Wp/rki/ရခိုင်အမျိုးသားနိ

ရခိုင်အမျိုးသားနိ

ရခိုင်အမျိုးသားနိArakan National Day ကို ကဆုန်လပြည့်ကျော် ၁ ရက်နေ့အဖြစ် ၂၀၁၄ ခုနှစ်က ကျောက်ဖြူမြို့တွင် ကျင်းပပြုလုပ်ခရေ ရခိုင်အမျိုးသားညီလာခံမှ သတ်မှတ်အတည်ပြုလုပ်ခြင်းဖြစ်ပြီးကေ ၂၀၁၄ ခုနှစ်တွင် ပထမဆုံးအကြိမ်အဖြစ် ကျင်းပခကာ ယင်းနိမှာ မဟာမုနိဘုရားကို သွန်းလုပ်ပြီးစီးရေ နိလည်းဖြစ်ပါရေ။

ရခိုင်အမျိုးသားနိ အခမ်းအနားကို ရခိုင်ပြည်နယ်ဟိ မြို့နယ်တိအပါအဝင် ရန်ကုန်နန့် တစ်ခြားပြည်ပ နိုင်ငံတစ်ချို့တွင်လည်း ကျင်းပကြပါရေ။ “ရခိုင်အမျိုးသားနေ့ကို ကျင်းပရတဲ့ရည်ရွယ်ချက်ကတော့ ရခိုင်တိုင်းရင်းသား အချင်းချင်း တစ်ယောက် ကိုတစ်ယောက် လေးစားအောင် တစ်ယောက်ကိုတစ်ယောက် ယုံကြည်မူရရှိအောင် ရခိုင်ရိုးရာယဉ်ကျေးမူများ သိရှိစေရန်အတွက် ကျင်းပရခြင်းဖြစ်တယ်”ဟု ဦးဇော်အေးမောင်က ပြောပါရေ။

ရခိုင်လူမျိုး

၁။ ရခိုင်ဒေသတွင် ကျောက်ကြမ်းခေတ်ဟိ မဟိ မသိရသိမ်းကေလည်း ကျောက်လယ်ခေတ်နန့် ကျောက်ချောခေတ် ယဉ်ကျေးမှုဟိကြောင်းကိုမူ အထောက်အထားတိအရ သိဟိရပါရေ။ ကျောက်လယ်ခေတ်နန့် ကျောက်ချောခေတ် ပစ္စည်းတိကို ရခိုင်ပြည်မြောက်ပိုင်းနန့် ရခိုင်ပြည်တောင်ပိုင်းနီရာ အနှံ့အပြားတွင် တွိ့ဟိရပါရေ။ မြေပြင်မှာသာမက လယ်ထွန်မြေဆွ ပြုလုပ်ရာမှလည်း တူးဖော်ရဟိခကြပါရေ။ ၎င်းကို `မိုးကြိုးပေါက်ဆိန်'ဟု ခေါ်တွင်ကြောင်း ရခိုင်ပြည် ပြည်သူ့ကောင်စီက ပြုစုရေ သမိုင်းတွင် ဖော်ပြရေ'ဟု ရခိုင်သမိုင်းအလင်းပြကျမ်း (ဆရာကြီးဦးရွှေဇံ)က ဖော်ပြပါရေ။ ရခိုင်လူမျိုးရေ BC ၄၀၀၀ ခန့်ကာလကပင် ဖြစ်ထွန်းပေါ်ပေါက်လာရေ လူမျိုးတစ်မျိုးဖြစ်ရေ။ ဒွါရာဝတီခေတ်၊ ပထမဝေသာလီခေတ်တိ ထွန်းကားခပြီး။ ပထမဓညဝတီခေတ်၊ ဒုတိယဓညဝတီခေတ်၊ တတိယဓညဝတီခေတ်၊ ဝေသာလီခေတ်၊ လေးမြို့ ခေတ်နန့် မြောက်ဦးခေတ်တိအဖြစ် အင်ပါယာနိုင်ငံတော်တိ ပေါ်ပေါက်ခရေ။ တတိယဓညဝတီခေတ် ဘုရင် စန္ဒသူရိယမင်းကြီးလက်ထက်မှစပြီးကေ ထေရဝါဒဗုဒ္ဓသာသနာတော်ကို ယုံကြည်သက်ဝင်ခကြပြီး ဝေသာလီခေတ်နန့် လေးမြို့ ခေတ်ရို့တွင် သင်္ဂါယနာ(၁)ကြိမ်စီ တင်တော်မူခကြရေ။ အမျိုးသားနိုင်ငံရီး ထွန်းကားပြီး စီးပွားရီး လူမှုရီးနန့် ယဉ်ကျေးမှ ဘာသာသာသနာရီးတိမှာ အိမ်နီးချင်း မဇ္ဈိမဒေသ-အိန္ဒိယနန့် သီဟိုဠ်(သီရိလင်္ကာ)နိုင်ငံရို့နန့် ကူးလူးဆက်ဆံမှုတိ တွင်တွင်ကျယ်ကျယ်ဟိခရေ။ ရခိုင်လူမျိုးနန့် ဗုဒ္ဓဘာသာ သာသနာတော်ရေ ဒင်္ဂါးပြားတစ်ခုဧ့ ခေါင်းနန့် ပန်းနှယ် ဖြစ်၍တည်ဟိနေပါရေ။

ရခိုင်အမျိုးသားနိ

၂။ ကမ္ဘာပေါ်တွင် လွတ်လပ်ရေ လူမျိုးအသီးသီးတွင် မိမိရို့လူမျိုးဂုဏ်ကို ဖော်ဆောင်နိုင်ရန် နိထူးနိမြတ်တိ သတ်မှတ်လျက် အောင်ပွဲသဘင်တိကို နှစ်စဉ်ကျင်းပလေ့ဟိကြပါရေ။ ယင်းနိရက်တိမှာ - အမျိုးသားနိ(National Day)၊ လွတ်လပ်ရီးနိ(Independence Day)၊ နိုင်ငံထူထောင်ရေနိ(Founding Day)နန့် ဘုရင်မွေးနိ(Birthday of the King)ရို့ ဖြစ်ပါရေ။ လွတ်လပ်ရီးနိကို နိုင်ငံလွတ်လပ်ရီးဆုံးရှုံးခံရဖူးသူတိုင်း၌ တွိ့ရပါရေ။ နိုင်ငံထူထောင်နိကို စနစ်တစ်ခုက အခြားစနစ်တစ်ခုသို့ ပြောင်းလဲ ထူထောင်ရေအခါမှာ ကျင်းပပါရေ။ အမျိုးသားနိကိုမူ သမိုင်းအစဉ်အလာကြီးမား ရှည်လျားရေ လူမျိုးတိတွင် တွိ့ရပါရေ။ အထူးသဖြင့် နှစ်ပေါင်း ၃၀၀၀ မှ ၅၀၀၀ အထိ ရှည်ကြာလာခရေ ရခိုင်လူမျိုးအတွက် ယင်းပိုင့်ရေ နိရက် တစ်ရက်ကို မဖြစ်မနေလိုအပ်လာခြင်းဖြစ်ပါရေ။ လက်ဟိအားဖြင့် ကမ္ဘာ့နိုင်ငံ(၃၀)တွင် အမျိုးသားနိ သတ်မှတ်ကျင်းပလျက်ဟိနီပိုင် မြန်မာနိုင်ငံမှာလည်း မြန်မာနိုင်ငံအမျိုးသားနိ၊ သျှမ်းအမျိုးသားနိ၊ မွန်အမျိုးသားနိ၊ ချင်းအမျိုးသားနိရို့ကို ကျင်းပနေရေကို တွိ့ရပါရေ။

စစ်တွေပညာသျှင်တိစတင်

၃။ ရခိုင်အမျိုးသားနိ သတ်မှတ်ရန်အတွက် စစ်တွေမြို့ တွင် သမိုင်းပညာသျှင်တိပါဝင်ရေ ရဟန်းသျှင် လူအဖွဲ့က ၂၀၁၃-ခု မတ်လ ၈ ရက်နိမှာ သတင်းထုတ်ပြန်ချက် အမှတ်(၁) ထုတ်ပြန်ပြီး ရခိုင်ပြည်အတွင်းမှ လူထုပရိသတ်တိဧ့ သဘောထား အကြံဉာဏ်တိပီးပို့ကြရန် တောင်းခံခပါရေ။ တောင်းခံချက်အရ ဘာသာရီးနန့် ဆက်နွှယ်ရေနိ(၅)ရက်၊ နိုင်ငံရီးနန့် ဆက်နွှယ်ရေနိ(၁၃)ရက်၊ စစ်ရီးနန့် ဆက်နွယ်ရေနိ(၃)ရက်၊ နက္ခတ် ဗေဒင် ဘိသိက်နန့် ပတ်သက်နေရေနိ(၁)ရက် စရေ အကြံပြုစာစောင်(၂၇)စောင်နန့် နှုတ်ဖြင့် အကြံပြုချက် အတိအပြားကို ရဟိခပါရေ။ ယင်းအထဲမှ အကြံပြုချက်(၂၂)ရက်ကို ရွေးထုတ်ခကြပါရေ။ အသေးစိပ်ကို တင်ပြရဖို့ဆိုကေ-

(က) ဘာသာရီးနန့် ဆက်နွှယ်ရေနိရက်

(၁) ဂေါတမဘုရားသျှင် အိန္ဒိယနိုင်ငံ ရာဇဂြိုဟ်ပြည် ဝေဠုဝန်ကျောင်းတော်မှနေ၍ ရခိုင်ပြည်သို့ ကြွချီတော်မူလာရေနိ (BC-၅၆၉-ခု၊ အဉ္ဇနဖြိုကြွင်း မဟာသက္ကရာဇ် ၁၂၃-ခု၊ ကဆုန်လဆန်း ၈ ရက်)

(၂) စန္ဒသူရိယဘုရင်လက်ထက် ဘုရားသျှင် ဓညဝတီသို့ကြွလာပြီး မဟာမုနိကိုယ်တော်မြတ်ကို သွန်းလုပ်ပြီးစီးစေကာ ရခိုင်တစ်မျိုးသားလုံး ဗုဒ္ဓဘာသာ စ,ဖြစ်စေရေနိ (BC-၅၆၉-ခု၊ အဉ္ဇနဖြိုကြွင်း မဟာသက္ကရာဇ် ၁၂၃-ခု၊ ကဆုန်လပြည့်ကျော် ၁ ရက်၊ ကြာသပတေးနိ)

(၃) မဟာမုနိဆင်းတုတော်ကို စ,တင်သွန်းလုပ်ရေနိ (ကဆုန်လပြည့် ဗုဒ္ဓပားနိ)

(၄) မင်းဗာဘုရင် ဘင်္ဂါ (၁၂)မြို့ကို တိုက်ခိုက်သိမ်းယူပြီး ဗုဒ္ဓဂယာအနီး မဟာဗောဓိစေတီတော်မှ မြတ်ဗုဒ္ဓ ဓာတ်မွေတော် (၈၄၀၀၀)ကို ရဟိသဖြင့် ရခိုင်သို့ပင့်လာပြီး ရန်အောင်ဇေယျ သျှစ်ရေင်းပုထိုးတော်ကြီးကို စ,တည်တော်မူရေနိ (သက္ကရာဇ် ၈၉၇-ခု၊ တန်ဆောင်မုန်းလပြည့်နိ(စနေနိ)

(၅) လေးမြို့ ခေတ် မင်းထီးဘုရင်ရေ ဘင်္ဂါ(၁၂)မြို့ ကို တိုက်ခိုက်အောင်မြင်ပြီး မဟာဗောဓိစေတီကို ပြုပြင်မွမ်းမံခရေနိ (ရခိုင်သက္ကရာဇ် ၆၆၀-ခု၊ တန်ဆောင်မုန်းလဆန်း ၈ ရက်နိ)

(ခ) နိုင်ငံရီးနန့် ဆက်နွယ်ရေ နိရက်

(၁) ရခိုင်နှစ်ပါတီဖြစ်ရေ ရခိုင်တိုင်းရင်းသား တိုးတက်ရီးပါတီနန့် ရခိုင်ဒီမိုကရေစီအဖွဲ့ချုပ်ရို့ ရခိုင်အမျိုးသား ညီညွတ်ရီးကို စံနမူနာပြအဖြစ် ပေါင်းစည်းခကြရေနိ (၆-၃-၂၀၁၄ ကြာသပတေးနိ)

(၂) မင်းစောမွန် မြောက်ဦးမြို့ ကို စ,တင်တည်ရေနိ (ရခိုင်သက္ကရာဇ် ၇၉၂-ခု၊ တောသလင်းလဆန်း(၁)ရက်နိ၊ တနင်္ဂနွေနိ)

(၃) အင်္ဂလိပ်ခေတ် ရခိုင်တိုင်းလုံးဆိုင်ရာ အစည်းအရုံး ဖွဲ့စည်းရေနိ (၁၉၃၉-ခု၊ မေလ ၂ ရက်)

(၄) ဖဆပလခေတ် ရတညပါတီ တည်ထောင်ရေနိ ( - - - - - - - - )

(၅) ဆရာတော် ဦးဥတ္တမ မွေးဖွားရေနိ (၁၈၇၉-ခု၊ ဒီဇင်ဘာလ ၂၈ ရက်)

(၆) မြေပုံကြာအင်းတောင် ညီလာခံကျင်းပရေနိ (၁၃၀၉-ခု၊ တန်ခူးလဆန်း ၁၃ ရက်/ ၁၉၄၇-ခု၊ ဧပြီလ ၃ ရက်)

(၇) OIC ကို ပြည်နယ်တစ်ခုလုံး အတိုင်းအတာဖြင့် ကန့်ကွက်ဆန္ဒပြရေနိ (၂၀၁၂-ခု၊ နိုဝင်ဘာလ ၁၅-ရက်)

(၈) ရသေ့တောင်ညီလာခံ ကျင်းပရေနိ ( -)

(၉) ဝေသာလီမြို့ကို မဟာတိုဉ်းစန္ဒြားမင်း တည်ထောင်တော်မူခရေနိ (သက္ကရာဇ် ၁၅၂-ခု၊ ကဆုန်လ)

(၁၀) စန္ဒသူရိယဘုရင်ကြီးမွေးနိ (မဟာသက္ကရာဇ် ၇၂-ခု၊ ပြာသိုလ်လပြည့်နိ)

(၁၁) ရခိုင်ဘုရင် မင်းခရီနန့် အင်းဝဘုရင်ရို့ ဖိုးခေါင်တောင်တွင် ငြိမ်းချမ်းရီးနန့် အချုပ်အချာ အာဏာ နယ်နိမိတ် ပိုင်းခြားသတ်မှတ်ရေနိ (သက္ကရာဇ် ၈၁၆-ခု၊ တန်ခူးလဆန်း ၆ ရက်၊ တနင်္လာနိ)

(၁၂) ရခိုင်တိုင်းနိုးကြား၍ အစည်းအရုံးကိုဖျက်၍ ရခိုင်တိုင်းရင်းသား အစည်းအရုံးကြီးကို စ,တင်ရေနိ (၁၉၃၉-ခု၊ မေလ ၂ ရက်နိ)

(၁၃) ၁၇၈၄-ခုနှစ်၊ ဒီဇင်ဘာလ ၃၁ ရက်၊ ရခိုင်နိုင်ငံ ကျဆုံးနိ (ဥဩရေရေက်/ လ,လည်းကွယ် ပြည်လည်းဆုံး/ ၁၁၄၆- ခု၊ ပြာသိုလ်လကွယ်နိ)

(ဂ) စစ်ရီးနန့် ဆက်နွှယ်ရေ နိရက်

(၁) ပေါ်တူဂီရေတပ်ကို ဘင်္ဂလားပင်လယ်ပြင်တွင် ရခိုင်တပ်မှ ချေမှုန်း အောင်မြင်ရေနိ ( - - -)

(၂) ဘုရင် မင်းဗာကြီးလက်ထက် ဘင်္ဂါ ၁၂ မြို့ကို သိမ်းပိုက်ရန် အောင်တပ် ထွက်တော်မူရေနိ ( - - - ---)

(၃) ရခိုင် လောင်းကြက်မြို့ ထီးနန်းကို မင်းစောမွန် ပြန်လည်သိမ်းပိုက်ရေနိ (AD ၁၄၂၉-ခု၊ ကဆုန်လပြည့်ကျော် ၁ ရက်၊ ကြာသပတေးနိ) (နံပါတ်(၂)နန့်တူ)

(ဃ) နက္ခတ်ဗေဒင် ဘိသိက်နန့် ပတ်သက်ရေနိရက်

မင်းဗာဘုရင် ဘိသိက်ခံရေနိ (ကဆုန်လဆန်း ၅ ရက်)

၄။ ယင်းကော်မတီကပင် အစည်းအဝေး ၇ ကြိမ်တိုင်တိုင် ပြုလုပ်ပြီး မူဝါဒ ၁၀ ရပ် ချမှတ်ကာ အပြီးသတ် စိစစ်လျာတားရေ နိရက် ၄ ရက်ကို အမျိုးသားညီလာခံ (ကျောက်ဖြူ)သို့ ပီးပို့ခပါရေ။

(က) ရခိုင်ဘုရင် မင်းခရီနန့် အင်းဝဘုရင်ရို့ ဖိုးခေါင်တောင်တွင် ငြိမ်းချမ်းရီးနန့် အချုပ်အချာ အာဏာ နယ်နိမိတ် ပိုင်းခြားသတ်မှတ်ရေနိ (တန်ခူးလဆန်း ၆ ရက်)

(ခ) ရခိုင်ခေတ်သစ်တစ်ခုတွင် ရခိုင်အမျိုသားတစ်ရပ်လုံး၊ မြေပေါ် မြေအောက် နိုင်ငံရီးအင်အားစုအားလုံး စုစည်းမိရေနိ (ရခိုင်အမျိုးသားညီလာခံ-ကျောက်ဖြူ စ,တင်ကျင်းပရေနိ၊ သို့မဟုတ် ပြီးစီးရေနိ - ဧပြီလ ၂၇ ရက်၊ ၂၀၁၄/ ၁၃၇၆-ခု၊ တန်ခူးလပြည့်ကျော် ၁၃ ရက်)

(ဂ) ဂေါတမဗုဒ္ဓ ရခိုင်ပြည်သို့ ကြွရောက်တော်မူရေနိ (ကဆုန်လဆန်း ၈ ရက်)

(ဃ) ရခိုင်ပြည်လုံးဆိုင်ရာ ကျူးကျော်ဘင်္ဂလီ အမည်လိမ်တိုက်ဖျက်ရီး ရခိုင်တစ်မျိုးသားလုံး ပါဝင်ရေ ကော်မတီမှ ဦးဆောင်၍ သဗိတ်တိုက်ပွဲကို အောင်မြင်စွာ ဆောင်ရွက်နိုင်ရေနိ (မတ်လ ၃၀ ရက်၊ ၂၀၁၄-ခု/ ၁၃၇၅-ခု၊ တပေါင်းလပြည့်ကျော် ၁၅ ရက်)

စာတမ်းလက်ခံ စိစစ်ရီးကော်မတီ (ရန်ကုန်)

၅။ ရခိုင်အမျိုးသားညီလာခံ(ကျောက်ဖြူ)ဧ့ စာတမ်း လက်ခံစိစစ်ရီးကော်မတီ(ရန်ကုန်)ရေ ရခိုင်အမျိုးသားတိထံမှ အကြံဉာဏ်တိကို တောင်းခံရာတွင် လူပုဂ္ဂိုလ်တစ်ဦးချင်း အကြံဉာဏ် ၂ စောင်ကိုရဟိခပြီး ရခိုင်အမျိုးသားနိ သတ်မှတ်ရီး ကြိုးပန်းမှုကော်မတီ(ယာယီ)(စစ်တွေ)က ယင်းအကြံပြုချက် ၄ ရက်နန့် တစ်ဦးချင်းအကြံပြုချက် ၃ စောင်ကို ပေါင်းစည်းလျက် မူဝါဒ ၁၀ ရပ် ချမှတ်ကာ စိစစ်လေ့လာပြီးနောက် ရခိုင်အမျိုးသားနိ သတ်မှတ်ရန် သင့်လျော်ရေ နိရက် လေးရက်ကို အဆိုပြုခပါရေ။ အောက်ပါနိရက်တိဖြစ်ပါရေ-

(က) မဟာမုနိ ရုပ်ရှင်တော်မြတ်ကို သွန်းလောင်းပြီးစီးရေနိ (ကဆုန်လပြည့်ကျော် တစ်ရက်)

(ခ) ဆရာတော် ဦးဥတ္တမမွေးနိ (ဒီဇင်ဘာလ ၂၈ ရက်)

(ဂ) ဘုရင်မင်းစောမွန် မြောက်ဦးမြို့ကို စ,တင်တည်ရေနိ (တော်သလင်းလဆန်း တစ်ရက်)

(ဃ) ရခိုင်ဘုရင် မင်းခရီနန့် အင်းဝဘုရင်တို့ ဖိုးခေါင်တောင်မှာ ငြိမ်းချမ်းရီးနန့် အချုပ်အချာ အာဏာ နယ်နိမိတ် ပိုင်းခြားသတ်မှတ်ရေနိ (တန်ခူးလဆန်း ၆ ရက်) ရခိုင်အမျိုးသားနိ သတ်မှတ်ရီး ကြိုးပမ်းမှုကော်မတီ

၆။ စာတမ်းလက်ခံစိစစ်ရီးကော်မတီ(ရန်ကုန်)နန့် ရခိုင်အမျိုးသားနိ သတ်မှတ်ရီး ကြိုးပမ်းမှုကော်မတီ(ယာယီ) (စစ်တွေ)ရို့ရေ ဧပြီလ ၂၇ ရက်နိတွင် တွိ့ဆုံပြီး ဦးဆောင်ကော်မတီကို တင်ပြရေအခါ ဦးကျော်စိန် ခေါင်းဆောင် ရေ ရခိုင်အမျိုးသားနိ သတ်မှတ်ရီးကြိုးပမ်းမှုကော်မတီကို ၂၇-၀၄-၂၀၁၄ ရက်စွဲဖြင့် ဖွဲ့စည်း တာဝန်ပီးအပ်ခပါရေ။ ယင်းကော်မတီရေ စိစစ်ရွေးချယ်ရီးဆိုင်ရာ မူဝါဒ ၈ ရပ် ချမှတ်လျှက် ဧပြီလ ၂၇/၂၈ နိရက်တိတွင် အစည်းအဝေး ၄ ကြိမ် ကျင်းပကာ အပြီးသတ် အဆိုပြု နိ(၃)နိကို လျာတားတင်ပြခပါရေ။ ယင်းနိ(၃)နိမှာ-

(က) မဟာမုနိရုပ်ရှင်တော်မြတ်ကို သွန်းလောင်းပြီးစီးရေနိ (ကဆုန်လပြည့်ကျော် တစ်ရက်)

(ခ) ရခိုင်ခေတ်သစ်တစ်ခုတွင် ရခိုင်အမျိုးသားတစ်ရပ်လုံး မြေပေါ် မြေအောက် နိုင်ငံရီးအင်အားစုအားလုံး စုစည်းမိရေနိ (ရခိုင်အမျိုးသားညီလာခံ-ကျောက်ဖြူ စ,တင် ကျင်းပရေနိ၊ တန်ခူးလပြည့်ကျော် ၁၃ ရက်၊ ဧပြီ ၂၇ ရက်)

(ဂ) ဘုရင်မင်းစောမွန် မြောက်ဦးမြို့တော်ကို စ,တင် တည်ထောင်ရေနိ (တောသလင်းလဆန်း တစ်ရက်နိ)ရို့ ဖြစ်ပါရေ။

မှတ်ချက်။ ၎င်းနိ(၃)နိရေ ရွေးချယ်ရီးကော်မတီနှစ်ဖွဲ့မှ နောက်ဆုံးအဆိုပြုချက်(၄)ချက်ကို သဘောတူရာပေါင်း၍ (၁။မဟာမုနိနိ ၂။ဦးဥတ္တမမွေးနိ ၃။မြောက်ဦးမြို့ တည်နိ ၄။မင်းခရီနိ ၅။ကျောက်ဖြူညီလာခံနိ ၆။OICဆန့်ကျင်နိ) နိ(၆)နိအနက် နိ(၃)နိကို မူဝါဒအရ အပြီးသတ်ရွေးချယ်ခြင်းဖြစ်ပါရေ။ . အဖယ်ခံရရေ နိရက်တိမှာ ၁။ဦးဥတ္တမမွေးနိ ၂။မင်းခရီနိ ၃။OICဆန့်ကျင်နိရို့ပင် ဖြစ်ပါရေ။

ရှင်းလင်းတင်ပြ

၇။ အထက်ပါ နိ(၃)နိကို ရဟိခပြီးနောက် ကော်မတီရေ ဦးဆောင်ကော်မတီဧ့ ကြီးကြပ်မှုဖြင့် ဆရာတော်ကြီးတိနန့် မြို့နယ်ကိုယ်စားလှယ်တိကို ချပြခပြီး မြို့နယ်အလိုက် ဆန္ဒပြုရန် နည်းစနစ်ကိုပါ ရှင်းပြခပါရေ။ ဆန္ဒပြုရမည့် အချိန်ကာလကို ဧပြီလ ၂၉ ရက်နိမှ၊ မေလ ၁ ရက်နိ မိုးထ ၉ နာရီ အချိန်အထိ သတ်မှတ်ပီးနှိုင်ခပါရေ။

ညီလာခံတွင် ကြေညာ

၈။ ရခိုင်အမျိုးသားနိ သတ်မှတ်နှိုင်ရန် မြို့နယ်တိက ပြည်လည်ပီးပို့လာရေ ဆန္ဒပြုလွှာတိကို ရွေတွက်ပြီး မေလ တစ်ရက်နိ ကျင်းပရေ ရခိုင်အမျိုးသားညီလာခံ(ကျောက်ဖြူ)သို့ တင်ပြခပါရေ။ အောက်ပါအတိုင်း ဆန္ဒမဲ ရဟိခကြပါရေ-

(က) မဟာမုနိ ရုပ်ရှင်တော်မြတ် သွန်းလောင်းပြီးစီးအောင်မြင်ရေနိကို ထောက်ခံရေမြို့နယ် ၁၂ မြို့နယ်

(ခ) ရခိုင်အမျိုးသားညီလာခံ(ကျောက်ဖြူ)ကျင်းပရေနိကို ထောက်ခံရေမြို့နယ် ၄ မြို့နယ်

(ဂ) မင်းစောမွန်ဘုရင် မြောက်ဦးမြို့တည်ထောင်ရေနိကို ထောက်ခံရေမြို့နယ် ၁ မြို့နယ်

၉။ရခိုင်အမျိုးသားညီလာခံ(ကျောက်ဖြူ)မှ “မဟာမုနိရုပ်ရှင်တော်မြတ် သွန်းလောင်းပြီးစီးအောင်မြင်ရေနိ”ကို ရခိုင်အမျိုးသားနိအဖြစ် ရွေးချယ်ကြောင်း ကြေညာခပါရေ။ . ၁၀။ မဟာမုနိရုပ်ရှင်တော်မြတ်နန့် ပတ်သက်၍ အချက်တစ်ချက်တင်ပြလိုပါရေ။ မဟာမုနိရုပ်ရှင်တော်မြတ်ကို သွန်းလုပ်တော်မူရေကာလ BC-၅၆၉-ခုကို သမိုင်းပညာသျှင်တစ်ချို့က မဖြစ်နှိုင်၊ ‘ယင်းစဉ်က ဤမျှမြင့်မားရေ ကြေးသွန်းပညာရပ်ကို မရဟိနှိုင်’ဟူရေ လက်ဟိရခိုင်လူမျိုး မွဲတေနေရေ အနီအထားကိုကြည့်ပြီး လေ့လာသုံးသပ်ကြရေကို တွိ့ရပါရေ။ . ကြေးသွန်းအတတ်ပညာရေ ဗုဒ္ဓဘုရားသျှင် မပွင့်မီ ကာလကပင် ဟိနေပြီဖြစ်ပါရေ။ ဂရိနိုင်ငံမြို့တော် အေသင်မြို့ သားရို့ဧ့ အထွဋ်အမြတ်ထားရာ နတ်ဘုရားရုပ်တုကြီးတိ။ Acropolis နတ်ဘုရားကျောင်းတိကို တောင်ထိပ်ဖျားတိတွင် စိုက်ထူထားရေကို တွိ့မြင်နေကြရပြီဖြစ်ပါရေ။ ဤအချက်ရေ ယင်းစဉ်ကပင် ကြေးသွန်းပညာ ပေါ်နေပြီဆိုရေကို ထောက်ပြနေခြင်းဖြစ်ပါရေ။ စာရီးဆရာကြီး Gorden Stowel | The book of knowledge, Vol.1နန့် ဆရာကြီး ဦးရွှေဇံ ရီးသားရေ “ရခိုင်သမိုင်းအလင်းပြကျမ်း”ရို့မှာ လေ့လာနှိုင် ကြောင်း တင်ပြလိုပါရေ။

၁၁။ ရခိုင်အမျိုးသားနိရေ . ရခိုင်အမျိုးသားတစ်ရပ်လုံးဧ့ ... လိုအပ်ချက်ကို ဖြည့်ဆည်းပီးခြင်း၊ ရခိုင်လူမျိုးဧ့ ဂုဏ်အင်္ဂါရပ်ကို ပြည့်စုံစေခြင်း ဖြစ်သဖြင့် ရခိုင်လူထုတစ်ရပ်လုံးက နှစ်စဉ် မပျက်မယွင်း ကျင်းပကြရန် တိုက်တွန်း အပ်ပါရေ။