Wb/nia/Sanguhuku/15

I. Ilau mbalönia Simesono

1 Ba lö ara furi ö, me baŵa wamasi gandru, ba so Zimesono, i'ohe nono nambi, möi ia mufaigi ndrongania andrö, imane: Mifa'amöido si bakha khö ndrongagu! Ba lö ifa'amöi ia amania matuania. 2 Imane sa amania andrö: Uwai sabua ölö ndra'ugö khönia, ba no ube'e khö nawöu andrö; ba si sökhi moroi khönia na'i nakhinia andrö: hana na khöu da'ö, fangalinia. 3 Ba imane khöra Simesono: Si samuza andre, ba lö horögu ba Ndrawa Wilisiti andrö, na ulau khöra hadia ia! 4 Ba maoso Zimesono, möi mondra'u asu gatua, tölu ngaotu rozi, ba ihalö zulu, ba ifaböbö gi'o nasu gatua andrö, dua-dua rozi, ba sara-sara ibe'e sulu ba gotalua gi'o andrö, si dua-dua rozi. 5 Ba itunu zulu andrö, ba ifoloi nasu gatua, ba mbasitö Ndrawa Wilisiti, ba akhozi zi no mulau ba ngamböbö, fabaya si lö mutaba na ibe'e, awö kabu zai. 6 Ba me lasofu Dawa Wilisiti: Haniha zolau da'ö? ba lamane: Simesono andrö, umönö mbanua Dimenata andrö, — me no ibe'e ba niha bö'ö ndrongania [amania andrö]! Ba so Ndrawa Wilisiti, ba lasului galawe andrö, awö namania. 7 Ba imane khöra Simesono: Na milau zi mane da'ö, ba lö ahono dödögu, irege no ulau mbalögu khömi! 8 Ba iforege iböbözi ira, afatö waha ba sola. Ba möi misi tou ia, i'iagö dögi narö gara, ba Getama.

II. Labe'e ia ba danga Ndrawa Wilisiti mado Yuda andrö. Ibunu Ndrawa Wilisiti töla zimbi galide

9 Ba so moroi sa Ndrawa Wilisiti ba ba danö mado Yuda tebato ira, ba lahawui Lehi. 10 Ba me lasofu mado Yuda: Hadia wa möi ami khöma? ba lamane: Ba wondra'u Simesono andrö soga, ba wolau khönia nilaunia khöma. 11 Ba 3000 zi möi mitou mado Yuda, ba dögi narö gara andrö ba Getama, ba mu'ao ira khö Zimesono, lamane: Hadia, lö ö'ila, wa no samatörö ya'ita Ndrawa Wilisiti? Ba hana sa, wa ölau khöma da'ö? Ba imane khöra: 12 Nilaura khögu usulöni khöra. Ba lamane khönia: Ba wondra'u ya'ugö möiga, ba wame'e ba danga Ndrawa Wilisiti ya'ugö! Ba imane khöra Simesono: Ba mi'ae ba hölu khögu, wa tenga ya'ami zamunu ya'odo! 13 Ba lamane khönia: Tenga, ha ba wondra'u ya'ugö ba ba wame'e ba dangara ya'ugö — tenga samunu ya'ugö ndra'aga! Ba laböbö ia sinali si bohou, dua rozi, ba la'ohe miyaŵa ia, moroi ba narö gara andrö. 14 Ba me irugi Lehi, me lakaraini sa'ae wa'iki Dawa Wilisiti, me no so ia, ba so khönia Geheha Yehowa, ba tobali hulö mbana, si no akhozi ba galitö wesu andrö ba nuwu gölönia ba timba zalau mböbö andrö ba mbagi mbulökhania. 15 Ba i'ila tou döla zimbi galide, si bohou, ba ituyu, ba hönö ibunu niha töla zimbi andrö. 16 Ba imane Simesono: "No uhaogö wanöwö ya'ira töla zimbi galide, hönö no ubunu niha töla zimbi galide andrö". 17 Ba me aefa iŵa'ö da'ö, ba itibo'ö döla zimbi andrö, ba labe'e töi naha andrö Ramata Lehi (hili zimbi). 18 Ba me no owökhi sibai dödönia, ba i'angaröfi li Yehowa, imane: No fangorifi sebua i'asogö tanga genoniu öbe'e — ba hadia, si mate owökhi dödö ndra'o iada'e, ba nilulu ba danga niha andrö, si lö muboto? 19 Ba ifobawa zahöndrö andrö ba Lehi Lowalangi, ba mangumbu moroi tou nidanö. Ba me no ibadu, ba te'ali nosonia, ifuli auri. Andrö wa labe'e töi gumbu andrö "umbu zi angaröfi li [Lowalangi]"; so ia, ba Lehi andrö, irugi ma'ökhö andre. 20 Ba 20 fakhe wa'ara ihuku Ndraono Gizeraeli Samesono, ba götö Ndrawa Wilisiti andrö.

Famotokhi ba gahe

Fabaliŵa lala

Olayama Sanguhuku: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö