Wb/nia/Fama'ele'ö/22
He wisa na Yeruzalema si bohou andrö[edit | edit source]
I. 1 Ba i'oroma'ö khögu zara nungo nidanö fangorifi, no ohahau, hulö mbaluri, si otarai dadaoma Lowalangi andrö ba dadaoma Nono mbiri-biri andrö,[1] 2 ba dalu golayamania; ba faoma fatambai nidanö andrö, ba eu fangorifi andrö, mewelendrua mowua, sara-sara waŵa, ba so mbuania. Ba bulu geu andrö, ba famadöhö wökhö soi niha baero andrö.[2]
3 Ba lö'ö sa'ae fangelifi, hadia ia. Ba so khönia dadaoma Lowalangi, ba dadaoma Nono Mbiri-biri andrö. Ba lafosumange ia enoninia andrö.[3] 4 Ba la'ila mbawania, ba so ba gangangora döinia.[4] 5 Ba lö si bongi sa'ae. Ba lö moguna khöra haga wandru, ba he haga luo, me ihagaini ira So'aya, Lowalangi, ba salaŵa ira, irugi zi lö aetu.[5]
Tenga faya wama'ele'ö andrö[edit | edit source]
II. 6 Ba imane khögu: Si lö tebulö ba si ndruhu daroma li andre. Ba So'aya andrö, Lowalangi Geheha zama'ele'ö andrö, ba no ifatenge mala'ikania, ba wangoroma'ö khö genoninia andrö, hadia zi lö ara tö itörö.[6] 7 Ba hiza, alio so ndra'o. Ya'ahowu zolo'ö taroma li fama'ele'ö andrö, ba zura andre.[7]
8 Ba ya'o, Yohane, zangila da'ö ba samondrongo. Ba me aefa urongo, ba me aefa u'ila, ba ulaugö tou ndra'o, ba wangalulu ba mala'ika andrö, sangoroma'ö khögu da'ö.[8]
9 Ba imane khögu: Böi! Awöu enoni ndra'o, ba awö dalifusöu sama'ele'ö andrö, ba awö zolo'ö taroma li andrö ba zura andre; khö Lowalangi angalulu. 10 Ba imane khögu: Böi fotandro daroma li fama'ele'ö andrö, ba zura andre; noa sa'ae ahatö ginötö andrö.[9] 11 Solau si lö atulö, ba yamutohugö wolau, ba si ra'i-ra'iö, ba yamutohugö wa'ara'i-ra'iö; ba satulö, ba yamutohugö wolau satulö, ba ni'amoni'ö, ba yamutohugö we'amoni'ö ya'ia.[10] 12 Hiza, alio so ndra'o, ba fao khögu luo andrö khögu, ba wanulöni ba zamösana, dali mbua-buania.[11] 13 Alafa ndra'o ba omega, si föföna ndra'o ba safuria, böröta ndra'o ba amozua.[12] 14 Ya'ahowu zamabago nukhara, ena'ö tetehe khöra geu fangorifi andrö, ba ena'ö tefatörö ira ba mbawa göli andrö, miyomo ba mbanua.[13] 15 Baero so nasu andrö, awö zi fakelemu, awö zohorö, awö zange'e, awö zame'e-me'e adu, awö dozi solau faya, ba somasi ya'ia.[14]
16 Ya'o, Yesu andrö, no ufatenge mala'ika andrö khögu, ba wamaduhu'ö khömi da'ö, ba mbanua niha Keriso andrö. Lewiö Dawido ndra'odo, lewiö ba mbörö, ba ma'uwunia, madala andrö, sihaga.[15]
Fango'ozui[edit | edit source]
III. 17 Ba lamane Eheha ba ono nihalö andrö: Aine! Ba ha niha zamondrongo, ba yamuŵa'ö: Aine! Ba ha niha zowökhi tödö, ba yamöi, ha niha zomasi, ba yamutema nidanö fangorifi saoha gölö.[16] 18 Ufaduhu'ö ba niha fefu, samondrongo taroma li fama'ele'ö andrö ba zura andre: Na so zondrou'ö ya'ia, ba ifatörö khönia Lowalangi wamakao andrö, nisura ba zura andre.[17] 19 Ba na so zombuwu taroma li ba zura wama'ele'ö andre, ba iheta Lowalangi gurakhania ba geu fangorifi andrö ba ba mbanua ni'amoni'ö andrö, nisura ba zura andre.[18]
20 Imane samaduhu'ö da'e: Ya'ia lö ara tö so ndra'o. Yaduhu; aine Yesu, So'aya![19] 21 Yafalukha ami fefu wa'ebua dödö Zo'aya ya'ita, Yesu.[20]
Famotokhi ba gahe[edit | edit source]
- ↑ Hes 47:1
- ↑ Faigi 21:21; 2:7; Hes 47:12
- ↑ Faigi 21:27; Sakh 14:11
- ↑ Mat 5:8; Heb 12:14; Sin 17:15; Faigi 3:12
- ↑ Faigi 21:22–25; Dan 7:18,27; TimII 2:12
- ↑ Faigi 21:5; 1:1
- ↑ Faigi 1:3
- ↑ Faigi 1:4,9 b.t.; 19:10
- ↑ Faigi 10:4; Fil 4:5
- ↑ Dan 12:10; TimII 3:13; Kol 1:10,11
- ↑ Faigi 2:23; Yes 62:11; Rom 2:6
- ↑ Faigi 21:6
- ↑ Faigi 14:12; 21:12
- ↑ Faigi 21:8; Fil 3:2; KorI 6:9,10
- ↑ Faigi 1:1,2; 11; 5:5; Yes 11:1,10
- ↑ Faigi 21:6; Yes 55:1; Yoh 7:37; 4:14
- ↑ MozV 4:2; Amaed 30:6
- ↑ Faigi 22:14; 21:2,10
- ↑ Faigi 1:7; Heb 10:37 b.t.
- ↑ Rom 16:24
Fabaliŵa lala[edit source]
Olayama Zura Fama'ele'ö: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22
Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö