fa'ate'ala sebua ba woloyo andre, tenga ha ba nowo ba ba nösinia, ba nosoda göi.
11 Ba ifondrondrongo kumandra niŵa'ö durumudi,[7] awö niŵa'ö nakoda,[7] moroi ba niŵa'ö Waulo. 12 Ba lö sökhi labua andrö, ba wombaloi fa'aefa mbaŵa deu, ba ato zomasi ahetaga ba da'ö, ma tola marugi Wönika, ba wombaloi fa'aefa mbaŵa deu; labua ba Gereta da'ö, tanö ba gaekhula. 13 Ba me angi moroi raya, si lö abölö-bölö, ba lawai tola niŵa'öra andrö, ba ladöni zao ba lahatö'ö ira, wanörö singa Gereta.
Bade ba fa'aboto nowo[edit | edit source]
II. 14. Ba lö ara, ba ilabu tawuyu nangi, sotöi timu kaduo. 15 Ba göna ba nowo ba tebai ilaŵa nangi, ba maböhöli, ba te'oloi'ö manö ndra'aga.[8]
16 Ba me matörö hulo side-ide, sotöi Kalauda, ba ma'ifu tö, ba tebai masöbi dundraha. 17 Ba lasöbi yaŵa da'ö, ba lafake wangaro andrö, laböbö nowo. Ba ata'u ira tosake ba goso ene andrö, ba labunu loyo, ba te'oloi'ö manö nowo. 18 Ba me iforege khöma angi, ba mahemolu ö, ba latibo'ö nösi nowo. 19 Ba dua wongi aefa da'ö ba latibo'ö gama-gama ba nowo tangara.[9] 20 Ba me ara lö oroma luo ba lö oroma ndröfi, ba me iforege bade sabölö-bölö, ba ma'ifu lö'ö sa'ae madöna-döna auri ndra'aga.
21 Ba me no ara lö si manga, ba möi khöra Waulo, imane: He ya'ami fefu, ni'o'ö sa mena'ö niŵa'ögu no, fa böi aheta ita ba Gereta, fa lö göna ita famakao andre, awö wa'ate'ala andre. 22 Ba iada'e, ba u'andrö khömi, böi mibusi dödömi, lö'ö sa tekiko ami, ha niha ami, ha owo zafufu dania. 23 Noa sa möi khögu me owi mala'ika Lowalangi andrö, sokhö ya'o, ba si no möido enoni göi,[10] 24 ba no imane khögu: Böi ata'ufi, Faulo, lö tola lö örugi kaizaro, ba hiza, no ibe'e bualania khöu Lowalangi fefu nawöu soloyo.[11] 25 Andrö, böi mibusi dödömi, ya'ami fefu! Faduhu sa dödögu khö Lowalangi, itörö, si mane niŵa'ö khögu. 26 Ba lö'ö sa tola lö tosake ita ba hulo.[12]
27 Ba me no fele'öfa bongi sa'ae te'oloi'ö manö misa ndra'aga ba nasi Aderia, ba talu mbongi, ba laŵa'ö ono nowo, te ahatö danö. 28 Ba lalau wanu'a wa'abakha, ba dua wulu ngaröfa. Ba me no moloyo ma'ifu tö, ba lafuli lalau, ba felelima ngaröfa. 29 Ba ata'u ira, ma tosake ba gara, ba latibo'ö zao moroi ba gi'o nowo, öfa, ba omasi ira, na moluo.
30 Ba la'alui ono nowo woloi moroi ba nowo, ladada ba nasi dundraha, fanguma'öra latibo'ö zao, moroi ba mbagi nowo; 31 ba imane Faulo khö gumandra andrö ba ba zaradadu andrö: Na aheta da'ö ba nowo, ba tebai auri ami. 32 Awena la'eŵa daŵi-taŵi dundraha saradadu, la'ekhugö si tou.
33 Ba gasa-gasa wa'amoluo, ba ifarou dödöra fefu Faulo, ba wemanga göra, imane: No fele'öfa bongi ma'ökhö mombalo-mbaloi ami, ba lö si manga, ma'ifu lö ni'ami.[13] 34 Andrö u'andrö khömi, mi'a gömi, fangorifimi sa da'ö; sara mbu sa lö'ö ba högömi fefu saekhu.[14]
35 Ba me aefa iŵa'ö da'ö, ba ihalö roti, i'aohasi gölö Lowalangi, fönara fefu, iboboto ba ibörötaigö manga.[15]
36 Awena terara dödöra fefu ba la'a göi göra.
37 Ba dua ngaotu a fitu ngafulu a önö ndra'aga fefu ba nowo andrö.
38 Ba me no abuso ira öra, ba lakaohasi nowo, latibo'ö si tou mbalazo, ba nasi. 39 Ba me moluo, ba lö la'ila watahögö danö andrö. Ba la'ila zadöni asi, si so ene, ba mamagölö ira, ba da'ö ladölö nowo, na tola.
40 Ba la'eŵa zinali zao, laröi ba nasi, ba fao ba da'ö göi latoto'ö mböbö gamuri andrö, lataŵi loyo sabu, tanö ba nangi ba la'angamurisi baene nowo. 41 Ba me göna ba dure, ba lasakeni, ba tetaru sa mbagi, lö maliŵa-liŵa, ba aboto gi'o ba wa'abölö ndrulu.[16]
42 Ba mamagölö zaradadu, ba wamunu nikuru andrö, fa böi moloi, na so zolangi, sanaŵa ene ena'ö.[17] 43 Ba edöna i'orifi Waulo kumandra andrö, ba itenaŵa ira, ba iŵa'ö, oföna latibo'ö ira ba nasi sangila molangi, 44 ba wogamö tanö, ba tanö bö'ö, ba ba wafa ösa ba ba gamotola nowo ösa. Ba tobali ahori auri ira ba zi manö, lakhamö danö.
Famotokhi ba gahe[edit | edit source]
- ↑ Italia no sambua danö si so negara Italia ma'ökhö, heŵa'ae lö faudu fagölö wa'ebolora.
- ↑ Faigi 25:12,21
- ↑ Azia eluahania tanöa Asia
- ↑ Faigi 19:29
- ↑ Faigi 24:23
- ↑ KorII 11:26; MozIII 23:27 b.t.
- ↑ 7.0 7.1 Itaria lafagölösi durumudi ba nakoda niha, bahiza no fabö'ö ira. Lafotöi durumudi (li Indonesia "juru mudi") zamofanö köfa, si sindro ba solohe amuri (li Indonesia "kemudi"). Ba li Inggris lakaoni ia "pilot". Lafotöi nakoda (li Indonesia "kapten kapal") niha si tobali högö zi sambua göfa. Ya'ia zangai angetula ba göfa ba khönia lafondrondrongo ya'ira sohalöŵö ba göfa, fao ba da'ö durumudi.
- ↑ Sin 107:25 b.t.
- ↑ Yon 1:5
- ↑ Faigi 5:19
- ↑ Faigi 23:11; 9:15
- ↑ Faigi 28:1
- ↑ Sin 102:5
- ↑ Luk 21:18
- ↑ Mat 14:19
- ↑ KorII 11:25
- ↑ Faigi 16:27
Fabaliŵa lala[edit source]
Olayama Zura Halöŵö Zinenge: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö