Jump to content

Wb/nia/Samueli II/22

From Wikimedia Incubator
< Wb‎ | nia‎ | Samueli II
Wb > nia > Samueli II > 22

Sinunö Dawido, me no i'efa'ö ia ba danga nemalinia fefu Yehowa[edit | edit source]

1 Ba humede Dawido, manunö, ia khö Yehowa, me luo da'ö,[1] me no i'efa'ö ia Yehowa ba danga nemalinia fefu ba ba danga Zaulo, 2 imane: "Hili dödögu Yehowa ba wa'atosasagu ba sangorifi ya'odo. 3 Nahiagu saro Lowalangigu, ba khönia u'alui zaŵatö; balusegu ia ba tandru fangorifigu, hatigu ba saŵatögu, sangefa'ö ya'odo; ya'ugö zangefa'ö ya'o, na tefakao ndra'odo![2] 4 U'angaröfi li Yehowa, si nangea nisuno andrö, ba te'efa'ö ndra'o ba danga zi fatiu tödö khögu. 5 Noa sa ifasui ndra'o dulu, ba no ifeta'u ndra'o hohou famunu. 6 No mukabi ndra'o böbö si oroi mbanua tou ba no ihawui ndra'o tandraŵa famunu. 7 No mu'ao ndra'o ba wa'atosasagu andrö, ba no u'angaröfi li Lowalangigu: No ifondrondrongo ligu ba gödonia andrö ba no irugi dögi dalingania we'aogu andrö khönia. 8 Ifaigi — ba humeu danö; humisi dayadaya mbanua yaŵa ba mudögö, me no mofönu ia. 9 Manimbo nikhunia ba i'otarai mbawania alitö si manga hadia ia; humola mbo galitö, si oroi khönia. 10 Idada mbanua si yaŵa, möi ia tou, ba sogömi-gömi barö gahenia. 11 Ba hulu Kerubi möi ia, muhombo misa; manahanahae ia ba gafi nangi. 12 Ibali'ö balu-balunia zogömi-gömi, osenia fasui, salu ba lawuo saitö. 13 Moroi ba haga andrö fönania itörö lawuo andrö khönia, teu kara ba bo galitö. 14 Ba mu'ugu-ugu mbanua si yaŵa ibe'e Yehowa, ba ifarongogö linia Fondrege zalaŵa andrö. 15 I'efasi nono wana khönia, ifazawili ira, ba ilau gari mbanua, ikeani ira. 16 Ba oroma nungo nidanö, ba aheta mbalu-balu dayadaya danö, ba wanegumö andrö, ya'ugö Yehowa, ba wangöhöfu geheha nikhumö andrö. 17 I'oro'ö dangania moroi si yaŵa, ira'udo, isöbido moroi ba nidanö sebua. 18 Ifadöni ndra'o ba nemaligu andrö, si no abölö, ba ba zi fatiu tödö khögu, me no tebai ulaŵa ira. 19 No lahawui ndra'o, me baŵa wa'ate'alagu, ba no tobali fanologu Yehowa. 20 Ba no i'ohe baero ndra'o, ba zebolo tanö; no i'efa'ö ndra'odo, me no omasi ia ndra'o. 21 No isulöni khögu wa'atulö dödögu Yehowa; no ibe'e khögu zulö, dali wa lö hadia ia zi falemba ba dangagu. 22 Noa sa utörö lala Yehowa, lö solalö ndra'o ba khö Lowalangigu. 23 Noa sa so ba gametahögu huku andrö khönia, fefu, ba amakhoitania andrö, ba lö ni'aröu'ögu khögu. 24 No adölö dödögu khönia, ba no ata'u ndra'o ulau zi lö atulö. 25 Ba no isulöni khögu wa'atulö dödögu andrö Yehowa, dali wa lö hadia ia zi falemba ba dangagu, wamaiginia. 26 Ba zebua tödö ebua dödöu, ba ba zadölö tödö adölö dödöu. 27 Ba zohau-hau ohau-hau ndra'ugö, ba ba zabila tödö abila göi ndra'ugö.[3] 28 Ya'ugö sa zanolo niha si göna famakao, ba öhöndrögö hörö zi fayaŵa, fefu.[4] 29 Ya'ugö sa zamohaga fandrugu, ifohaga zogömi-gömi andrö khögu Yehowa, Lowalangigu. 30 Na ötolodo, ba ududugö göli kara, ba na awögu Lowalangigu, ba usawö mba'a-ba'a.[5] 31 Lala Lowalangi andrö, ba no so'ahonoa! Taroma li Lowalangi andrö, ba si no ohaohao, baluse ia ba zangalui saŵatö khönia, fefu. 32 Ha niha sa Lowalangi, baero Yehowa andrö? Ba ha niha nahia saro, baero Lowalangida? 33 Lowalangi andrö, same'e böbö talugu fa'abölö, ba sangehao lala khögu. 34 Samali'ö ahe mböhö ahegu ba samataro ya'o ba zalaŵa yaŵa. 35 Samahaö tangagu ba wasöndrata ba ta'iogu ba wogai fana töla. 36 Ba no öbe'e khögu mbaluse fangorifi andrö khöu, ba fa'ebua dödöu wangebuagu. 37 No ö'ebolo'ö naha gahegu, ba lö sangiwa mbu'u kawonogu. 38 No ugohi nemaligu ba no ukhamö, ba lö nifuligu ya'o furi, balazi no ufakiko ira. 39 No ufakiko ira, ba no urasa, tobali lö'ö sa'ae maoso ira; tegaölö tou ira barö gahegu. 40 Ba no öfamöbö talu ndra'o fa'abölö, ba wasöndrata, no öfaöndrö barögu zi fa'udu khögu. 41 Moloi nemaligu andrö öbe'e; ba si fatiu tödö khögu ba no uhori! 42 Mangarö-ngarö ira, ba lö sangorifi — khö Yehowa, ba lö itema lira. 43 Ba no ufufu ira, timba gawu-gawu ba danö, uhundrahundra ira, timba dambu baewali, uduwagö. 44 No ö'efa'ö ndra'o ba wasöndrata niha, no öfataro högö soi niha ndra'odo: tobali möi barö mbawagu niha si lö urai mila. 45 Ha larongo ligu, ba la'o'ö khögu, lahaogö-haogö wehedera khögu ono niha bö'ö. 46 Sariri nono niha bö'ö, laröi gödora, manizi-nizi. 47 Sauri Yehowa, ba nisuno nahiagu saro andrö, ba ni'ebua'ö döi Lowalangi fangorifogu andrö! 48 Lowalangi andrö, si no manolo ya'o ba wolau balö, si no mame'e barö mbawagu soi niha. 49 Sangefa'ö ya'o ba nemaligu andrö, ba no öbe'e yaŵa zi fa'udu khögu ndra'odo; no ö'efa'ö ndra'o ba danga niha andrö samakao awönia. 50 Andrö usuno ndra'ugö ba niha baero, ya'ugö Yehowa; usuno döimö. 51 Ya'ugö, sangebua fangorifi ba razo andrö khönia, ba sangebua tödö ba nibayoininia andrö, khö Dawido ba ba ma'uwunia, irugi zi lö aetu."

Famotokhi ba gahe[edit | edit source]

  1. Faigi göi Sin 18
  2. Luk 1:69
  3. MozIII 26:24
  4. Sin 113:7
  5. SamI 17:45

Fabaliŵa lala[edit source]

Olayama Samueli II: 123456789101112131415161718192021222324

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö