Wb/nia/Sanguhuku/21

I. Fa'abu dödö Ndraono Gizeraeli ba wa'atekiko mado Mbeniyami andrö

1 Ba no möi ba hölu Ndraono Gizeraeli ba Misefa, no lamane: Ya'ita fefu, ba lö tola tabe'e ba mado Mbeniyami nonoda alawe! 2 Ba möi ira ba Mbetieli, ba la'iagö da'ö, irege bongi, föna Lowalangi. Ba labörötaigö mege-ege, ebua lira, 3 lamane: He Yehowa, Lowalangi Ndraono Gizeraeli! Hana wa itörö Ndraono Gizeraeli si mane da'ö, wa sambua mado manö zi lö'ö ba khöra? 4 Ba mahemolu ö, ba lahulö wongi sato, wama'anö naha wame'e sumange, ba labe'e zumange nitunu ba sumange fangorifi. 5 Ba lamane Iraono Gizeraeli: Ha niha, mado Ndraono Gizeraeli fefu, si lö möi ba da'e khö Yehowa, awö zato andre? Noa sa möi ira ba hölu: ha niha zi lö möi misi yaŵa khö Yehowa ba Misefa, ba lö tola lö mate! 6 Ba no aröu-röu ba dödö Ndraono Gizeraeli dalifusöra, mado Mbeniyami, lamane: Sambua mado manö zi no muse'e ba Ndraono Gizeraeli! 7 He tawisa wamaigi ira alawe ba zi tosai andrö, me no möi ba hölu ita khö Yehowa, ma'ifu lö tabe'e khöra nonoda alawe?

II. Fangotu'ö banua Yabesi andrö ba danö Gileadi

8 Ba lamane ba da'ö: Hadia, so ha niha, zi lö möi ba da'e, khö Yehowa, ba Misefa? Ba hiza, samösa lö si möi ba golombaseŵa, ba walukhata, banua Yabesi ba danö Gileadi. 9 La'ofaya niha, ba hiza, samösa lö'ö, banua Yabesi ba danö Gileadi. 10 Ba lafatenge zabölö, 12.000, lamane khöra: Mi'ae mi'ö'ötö si'öli mbanua Yabesi andrö, ba danö Gileadi, fabaya ira alawe ba iraono. 11 Mimane wolau: Dozi motöi matua ba dozi ira alawe, ba zi no orudu ira matua, ba mibunu, ba ono alawe, ba mi'orifi! Ba la'o'ö da'ö. 12 Ba öfa ngaotu zi falukha ira ba mbanua Yabesi andrö, ba danö Gileadi, ono alawe, ba zi lö irai orudu ira matua, ba la'ohe ba golombaseŵa ba Zilo, ba danö Gana'ana. 13 Ba lafatenge sato fefu zi fahuhuo ba mado Mbeniyami andrö, ba ngai gara Rimono, lafabu'u khöra wa'atulö. 14 Ba lafuli ira mado Mbeniyami andrö, ba labe'e khöra ndra alawe no mege, ni'orifira andrö, ono alawe, ba mbanua Yabesi, ba danö Gileadi. 15 Ba ambö na'i fa'ato. Ba aröu-röu ba dödö zato mado Mbeniyami, me no hulö zi fambambö mado Ndraono Gizeraeli, ibe'e Yehowa.

III. Larabu nono alawe ba Zilo

16 Ba lamane satua mbanua: He tawisa wamaigi ira alawe ba zi tosai andrö? Noa sa muhori ndra alawe ba mado Mbeniyami! 17 Ba lamane: Ba mado Mbeniyami andrö, sauri, ba tenga nibulö'ö dana khöra tanö, fa böi sambua mado manö ahori ba Ndraono Gizeraeli; 18 ba onoda alawe, ba tebai tabe'e khöra! Noa sa möi ba hölu Ndraono Gizeraeli, no lamane: Ni'elifi zame'e ba mado Mbeniyami ira alawe! 19 Ba lamane: Ero röfi a'i, ba owasa khö Yehowa ba Zilo, yöu Mbetieli, ba ngai lala andrö si otarai Mbetieli saekhu ba Zikhema, tanö ba gatumbukha, ba raya Lebona. 20 Ba lafobawa lala ba mado Mbeniyami, lamane: Mi'ae midaro-darogö ba kabu nagu andrö, 21 ba na mi'ila dania, so moroi yomo ba Zilo nono alawe, ba wanari, ba so ami moroi ba kabu nagu ba oi zara mirabu dongami nono alawe andrö, si otarai Zilo; ba misaŵa danö mado Mbeniyami. 22 Ba na so dania ndra amara ba ira talifusöra matua, na lafasosoni ndra'aga ba mamane dania khöra: Mibe'e bualami khöma; dozi ndra'aga, ba lö nisöndrama ira alawe, khöma, ba wanuwöda Yabesi andrö. Ba tenga sa nibe'emi khöra; na si manö mena'ö, ba no si so sala ami! 23 Ba la'o'ö da'ö mado Mbeniyami, lahalö khöra ndra alawe, ndrohu-ndrohu zoguna khöra, sanari andrö, nirabu. Ba lafuli ira ba dana khöra, ba lafuli lataru'ö mbanua misa, nahiara. 24 Ba mofanö sa'ae göi Ndraono Gizeraeli, ifuli ia ba madora ba ba daliföesöra zamösana, laheta ira ba da'ö, oi zara lasaŵa dana khöra. 25 Me luo da'ö, ba lö razo samatörö Iraono Gizeraeli; ilau manö nikhoi dödönia zamösana.

Famotokhi ba gahe

Fabaliŵa lala

Olayama Sanguhuku: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö