Wb/nia/Hosea/2
I. Falukha ira wa'ahakhö dödö dania[edit | edit source]
1 Ba fa'ato Ndraono Gizeraeli dania, ba timba wa'oya ngawua nene ba mbewe nasi, si tebai nisu'a ba si tebai ni'erai; ba tobali: ba mbanua, ba niŵa'ö khöra: "Tenga banuagu ami", ba lamane khöra: "Ya'ami, ono Lowalangi sauri."[1] 2 Ba lafuli la'orudugö ira Iraono Yuda ba Iraono Gizeraeli fefu, ba si ha samösa lafataro högöra ba möi ira miyaŵa, moroi ba danö andrö; baŵa sebua sa mbaŵa Yezere'eli andrö.[2]
II. Tohu-tohu gamaedola walimosara ba fotura[edit | edit source]
3 Mimane ba dalifusömi matua andrö: "Banuagu [ami]!" ba ba dalifusömi alawe: "Nihakhösi tödö [ami]!" 4 Mihuku ninami andrö, mihuku! me no tenga fo'omogu ia ba me no tenga ngambatönia ndra'odo, ena'ö iheta ba mbawania hokhania, ba fohorönia ba gotalua zusunia.[3] 5 Fa böi uheta mbalu-balunia, fa böi ube'e si mane me luo wa'atumbunia ia, ba fa böi ufaomagö ia ba danö si mate, ba danö si lö ida'idanö, ba fa lö ube'e mate owökhi dödö ia. 6 Ba ononia andrö, ba lö uhakhösi tödö, me no ono horö. 7 Noa sa mohorö ninara, no ilau zaila ita sadono ya'ira; noa sa imane: Da'ugo'ögo'ö zomasi ya'odo, same'e ögu fakhe ba ögu idanö ba bu mbiri-biri ba afasi ba fanikha khögu ba hadia ia nibadugu. 8 Andrö hiza, uba'a lalania doi ba ufa'anö göli kara khönia, ba alakha lö isöndra lalania. 9 Ba igohi zomasi ya'ia, ba lö ikhamö: i'alui, ba lö isöndra, ba imane dania: Da'ufulido khö ngambatögu si föföna andrö; noa sa ohahau dödögu, me luo da'ö, moroi iada'e. 10 Ba lö saboto ba dödönia, wa ya'odo zame'e khönia fakhe ba agu ba fanikha andrö, ba si no mangöhöna khönia firö ba ana'a; ba ba khö Mba'ali la'oguna'ö.[4] 11 Ba ya'odo göi, ba uhalö sa'ae göi wakhe andrö khögu, na asotö, ba agu andrö khögu, na baŵania; ba bu mbiri-biri ba afasi andrö khögu, nibe'enia balu-balunia ena'ö, ba usöbi khönia. 12 Ba uheta mbalu-balu zaila ia, ba zanehe zohoröni ya'ia; ba lö sangefa'ö ya'ia ba dangagu![5] 13 Ba u'etu'ö fefu wa'omuso dödönia, awö walöŵa andrö, awö wasulöna andrö, awö luo sabato ba awö gowasa andrö khönia, fefu.[6] 14 Ba töla nagu andrö khönia ba töla marafala khönia, ba ufufu, niŵa'önia tödönia: buala khögu da'ö, nibe'e zomasi ndra'o andrö, ba ubali'ö sasai'ö, ena'ö ö gutu ndru'u.[7] 15 Uhuku ba khönia götö nadu andrö, götö wamosumangenia ya'ia, wango'aya laeduru ba aya bö'ö, me olifu ia ndra'odo, iŵa'ö Yehowa.
III. Amabu'ula li fa'ebua dödö[edit | edit source]
16 Andrö hiza, udönisi ia, ba u'ohe ba danö si mate, ba uhaogö wehede khönia.[8] 17 Ba ba da'ö ufuli khönia kabu nagu andrö khönia ba ubali'ö bawa göli ba wanötöna mbawa danö wa'abu dödö andrö; ena'ö manunö ia ba da'ö, si mane me ono alawe ia, si mane me i'otarai moroi si tou danö Miserayi.[9] 18 Na luo da'ö — iŵa'ö Yehowa — ba "fo'omogu" öbe'e töigu, ba tenga sa'ae "Ba'aligu." 19 Ba ube'e taya sa'ae ba mbewenia döi Mba'ali andrö, ena'ö lö'ö sa'ae tetötöi döira andrö. 20 Ba na luo da'ö, ba ube'e gamakhoita ba gutu ndru'u ba ba wofo ba dalu mbanua, ba ba guökuö ba danö, fangorifira, ba fana ba si'öli ba fanuwö, ba uhori ba danö, ba lö hadia ia khöra ba danö ube'e.[10] 21 Ba u'oniha ndra'ugö, si lö mamalö-malö; u'oniha ndra'ugö ba wa'atulö ba ba wa'adölö ba ba wa'ebua dödö ba ba wa'ahakhö dödö;[11] 22 ba wa lö faröi u'oniha ndra'ugö, ena'ö aboto ba dödöu Yehowa![12] 23 Na luo da'ö, ba ufondrondrongo li, iŵa'ö Yehowa; ufondrondrongo li mbanua si yaŵa, ba ya'ia zamondrongo li danö.[13] 24 Ba tanö, ba ifondrondrongo li wakhe ba li nagu ba li wanikha ba ya'ira zamondrongo li Yezere'eli andrö.[14] 25 Ba utaru'ö ia khögu ba danö, ba uhakhösi tödö Lo-Ruhama (si lö muhakhösi tödö) andrö, ba umane khö Lo-Ami (tenga banuagu) andrö: "Banuagu ndra'ugö"! na ya'ia, ba imane: "He Lowalangigu."[15]
Famotokhi ba gahe[edit | edit source]
Fabaliŵa lala[edit source]
Olayama Hosea: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö