Jump to content

Wb/nia/Samueli II/5

From Wikimedia Incubator
< Wb‎ | nia‎ | Samueli II
Wb > nia > Samueli II > 5

Tobali razo ba Ndraono Gizeraeli fefu Dawido[edit | edit source]

I. 1 Ba owulo khö Dawido ba Heberona mado Ndraono Gizeraeli fefu, lamane khönia: Hiza, no föföu ndra'aga![1][2] 2 No ara ae, me razoma na Zaulo, ba no ya'ugö sa'ae zolohe Iraono Gizeraeli ba wasuwöta ba solohe mangawuli ya'ira. Ba noa na ifabu'u khöu Yehowa, manguma'ö: Ya'ugö dania zokubaloi banuagu Iraono Gizeraeli ba razora ndra'ugö![3] 3 Ba la'ondrasi razo ba Heberona satua Ndraono Gizeraeli fefu, ba fawu'u li ira razo, Dawido, ba da'ö, ba Heberona, föna Yehowa, ba labayoini razo Ndraono Gizeraeli Dawido.[4] 4 Tölu ngafulu fakhe Dawido, me tobali razo ia; ba öfa wulu fakhe wa'ara razo ia.[5] 5 Ba Heberona, ba mewitu fakhe a matonga razo ia ba mado Yuda, ba ba Yeruzalema, ba tölu ngafulu a tölu fakhe, ba Ndraono Gizeraeli ba ba mado Yuda, fefu.

Isuwö Yeruzalema ba atu'a ia, ba ibali'ö banua razo. Ononia si tumbu ba da'ö[edit | edit source]

II. 6 Ba me möi ba Yeruzalema razo, me i'ohe zabölö andrö khönia, ba wanuwö Iraono Yebusi, sowanua ba danö andrö, ba lamane khö Dawido: Tebai ösösö da'ö; sau'a ba sombuyu-mbuyu töla zanimba ya'ugö; eluahania: tebai ilaŵa ira Dawido. 7 Ba atu'a Dawido ba hati Siona andrö, ya'ia mbanua Dawido andrö. 8 Me luo da'ö, ba imane Dawido: Ha niha zame'e te'ala Ndraono Yebusi ba sau'a andrö ba sombuyu-mbuyu töla andrö, si fatiu tödö Dawido [ba tabe'e högö ba kumandra ia]. Andrö wa lawa'ö: "Lö möi yomo niha sau'a ba sombuyu-mbuyu töla." 9 Ba i'iagö hati andrö Dawido ba ibe'e töinia mbanua Dawido. Ba i'aro'ö na Dawido, fasui, i'otarai Milo andrö, ba numalö miyomo. 10 Ba itugu tedou wa'abölö Dawido, itolo ia Yehowa, Lowalangi ngahönö.[6] 11 Ba ifatenge zinenge khö Dawido Hiramo, razo Diro, ifa'ohe'ö geu, eresi, ba fao duka, sotomo, ba sanoto kara, ba wangotomosi gödo khö Dawido.[7] 12 Ba aboto ba dödö Dawido, wa no i'aro'ö ia razo Ndraono Gizeraeli Yehowa, awö wa no i'ebua'ö wa'asalaŵania, börö mbanuania andrö, Iraono Gizeraeli. 13 Ba ba Yeruzalema, ba itohugö na Dawido wangai ira alawe, donga ba döi ösa, ba si ndruhu ndronga ösa, me no aheta ia ba Heberona, ba tumbu-tumbu na khönia ndraono, ono matua ba ono alawe. 14 Ba töi zi tumbu khönia ba Yeruzalema, ba Samua ba Sobaba ba Natano ba Selomo,[8] 15 ba Yibihari ba Elizua ba Nefegi ba Yafia, 16 ba Elizama ba Beliada ba Elifeleti.

Mendrua te'ala Ndrawa Wilisiti ibe'e Dawido[edit | edit source]

III. 17 Ba me larongo Dawa Wilisiti, wa no labayoini razo Ndraono Gizeraeli Dawido, ba so ira moroi si tou, dozi ira, ba wondra'u Dawido. Ba terongo khö Dawido ba möi ia mitou ba hati. 18 Be me no larugi danö Dawa Wilisiti, me no tebato ira ba ndraso ba Refa'i, 19 ba isofu khö Yehowa Dawido, imane: Hadia, ufaondragö miyaŵa Ndrawa Wilisiti? Hadia, öbe'e ba dangagu ira? Ba imane Yehowa khö Dawido: Ae'e, lö zi lö ube'e ba dangau Ndrawa Wilisiti.[9] 20 Ba irugi Mba'ali Werasi Dawido. Ba me no ilau khöra ba da'ö Dawido, ba imane: No ifabali fönagu nemaligu Yehowa, si mane na ihanigö hadia ia idanö; andrö wa labe'e töi naha andrö Mba'ali Werasi. 21 Ba laröi furi ba da'ö nadura, ba lahalö ira Dawido. 22 Ba mangawuli zamuza tö Ndrawa Wilisiti ba lahawui ndraso andrö ba Refa'i. 23 Ba me isofu khö Yehowa Dawido, ba imane khönia: Böi faondragö ira miyaŵa, fasui ira moroi furi ba ö'otarai mbörö keretau andrö wolau khöra. 24 Ba na örongo ruru zanörö ba hogu geretau andrö, ba labu, noa sa mowaö-waö fönau Yehowa, ba da'ö, ba wolau ba Ndrawa Wilisiti, ba zanuwö andrö. 25 Ba i'o'ö Dawido niŵa'ö Yehowa khönia, ba te'ala Ndrawa Wilisiti ibe'e, i'otarai Gibeona, irugi misa Gezeri.

Famotokhi ba gahe[edit | edit source]

  1. Ayati 1—10: Nga'ötI 11:1—9
  2. Faigi 19:13
  3. SamI 13:14; 25:30
  4. Faigi 2:4; SamI 16:13
  5. RazI 2:11; Nga'ötI 29:27
  6. Faigi 3:1
  7. Ayati 11—25: Nga'ötI 14:1—16
  8. Luk 3:21; Mat 1:6
  9. SamI 30:8

Fabaliŵa lala[edit source]

Olayama Samueli II: 123456789101112131415161718192021222324

Amabu'ulali Siföföna: Moze IMoze IIMoze IIIMoze IVMoze VYosuaSanguhukuRutiSamueli ISamueli IIRazo IRazo IINga'ötö INga'ötö IIEseraNehemiaEsiteraYobiSinunöAmaedola ZelomoSangombakhaSinunö SebuaYesayaYeremiaNgenu-Ngenu YeremiaHezekieliDanieliHoseaYoeliAmosiObadiaYonaMikhaNakhumiHabakukiSefaniaHagaiSakhariaMaleakhi

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö