Wb/nia/Sanguhuku/6
I. Lafakao Ndraono Gizeraeli Iraono Midiano. Ifangelama ira sama'ele'ö[edit | edit source]
1 Ba me lalau zi lö omasi Yehowa Iraono Gizeraeli, ba ibe'e ira ba danga Ndraono Midiano Yehowa, mewitu fakhe. 2 Ba lafakao Ndraono Gizeraeli Iraono Midiano. Ba labali'ö nahara mbawö andrö ba hili Iraono Gizeraeli, ba tögi narö hili andrö, awö nahia saro ba hili, ba Ndraono Midiano andrö. 3 Ba na no manaru Ndraono Gizeraeli, ba möi miyaŵa khöra Ndraono Midiano, awö Ndraono Gamaleki, awö zowanua tanö ba gatumbukha luo. 4 Ba tebato ba da'ö khöra, ba lafufu zinanö ba danö, irugi tanö ba Gasa; ma'ifu lö lasaigö gaurifa ba Ndraono Gizeraeli, ba he biri-biri ba he saŵi ba he kalide. 5 La'ohe sa'ae guriföra ba osera, na möi ira miyaŵa, timba wa'oya wali, na so ira, ba he ya'ira, ba he ondra khöra, ba tebai ni'erai. 6 Ba wamakiko möi ira ba danö. Ba tobali numana sibai Ndraono Gizeraeli, börö Ndraono Midiano andrö. Ba la'angaröfi li Yehowa Iraono Gizeraeli. 7 Ba me mangarö-ngarö khö Yehowa Ndraono Gizeraeli, ba Ndraono Midiano andrö, 8 ba ifatenge ba Ndraono Gizeraeli zama'ele'ö Yehowa, ba imane khöra da'ö: Da'ö niŵa'ö Yehowa, Lowalangi Ndraono Gizeraeli: No u'ohe miyaŵa ami, moroi ba danö Miserayi, no uheta ami ba nahia wa'asawuyu; 9 no u'efa'ö ami ba danga Ndrawa Miserayi, ba ba danga zamakao ya'ami fefu, ba no utimba ira fönami ba no ube'e khömi danöra. 10 Ba no umane khömi: Yehowa ndra'o, Lowalangimi; böi mi'ata'ufi Lowalangi Ndraono Gamori andrö, si so ami ba danö. Ba lö'ö sa nifondrondrongomi ligu.
II. Humede mala'ika Yehowa andrö khö Gideono. Ibe'e zumange[edit | edit source]
11 Ba so mala'ika Yehowa andrö, mudadao ia ba mbörö manawa andrö, ba Gofera, banua Yo'asi andrö, ma'uwu Gabieseri. Ba samöbörö fakhe nono Yo'asi, Gideono, ba wolazi nagu, ba wangoloi'ö ya'ia, ba Ndraono Midiano andrö. 12 Ba i'oroma'ö ia khönia mala'ika Yehowa andrö, imane khönia: Itolo'ö Yehowa, ya'ugö sabölö! 13 Ba imane khönia Gideono: He Tuha, na itologa Yehowa, ba hana sa wa göna ndra'aga da'ö fefu? Ba heza so dandra andrö khönia fefu, nidunö-dunö ndra tuama khöma, me lamane: Hadia, tenga no i'ohe miyaŵa ndra'aga Yehowa, moroi ba danö Miserayi? Ba iada'e, ba no i'erogö ita Yehowa ba no ibe'e ba danga Ndraono Midiano ita. 14 Ba i'otahögö ia Yehowa, imane: Ae'e, ba wa'abölöu andrö, ba efa'ö Ndraono Gizeraeli ba danga Ndraono Midiano. Hadia, tenga ya'o zamatenge ya'ugö?[1] 15 Ba imane khönia; He Tuha, hadia ube'e fangefa'ö Ndraono Gizeraeli? Hiza, no fondrege zi numana ba mado Manase watalifusöta khöma, ba ya'odo, ba no fondrege zide-ide ba zi samba omo ndra amagu.[2] 16 Ba imane khönia Yehowa: Ya'o zanolo ya'ugö, ba ö'alani Ndraono Midiano, hulö na ha samösa niha. 17 Ba imane khönia: Na no atö falukhado wa'ebua dödöu wamaigiu, ba lau khögu dandra, wa no ya'ugö zi fahuhuo khögu. 18 Böi ofanö a'i, irege sodo, irege u'ohe baero game'elagu, ba wanou'ö tou fönau. Ba imane: U'agö da'e, irege mangawuli'ö. 19 Ba möi miyomo Gideono, i'asiwai nono nambi ba kue si lö mu'aisöni, ösi zi samba yöu hamo. Ösi nono nambi andrö, ba ibe'e ba gude, ba dinonia, ba ilau ba mbowoa, ba i'ohe baero khönia, ba mbörö manawa itou'ö tou fönania. 20 Ba imane khönia mala'ika Lowalangi andrö: Halö nambi andrö, awö kue andrö, si lö mu'aisöni, ba tou'ö tou ba dete gowe andre, ba dino andrö, ba faduwa. Ba i'o'ö da'ö. 21 Ba i'oro'ö mbalö zi'onia, si so ba dangania, mala'ika Yehowa andrö, ituko nambi andrö ba kue andrö, si lö mu'aisöni, ba alua galitö ba gowe andrö ba i'a nambi, awö kue andrö, si lö mu'aisöni. Ba taya mala'ika Yohowa andrö, lö'ö sa'ae oroma khönia. 22 Awena i'ila Gideono, wa no mala'ika Yehowa. Ba imane Gideono: Alai ndra'o, So'aya, Yehowa, me no fa'ila bawa ndra'o ba mala'ika Yehowa![3] 23 Ba imane khönia Yehowa: Ya'ohahau dödöu! böi ata'ufi, lö mate'ö! 24 Ba ifa'anö naha wame'e sumange ba da'ö Gideono ba ibe'e töinia "fangorifi Yehowa". Ba irugi ma'ökhö, ba lö tebulö ba da'ö, ba Gofera, banua ma'uwu Gabieseri.
III. Idudugö naha wame'e sumange andrö khö Mba'ali[edit | edit source]
25 Ba ba zi bongi andrö, ba imane khönia Yehowa: Ohe niha, dafulu, sawuyumö, ba saŵi si matua, si mewitu fakhe; ba dudugö naha wame'e sumange khö Mba'ali khö namau, ba Asera andrö, ba ngainia, ba eŵa. 26 Ba khö Lowalangiu, Yehowa fa'anö naha wame'e sumange ba zuzu hati andre, ba asiwai. Ba halö zaŵi andrö, si sageu, ba be'e sumange nitunu; eu Gasera andrö, ni'eŵamö dania, be'e fanunu. 27 Ba dafulu, i'ohe niha Gideono, sawuyunia, ba i'o'ö niŵa'ö Yehowa khönia. Ba me ata'u ia ndra amania ba banuara ilau ba zi ma'ökhö, andrö wa ba zi bongi ilau. 28 Ba me maoso mbanuara, si hulö wongi, ba hiza, ba no mududugö naha wame'e sumange andrö khö Mba'ali, ba Asera andrö ba ngainia, ba no mu'eŵa, ba saŵi andrö, si sageu, ba no mube'e sumange ba naha wame'e sumange andrö, nifa'anö andrö. 29 Ba faoma lamane khö nawöra: Ha niha zolau da'ö? Ba la'alu-alui ba lazofu-zofu ba lamane: Gideono, ono Yo'asi zolau da'ö. 30 Ba lamane banuara khö Yo'asi: Da khöma nonou andrö, ba wamunu ya'ia, me no idudugö naha wame'e sumange andrö khö Mba'ali ba me no i'eŵa Gasera andrö, ba ngainia. 31 Ba imane Yo'asi khöra fefu, si so ba da'ö khonia: Hadia, ya'ami zamatunö huhuo Mba'ali andrö; ya'ami zangorifi ya'ia? Ha niha zamatunö ya'ia, ba nibunu irege mahemolu mbanua. Na Lowalangi ia, ba yamufatunö huhuonia, me no ladudugö naha wame'e sumange andrö khönia. 32 Ba me luo da'ö, ba labe'e töi Gideono Yerubi-Mba'ali, lamane: Yamufatunö huhuonia khönia Ba'ali, me no idudugö naha wame'e sumange andrö khönia.
IV. Tandra, ba wangabe'e tödö Gideono[edit | edit source]
33 Ba la'owuloi ira dozi Iraono Midiano ba Iraono Gamaleki, awö zowanua ba gatumbukha luo, dozi manö ira, ba la'ötö Yoridano ba tebato ba ndraso andrö, ba Yezere'eli. 34 Ba so Geheha Yehowa khö Gideono, ba ilau dorofe fogaoni ma'uwu Gabieseri, ba wefao khönia. 35 Ba ifatenge zinenge ba mado Manase fefu, ba tefakaoni'ö ira göi, ba wefao khönia. Ba he ba mado Gaseri ba ba mado Zebuloni ba ba mado Nafetali, ba ifatenge göi. Ba möi ira miyaŵa, lafaondragö. 36 Ba imane Gideono khö Lowalangi: Na omasi'ö ö'efa'ö Ndraono Gizeraeli tangagu andre, si mane niŵa'öu — 37 ba hiza, ubologö ba golayama mbasitö mbu mbiri-biri niguti; ba na ha bu mbiri-biri andrö zonamo, ba na otufo danö ma'afefu, ba aboto ba dödögu, ö'orifi Ndraono Gizeraeli tangagu andre, itörö niŵa'öu. 38 Ba itörö. Ba mahemolu ö, ba ihulö wongi wemaoso, ifera'ö mbu mbiri-biri andrö, namo andrö, samba figa nidanö. 39 Ba imane Gideono khö Lowalangi: Böi ofönu khögu, ba hatö samuza tö muhededo. Hatö samuza tö utandraigö ba mbu mbiri-biri andrö. Ya'otufo mbu mbiri-biri, ha ya'ia, ba yamonamo danö ma'afefu. 40 Ba i'o'ö khönia da'ö Lowalangi, ba zi bongi andrö, ha bu mbiri-biri zotufo, ba no monamo danö fefu.
Famotokhi ba gahe[edit | edit source]
Fabaliŵa lala[edit source]
Olayama Sanguhuku: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö