Wb/nia/Sinunö/119

Fanuno oroisa Lowalangi andrö, fanuno fa'abölönia awö howu-howu andrö lua-luania

A.

1 Ya ahowu zi lö sinegu ba nitöröra andrö, sanörö lala goroisa Yehowa.
2 Ya ahowu zolo'ö famaduhu'ö andrö khönia, sangalui ya'ia, soroi si'aikö ba dödö.
3 Si lö molau si lö atulö, sanörö lala andrö khönia.
4 Amakhoitamö andrö, ba no öŵa'ö, ba wanörö ya'ia, soroi ba dödö.
5 Ena'ö na ba da'ö itörö lalagu, ba wolo'ö amakhoitamö andrö!
6 Ba lö falukhado wa'aila, na utöngöni goroisamö andrö.
7 Moroi ba dödögu usunö ndra'ugö, na utanö ba dödögu gamakhoitamö andrö, satulö.
8 Lö uböhöli ni'oroi'ömö andrö; böi falua wamöhöli ya'odo!

B.

9 He iwisa ono matua, fa böi fabaya hadia ia, ba döröŵania andrö? Na ibe'e dali daroma limö andrö.
10 Moroi si'aikö ba dödögu u'alui ndra'ugö; böi be'e elungu ndra'o, wamöhöi oroisamö andrö.
11 No u'irö'ö ba dödögu bakha niŵa'ömö andrö, fa böi molalö ndra'o khöu.
12 Nisuno ndra'ugö Yehowa; fahaö ndra'o ba gamakhöitamö andrö.
13 Udunö-dunö bewegu goroisa mbawau andrö, fefu.
14 Fa'omuso dödögu lala wamaduhu'ömö andrö, timba wa'omuso dödö ba gana'a.
15 Ufatou-tou tödögu goroisamö andrö, ba utöngöni lala andrö khöu.
16 Ba gamakhoitamö u'omusoi'ö dödögu, lö olifudo daroma limö.

D.

17 Ebua'ö dödöu khö genoniu andre, ena'ö aurido, ba ufondrondrongo daroma limö andrö.
18 Bokai hörögu, ena'ö u'ila zahöli-höli dödögu ba goroisamö andrö.
19 Tome ndra'odo ba guli danö andre: Böi bini'ö khögu goroisamö andrö.
20 No arasa dödögu ba wehulu andrö ba zatulö andrö khöu, lö mamalö-malö.
21 No ötenaŵa zebua hokha andrö; ni'elifi zelungu andrö, samöhöi oroisamö.
22 Heta khögu wango'aya andrö, awö wa'aila andrö; utöngöni sa wamaduhu'ömö andrö.
23 He ŵa'ae no dumadao zalaŵa, mamagölö, ba khögu, andre: ba ifatou-tou sa atö tödönia enoniu gamakhoitamö andrö.
24 Wa'omasigu sa'ae wamaduhu'ömö andrö, anofulagu.

E.

25 Si no falemba ba danö nosogu; orifi ndra'odo fatörö niŵa'öu andrö!
26 No utunö lalagu andrö, ba öfondrondrongo ligu; fahaö ndra'o ba gamakhoitamö andrö.
27 Be'e aboto ba dödögu lala nifakhoimö andrö, ba ufatou-tou tödögu zahöli-höli dödö andrö khöu.
28 Mangulu dödögu, ba wa'abu dödö andrö; abe'e'ö ndra'o, dali limö andrö.
29 Aröu'ö khögu lala waya andrö, ba ebua'ö dödöu khögu, wamahaö ya'odo.
30 No utuyu lala zi duhu andrö. No ube'e ba duduma hörögu zatulö andrö khöu.
31 Tebai aefa ndra'odo ba wamaduhu'ömö andrö, ya'ugö Yehowa; böi be'e aila ndra'o.
32 Utörö lala goroisamö andrö; ba öbologö dödögu.

F.

33 Fahaö ndra'odo, Yehowa, ba lala gamakhoitamö andrö, ena'ö utörö, irugi gamozua.
34 Fa'aboto ba dödö be'e khögu, ena'ö utöngöni goroisamö andrö, ba ena'ö moroi ba dödögu u'o'ö.
35 Fatörödo ba lala goroisamö andrö; omasido sa ia.
36 Ombuyu'ö dödögu ba wamaduhu'ömö andrö, ba böi ba wangalui ana'a.
37 Hole'ö hörögu, fa böi ifaigi waya-faya; orifido ba lala andrö khöu!
38 Fatörö khö genoniu andre gamabu'ula limö andrö, nibe'e famasugi wangata'ufi ya'ugö.
39 Heta wa'ailagu andrö, sata'u ndra'odo; si sökhi sa nifakhoimö andrö.
40 Hiza, humulu dödögu ba goroisamö andrö; orifido fa'atulö andrö khöu.

G.

41 Ena'ö na falukhado wa'ebua dödö andrö khöu, ya'ugö Yehowa, fangorifi andrö khöu, dali daroma limö!
42 Ena'ö u'ila utema li zango'aya ya'o; udöna-döna sa'ae ba limö andrö.
43 Ba böi hori ba mbewegu daroma li si duhu andrö; ba zatulö andrö khöu sa'ae manötöna ndra'odo.
44 Ba lö ubulö'ö wolo'ö oroisamö andrö, lö ufamalö-malö, irugi zi lö aetu.
45 Ena'ö utörö zebolo tanö; u'alu-alui sa tödögu nifakhoimö andrö.
46 Ba ufatunö wamaduhu'ömö andrö ba zalaŵa; lö ailado.
47 Ube'e fa'omuso dödögu goroisamö andrö, somasi ndra'o sa'ae.
48 Ba ufazaŵa dangagu ba goroisamö andrö, somasi ndra'o sa'ae, ba u'alu-alui tödögu nifakhoimö andrö.

H.

49 Törö tödöu limö andrö khö genoniu andre, nibe'eu tötönafögu.
50 Da'ö wondrara dödögu ba wa'anumanagu andre, wa i'orifido taroma limö andrö.
51 No laforege wango'aya ya'o sebua hokha; — ba lö niböhöligu oroisamö andrö.
52 No itörö tödögu zatulö andrö khöu, si otarai mböröta sa'ae, ya'ugö Yehowa, ba terara dödögu.
53 Mifönu sibai bakha dödögu ba zebua horö andrö, samöhöi oroisamö andrö.
54 Börö wanunö khögu gamakhoitamö andrö, ba danö si fatewu gana ndra'odo.
55 Ba zi bongi itorö tödögu döimö, ya'ugö Yehowa, ba utöngöni goroisamö.
56 Da'ö nihonogöi khögu: ena'ö u'o'ö nifakhoimö andrö.

== Kh.

57 Umane: He Yehowa! Tana khögu wanöngöni taroma limö andrö.
58 Moroi si'aikö ba dödögu u'angaröfi li ndra'ugö; ebua'ö dödöu khögu, fatörö khögu gamabu'ula limö andrö.
59 No ufatou-tou tödögu lala andrö khögu, ba no usaŵa wamaduhu'ö andrö khöu.
60 No u'alio'ö ndra'odo, lö sarörö ndra'o, ba wolo'ö oroisamö.
61 No tefa'u'u ndra'o fesu ba zebua horö andrö; ba lö solifudo oroisamö.
62 Na talu mbongi, ba maoso ndra'odo, ba wangandrö saoha gölö khöu amakhoitamö andrö, satulö.
63 Awö zangata'ufi ya'ugö andrö fefu ndra'odo andre, ba awö zanöngöni nifakhoimö andrö.
64 He Yehowa, no anönö danö wa'ebua dödöu andrö; fahaö ndra'o ba nifakhoimö andrö.

I.

65 No ölau zi sökhi khö genoniu andre, ya'ugö Yehowa, itörö niŵa'öu andrö.
66 Si sökhi fangila ba fa'aboto ba dödö be'e khögu; mamati sa ndra'o ba goroisamö andrö.
67 Me lö mu'ide-ide'ö ndra'odo na, ba selungu ndra'o, ba iya'e, ba utöngöni niŵa'öu.
68 Si sökhi tödö ndra'ugö ba soböwö, fahaö ndra'o ba gamakhoitamö andrö.
69 Lafakhai waya khögu sebua hokha andrö; — ba ya'odo, ba moroi ba dödögu u'o'ö nifakhoimö andrö.
70 No abe'e dödöra, motawö; ba ya'odo, ba u'omusoi'ö dödögu ba goroisamö andrö.
71 Fangorifigu me te'ide-ide'ö ndra'odo, ena'ö utöngöni nifakhoimö andrö.
72 Omasido goroisa mbawau andrö, moroi ba ngahönö gana'a ba moroi ba ngahönö wirö.

K.

73 Tangau zomböi ya'odo, tangau zamazökhi; be'e khögu wa'aboto ba dödö, ena'ö utöngöni goroisamö andrö.
74 La'ila dania ndra'o sangata'ufi ya'ugö, ba omuso dödöra me sanötöna ba daroma limö ndra'odo.
75 U'ila wa no satulö hukumö andrö, ya'ugö Yehowa, awö wa ba wa lö faröi ndra'ugö ö'ide-ide'ö ndra'odo.
76 Ena'ö na fondrara dödögu wa'ebua dödöu andrö, ena'ö na itörö nifabu'umö andrö khö genoniu andre.
77 Ena'ö na falukhado wa'ahakhö dödö khöu, ena'ö aurido; wa'omasigu sa goroisamö andrö.
78 Akha aila zebua hokha andrö, me lahöndrögö ndra'o, lö börö, ba ya'odo, ba u'alu-alui tödögu geluaha goroisamö andrö.
79 Ena'ö na fao-fao khögu zangata'ufi ya'ugö ba si no aboto ba dödö wamaduhu'ömö andrö!
80 Ya adölö dödögu wolo'ö amakhoitamö andrö, ena'ö lö falukha wa'aila ndra'odo.

L.

81 Humulu dödögu ba wangorifi andrö khöu; udöna-döna ba daroma limö andrö.
82 Omasi sibai hörögu daroma limö andrö, ba umane: "Ha wa'ara örara dödögu!"
83 Hulö guli nambi ba zimbo sa'ae ndra'odo, ba lö solifudo nifakhoimö andrö.
84 Ha wa'anau noso genoniu andre? Ha wa'ara öhuku zolohi ya'odo?
85 No lakharu khögu lösu-lösu sebua hokha andrö; ya'ira andrö, si lö faudu ba goroisamö andrö.
86 Oroisamö andrö fefu, ba no si duhu; lagohido lö börö: tolo ndra'odo!
87 Hatö ma'ifu tö, ba labunudo mena'ö ba danö andre, ba lö'ö zui niböhöligu oroisamö andrö.
88 Orifido ba wa'ebua dödöu andrö, ena'ö utöngöni wamaduhu'ö mbawau andrö!

M.

89 Taroma limö andrö, ya'ugö Yehowa, ba lö tebulö ba zorugo, irugi zi lö aetu.
90 Fa lö faröi ndra'ugö, ba götö-götö wa'ara; ya'ugö zamazökhi tanö, ba no aro.
91 Dali nihonogöimö andrö, wa so manö fefu hadia ia, irugi ma'ökhö andre; oi sa ngoni-ngoniu fefu.
92 Na tenga fa'omuso dödögu goroisamö andrö mena'ö, ba noa sa'ae otufo gilogu ba wa'anumanagu andre.
93 Sagötö ya'odo, ba lö olifudo goroisamö andrö; noa sa öbe'e fangorifigu.
94 Khöu ndra'odo, tolodo! U'alu-alui sa goroisamö andrö.
95 Ladaro-darogö ndra'o sebua horö andrö, ba wamunu ya'odo. — Utöngötöngöni wamaduhu'ömö andrö.
96 Fozu zo'ahonoa fefu, ba fa'aetu, u'ila: ba oroisamö andrö, ba si lö aetu.

N.

97 Ha lö omasido goroisamö andrö! Ma'öma'ökhö lö aefa ba dödögu.
98 No ö'atua-tua'ö ndra'odo, moroi ba zi fa'udu khögu, oroisamö andrö, me no tana khögu, irugi zi lö aetu.
99 Atua-tua ndra'odo, moroi ba zamahaö ya'o fefu; me ufatou-tou tödögu wamaduhu'ömö andrö.
100 Atua-tua ndra'o, moroi ba zatua, me utöngöni goroisamö andrö.
101 Lö urai uhundragö lala si lö sökhi, ena'ö u'o'ö limö andrö.
102 Lö uböhöli zatulö andrö khöu; me no öfahaö ndra'odo.
103 Wa'ami ba lelagu gamabu'ula limö andrö; ami moroi ba ŵe ŵani ba mbawagu!
104 Fangatua-tuagu goroisamö andrö; andrö u'ogorofi fefu lala waya andrö.

O.

105 Fandru föna gahegu daroma limö andrö, ba haga ba lalagu.
106 No fahölu ndra'odo, ba u'o'ö, ba wanöngöni amakhoitamö andrö, si no atulö.
107 No aöndrö sibai ndra'odo. He Yehowa orifi ndra'o, fatörö ba limö andrö?
108 Ena'ö na omasi ndra'ugö game'ela mbewegu andrö, soroi ba dödö, ya'ugö Yehowa, ba ena'ö na öfahaö ndra'odo ba gamakhoitamö andrö.
109 Ugogohe tangagu nosogu, si lö mamalö-malö, ba lö olifudo goroisamö andrö.
110 No lalau wesu khögu sebua horö andrö, ba lö selungu ndra'o, lö niböhöligu oroisamö andrö.
111 Tana khögu, irugi zi lö aetu, wamaduhu'ömö andrö, me no fa'omuso dödögu.
112 No aolo dödögu ba wolo'ö amakhoitamö andrö, si lö mamalö-malö, irugi gamozua.

Ö.

113 U'ogorofi zi dua tödö, ba oroisamö andrö, ba omasido.
114 Nöugu ba balusegu ndra'ugö; manötöna ndra'o ba daroma limö andrö.
115 Miheta ami khögu, ya'ami, solau si lö sökhi! ena'ö utöngöni goroisa Lowalangigu andrö.
116 Tuwu galogogu, dali nifabu'umö andrö, ena'ö aurido ba böi be'e aila ndra'o, ba wanötönagu andrö.
117 Abe'e'ö ndra'o, ena'ö falukhado wanolo, ba lö ufamalö-malö wanöngöni amakhoitamö andrö.
118 Selungu andrö, samöhöli nifakhoimö andrö, ba lö ba dödöu; me si lö boto wayara andrö.
119 Hulö na latibo'ö gakhozila ötibo'ö fefu zebua horö ba guli danö; andrö omasido wamaduhu'ömö andrö.
120 Muhokha mbugu, fa'ata'ugu ndra'ugö, ata'u ndra'odo wanguhukumö andrö.

R.

121 No utörö zadölö ba satulö; böi lulu ndra'odo ba zamalangögö ya'o!
122 Oawögö genoniu andre, ba wangorifi ya'ia, fa böi lafakao ndra'o si fayaŵa andrö!
123 Omasido sibai u'ila wangorifi andrö ba taroma li satulö andrö khöu.
124 Be'e dali wa'ebua dödöu andrö, wamatörö enoniu andre, ba fahaö ndra'o ba gamakhoitamö andrö.
125 Enoniu ndra'odo; fa'atua-tua be'e khögu, ena'ö aboto ba dödögu wamaduhu'ömö andrö.
126 Baŵa wolau sa'ae khö Yehowa; no labe'e faya goroisamö andrö.
127 Da'ö mbörö, wa omasido goroisamö andrö, moroi ba gana'a, moroi ba mbalaki.
128 Andrö utehe fefu nifakhoimö andrö; fefu lala waya, ba u'ogorofi.

S.

129 Sahöli-höli dödö wamaduhu'ömö andrö; andrö itöngöni tödögu.
130 Nat teboka daroma limö andrö, ba mohaga; falukha wa'aboto ba dödö zadölö tödö.
131 Ubokai mbawagu, owökhi dödögu, humulu ba goroisamö andrö.
132 Otahögö ndra'odo ba ebua'ö dödöu khögu, törö lala ba zangomasi'ö töimö andrö!
133 Abe'e'ö mbekagu ba lala limö andrö ba böi be'e ifatörö si lö atulö hadia ia!
134 Efa'ö ndra'o ba wamakao niha ya'odo, ena'ö u'o'ö goroisamö andrö.
135 Hagaini genonimö andre bawau, ba fahaö ndra'o ba gamakhoitamö andrö.
136 No falawu idanö hörögu, mo'elea, me lö mu'o'ö goroisamö andrö.

T.

137 Satulö ndra'ugö Yehowa, ba satulö wanguhukumö andrö.
138 Famaduhu'ömö andrö, ba ba wa'atulö ö'oroi'ö mege, ba ba wa'aduhu manö.
139 I'ado sa'ae fönugu andrö, me no olifu zamakao ya'o daroma limö andrö.
140 Si lö fabaya hadia ia daroma limö andrö, ba i'omasi'ö enonimö andre.
141 Side-ide ndra'odo, ba si lö ba dödö niha bö'ö, ba lö solifudo oroisamö andrö.
142 Fa'atulömö andrö, ba no fa'atulö si lö mamalö-malö, ba no si duhu goroisamö andrö.
143 No göna ndra'o fa'abu dödö ba fa'atosasa; ba fa'omuso dödögu goroisamö andrö.
144 Fa'atulö wamaduhu'ömö andrö, ba si lö mamalö-malö; be'e khögu wa'aboto ba dödö, ena'ö aurido!

U.

145 Mu'ao ndra'o, moroi si'aikö ba dödögu: Fondrondrongo khögu, Yehowa! U'o'ö gamakhoitamö andrö.
146 U'angaröfi li ndra'ugö, tolodo, ena'ö u'o'ö gamakhoitamö andrö!
147 Lö börö moluo na, ba mu'ao ndra'o; udöna-döna ba limö andrö.
148 Ihulö wamosasi zi bongi andrö hörögu, ba wamatou-tou taroma limö andrö.
149 Fondrondrongo ligu, ba wa'ebua dödöu andrö; he Yehowa, orifi ndra'o, dali lala andrö khöu!
150 Lahatö'ö ira sanao horö, si no aröu oroisamö andrö.
151 Sahatö ndra'ugö, ya'ugö Yehowa, ba si duhu manö goroisamö andrö fefu.
152 No ara sa'ae u'ila ba wamaduhu'ömö andrö, wa no öhonogöi ia sirugi si lö aetu.

W.

153 Faigi wa'anumanagu andre, ba efa'ö ndra'odo! Lö'ö sa solifudo oroisamö andrö.
154 Fatunö huhuogu andrö ba efa'ö ndra'o; orifido, fatörö ba limö andrö!
155 Ba zebua horö andrö, ba no aröu wangorifi, me lö ba dödöra amakhoitamö andrö.
156 No ebua wa'ahakhö dödöu andrö, ya'ugö Yehowa, orifido, fatörö ba lala andrö khöu.
157 No ato zolohi ya'odo ba samakao ya'o, ba lö uböhöli wamaduhu'ömö andrö.
158 No u'ila zo'olalöŵa andrö, ba ogoro ndra'o, me lö ba dödöra taroma limö andrö.
159 Nehegö, wa no somasi oroisamö andrö ndra'odo; he Yehowa, orifido, ba wa'ebua dödöu andrö!
160 Ahonoa daroma limö andrö, ba si duhu, ba si lö aetu lala wa'atulö andrö khöu. Ŵ. 161 Lagohi ndra'o salaŵa, lö börö, ba taroma limö andrö zata'u dödögu.
162 Omuso dödögu niŵa'ömö andrö, fa'omuso dödö zanöndra hare sebua.
163 Si fatuwu ba dödögu waya ba u'ogorofi; ba oroisamö andrö, ba omasido.
164 Mewitu ma'ökhö usuno ndra'ugö ba nifakhoimö andrö, satulö andrö.
165 Ba zomasi oroisamö andrö, ba fahöna wa'ohahau dödö, ba lö manendre ira.
166 Udöna-döna wangorifi andrö khöu, ya'ugö Yehowa, ba u'o'ö goroisamö andrö.
167 Itöngöni wamaduhu'ömö andrö tödögu, ba no tobali omasido sibai ia.
168 U'o'ö goroisamö, awö wamaduhu'ömö andrö; duduma höröu sa atö lalagu andrö fefu.

Z.

169 Akha irugi ndra'ugö fangarö-ngarögu andrö, ya'ugö Yehowa; be'e khögu wa'aboto ba dödö, fatörö ba niŵa'öu andrö.
170 Folala khöu wakaosagu andrö; orifi ndra'odo, fatörö ba niŵa'öu andrö.
171 Luaha wanuno ya'ugö dania mbewegu, öfahaö sa ndra'o ba gamakhoitamö andrö.
172 Sanuno taroma limö andrö dania legagu, me no satulö goroisamö andrö fefu.
173 Ya möi fanolo khögu dangau andrö; noa sa utuyu khögu goroisamö andrö.
174 Omasido wangorifi andrö khöu, ya'ugö Yehowa; ba fa'omuso dödögu goroisamö andrö.
175 Akha anau nosogu, ena'ö usuno ndra'ugö; ba hana na itolo ndra'o hukumö andrö.
176 Si no elungu ndra'odo; alui genonimö andre, nifangalui biri-biri si suna; lö'ö sa solifudo oroisamö andrö.

Famotokhi ba gahe

Fabaliŵa lala

Olayama Sinunö: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66 • 67 • 68 • 69 • 70 • 71 • 72 • 73 • 74 • 75 • 76 • 77 • 78 • 79 • 80 • 81 • 82 • 83 • 84 • 85 • 86 • 87 • 88 • 89 • 90 • 91 • 92 • 93 • 94 • 95 • 96 • 97 • 98 • 99 • 100 • 101 • 102 • 103 • 104 • 105 • 106 • 107 • 108 • 109 • 110 • 111 • 112 • 113 • 114 • 115 • 116 • 117 • 118 • 119 • 120 • 121 • 122 • 123 • 124 • 125 • 126 • 127 • 128 • 129 • 130 • 131 • 132 • 133 • 134 • 135 • 136 • 137 • 138 • 139 • 140 • 141 • 142 • 143 • 144 • 145 • 146 • 147 • 148 • 149 • 150

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö