Wp/sjd/Са̄мь кӣл

Са̄мь кӣл (вай са̄мь-кӣл, са̄мькӣл) – кӣлл туһк ла̄дтҍ-угор кӣл тугкэсьт урал кӣл пӣррсэсьт. Са̄мь кӣл ле̄в соа̄ме е̄ннҍкӣл.

Рӯшш кӣл кырьенҍ тэ̄йт са̄мь кӣлэтҍ пыййма лӣ коаһче диалектэгуэйм (кӣллт диалект а элля кӣллт кӣлл).

Классификация

Вуэррьял са̄мь кӣлл туһк

Соа̄ййв са̄мь кӣлл (åarjelsaemien gïele) – Та̄ре̄ммьне я Рӯһце̄ммьне, 600 ве̄рьт са̄ррнэйе
Ӯмэ са̄мь кӣлл (ubmejesámiengiälla) – Рӯһце̄ммьне, 20 ве̄рьт са̄ррнэйе
Пӣтэ са̄мь кӣлл (bidumsámegiella)– Та̄ре̄ммьне я Рӯһце̄ммьне, 25 – 50 са̄ррнэйе
Ю̄лэв са̄мь кӣлл (julevsámegiella) – Та̄ре̄ммьне я Рӯһце̄ммьне, 650 ве̄рьт са̄ррнэйе
Tаввял са̄мь кӣлл (davvisámegiella) – Та̄ре̄ммьне, Рӯһце̄ммьне я Ла̄дтҍе̄ммьне, 25,000 ве̄рьт са̄ррнэйе

Нуҏҏьт са̄мь кӣлл туһк

А̄нар са̄мь кӣлл (anarâškielâ) – Ла̄дтҍе̄ммьне, 400 ве̄рьт са̄ррнэйе
Кайнӯ са̄мь кӣлл † (ка̄дэ 1800. ыгк. райя) – Ла̄дтҍе̄ммьне
Кеми са̄мь кӣлл † (ка̄дэ 1900. ыгкенҍ) – Ла̄дтҍе̄ммьне
Колтта са̄мь кӣлл (nuõrttsääʹmǩiõll) – Ла̄дтҍе̄ммьне я Рӯшше̄ммьне, 320 ве̄рьт са̄ррнэйе
Ахькэль (вай Аһкэль, А̄кьявьр) са̄мь кӣлл † (ка̄дэ 2003 ыгесьт) – Рӯшше̄ммьне
Кӣллт са̄мь кӣлл – Рӯшше̄ммьне, 300 ве̄рьт са̄ррнэйе
Та̄ррьй са̄мь кӣлл – Рӯшше̄ммьне, 2-10 ве̄рьт са̄ррнэйе, вай ка̄дэ

Са̄мь кӣл Рӯшш е̄ммьнесьт

Рӯшш е̄ммьнесьт са̄мас традиционнэ са̄ррнэв Куэлнэгк нёаркэсьт. Та̄рьм Куэлнэгкнёарк соа̄ме пугк не̄лльй кӣл ле̄в вэсьт ка̄дтмэдтӭ я кӣлоаннӭй выйтнэв са̄мь кӣлэсьт рӯшш кӣлле. Кӣллт, та̄ррьй я скольт (вай нюхьт-я̄вьр) кӣл вэсьтэ вя̄л о̄ннъюввэв. Ахькэль (вай А̄кьявьр) кӣлл, вуайй це̄ӆӆьке, ка̄дэ, ноа ле̄в вял о̄ллмэ, ке̄сьт кӯдтъенҍ тэнн кӣл ре̄яс те̄д. Таввялсамь кӣлл, ку пӯдӭ Рӯшш-е̄ммьнье 1990 ыгенҍ, коаппч е̄на я е̄на со̄н оаннҍет, ко̄ххт Скандинавиясьт, ныдтҍ э Куэлнэгк нёаркэсьт. Ко̄нн гоарренҍ ель вэльшэхьт тэнн э̄л, ноа кӣлт соа̄ме кӣл пайнэмушш пай эвтэс манн.

Та̄ррьм, кӯсстай, альт 800 о̄ллмэнҍ Рӯшш е̄ммьнесьт лев те̄д са̄мь кӣл баяс. Сӣнэнҍ, вуайй пыйнӭ, 200 о̄ллмэдтӭ вуайй коаххче «потенциальнэ кӣл оаннҍегуэйм». Сӣнэнҍ ле̄в кӣл шӣг ре̄яс те̄д: сыйй оа̄нтшэв пугк лубэ е̄ннэ, е̄ннэ сыйе ма̄ххтев са̄ррнэ са̄мь кӣлле, ноа югке рэ̄зэ гуэйке сыйй ев са̄рн ка̄йнханна, ва̄ймленне лубэ во̄фьсе ев са̄рн. Рӯшш е̄ммьнесьт та̄рьм ва̄нä 100 ва̄ймлэсь са̄мь кӣл оаннҍедтӭ е̄ллев. Са̄мас ва̄ймлесь са̄ррнъедтӭ, вуайй це̄ӆӆьке, лев о̄ллмэ, кугк пуэраст я ва̄ллтъенне са̄ррнэв ӣжесь кӣлле ко̄ххт авьтма кӣлле, ныдтҍ э нымьп кӣлле, я кугк оаннӭв са̄мь кӣл югке пе̄йв я югке саесьт.

Са̄мь кӣлл тоа̄ййв о̄ннъювв вэ̄зхэллэм (символическэ) кӣлэнҍ, ва̄лльтэ, вӯзьхемь гуэйке, манҍтэ олма ли – са̄мь вай мудта. Ныдтҍшэ вэ̄зхэллэм кӣл о̄нньювв э̄ххтса са̄мь я̄лэсьт, лубэ, го «шоу кӣлл» вэ̄зхалл ӣжесь о̄ллмэ культура. Вэ̄зхэллэм кӣл оаннӭв ев лышшэ о̄ллмэ, ва̄нас тӣдтӭй кӣл, ноа э о̄ллмэ, пуэраст тӣдтӭй кӣл. Е̄намп вэ̄зхэллэм кӣл оаннӭв о̄ллмэ, кугк ва̄йймельт кӯскнэв э̄ххтса са̄мь я̄лла.

Я̄наш са̄мь кӣл оаннӭй ев кӯсстэ. Чӯтä кӯсстъев са̄мь кӣлл ва̄йймлесь, кугк ва̄ймельт кӯскнэв э̄ххтса са̄мь я̄лла, о̄ллмэ ке̄сьт ли э̄лл сайй я̄лэсьт я ял выгкэй, го политик я шурьмуз. Ноа я̄наш са̄мь кӣл ва̄ймлесь оаннӭй ев кӯсстэ. Тэнн "эйй кӯсстъей" о̄ллмэ туххка ныдтҍшэ мэ̄нънэв я̄наш потенциальнэ кӣл оаннӭй, нӯрр пуллдэг, о̄ллмэ эйй соа̄менҍ выййтма я о̄ллмэ вӯлльгесь я̄л сэенҍ, ва̄лльтэ, кэ̄бп во̄йвишна о̄ллмэ, вуаййпей роавас чоа̄зенҍ я мудта рэ̄зэгуэйм вуаййпей о̄ллмэ. Го кӣл пайнэмушш ло̄гэнч ва̄сьт я̄ллхэ кӣлт кӣл, гу югкепяййвса кӣл, ку ва̄ллтъенне о̄ннъюваһч югке сэенҍ, танна кӣлт кӣл ва̄ймлесь я потенциальнэ оаннӭй эйй кӯсстъей туххк лыххк шӯрр потенциал. Эвтэс, кунт гуэйке ва̄сьт кӣл пайнэ, бэдҍсуввэв о̄ххпэй, тӣдтӭй о̄дт я та̄ррмъя кӣл о̄ххпэм тӯетҍ, о̄дт о̄ххпэм кырьетҍ я кӣл о̄ххпэм оанҍхесь кэскэтҍ лыгксаххтемь гуэйке эвтэс о̄ххпмуж. Лашшенҍ кӣл о̄ххпэм оанҍхэсь кэскэтҍ бэдт лыххкэ е̄на вуаннчмужэтҍ кӣл ва̄ймля оаннӭмь гуэйке са̄мас са̄ррнэм па̄ль югкепийве вуанчнэмь ва̄рэсьт са̄мас са̄ррнэм вырькэтҍ. А̄ннъювв э са̄мь о̄ллмэе эхтнэг сыськасьт кэскэсьт югке пуллдэгэ е̄на э̄ххтса кӣл тӯетҍ выгкэ я ныдтҍшэ выгкэ э̄ххтса тӯетҍ кэскэсьт са̄мь кӣлл ва̄ймлегуэйм, па̄йхьк я̄л выгкэй чӯрьвэгуэйм. Ныдтҍшэ шӯрр тӯйй ли аннҍтэ Куэлнэгкнёарк соа̄ме кӣлэтҍ е̄ннгэдтӭ аля я̄лл сай, ва̄лльтэ, лыххкэ ве̄ххькенҍ мугка тӯетҍ, кугк а̄ннэв кӣлт соа̄ме кӣлэтҍ оаннмуж. Кӣл сай пайнэмь гуэйкэ вял э мугка вуэйймушш лӣннчле вуаяххч, ва̄лльтэ, Скандинавскэ са̄мь о̄ллмэ ва̄лтченҍ шуря пя̄дцэльвуд я тыввьвудт Куэлнэгкнёарк соа̄ме кӣлэ альн. Тэ̄йт тӯетҍ вуаяхч ӣллькье пэ̄йель э̄ххтса оанҍхэсь кӣлт кӣл о̄ххпэм кэскэ Скандинавскэ соа̄ме я Куэлнэгкнёарк соаме гуэйке. Вял кӯсстай мугка лыххк, ва̄лльтэ, Куэлнэгкнёарк соа̄ме кӣлэтҍ э̄ххтэ Скандинавскэ шӣг программатҍ пайнэмь гуэйке са̄мь кӣлэтҍ.

Куэлнэгк са̄мь кӣл я па̄ххкма вя̄ӆӆтэдтмушш

Па̄ххкма вя̄ӆӆтэдтмушш куэлнэгк соа̄мэнҍ коа̄ввэстҍ э̄ххтса чуэдзмуж я пыдтӭ нюэзесь я̄ллмушша социальнэ, экономическе я культурнэ тӯегуэйм. А тэдт ли шӯррьмусс рэ̄сс са̄мь кӣл ка̄дхэм гуэйкэ. Вя̄ӆӆтма са̄мь ка̄дхэнҍ е̄рркъя я̄лсэтҍ, пуазпыннемъ е̄ммънетҍ я ӣжесь вуаннтсэтҍ. Ва̄лльтма, Луявьр сыйтэсьт е̄ннэ вя̄ӆӆтэдтма са̄мь кугкь ев вуаййма соа̄гкэ пэҏт, тӯй ыдтӭнҍ оа̄фкант сыййт е̄ллъегуэйм о̄ллмэтҍ, ке̄гк соа̄ррнэнҍ югкеналшэм са̄мъ кӣлле (югке са̄мь кӣлле) лубэ диалектэ я кугк выгкэнҍ »ял ӣэесь-налла мудта сыйтэнҍ, тала пугкэтҍ се̄гьхэмҍ я е̄лхэххьтэнҍ эфт сыйтэсьт. Ко̄ххт вя̄ӆӆтма са̄мь я сыййт е̄ллей моа̄йнсэнҍ, го о̄ллмэ ка̄ньць ка̄нҍцесь э̄ллькэнҍ ла̄йххтэ я ӣввче, куэссь кене са̄рнэ е̄ххк са̄мь кӣлле лубэ диалектэ. Мэннэм гуэйкэ оа̄фкант а̄еннэ еа̄ме э̄ллькэнҍ ка̄нҍц коа̄нҍцснэсь са̄ррнэ рӯшшас.

Па̄ххкэм вя̄ӆӆтэдтмушш пуэдтӭ депрессиятҍ я вӣр кадхэмуж пуэдтӭй я̄ллмушша. Лашшэнҍ алкоголизм, шэ̄ннҍтэнҍ социальнэ рэ̄з, ва̄йвашвудт физическэ я психологическэ рэ̄з тӣрвасвудэнҍ.

Эйй ва̄нас са̄мме вя̄ӆӆтэдтмуж гуэйкэ пыйенҍ кӣдэтҍ ӣжесь э̄л. Са̄мь э̄ллькэнҍ ко̄рнэ са̄ммьвуд, ва̄йвашвудэнҍ я социальнэ рэ̄зэгуэйм. Пе̄ссэ гуэйкэ дискриминациясьт я стигматизациясьт са̄мь э̄ллькэнҍ ся̄гьхувнэ шӯрр о̄ллмэ эхтнэгэнҍ я я̄наш са̄мме са̄рнэшкудтӭнҍ рӯшас.

Та̄ррьм Рӯшш-е̄ммьне са̄мь старъедтэв пайнэ ӣжесь кӣл. Рӯшш-е̄ммьне пэря олмняххт са̄мь культура, са̄мь кӣлэтҍ. Но депрессия, алкоголизм, социальнэ я экономическэ рэ̄з, ёаф, вӣр ка̄дхэмушш ӣджясь ле̄в шӯрр рэ̄з, е̄кхэллмуж лыгк кукесь чӯххкэ альн са̄мь кӣл пайнэм я пыннемь ва̄рэсьт.

Литература

Антонова, Александра А. 1982. Са̄мь букварь для подготовительного класса саамской школы. Ленинград.
Зайков, Петр Мефодьевич 1987. Бабинский диалект саамского языка (фонолого-морфологическое исследование). Петрозаводск: Карелия.
Керт, Георгий М. 1971. Саамский язык (кильдинский диалект). Фонетика, морфология, синтаксис. Ленинград.
Керт, Георгий М. 1986. Словарь саамско-русский и русско-саамский. Ленинград.
Куруч, Римма Д. Kuruč, Нина Е. Афанасьева, Екатерина И. Мечкина. 1985. Са̄мь-рӯшш соагкнэһк. Москва. Sami-Russian dictionary, Kuruch R. D., Grammar of Kildin Sami language (DJVU, PDF)
Куруч, Римма Д. Kuruč, Нина Е. Афанасьева, Ираида В. Виноградова. 1995. Правила орфографии и пунктуации саамского языка. Мурманск-Москва.
Tерешкин, 2002. Tерешкин, С. Н. Йокангский диалект саамского языка. 10.02.02. – языки народов Российской Федерации. Диссертация на соискание ученой степени кандидата филологических наук / Российский государственный педагогический Университет имени А. И. Герцена. – Санкт-Петербург, 2002. – С. 73.
Шеллер, Элизабет 2010. Ситуация саамских языков в России. В: Циркунов, И. Б. (главный редактор) Языки и культура кольских саами. Наука и Бизнес на Мурмане, N 2 (69) 2010. Мурманск: Мурманское областное книжное издательство. 15-27.
Scheller, Elisabeth 2011. Samisk språkrevitalisering i Ryssland – möjligheter och utmaningar. I: NOA: Norsk som andrespråk 2011; Volum 27.(1). 86-119.
Fernandez, J. 1997. Parlons lapon. – Paris.
KSDP 2005+. Куэлнэгк нёарк са̄мь кӣлэ кӣлтидтӭй я о̄ллмэ я̄л уһцей документация. – Berlin.
Rantala, Leif, Aleftina Sergina 2009. Áhkkila sápmelaččat. Oanehis muitalus sámejoavkku birra, man maŋimuš sámegielalaš olmmoš jámii 29.12.2003. Roavvenjárga.
Sammallahti, P. 1998. The Saami languages. – Kárášjohka.