Jump to content

Wb/nia/Heberaio/11

Add links
From Wikimedia Incubator
< Wb | nia | Heberaio
Wb > nia > Heberaio > 11

Amuata wamati andrö

[edit | edit source]

I. 1 Ba famati andrö, ba no fa'a'ro dödö ba nidöna-döna andrö, fa'afaduhu dödö ba ngawalö, hadia ia, si lö oroma.[1] 2 Ba khönia sa lasöndra satua föna, wa tefaduhu'ö ira. 3 Moroi ba wamati aboto ba dödöda, wa no taroma li Lowalangi wamazökhi danö'a, wa no tobali tenga moroi ba zoroma tumbu zoroma andrö,[2]

Fa'abölö wamati ndra tua föna

[edit | edit source]

II. 4 Moroi ba wamati, wa no sökhi zumange andrö, nibe'e Habeli khö Lowalangi, moroi ba nibe'e Ka'ino, ba moroi ba da'ö tefaduhu'ö ia, wa satulö ia, me ifaduhu'ö game'elania Lowalangi, ba moroi ba da'ö göi, wa muhede ia na, he ŵa'ae no mate ia.[3]

5 Moroi ba wamati, wa teheta Khenoki, fa lö i'ila wa'amate, ba lö lasöndra ia, me no iheta ia Lowalangi; föna wangeheta ya'ia sa'ae tefaduhu'ö ia, wa no somasi Lowalangi ia.[4] 6 Ba na lö famati, ba tebai i'omasi'ö niha Lowalangi: Sangondrasi Lowalangi ena'ö ba lö'ö sa tola lö mamati ia, so Lowalangi, ba ifoluo zangalui ya'ia andrö.

7 Moroi ba wamati, wa ilau nowo andrö Noakhi, ba wangorifi si samba omo ya'ira, me no ibokai khönia Lowalangi zi lö oroma na; i'ata'ufi; ba da'ö i'etu'ö huku niha guli danö, ba tobali sanema fa'atulö dödö ba wamati ia.[5]

8 Moroi ba wamati, wa molo'ö Gaberahamo, me tekaoni ia, wa awu'a ia, wa isaŵa danö, nibe'e ondröita mitou dania khönia, ba mofanö ia, he lö'ö na i'ila, heza isaŵa.[6]

9 Moroi ba wamati, wa si fatewu ia, ba danö amabu'ula li andrö, ba danö niha bö'ö ua, ose nahiania, ba si manö göi khö Giza'aki ba khö Yakobo, awönia sanema amabu'ula li andrö göi.[7] 10 Ibaze-baze'ö sa mbanua andrö, saro dane-dane, ba zi no möi tuka ba sotomo Lowalangi.[8]

11 Moroi ba wamati göi, wa isöndra wa'abölö Sara andrö, ba wamobörö nga'ötö, ba lö lai wa no numalö ndröfinia, me no faduhu dödönia, ba zamabu'u andrö.[9]

12 Andrö göi moma'uwu zi ha samösa andrö, ba si no mate, taŵa'ö, timba ndröfi ba mbanua yaŵa wa'ato, ba timba nene ba mbewe nasi andrö, si tebai la'erai ngawua.[10] 13 Ba ba wa'amate da'ö fefu, ba dali wamati, lö si falukha ira amabu'ula li andrö, ha moroi ba zaröu la'ila, ba la'owai, ba la'ombakha'ö, tome ira ba si fatewu, ba guli danö andre.[11] 14 Sanguma'ö da'ö sa, ba la'ombakha'ö, wa la'alui zi ndruhu mbanuara. 15 Ba na da'ö niŵa'öra, ba zi otarai ira, ba fakhamö mena'ö, mangawuli ira. 16 Ba me tenga da'ö, ba si sökhi ni'aluira, ya'ia zi so ba zorugo. Andrö wa lö aila khöra Lowalangi, na labe'e töinia Lowalangira; noa sa itaru'ö khöra mbanua.[12]

17 Moroi ba wamati, wa ibe'e sumange Giza'aki andrö Aberahamo, me tetandraigö ia, ononia si ha sambua andrö ibe'e sumange, ya'ia si no manema amabu'ula li andrö.[13] 18 ba zi no muŵa'ö: "Ba khö Giza'aki tefotöi khöu nga'ötö."[14] 19 Da'ö dödönia, he moroi ba ngai zi mate, ba i'ila isusugi Lowalangi, moroi ba da'ö göi itema mangawuli ia, me ilulu.[15]

20 Moroi ba wamati, wa ifahowu'ö ndra Yakobo Ezau Iza'aki, ba zi falukha ira dania.[16]

21 Moroi ba wamati, wa faoma ifahowu'ö nono Yosefo andrö Yakobo, me arakha mate ia, ba mangalulu ia faudu högö zi'onia.[17]

22 Moroi ba wamati, wa itörö li Yosefo wa'awu'a Ndraono Gizeraeli andrö, me mate ia, ba ibe'e goroisa, ba wolohe botonia.[18]

23 Moroi ba wamati, wa labini'ö Moze ira inania, me sawena tumbu, tölu waŵa wa'ara, me la'ila, si sökhi nono andrö, ba lö la'ata'ufi goroisa razo andrö.[19]

24 Moroi ba wamati, wa lö ba dödö Moze, na laŵa'ö ono nono Wara'o alawe ia, me no ebua ia,[20] 25 awö wa abölö omasi ia, itaögö wamakao, awö mbanua Lowalangi, moroi isöndra wa'omuso dödö ba horö, si lö arara; 26 ba dödönia, ebua hare ba wango'aya andrö, khö Keriso, moroi ba gana'a Miserayi andrö; famoluo dania sa ifaigi.

27 Moroi ba wamati, wa iröi danö Miserayi, wa lö i'ata'ufi wönu razo andrö; i'olembai sa'ae zi lö oroma andrö, hulö na no i'ila.[21]

28 Moroi ba wamati, wa ilau wasa andrö, awö wamaduwa do andrö, fa böi ibabaya ira samunu ono si a'a andrö.[22]

29 Moroi ba wamati, wa latörö nasi soyo andrö, hulö na tanö sabe'e, ba zalömö Ndrawa Miserayi, me latandraigö göi.[23]

30 Moroi ba wamati, wa adudu göli kara andrö, ba Yerikho, me no fitu bongi lafasui.[24]

31 Moroi ba wamati, wa lö tekiko Rakhaba andrö, sohorö andrö, awö zi lö molo'ö, me no ifa'amöi yomo khönia zamauze andrö, me no ihaogö khöra.[25]

32 Ba hadia niŵa'ögu na ena'ö? Lö'ö sa fakhamö, na udunö-dunö ena'ö, hadia ia ba khö Gideono andrö, ba ba khö Mbaraki, ba ba khö Zimesono, ba ba khö Yefita ba ba khö Dawido ba ba khö Zamueli andrö, ba ba zama'ele'ö andrö.[26] 33 Si no molaŵa banua bö'ö, ba wamati, si no mamalua satulö, si no manema amabu'ula li, si no mondruhö bawa zingo,[27] 34 si no mamunu fa'abölö galitö, si no aefa ba mbawa zi'öli, si no mogamö fa'abölö, he si lö abölö, mböröta, si no abölö ba wanuwö, si no manimba sabölö niha bö'ö.[28]

35 No ba wemaoso, moroi ba ngai zi mate, latema mangawuli zi mate khöra ira alawe; ba so niforöfa, sanimba fangefa, ena'ö lakhamö wemaoso si sökhi,[29] 36 ba so zi no falukha fango'aya ba famözi-mözi, awö mböbö, ba awö gurunga;[30] 37 no latebu kara ira, no lafakao, no lasila, mate ira nibunu si'öli, mowaö-waö ira, uli mbiri-biri nukhara, ba ma uli nambi, no falukha ira wa'ambö, ba fa'afökhö, ba famakao.[31]

38 Ya'ira andrö, si tenga si nangea awö niha guli danö mena'ö; ba danö si mate misa elungu-lungu ira, ba ba hili misa, ba ba dögi narö gara, ba ba zo'arö hili.[32] 39 Ba da'ö fefu, ba lö nikhamöra amabu'ula li andrö, he ŵa'ae no nifaduhu'ö ira, moroi ba wamati andrö; 40 me no ihönagö ifaigi khoda zi sökhi Lowalangi, ena'ö böi mo'ahonoa ira lö ya'ita.[33]

Famotokhi ba gahe

[edit | edit source]
  1. ↑ Rom 8:24-25; KorII 4:18
  2. ↑ Rom 1:20; Sin 33:6; Yoh 1:3
  3. ↑ MozI 4:4 b.t.; Mat 23:35
  4. ↑ MozI 5:24
  5. ↑ MozI 6:9-22; FetII 2:5; Rom 3:22
  6. ↑ MozI 12:1-4; Rom 4:1 b.t.
  7. ↑ MozI 12:7 b.t.; 15:13
  8. ↑ Faigi 12:22; 13:14
  9. ↑ MozI 18:10; 21;2,7; Rom 4:20,21
  10. ↑ Rom 4:19; MozI 15:5
  11. ↑ MozI 47:9; Sin 39:13
  12. ↑ MozII 3:6
  13. ↑ MozI 22:1 b.t.
  14. ↑ MozI 21:12; Rom 9:7
  15. ↑ Rom 4:17
  16. ↑ MozI 27:28; 39
  17. ↑ MozI 48:1-20; 47:31
  18. ↑ MozI 50:24-25
  19. ↑ MozII 2:2
  20. ↑ MozII 2:10,11
  21. ↑ MozII 12:41; 10:28
  22. ↑ MozII 12:3-14
  23. ↑ MozII 14:16-31
  24. ↑ Yos 6:1-20
  25. ↑ Yos 2:1 b.t.; 6:17 b.t.
  26. ↑ Sanguhuk 6:11; 4:6; 13:24; 11:1; Sin 78:70 b.t.; SamI 3:20; HalZin 3:24
  27. ↑ SamII 8:1-14; SamI 12:3-4; Dan 6:22
  28. ↑ Dan 3:25 b.t.; RazI 19:1-3; RazII 20:7; Sanguhuk 15:8,15; 16,28; 7:13,22
  29. ↑ RazI 17:18 b.t.; RazII 4:32 b.t.
  30. ↑ MozI 39:20; Yer 20:2
  31. ↑ RazI 21:13; 19:10; RazII 1:8; Yak 5:10; HalZin 7:52
  32. ↑ RazI 18:4; 19:4
  33. ↑ Faigi 8:6

Fabaliŵa lala

[edit source]

Olayama Zura Heberaio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Heberaio/11&oldid=6229860"