Wb/nia/Nehemia/4

I. Fa'udusa Ndrawa Zamaria ba niha Yehuda

1 Ba me irongo Sanabala la'a'azökhi göli, ba mofönu ia ba abao sibai dödönia. Ba i'igi'igi'ö niha Yehuda. 2 Imane, ba zi so talifusönia, awö zabölö Ndrawa Zamaria: "Hadia nilau niha Yehuda samomo andrö? Hadia, lafuli laböhöli dania? Hadia, mame'e sumange ira dania? Hadia, la'asiwai ma'ökhö? Hadia, lafuli lafahalö gara adudula andrö, si no fabali ba galitö?" 3 Ba no so ba ngainia Dobia andrö, Iraono Gamoni, ba imane da'ö: "Alakha lalau, ba na möi yaŵa nasu, ba adudu göli kara andrö khöra ibe'e!" 4 Fondrondrongo, ya'ugö Lowalangima, he wisa wa lö ba dödö niha bö'ö ndra'aga! Be'e mangawuli ba hulura wango'ayara andrö, ba be'e ni'oloi'ö ba danö bö'ö ira, ba be'e nirabu zi so khöra. 5 Böi balugö lalöra, ba böi bunu [ba zura] horöra, fönamö; me no la'andrö wönumö, ba zanehe zangazökhi öli andrö! 6 Ba sangazökhi öli ndra'aga, ba teduhö göli, ma'asara, irugi zi matonga wa'alaŵania, ba no owölö-ölö sibai niha sato ba halöŵö andrö. 7 Ba me larongo ira Sanabala Tobia ba Dawa Ara ba Iraono Gamoni ba banua Gasoto andrö, te'azökhi göli Yeruzalema ba ibörötaigö teduhö zabökha andrö, ba mofönu sibai ira, 8 ba möi ira ba hölu, dozi ira, lafa'aso ira, lawa'ö, ba wanuwö Yeruzalema ba ba wangalani ya'ira.

II. Mangaro niha Yehuda wanohugö fanga'azökhi öli

9 Ba mangandrö ndra'aga khö Lowalangima, ba bongi ma'ökhö mafataro zanaro, ba khora andrö, fa'ata'uma ira. 10 Ba lamane mado Yuda: Erege dödö zana'u andrö, me no abölö fahöna gadudula, ba tobali tebai ma'azökhi göli andrö. 11 Ba lamane uduma andrö: Alakha lö larongo ba alakha lö la'ila, irege no tarugi bakha hunöra, ba ta'ö'ötö ira ba tebato halöŵö tabe'e! 12 Ba me so niha Yehuda, banua sahatö khöra, me no mato mewulu laŵa'ö khöma, dozi banua: Lö tola lö mifuli ami khöma! 13 Ba ufataro niha, sawu-sawu, ba zahöndrö tanö, ba gero göli, ba mbandra, sangaro, si'öli ba toho ba fana. 14 Ba ufaigi; ba maoso ndra'o ba umane ba zalaŵa ba ba zatua ba ba niha sato: Böi mi'ata'ufi ira. Mitörö tödömi zokhö ya'ita, si no ebua ba sata'u niha, ba milau fasöndra, ba wangorifi talifusömi ba iraonomi, matua ba alawe, ba fo'omomi; ba omomi mifatou-tou tödömi. 15 Ba me larongo uduma andrö, no terongo khöma ba no aekhu ba wa lö boto dödöra andrö ibe'e Lowalangi, ba tola mangawuli ba göli ndra'aga fefu ba tola ifaigi halöŵönia zamösana. 16 Ba i'otarai luo da'ö, ba ha si matonga nono matua andrö khögu zohalöŵö ba göli; ba si matonga, ba solohe si'öli ba toho ba baluse ba fana ba öröba, ba satua, ba la'iagö furi mado Yuda sato, sohalöŵö ba göli. 17 Ba sonoro andrö, ba no mangaro; lahalö-halö halöŵöra tangara si sara, ba si sara, ba solohe toho. 18 Ba sama'anö kara, ba dozi no labe'e ba löwi-löwira zi'ölira, ba lafa'anö'anö gara; ba ba ngaigu so zolau torofe. 19 Ba umane ba zalaŵa ba ba zatua, ba ba zato: Halöŵöda, ba no ebua ba no ebolo zi so ita, ba tobali si no muzaewe ita, ba göli, no aröu gotaluada. 20 Ba heza mirongo li dorofe, ba da'ö mi'owuloi ami khöma; Lowalangida dania zi fasöndra, salahida. 21 Ba mahalö-halö halöŵöma ba göli, ba si matonga, ba solohe toho, i'otarai wa'amoluo ba irugi oroma ndröfi. 22 Ba umane göi ba niha sato, me luo da'ö: Dozi ami, ba ba Yeruzalema mörö ami, awö ngoni-ngonimi, ena'ö sanaro ba zi bongi khöda da'ö, ba ba zi ma'ökhö, ba ba wangazökhi öli. 23 Ba lö'ö manö maheta nukhama, he ya'o, ba he talifusögu, ba he ono matua andrö khögu, ba he sanaro andrö, si so barö mbawagu; ba dozi ndra'aga, ba si so fangöna ba gambölö.

Famotokhi ba gahe

Fabaliŵa lala

Olayama Nehemia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö