Wb/nia/Nehemia/3
La'azökhi göli Yeruzalema ba alio tedou[edit | edit source]
1 Ba maoso Geliasibi ere sebua ba talifusönia ere andrö, ba lalau mbawa göli mbiri-biri andrö. Ba la'amoni'ö ba labe'e lagönia. Ba latohugö, irugi malige Hamea andrö, ba la'amoni'ö da'ö göi, ba latohugö, irugi malige Hanane'eli.[1] 2 Ba sohalöŵö ba ngaira, ba banua Yerikho. Ba ba ngai da'ö, ba Sukuri, ono Imeri. 3 Ba bawa göli gi'a, ba banua Zana'a zolau; labe'e mboha ba lafa'anö lagö, awö lazi, ba si no amaedola mbuatö. 4 Ba sangazökhi ba ngai da'ö, ba no Meremoto, ono Guria ono Hakosi, ba ba ngai da'ö, ba Mesula, ono Mberekhia ono Mesesabe'eli. Ba ba ngai da'ö, ba Sadoki, ono Mba'ana. 5 Ba ba ngai da'ö, ba banua Dekoa; ba salaŵara, ba lö la'o'ö niŵa'ö zamatörö ya'ira. 6 Ba sangazökhi bawa göli ba mbanua satua, ba Yoyada, ono Wasea, ba Mesula, ono Mbesodia, labe'e mboha ba lafa'anö lagö, awö lazi ba si no amaedola mbuatö. 7 Ba ba ngai da'ö, ba Melatia, banua Gibeona, ba Yadono, banua Meronoti, awö mbanua Gibeona andrö, awö mbanua Misefa, amatöröŵa gumandru ba danö ba zi tambai Oifarati tanö andre. 8 Ba ba zi tambai da'ö, ba Usieli zangazökhi, ono Haraya, awö duka gana'a andrö. Ba ba ngai da'ö, ba Hanania tuka dalu-dalu nifalemba; la'azökhi [göli] Yeruzalema, irugi göli sawe'e-we'e andrö. 9 Ba ba ngai da'ö, ba Refaya zangazökhi, ono Huri, satua zi matonga mbanua Yeruzalema. 10 Ba ba ngai da'ö, ba Yedaya, ono Harumafa, ba gamaudu nomonia. Ba ba ngai da'ö, ba Hatusi, ono Hasabeneya. 11 Ba sandroro lahaogö Malakhia, ono Harimi ba Hasubi, ono Wahata-Moabi, fabaya malige danuri andrö. 12 Ba ba ngai da'ö, ba Salumi, ono Halohe, satua zi matonga mbanua Yeruzalema — ya'ia ba ononia alawe. 13 Ba bawa göli ba ndraso, ba Hanuni zolau, awö mbanua Zanoa, lafasindro ba fa'anö lagö, awö lazi ba si no amaedola mbuatö, ba latohugö wangazökhi öli, 1.000 hela, irugi mbawa göli golawua. 14 Ba bawa göli golawua andrö, ba Malakhia zangazökhi, ano Rekhabi, satua mbanua Mbeti Kheremi; ifasindro ba ifa'anö lagö, awö lazi ba si no amaedola mbuatö. 15 Ba bawa göli ba mba'a, ba Saluni zangazökhi, ono Kholi-Hose, satua mbanua Misefa — ifasindro ba ifosagö ba ifa'anö lagö, awö lazi ba si no amaedola mbuatö —, ba itohugö wangazökhi öli ba zinga mbaŵa ba nulu hele, ba kabu razo, ba irugi nibosi andrö, moroi yaŵa ba mbanua Dawido.[2] 16 Ba tohu-tohu da'ö, ba Nehemia zangazökhi, ono Gasibuki, satua zi matonga mbanua Mbetisuri, irugi ba gamaudu lewatö Dawido ba irugi mbaŵa andrö, nifazökhi, ba irugi nomo zaradadu andrö. 17 Ba ba zi tambai da'ö, ba Ono Lewi Rehumi, ono Mbani [zolohe ya'ira]. Ba ba ngai da'ö, ba Hasabia, satua zi matonga mbanua Gegila, nifakhoi ba mbanuara lalau. 18 Ba ba zi tambai da'ö, ba iwara. Bawai, ono Henedada, satua zi matonga mbanua Gegila [zolohe]. 19 Ba ba ngaira, ba Ezeri, ono Yesua, satua mbanua Misefa, sandroro göi lalau, ba gamaudu lala miyaŵa ba nomo wangöna ba watalinga.[3] 20 Ba ba zi tambai da'ö, miyaŵa ba hili, ba Barukhi, ono Zabai, sandroro göi, i'otarai watalinga, irugi gamaudu mbawandreehö nomo Geliasibi ere sebua. 21 Ba ba ngai da'ö, ba Meremoto, ono Guria ono Hakosi, sandroro göi, i'otarai ba gamaudu mbawandruhö nomo Geliasibi, irugi ba hambo nomonia. 22 Ba ba ngai da'ö, ba ere, banua ba zalo'o. 23 Ba ba ngai da'ö, ba Beniyami ba Hasubi, ba gamaudu nomora. Ba ba ngai da'ö, ba Asaria, ono Ma'aseya ono Ganania, ba ngai nomonia. 24 Ba ba zi tambai da'ö, ba Binui, ono Henadada, sandroro göi, i'otarai nomo Gasaria, irugi watalinga andrö ba sanalinga si'u. 25 Ba Falala, ono Usai, ba ba gamaudu watalinga andrö ba ba gamaudu malige tanö yaŵa, si no tedou moroi ba gödo razo, si fadoro ba gurunga. Ba ba ngai da'ö, ba Fedaya, ono Wareo.[4] 26 Ba sangai halöŵö ba gosali, enoni andrö, ba ba Gofeli andrö so nomora, irugi ba gamaudu mbawa göli ba nidanö, tanö ba gatumbukha luo ba irugi malige si no tedou andrö.[5] 27 Ba ba zi tambai da'ö, ba banua Dekoa zui, sandroro tö, ba gamaudu malige si no tedou, ba irugi göli Gofeli andrö. 28 Ba yaŵa mbawa göli kudo, ba ere zangazökhi; ba gamaudu nomonia ilau zamösana. 29 Ba ba ngai da'ö ba Sadoki, ono Imeri, ba gamaudu nomonia. Ba ba zi tambai da'ö, ba Semaya, ono Zekhania, sanaro ba mbawa göli tanö ba gatumbukha luo. 30 Ba ba ngai da'ö, ba Hanania, ono Zelemia ba Hanuni, ono Zalafi, lima moroi ba zi a'a, sandroro zui. Ba ba ngai da'ö, ba Mesula, ono Mberekhia, ba gamaudu mbate'enia. 31 Ba ba zi tambai da'ö, ba Malakhia andrö, tuka gana'a, irugi nomo zangai halöŵö ba gosali, ba ba ngai da'ö, ba solafo, ba gamaudu mbawa göli Mifikada, ba irugi ba gamaudu mbate'e andrö ba zi sagötö, ba watalinga. 32 Ba ba gotalua da'ö mbawa göli mbiri-biri, ba tuka gana'a göi ba solafo zangazökhi.
Famotokhi ba gahe[edit | edit source]
Fabaliŵa lala[edit source]
Olayama Nehemia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö