Jump to content

Wp/rki/ကုန်းပြိုင်လောင်းပြိုင်ပွဲ

From Wikimedia Incubator
< Wp‎ | rki
Wp > rki > ကုန်းပြိုင်လောင်းပြိုင်ပွဲ

ရခိုင်ကုန်းလောင်းပြိုင်ပွဲ[edit | edit source]

ပြိုင်လောင်းဆိုပနာပြောကေ အကျွန်ရို့ရခိုင်သားတိ ရီကိုပြီးမြင်ကတ်လိမ့်မည်။

ဒေခု အကျွန်ရွီးဖို့ပြိုင်လောင်းအကြောင်းရေ ရီမာပြိုင်စာမဟုတ်၊ ကုန်းထက်မာ ထူးထူးဆန်းဆန်း ပြိုင်ခြင်းဖြစ်ရေ။

အကျွန်ဘဝတသက်မာ တခါရာ မြင်ဖူးပါရေ။

အကျွန်အသက် (၁၂) အရွယ်ခန့်မာဖြစ်ရေ။

ပေါက်တောတွင် လိုင်ရိုးတော်ဓာတ်စေတီပွဲ ကျင့်ပရေ။

ယင်းဘုရားပွဲကို နှစ်စဉ်နှစ်တိုင်းကျင့်ပပနာ စည်လည်းကကောင်းစည်ပါရေ။

လူပေါင်းထောင်သောင်းတိစွာ ပါဝင်ဆင်နွဲကတ်ပါရေ။

ထိုပွဲမာ ရခိုင်ရိုးရာယဉ်ကျေးမှုအဖုံဖုံ၊ အက၊ အားကစပ်၊ ခရမ်းသီးဇာတ် ယင်းပိုင်အစုံပါရေ။

အကျွန် ယင်းပြိုင်လောင်းအကြာင်း အသက် (၁၂) အရွယ်ခန့်ဖြစ်ပနာ လုံးစိပတ်စိမမှတ်မိပါ။

ယေကေလည်း မှတ်မိသလောက်တင်ပြလားပါမည်။

ယင်းကုန်းပြိုင်လောင်းကို ပုံဖော်ရာမာ ပုတ်၊ ဖျာ (ဝါ) ရိုင်လိပ်တိကို လောင်းပုံပိုင် ဓားနန့်ပိုင်းဖြတ်ပုံဖော်ရရေ။

အားကောင်းမောင်းသန်၊ ဖျတ်လတ်ရေ လောင်းလှော်သားတိက ဘေးတဖတ်တချက်တွင် ထိုလောင်းပုံဖော်ထားရေ ပုတ်၊ ဖျာ (ဝါ) ရိုင်လိပ်တိကို ဝါး (သို့မဟုတ်) သစ်သားဒဂုံတိနန့် ပူးချိုင်ရရေ။

ဒဂုံကွင်တိမှာ တခုနန့်တခု အကွာအဝီး (၁) ပီ (၇) လက်မလောက် အကွာဟိရေ။

လောင်းလှော်သားတိရေ ဒဂုံကွင်းတိအလယ်မာ ရပ်လျှက်အနီထားနန့် ကုန်းပြိုင်လောင်းအား ခိုင်မာရေကြိုးတိနန့် ပက်ခုံးထက်တွင် ထမ်းတင်ထားရရေ။

လောင်းတလောင်းတွင်ဦးရေ (၁၅) ယောက်မှ (၁၇) ယောက်ထိပါဝင်ရေ။

အဝီးကကြည့်ဖို့ဆိုပါကေ အလွန်လှပခန့်ငြားရေ ကုန်းပြိုင်လောင်းကြီးကိုမြင်နိုင်ရေ။

ပြိုင်လောင်းဧ့ပြင်ဘက်နံတိကိုလည်း ပန်းချီအလှတိနန့် ပုံဖော်ထားရေ။

လောင်းလှောင်းသားတိအနီထားမှာ ရီပြိုင်လောင်းပိုင် အတူတူဖြစ်ရေ။

လောင်းလှော်သားတိရေ သူရို့ဧ့လှော်တက်တိကို အားမာန်အပြည့်နန့် ကိုင်ထားကတ်ရရေ။

ပြိူင်ပွဲဝင်အသင်းတိရေ တာမထွက်ခင် တစင်းနန့်တစင်းပြိုင်တူရပ်လျှက် ဒိုင်လူကြီးအချက်ပီး ပုလီသံကို စောင့်နီကတ်ရရေ။

ရီပြိုင်လောင်းနန့် စည်ကမ်းချက်တိအတူတူဖြစ်ရေ။

ပုလီအချက်ပီးသံကြားလျှင်ကြားချင်း ပန်းတိုင်သို့ အယင်ဆုံးရောက်ရန် လှော်တက်တိကိုလှော်ပနာ ပြိုင်တူပြီးကတ်ရရေ။

အေကုန်းပြိုင်လောင်းပွဲကြည့်ရရေမှာ ရယ်ဖို့ပျော်ဖို့ကောင်းရေပိုင် အားပါဖို့လည်း ကကောင်းကောင်းပါရေ။

ကုန်းပြိုင်လောင်းရေ ရီပြိုင်လောင်းထက် အဆတရာခက်ခဲသိမ်မွိဖို့လို့ အကျွန်ထင်ရေ။

ကုန်းပြိုင်လောင်းတွင် အတိုင်ဖောက် ကကောင်းညီဖို့လိုဘာရေ လောင်းလှော်သားအချင်းချင်း အဟုန်အတူတူပြီးစာက ကကောင်းအရေးကြီးရေ။

မဟုတ်ပါက တစင်းလုံး ဂွမ်းဂွမ်းပြို လဲကျမည်ဖြစ်ရေ။

ပန်းတိုင်သို့ စပြီးရာမာ လှော်တက်တိကိုလည်း တပါတည်းလှော်ရရေအခါ Balanced ဖြစ်ဖို့ ကကောင်းခက်ခဲရေအလုပ်ဖြစ်ရေ။

အကျွန့်ဟိတွင်ပင် တချို့ရေလောင်းတိ ဂွမ်းဂွမ်းပြို လဲကျကတ်ပါရေ။

အကျွန်ရေ အချေဘာသာဘာဝအလျှောက် အူပိန်အောင်ရယ်မိပါရေ။

အသင်း တသင်းနန့်တသင်းလည်း မနာနာအောင် သံကျပ်ထိုးပါရေ။

ရခိုင်ရိုးရာ ကုန်ပြိုင်းလောင်းပြိုင်ပွဲမျိုးရေ ကမ္ဘာ့ဇာနီရာမာမဆို ယှာတွိနိုင်ဖို့မဟုတ်ပါ။

ရခိုင်ပြည်မာလည်း ပျောက်ကွယ်လားယာဟုထင်ပါရေ။

ယင်းပိုင်ချစ်ဖို့ကောင်းရေ၊ သိမ်မွိနက်နဲရေ ရခိုင်ရိုးရာယဉ်ကျေးမှုအမွီနှစ်တိကို ထိမ်းသိမ်းဖော်ထုတ်ကတ်ဖို့စာကို ရခိုင်တမျိုးသားလုံး ကြိုးပမ်းကတ်စီချင်ပါရေ။

ကိုးကား[edit | edit source]

အေးမောင်( ရင်အုံတော်ဓာတ်)