Wb/nia/Fama'ele'ö/17

From Wikimedia Incubator
< Wb‎ | nia‎ | Fama'ele'ö
Wb > nia > Fama'ele'ö > 17

Babilona andrö[edit | edit source]

I. 1 Ba so mala'ika, samösa, awö zi dafitu andrö, si so mako andrö, si fitu, humede ia khögu, imane: Tabu, da'u'oroma'ö khöu wanguhuku sohorö sebua andrö, sidadao yaŵa nidanö sebua andrö. [1]

2 Nihoröni razo andrö ba guli danö; ba no mabu zowanua ba guli danö agu wohorönia andrö. [2]

3 Ba i'ohe ndra'o ba danö si mate; no aheta nosogu. Ba u'ila ndra alawe sidadao ba hulu zaliŵa-liŵa ba danö, soyo kirimisi, safönu töi wanandraŵaisi, fitu högö ba fulu rozi dandru. [3]

4 Ba nukha ndra alawe andrö, ba no baru luo ungu ba baru luo kirimisi, ba no mufo'aya ana'a ba indra-indra ba mani-mani, ba so ba dangania mako ana'a, safönu horö, awö zi ta'unö, ba wohorönia andrö. [4]

5Ba ba gangangonia, ba no musura döi, si lö aboto ba dödö niha: Babilona sebua andrö, ina zohorö ba ina hokha andrö, ba guli danö. [5]

6 Ba u'ila mabu ndra alawe andrö do ni'amoni'ö andrö, ba do zamaduhu'ö Yesu. Ba ahöli-höli sibai dödögu me u'ila ia. [6]

Eluahania ba eluaha zaliŵa-liŵa ba danö[edit | edit source]

II. 7 Ba imane khögu mala'ika andrö: Hana wa ahöli-höli dödöu? Da'u'ombakha'ö khöu zi lö aboto ba dödö niha andrö, ba ndra alawe andrö, ba ba zaliŵa-liŵa ba danö andrö, solu'i ya'ia, si fitu högö, ba si fulu rozi tandru.

8 Saliŵa-liŵa ba danö andrö ni'ilau, ba no so föna ba lö ya'ia iada'e, ba möi ia miyaŵa dania i'oroi gawuwukha, ba isaŵa wa'atekiko; ba ahöli-höli dania dödö zowanua ba guli danö andrö, si lö musura töi ba zura wa'auri andrö, i'otarai wamobörö danö'a, na la'ila zaliŵa-liŵa ba danö andrö, me no so ia föna, ba me lö ya'ia iada'e, ba me so dania. [7]

9 Ba da'e moguna dödö, si so fa'atua-tua! Högö andrö, si fitu, ba fitu hili dadaoma ndra alawe andrö; [8]

10 ba razo, dafitu. Si dalima, ba no tekiko, si samösa ba so iada'e, ba si samösa zui ba lö si so na, ba na so ia ba lö tola ara ia.

11 Ba saliŵa-liŵa ba danö andrö, si no so föna, ba si lö'ö iada'e, ba ya'ia wanete zi dafitu andrö, ba samösa ia ba zi dafitu andrö, ba isaŵa wa'atekiko.

12 Ba tandru andrö, si fulu rozi, ni'ilau, ba no razo, dafulu, si lö sanema na amatöröŵa, ba lasöndra wa'abölö razo, saza wa'ara, awö zaliŵa-liŵa ba danö andrö. [9]

13 Ha sara dödö da'ö, ba labe'e ba zaliŵa-liŵa ba danö andrö wa'abe'era ba fa'abölöra.

14 Ya'ira zi fasuwö dania ba Nono mbiri-biri andrö, ba abölö Nono mbiri-biri moroi khöra, me no So'aya sokhö ia, ba me razo razo, ba awönia andrö, ba no nikaoni ba nitutuyu ba si lö faröi. [10]

15 Ba imane khögu: Idanö andrö, ni'ilau, ba zidadao zohorö andrö, ba no ngawalö mado da'ö, ba niha sato, ba ngawalö soi, ba ngawalö li. [11]

16 Ba tandru andrö, si fulu rozi, ba saliŵa-liŵa ba danö andrö, ba ya'ira zi fatiu tödö ba zohorö andrö, ba ha ya'i-ya'ia labe'e, ba si lö nukha, ba la'a nösinia ba latunu ia, ba galitö. [12]

17 Noa sa ibe'e ba dödöra Lowalangi wamalua gera'erania, ba folau si ha sara dödö, ba fame'e amatöröŵara ba zaliŵa-liŵa ba danö andrö, irege te'o'ozui niŵa'ö Lowalangi andrö.

18 Ba ira alawe andrö, ni'ilau, ba ya'ia mbanua sebua andrö, samatörö razo, ba guli danö. [13]


Famotokhi ba gahe[edit | edit source]

  1. Faigi 15:6 b. t.; 16:19; Nakh 3:4
  2. Faigi 18:3-9
  3. Faigi 13:1 b. t.
  4. Faigi 18:16
  5. Tes II 2:7. F 14:8; 18:2-10
  6. Faigi 18, 24
  7. Faigi 11: 7; 20:12-15
  8. Faigi 13:1-18
  9. Faigi 13:1; Dan 7:20-24
  10. Faigi 16:14; 19:16 b. t. Tim I 6:15; Mat 24:31
  11. Sin 93:3
  12. Faigi 18: 7-8
  13. Faigi 16:19


Fabaliŵa lala[edit source]

Olayama Zura Fama'ele'ö: 12345678910111213141516171819202122

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö