Wp/bew/Kasakstan

From Wikimedia Incubator
< Wp‎ | bew
Wp > bew > Kasakstan
Kiblik Kasakstan
Қазақстан Республикасы (Kasak)
Qazaqstan Respublikasy
Республика Казахстан (Rus)
Respublika Kazakhstan
Ibu negeri Nursultan
Nama pengendek Kasak


Kasakstan (hurup Arab Gundul: قازاقستان; basa Kasak: Қазақстан Qazaqstan) atawa Negeri Kasak (hurup Arab Gundul: نݢرى قازاق) entu negara nyang ada di tenga-tenga Èurasia, ya'entu di tenga-tenganya antara benua Èropa ama Asia. Jadinya, ni negara bisa dah tuh dirèken sebagé Èropa atawa Asia punya bagèan. Dia punya nama resmi – Kiblik[1] Kasakstan (hurup Arab Gundul: كبليک قازاقستان; basa Kasak: Қазақстан Республикасы Qazaqstan Respublikasy). Kasakstan ada atu negara kesembilan paling gedé di dunia, èn juga' negara' nyang kekonci daratan nyang paling gedé di antéro dunia. Sebelonnya bubaran tu Uni Sowièt, ni negara dulu digero'ya "Kiblik Sosialis Sowièt Kasak". Sempragan dia punya kemerdèkaan di tahon 1991 ampé Maret 2019, persidènnya entu Nursultan Nazarbayev. Adapun ni negara punya hopstat[2] nama Astana, nyang sekarang udah dibalik nama jadi Nursultan. Almati entu dulunya dia punya hopstat ampé tahon 1988, nyang abis entu dipindahin ke Astana.

Basa Kasak entu masup ke kulawarga basa Turkik, nyang jadi basa ibu bakal kebanyakan Kasakstan punya penduduk. Cuman bahnanya ni negara ada kesawaban sama Ruslan deri sejeg-bujeg, basa Rus juga' dipaké jadi basa resmi èn ada punya status resmi nyang sama bakal semua pemakéan dalem bestir èn kelembagaan. Adapun agama Selam jadi agama paling gedé nyang dipeluk ama orang-orang di ni negara, sekitaran 70%-nya orang Selam. Sementara entu, agama Serani cuman dipeluk ama 26%. Sebagé lagi, Ruslan juga' nyèwa tana dah tu di Kasakstan bakal Peluncuran Kapal Luar Angkasa Baikongur.

Ruju'an[edit | edit source]

  1. Chaer, Abdul. (2009). Kamus Dialek Jakarta. K. Rép. Penerbit Masup Jakarta. Kiblik (hurup Arab Gundul: کبليک) – republik (Indo.); republic (Ing.)
  2. Hopstat (hurup Arab Gundul: هوفستت) – ibukota (Indo.); capital (Ing.); hoofdstad (Wld.).