Wb/nia/Samueli II/13

Ihoröni Damara andrö Amoni

I. 1 Ba so nakhi Gabisalomi ono Dawido, ono alawe si sökhi si'ai bawa, Tamara döi. Ba tobali omasi Gamoni, ono Dawido Damara andrö. 2 Ba tobali abu sibai dödö Gamoni, irege mofökhö ia, börö nakhinia Tamara andrö. Ono alawe Damara, ba lö isöndra lala Amoni, ba wa'orudu khönia. 3 Ba so zi fahuwu khö Gamoni, Yonadabi döi, ono ga'a Dawido, Simea; ba no niha sonekhe sibai Yonadabi andrö. 4 Ba imane da'ö khö Gamoni: Hana wa ariri ma'ökhö ndra'ugö, ono razo? Hadia, lö ö'ombakha'ö khögu? Ba imane khönia Amoni: Omasido Damara, akhi nakhigu Abisalomi. 5 Ba imane khönia Yonadabi: Ae mörö, ö'osofökhö ndra'ugö, ba na so namau, ba wamaigi ya'ugö, ba ömane khönia: Ena'ö na möi ba da'e nakhigu Tamara, ba wame'e gögöe ma'ifu! Na i'asiwai gö ba zanehe ndra'o, na i'ila hörögu, ba u'a zoroi ba dangania. 6 Ba möi mörö Gamoni i'osofökhö ia. Ba me so razo, ba wamaigi ya'ia, ba imane Amoni khö razo: Ena'ö na möi ba da'e nakhigu Tamara, ba wogore kue, dua görö, ba zanehe ndra'o, ena'ö u'a zoroi ba dangania! 7 Ba ifatenge Dawido, ba nomonia, khö Damara, imane khönia: Ae ba nomo ga'au Amoni ba halö gönia. 8 Ba möi ba nomo ga'ania Amoni Damara, me mörö-mörö Gamoni. Ihalö gomböila roti, iferafera, ifazökhi, ba zanehe ia, ba igore kue andrö. 9 Ba humede ia ba zangai halöŵö ba itou'ö tou föna Gamoni kue andrö. Ba lö edöna manga Gamoni. Imane sa: Dozi ndramöi baulu. 10 Ba dozi ira, ba möi baulu. Ba imane Amoni khö Damara: Ohe si bakha sibai gö andrö, ba u'a ba dangau. Ba ihalö kue andrö Tamara, i'ohe khö ga'ania Amoni si bakha sibai. 11 Ba me i'oro'ö khönia, ba ira'u ia, imane khönia: Förö ba ngaigu, akhi! 12 Ba imane khönia: Böi ga'a, böi höwö ndra'odo, tenga si manö wolau ba Ndraono Gizeraeli: böi fazökhi horö si manö! 13 Heza sa u'ohe wa'ailagu andrö? Ba tobali awö zebua horö ndra'ugö, ba Ndraono Gizeraeli, ena'ö: sökhi na öŵa'ö khö razo, lö zi lö ilulu ndra'o khöu! 14 Ba lö edöna ifondrondrongo linia, ilangögö manö, ihöwö, orudu ia khönia. 15 Ba aefa da'ö, ba anuzu sibai dödö Gamoni ia; abölö sa'ae wa'anuzu dödönia khönia, moroi ba wa'omasinia ia mege. Ba imane khönia Amoni: Faoso, labu'ögö! 16 Ba imane khönia: Böi ga'a! Na öfofanö ndra'o, ba ebua horö da'ö, moroi ba nilaumö khögu mege! Ba lö ifondrondrongo khönia, 17 humede sa'ae ia khö nono matua andrö, ngoni-ngoninia, imane: Ohe tou baewali da'e khögu, ba lazi mbawandruhö furinia! 18 Ba baru si so ta'io mbarunia — si manö sa mbaru nono razo alawe, i'otarai föna sa'ae, götö wa ono alawe ira —. Ba me no i'ohe tou Damara baewali ngoni-ngoni Gamoni andrö ba me no ilazi mbawandruhö furinia, ba ilau nawu ba högönia, 19 Tamara, ba ire'a mbarunia andrö, si so ta'io, ba itufa tanga högönia, ba mofanö, mu'ira-ira. 20 Ba imane khönia ga'ania Abisalomi: Hadia, no orudu khöu ga'au Amoni? Ba böi hede-hede, ya'ugö akhigu — no ga'au ia! Böi busi dödöu da'ö! Ba i'iagö yomo khö ga'ania Abisalomi Tamara, sabu tödö. 21 Ba me irongo da'ö fefu Dawido, ba mofönu sibai ia, ba lö edöna ia ibusi dödö Gamoni, me no omasi ia Gamoni, me no si a'a nononia. 22 Ba lö fahede Gabisalomi khö Gamoni, sambua li lö'ö, he si lö sökhi, ba he si sökhi; noa sa abao sibai dödö Gabisalomi khö Gamoni, me no ihöwö nakhinia Tamara andrö.

Ilau mbalö Abisalomi ba moloi ia, isaŵa Gesuri

II. 23 Ba mendrua fakhe aefa da'ö, ba samuza ma'ökhö, ba moguti bu mbiri-biri Gabisalomi, ba Mba'ali Hasora, ba nola mado Geferayi; ba ikaoni ba da'ö nono razo fefu Abisalomi. 24 Ba möi khö razo göi Gabisalomi, imane: ö'ila, moguti bu mbiri-biri zawuyumö, ena'ö na möi göi razo, awö genoninia! 25 Ba imane razo khö Gabisalomi: Böi, onogu! Böi ahori möi ndra'aga, fa böi möiga noro dödöu! Ba iforege khönia, ba lö edöna möi razo, ifofanö ia. 26 Ba imane Abisalomi: Ba na lö möi'ö, ba hana na ga'agu Amoni zi möi awöma. Ba imane razo: Hana wa ya'ia zi möi awöu? 27 Ba me iforege wangandrö, ba ifatenge awönia Gamoni ba ono razo fefu. Ba ifodiwo ira Abisalomi, si mane na ibe'e gö niha razo. 28 Ba ibe'e li ba zangai halöŵö khönia Abisalomi, imane: Na no mabu agu ma'ifu Gamoni, ba na umane khömi: Mi'ö'ötö Gamoni! Ba mibunu ia! Böi mi'abusi tödö: ya'odo sa zanguma'ö khömi — mi'abe'e'ö dödömi, ya sabölö ami! 29 Ba la'o'ö da'ö sangai halöŵö khö Gabisalomi, ba khö Gamoni, dali niŵa'ö Gabisalomi. Ba maoso nono razo fefu, möi ira yaŵa ba hulu kudo kalide khöra ba moloi ira. 30 Ba me so ba lala na ira, ba no irongo duria da'ö Dawido, no lamane khönia: No ahori ibunu nono razo Abisalomi, samösa lö si tosai! 31 Ba maoso razo, isika nukhania, ba ifadölö tou ia ba danö; ba lasika göi nukhara enoninia fefu, si so ba ngainia. 32 Ba humede Yonadabi andrö, ono ga'a Dawido Simea, imane: Böi faduhu dödöu, ya'ugö sokhö ya'o, wa no ahori labunu nono matua andrö, ono razo: ha Amoni zi mate, noa sa oroma wa'abao mbawa Gabisalomi, i'otarai luo, me ihöwö Damara Amoni. 33 Ba böi yamuŵa'ö tödönia sokhö ya'o, razo, no ahori mate nono razo — ha sa Amoni zi mate. 34 Ba moloi Gabisalomi. Ba me ifakhölö ia enoni andrö, sanaro, ba i'ila, ato niha si otarai moroi yaŵa ba hili, ba lala ba Horona'i. Ba so zanaro andrö, i'ombakha'ö khö razo, imane: No u'ila niha moroi yaŵa ba hili ba lala ba Horona'i. 35 Ba imane Yonadabi khö razo: Hiza, so nono razo: itörö niŵa'ö zawuyumö. 36 Ba me aefa sibai iŵa'ö da'ö, ba larugi sa'ae ono razo ba mege-ege. Ba mege-ege sibai göi razo ba enoninia andrö fefu. 37 Ba lö mamalö-malö wa'abu dödö razo khö nononia andrö. Ba no moloi Gabisalomi, isaŵa Dalamai andrö, ono Gamihudi, razo Gesuri. 38 Ba medölu fakhe ia ba da'ö. 39 Ba humulu dödö razo, ena'ö falukha ia khö Gabisalomi; noa sa irara dödönia ba wa'amate Gamoni.

Famotokhi ba gahe

Fabaliŵa lala

Olayama Samueli II: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö