Wb/nia/Nehemia/9

I. Mangalulu ira khö Lowalangi

1 Ba ba zi dua wulu a öfa ba mbaŵa da'ö, ba owulo Ndraono Gizeraeli, mamoni ba gö ira ba baru gonigoni mbarura, ba no lalau gawu-gawu ba högöra. 2 Ba la'oniagö ira ba niha bö'ö fefu nga'ötö Ndraono Gizeraeli, ba so ira ba la'ombakha'ö horö, fabaya lalö ndra tuara mege. 3 Ba muzizio ira ba nahara andrö, ba so zombaso sura goroisa Lowalangira Yehowa, matonga zi matonga luo wa'ara, ba matonga zi matonga luo göi wa'ara wangombakha'öra horöra, ba lafalögu tou ira föna Lowalangira Yehowa.

II. Mangandrö fa'ahakhö dödö Lowalangi Nono Lewi

4 Ba ba harehare andrö ia'agö Ono Lewi, ira Yesua, Bani, Kadimieli, Sebania, Buni, Serebia, Bani, Khenani, ba la'angaröfi li Lowalangira Yehowa, la'ebua'ö lira. 5 Ba humede Nono Lewi andrö, ira Yesua, Bani, Kadimieli, Hasabineya, Serebia, Hodia, Sebania, Fetaya, lamane: "Mifaoso, misuno Yehowa, Lowalangimi, götö-götö wa'ara? Ba nisuno döimö andrö, sebua turia, si no manalu'i fangandrö saoha gölö fefu, awö wanuno! 6 Ha ya'ugö, Yehowa; no ya'ugö zamazökhi banua si yaŵa, banua si yaŵa irugi ba wondrege, awö ngahönö andrö khönia, ba tanö, awö nösi guli danö fefu, ba asi, awö nosinia fefu, ba oi ya'ugö zangorifi, ba no sangalulu khöu ngahönö andrö ba mbanua si yaŵa. 7 No ya'ugö, Yehowa, Lowalangi, sanuyu mege Aberamo, sangeheta ya'ia ba Guri ba danö Galedaia, same'e töinia Aberahamo andrö. 8 Ba me no ö'ila dödönia, wa no si tebai faröi khöu, ba no öfabu'u sibai khönia, öbe'e ba ma'uwunia danö Ndrawa Gana'ana andrö ba tanö Ndraono Kheti ba tanö Ndraono Gamori ba tanö Ndraono Weresi ba tanö Ndraono Yebusi ba tanö Ndraono Girigasi, ba no ötörö nifabu'umö, me no satulö ndra'ugö. 9 Ba me ö'ila wamakao ndra tuama ba danö Miserayi, ba fangarö-ngaröra ba mbewe nasi zukhu, 10 ba ölau zahöli-höli dödö ba ila-ila khö Wara'o ba ba genoninia fefu ba ba mbanua ba danönia fefu, me no ö'ila, wa no lafakao ira [ndra tuama]; ba no ö'ebua'ö döimö, irugi ma'ökhö andre. 11 Ba asi, ba öfabali fönara, tobali latörö dalu, abe'e lalara; ba solohi ya'ira, ba ötibo'ö ba namö, hulö gara, ba zabölö hou. 12 Ba öfasao ira boto lawuo na ma'ökhö ba boto galitö ba zi bongi, ba wohagaini lalara nitöröra. 13 Ba möi'ö tou, ba hili Zina'i, humede ndra'ugö khöra, moroi ba zorugo, öbe'e khöra huku satulö ba oroisa si ndruhu; amakhoita ba oroisa si sökhi öbe'e khöra. 14 No ö'ombakha'ö khöra luo sabato andrö khöu, ni'amoni'ö, ba oroisa ba amakhoita ba huku öfaŵa'ögö khöra khö genoniu Moze. 15 Ba no öbe'e khöra kue moroi ba mbanua si yaŵa, ba wa'olofora, ba idanö öfangumbu ba gara, me owökhi dödöra. Ba no öŵa'ö khöra we'amöi ba danö andre, ba wangokhögö ya'ia, nifabu'umö khöra, öbe'e khöra, me ö'oro'ö dangau [ba wahölusa]. 16 Ba ira tuama, ba fayaŵa ba no abe'e mbörö du'i, ba lö la'o'ö goroisamö andrö. 17 No tekhöra wamondrongo, ba lö itörö tödöra zahöli-höli dödö andrö, nilaumö khöra mege, manandro ira ba latuyu zolohe ya'ira, ba wangawuli ba wa'asawuyu ba danö Miserayi. Ba no Lowalangi somasi mame'e aefa horö ndra'ugö, ba sebua tödö, ba sahakhö tödö ba sebolo tödö, ba si fahöna fa'asökhi dödö [ba niha] ba lö ni'erogöu ya'ira. 18 Ba he me lafazökhi nono zaŵi nifahele ba me lamane: Da'ö Lowalangimi, sangeheta ya'ami ba danö Miserayi mege, me la'abölögö wango'aya [ya'ugö], 19 ba no lö ni'erogöu ya'ira ba danö si mate, ba wa'ahakhö dödöu andrö, si no ebua: lö saheta khöra mboto lawuo andrö ba zi ma'ökhö, ba wamasao ya'ira ba lalara, ba he boto galitö andrö, ba zi bongi, ba wohagaini lalara, nitöröra. 20 Ba no öbe'e khöra Gehehamö andrö, si sökhi ba wamahaö ya'ira, ba lö nibödau ba mbawara "mana" andrö, ba no öbe'e göra idanö, na owökhi dödöra. 21 Ba no örorogö ira ba danö si mate, öfa wulu fakhe wa'ara, tobali lö ambö khöra hadia ia; lö sadudu nukhara ba lö sabao gahera. 22 Ba no öbe'e khöra gamatöröŵa [niha bö'ö] ba soi [bö'ö]; ba no öfaosa da'ö, öhonogöi nola, ba la'okhögö danö Zihona andrö, tanö razo Hesibona, ba tanö Ogi andrö, razo Mbazana. 23 Ba no ö'oya'ö nga'ötöra, no timba ndröfi ba mbanua si yaŵa wa'oya öbe'e, ba no ö'ohe ba danö andrö nituturu tanöra, ba wangokhögö ya'ia, dali nifabu'umö khö ndra tuara. 24 Ba iraonora zondrugi, ba la'okhögö danö andrö, ba öbe'e barö mbawara niha ba danö, Dawa Gana'ana andrö, öbe'e ba dangara ira, he razora, ba he niha sato ba danö, ena'ö balazi manö ira, he lawisa khöra. 25 Ba atu'a ira ba mbanua saro, ba la'okhögö danö, satabö sinanö, fabaya omo niha, ba zi no fahöna ngawalö gama-gama, ba he ba'a nikhau ba kabu nagu ba kabu zai ba eu sowua, wa'oya. Ba manga-manga ira, ba abuso ba esolo, la'omusoi'ö dödöra ba wa'oböwömö andrö. 26 Ba manandro ira, ba lalaŵa ndra'ugö, ba la'erogö goroisamö andrö; ba sama'ele'ö andrö, sanenaŵa ya'ira, ba wolohe mangawuli ya'ira khöu, ba labubunu, ba la'abölögö wanandraŵaisi [ya'ugö]. 27 Ba öbe'e ira ba danga zamakao ya'ira; ba lafakao ira. Ba na no tosasa ira, ba la'angaröfi li ndra'ugö, ba öfondrondrongo lira, moroi ba zorugo, ba ö'asogö khöra zangorifi, ba wa'ahakhö dödöu andrö, si no ebua, ena'ö da'ö zangefa'ö ya'ira ba danga zamakao ya'ira. 28 Ba ha si'aikö lö hadia ia khöra sa'ae, ba lafuli lalau zi lö sökhi fönau, ba öfuli ölulu ira ba danga nemalira, ena'ö da'ö zalaŵara. Ba lafuli la'angaröfi li ndra'ugö, ba öfondrondrongo lira, moroi ba zorugo, ba ö'orifi ira, ba wa'ahakhö dödöu andrö si no ebua, ha me uga. 29 Ba öfangelama ira, ena'ö lafuli la'o'ö goroisamö; ba no si fayaŵa ira, ba lö lafondrondrongo goroisamö, ba lasawö nifakhoimö andrö, nibe'e fangorifi zolo'ö ena'ö. No abe'e mbörö du'ira, la'erogö ndra'ugö, manandro, lö lafondrondrongo liu. 30 Ba sebolo tödö ndra'ugö khöra, ha me uga fakhe, ba öfangelama ira Ehehamö, nifa'ema zama'ele'ö andrö, ba lö'ö zui lafondrondrongo. Ba öbe'e ira ba danga niha ba danö, niha baero, 31 ba ba wa'abölö wa'ahakhö dödöu andrö, ba lö öhori ira, ba lö öfalua wangerogö ya'ira, me no Lowalangi sebua tödö ba sahakhö tödö ndra'ugö.

III. Lafuli la'aro'ö wawu'usa li andrö

32 Ba iya'e, ya'ugö Lowalangima, Lowalangi sebua ba sabölö ba sata'u niha, si lö mamöhöi fawu'usa li, fa'ebua dödö andrö, böi bali ambö fa'ebua wamakao andrö fefu, si no göna ndra'aga, he razoma, ba he satuama, ba he ere, ba he sama'ele'ö andrö khöma, ba he ira tuama ba banuau andrö fefu, i'otarai luo razo Ndrawa Asiria andrö, irugi ma'ökhö andre. 33 Ba no dörödöro satulö ndra'ugö, ba da'ö fefu, si no göna ndra'aga; me no si lö faröi ndra'ugö, ba ya'aga, ba no sebua horö. 34 Ba razoma ba satuama ba ere khöma ba ira tuama, ba no lö ni'o'öra oroisamö, ba lö nitöngönira amakhoitamö ba famaroumö tödöra. 35 Ba he ŵa'ae ba danöra so ira, nifa'u'u howu-howu sebua andrö, nibe'eu khöra, bualau, ba danö sebolo andrö, satabö sinanö, niteheu khöra, ba lö'ö zui laföndrondrongo limö, ba lö laböhöli mbua-buara si lö sökhi andrö. 36 Hiza, ya'aga andre, ba no sawuyu iya'e, ba tanö andre, nibe'eu khö ndra tuama, ena'ö la'a mbuania, awö zi sökhi andrö khönia — ba danö da'ö no sawuyu ndra'aga. 37 Buania sabölö andrö, ba no razo andrö, nibe'eu barö mbawa ya'aga — börö horöma andrö — zi manga; ya'ira zamatörö botoma ba uriföma, ba zomasi ira, ba no tobali sebua famakao ndra'aga."

Famotokhi ba gahe

Fabaliŵa lala

Olayama Nehemia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö