Wb/nia/Esera/9

I. Fangai Ndraono Gizeraeli ono alawe ba niha baero. Fa'abu dödö Gesera ba da'ö.

I. 1 Ba me no mu'asiwai da'ö, ba la'ondrasi ndra'o satua, ba lamane: Lö ni'oniagö Ndraono Gizeraeli sato ba ere ba Ono Lewi ya'ira ba niha baero ba danö, si no si nangea ena'ö, ba zogoro ita andrö, ba Ndrawa Gana'ana andrö ba ba Ndraono Kheti ba ba Ndraono Weresi ba ba Ndraono Yebusi ba ba Ndraono Gamoni ba ba Ndrawa Miserayi.

2 Noa sa lahalö nonora alawe ösa fo'omora ba fo'omo ndraonora, ba tobali faruka danömö niha ni'amoni'ö andrö ba danömö niha ba danö, ba no salaŵa ba satua zamobörö lalö andrö.

3 Ba ha si'aikö urongo wangadu andrö, ba utika mbarugu, awö lembegu ba udödöni mbu högögu, awö gambigu, ba mudadaodo tou, lö hede-hede, börö lalö zangawuli andrö moroi ba ni'oloi'ö ya'ira mege.

4 Ba la'ondrasi ndra'o dozi sangata'ufi oroisa Lowalangi Ndraono Gizeraeli. Ba dumao-dao manö ndra'o lö hede-hede, irugi ginötö wame'e sumange tanö owī.

5 Ba me inötö wame'e sumange tanö owī, ba maoso ndra'o, ubato wamakao ya'o andrö ba ufuli utika mbarugu, awö lembegu; ba utuhi danö tou ba u'oro'ö dangagu khö Lowalangigu Yehowa.

II. Fangandrönia.

II. 6 Ba umane: "He Lowalangi, saila sibai ndra'odo, tobali tebai ufaöga mbawagu khöu, ya'ugö, Lowalangigu! Noa sa ilawui ndra'aga lalöma, no ebua sibai horöma, irugi mbanua si yaŵa.

7 I'otarai götö ndra tuama, ba no ebua horöma, ba irugi ma'ökhö andre. Ba börö lalöma andrö, wa no nilulu manö ndra'aga, ya'aga ba salaŵa ba ere khöma, wa no mube'e ba danga razo niha baero ndra'aga ba ba mbawa zi'öli ba ba wangoloi'ö ya'aga ba ba worabu niha bö'ö ba ba wa'aila, si mane ma'ökhö.

8 Ba iya'e, ba no falukhaga wa'ahakhö dödö Lowalangima Yehowa, si lö arara na, me no isaigö na khöma zauri, ösa, si lö atotó, ba me no [ifuli] ifonahia ndra'aga ba naha ni'amoni'ö andre khönia, ena'ö ifehaga höröma Lowalangima, ba ena'ö [ifuli] ibe'e khöma wa'auri ma'ifu, ba wa'asawuyuma andre.

9 Noa sa sawuyu ndra'aga, ba no lö'ö zui ni'erogö Lowalangima ya'aga, ba wa'asawuyuma andre, noa sa ibe'e falukha wa'ahakhö dödö razo Weresia ndra'aga, ba no tobali la'orifi ndra'aga, ba wolau osali Lowalangima andrö, ba ba wanga'azökhi adudulania, ba ba wolau nahiama ba danö mado Yuda ba ba Yeruzalema, nahia nikölini öli kara.

10 Ba iya'e, ya'ugö Lowalangima, hadia niŵa'öma ba da'ö?

11 Me no ma'erogö goroisamö, nifabe'e'ömö khöma ba genonimö andrö, sama'ele'ö andrö, me ömane: Tanö andrö, nirugimi dania, ba wangokhögö ya'ia, ba no tanö si ra'i-ra'iö, börö wa'ara'i-ra'iö niha ba danö andrö, sogoro ita andrö khöra, nihönara ba danö ma'asagörö, ba wa'ara'i-ra'iöra andrö.

12 Ba böi mibe'e ba nonora matua nonomi alawe, ba böi mihalö umönömi nonora alawe, ba böi mitolo ira ba wangalui fa'ohahau dödöra ba sohare ira, götö-götö wa'ara dania, ena'ö ya'ami zabölö ba ena'ö mi'aga'aga zi sökhi ba danö, ba ena'ö lö mamalö-malö, ondröitami ba nga'ötömi mitou.

13 Ba ba zi no göna ndra'aga, fefu, ba mbua-buama andrö si lö sökhi ba ba horöma andrö, si no ebua — ba noa na ö'osilömilagö ösa, lalöma andrö, ya'ugö, Lowalangima, ba noa na ötehe khöma, tosai zi manö —,

14 ba hadia, mafuli masawö goroisamö, ba wambambatösa ba niha andrö, si no to'ölö ba zogoro ita andrö? Ba hadia, lö öhori ena'ö ndra'aga, ba wönumö, irege lö'ö sa'ae si tosai, ba irege lö fangorifi sa'ae?

15 He Yehowa Lowalangi Ndraono Gizeraeli, no satulö ndra'ugö; ba no si tosai ndra'aga, sauri, ma'ökhö: Ya'e ndra'aga, fönau, ba horöma andrö; börö da'ö, wa tabai mataha wönumö!"

Famotokhi ba gahe

Fabaliŵa lala

Olayama Esera: 1 • 2 • 3 • 4 • 5 • 6 • 7 • 8 • 9 • 10

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö