Wb/nia/Sinunö/106
I. Fanuno fa'asökhi dödö Lowalangi
[edit | edit source]1 Haleluya! Mi'andrö saoha gölö khö Yehowa! Me no si sökhi tödö ia, me si lö aetu wa'ebua dödönia andrö.[1]
2 Ha niha zangila manutunö nilau Yehowa andrö, fa'abölönia, ba ha niha zangila mamarongogö fanuno ya'ia andrö, fefu?
3 Ya ahowu zolo'ö huku andrö, ba si lö mamamalö-malö folau satulö!
4 Törö tödöu ndra'odo, ya'ugö Yehowa, dali wa'omasiu mbanuau andrö; fatörö khögu wangorifi andrö khöu.
5 Ena'ö anehe ndra'o wa'ohahau dödö nitutuyumö andrö; ena'ö omuso dödögu göi ba wa'omuso dödö mbanuau, ba ena'ö usuno ndra'o, awö dana khöu andrö.
II. Famasugi ba dödö horö Ndraono Gizeraeli ba danö Miserayi
[edit | edit source]6 No mafazökhi horö, si mane tuama andrö; no mo'olalöŵa ndra'aga, no malau zi lö sökhi.[2]
7 Lö saboto ba dödö duama ba danö Miserayi zahöli-höli dödö andrö khöu; lö itörö tödöra wa'afahöna wa'ebua dödöu andrö, ba molaŵa ba mbewe nasi andrö, ba nasi zukhu.[3]
8 Ba itolo ira, börö döinia andrö, ba wama'ele'ö fa'abölönia.
9 Ba ihede-hede'ö nasi zukhu andrö, ba otufo, ifatörö ira ba dalu hou andrö, nifamatörö ba danö si mate.
10 Ba i'efa'ö ira ba danga zi fatiu tödö khöra, ba danga zi fa'udu i'efa'ö ira.
11 Ba tebalugö asi zi fa'udu khöra andrö; samösa lö'ö si tosai.
12 Awena mamati ira ba daroma linia ba lasuno ia.[4]
III. Famasugi ba dödö horö Ndraono Gizeraeli ba danö si mate andrö
[edit | edit source]13 Ba lö ara, ba olifu ira nilaunia andrö, ba lö latöngöni dödönia andrö.
14 Ba tesao wangisö, ba danö si mate andrö, ba latandraigö Lowalangi ba danö si lö niha-niha.[5]
15 Ba ibe'e khöra zomasi ira, ba ifatörö khöra wökhö baosi.
16 Ba afökhö dödöra khö Mose ba golombaseŵa ba khö Ga'aroni, ni'amoni'ö Yehowa andrö.[6]
17 Ba asila danö, itölö Datano andrö, ibalugö zi fao khö Gabiramo andrö.
18 Te'ebua'ö galitö ba zangorudu ya'ira andrö, i'a alitö zanao horö andrö.
19 Lafazökhi nono zawi ba gahe hili Horebi, mangalulu ira ba wamaedo andrö, nifahele.[7]
20 Lafalalini lakhömira, lahalö wamaedo zawi si matua, si manga ndru'u.[8]
21 Olifu ira Lowalangi, sangorifi ya'ira, si no molau sebua andrö ba danö Miserayi.[9]
22 Sahöli-höli dödö ba danö ma'uwu Khamo andrö, ba sata'u niha ba nasi zukhu andrö.
23 Ba iŵa'ö tödönia, itakiko ira, na lö ibelegö ia mena'ö fönara Moze andrö, nituyunia, ba wangalösi fönunia, ena'ö lö ifakiko ira.[10]
24 Ba lö ba dödöra danö si sökhi andrö, ba lö lafati linia.[11]
25 Ba mukökö-kökö ira, baose andrö khöra, ba lö lafondrondrongo li Yehowa.
26 Ba fahölu ia khöra, ibözi tou ira ba danö si mate andrö,
27 ba ifazawili ma'uwura ba niha baero, ba danö niha bö'ö ifazaewe, iŵa'ö.
28 Ba la'olembai Mba'ali-Weoro andrö, la'a zumange zi lö noso [sumange nadu].[12]
29 Ba la'andrö wönunia folaura andrö, ba itörö ira famakao.
30 Ba maoso Wineha andrö, ba wangatulö, ba döhö wamakao andrö.
31 Ba tebe'e fa'atulö dödönia da'ö, götö-götö wa'ara, irugi zi lö aetu.[13]
32 Ba labaosi dödö Lowalangi, ba nidanö wasosota andrö, ba itörö Mose si lö sökhi, börö ira.[14]
33 Lafadaö sa'ae dödönia, ba iŵa'ö bewenia zi lö mutulo tödö.
IV. Famasugi ba dödö horö Ndraono Gizeraeli ba danö Gana'ana
[edit | edit source]34 Lö lahori soi niha andrö, niŵa'ö Yehowa khöra, nihori.[15]
35 Lafaruka ira ba niha baero andrö ba latöngöni wolaura.
36 Lafosumange nadura, ba tobali tandraŵa khöra da'ö.
37 Labe'e sumange mbekhu nonora matua, awö nonora alawe.[16]
38 Aduwa ndro zi lö horö labe'e, do nonora matua ba do nonora alawe, nibe'era sumange nadu Ndrawa Gana'ana; tobali teta'unöi danö do.
39 Togule khöra zi lö sökhi ba wolaura andrö; sohorö ira folaura andrö.
40 Ba tesao wönu Yehowa ba mbanuania andrö, ba i'ogorofi dana khönia.
41 Ibe'e ira ba danga niha baero andrö; ba samatörö ya'ira zi fatiu tödö khöra.[17]
42 Lafakao ira si fa'udu khöra, tehöndrögö ira barö mbawara.
43 Lö aetu i'orifi ira, ba no sabe'e tandro ira, ba nifakhai dödöra andrö, ba ahöndrö ira ba lalöra andrö.
V. Fangandrö fa'ahakhö dödö
[edit | edit source]44 Ba inehegö wamakaora andrö, me irongo wangarö-ngaröra.
45 Ba itörö tödönia khöra wawu'usa li andrö khönia ba aröuröu ba dödönia, balazi wa'ebua dödönia andrö.
46 Ibe'e falukha ira wa'ahakhö dödö zanaha ya'ira, fefu.
47 Orifi ndra'aga, ya'ugö Yehowa, Lowalangima, fuli ozaragö ndra'aga ba mbanua niha baero andrö, ena'ö ma'andrö saoha gölö, ba döimö andrö ni'amoni'ö, ena'ö masuno ndra'aga ba wanuno ya'ugö andrö![18][19]
48 Nisuno Yehowa, Lowalangi Ndraono Gizeraeli andrö, götö-götö wa'ara, ba ya lamane niha fefu: Ya duhu! Haleluya![20]
Famotokhi ba gahe
[edit | edit source]- ↑ Sin 107:1; 118:1; 136:1
- ↑ Dan 9:5
- ↑ MozII 14:11,12
- ↑ MozII 15
- ↑ MozIV 11:4–6
- ↑ MozIV 16
- ↑ MozII 32
- ↑ Rom 1:23
- ↑ MozV 32:18
- ↑ Hez 13:5
- ↑ MozIV 14:2–4
- ↑ MozIV 25:3
- ↑ MozI 15:6; MozIV 25:12
- ↑ MozIV 20:2–13
- ↑ MozV 7:1,2; 12:2,3; Sanguhuk 1:28
- ↑ MozIII 18:21
- ↑ Sanguhuk 2:14
- ↑ Ayati 47,48: Nga'ötI 16:35–36
- ↑ MozV 30:3
- ↑ Sin 41:14
Fabaliŵa lala
[edit source]Olayama Sinunö: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28 • 29 • 30 • 31 • 32 • 33 • 34 • 35 • 36 • 37 • 38 • 39 • 40 • 41 • 42 • 43 • 44 • 45 • 46 • 47 • 48 • 49 • 50 • 51 • 52 • 53 • 54 • 55 • 56 • 57 • 58 • 59 • 60 • 61 • 62 • 63 • 64 • 65 • 66 • 67 • 68 • 69 • 70 • 71 • 72 • 73 • 74 • 75 • 76 • 77 • 78 • 79 • 80 • 81 • 82 • 83 • 84 • 85 • 86 • 87 • 88 • 89 • 90 • 91 • 92 • 93 • 94 • 95 • 96 • 97 • 98 • 99 • 100 • 101 • 102 • 103 • 104 • 105 • 106 • 107 • 108 • 109 • 110 • 111 • 112 • 113 • 114 • 115 • 116 • 117 • 118 • 119 • 120 • 121 • 122 • 123 • 124 • 125 • 126 • 127 • 128 • 129 • 130 • 131 • 132 • 133 • 134 • 135 • 136 • 137 • 138 • 139 • 140 • 141 • 142 • 143 • 144 • 145 • 146 • 147 • 148 • 149 • 150
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö