Wb/nia/Esera/7

I. Möi ba Yeruzalema Gesera.

I. 1 Ba me aefa da'ö no mege, me razo Aretazasa, razo Weresia, ba möi misi yaŵa Gesera andrö, ono Zeraya ono Gasaria ono Hilikia

2 ono Zalumi ono Zadoki ono Gahitobi

3 ono Gamaria ono Gasaria ono Merayoto

4 ono Zeraya ono Usi ono Mbuki

5 ono Gabisua ono Wineha ono Geleazari ono Ga'aroni ere sebua andrö. —

6 Esera andrö zi möi misi yaŵa, moroi ba Mbabeli. Ba sangila amakhoita ia, si no mangila sibai oroisa andrö, khö Moze, nibe'e Yehowa, Lowalangi Ndraono Gizeraeli; ba itehe khönia ni'andrönia fefu razo, me itolo ia tanga Lowalanginia Yehowa. 7 Ba so zi fao khönia ba Yeruzalema Iraono Gizeraeli ösa ba ere ba Ono Lewi ba sanunö ba sanaro ba mbawandruhö ba sangai halöŵö ba gosali, enoni andrö, me no alua meönö fakhe razo Aretazasa.

8 Ba irugi Yeruzalema, me baŵa si lima, döfi si fitu khö razo.

9 Ba zi sambua desa'a ba mbaŵa si föföna iŵa'ö wangefa ba Mbabeli, ba ba zi sambua desa'a ba mbaŵa si lima larugi Yeruzalema, me no itolo ia tanga Lowalanginia, sebua tödö khönia. 10 Me no ibe'e dödönia Esera i'alu-alui goroisa Yehowa ba i'o'ö, ba ifahaö Ndraono Gizeraeli ba gamakhöita andrö ba ba huku.

II. Ifa'ohe'ö khönia zura Aretasasa, sura wanehe.

II. 11 Ba da'e zura andrö, nibe'e razo Aretazasa khö Gesera sangila amakhoita; si no to'ölö ba niŵa'ö ba goroisa Yehowa ba ba gamakhoitania ba Ndraono Gizeraeli, imane:

12 "[Nibe'e] Aretazasa fondrege razo khö Gesera andrö ere ba sanura oroisa Lowalangi zorugo andrö — ba tohu-tohunia.

13 No ube'e goroisa: dozi Iraono Gizeraeli ba mbanuagu ba ere khöra ba Ono Lewi, sedöna möi ba Yeruzalema, ba ndra möi awöu, 14 me no nifatenge razo ndra'ugö ba nifatenge ganofulania andrö si dafitu, dali goroisa Lowalangiu andrö, si so ba dangau, ba wamaigi he wisa ba mado Yuda ba ba Yeruzalema, 15 ba ba wolohe khöra firö andrö ba ana'a, nibe'e razo ba anofulania saoha gölöra khö Lowalangi Ndraono Gizeraeli si so nahia ba Yeruzalema,

16 ba he firö andrö ba ana'a, fefu, nifalau khöu ba danö Mbabeli ma'asagörö, awö nibe'e zato [Iraono Gizeraeli] ba ere, saoha gölöra, wame'e balazo gosali Lowalangira ba Yeruzalema, saoha gölö.

17 Andrö wa öfaigi sibai wame'e ana'a andrö, ba wowöli saŵi si matua ba biri-biri si matua ba ono mbiri-biri, awö zumange ni'a ba sumange nibadu, nifao ba da'ö, ba öbe'e ba naha wame'e sumange andrö, ba gosali Lowalangimi ba Yeruzalema.

18 Ba ba zi tosai firö andrö ba ana'a ba balazi dödöu ba tödö niwami andrö, heza mi'oguna'ö, dali zomasi Lowalangimi.

19 Ba gama-gama andrö, ba halöŵö, ba gosali Lowalangimö, nibe'e ba dangau, ba ahori ötou'ö tou föna Lowalangi andrö, ba Yeruzalema.

20 Ba hadia na zoguna khöu, ba gosali Lowalangiu andrö, balazo, ba hana na ba nomo girö-girö khö razo öhalö.

21 Ba ya'odo, razo Aretazasa, ba no ube'e li ba zangirö ana'a andrö, fefu, ba danö, ba zi tambai Oifarati tanö andrö, no umane: Fefu hadia ia ni'andrö Gesera andrö, sanura oroisa andrö, oroisa Lowalangi zorugo, ni'andrönia khömi, ba mi'o'ö sibai khönia, 22 irege 22,050 balaki wirö ba 200 ngaso'e gandru ba 20 ngaso'e nagu ba 20 ngaso'e wanikha, ba asio, ba si lö muŵa'ö ha wa'oya.

23 Fefu hadia ia zoguna, dali goroisa Lowalangi zorugo andrö, ba tenga ni'ambösi fame'e ba gosali Lowalangi zorugo andrö, fa böi göna fönu mbanua razo ba banua ndraononia.

24 Ba ya'ami, ba böi zi lö mirongo: dozi ami, ba ba gere andrö ba ba Nono Lewi ba ba zanunö andrö ba ba zanaro ba mbawandruhö ba ba zangai halöwö ba gosali Lowalangi andrö, ba lö tola miwa'ö mbeo ba ma hua zago ba ma rodi lala.

25 Ba ya'ugö Esera, ba öfataro zanguhuku ba samatörö ba wa'atua-tua andrö khö Lowalangiu, si no so khöu, ena'ö lafatunö huhuo niha sato fefu, ba danö ba zi tambai Oifarati tanö andrö, — huhuo zi no aboto ba dödö oroisa Lowalangiu andrö; ba ha niha zi lö mangila ya'ia [na], ba mifahaö.

26 Ba dozi ha niha zi lö molo'ö oroisa Lowalangiu ba oroisa razo, ba nihaogö fanguhuku, he ba wamunu ya'ia, ba he ba wanibo'ö ya'ia, ba he ba wogau, ba he ba wokuru."

III. Isuno Lowalangi Esera.

III. 27 Nisuno Yehowa, Lowalangi ndra tuada, si no mame'e ba dödö razo da'ö, ba wamolakhömi osali Lowalangi andrö, ba Yeruzalema,

28 ba si no mame'e falukha wa'ebua dödö razo ndra'odo, khö razo ba ba ganofulania andrö ba ba gumandru sebua andrö khö razo fefu! Ba u'abe'e'ö dödögu, me no itolodo tanga Lowalangigu Yehowa, ba u'owuloi zatua Ndraono Gizeraeli, ena'ö möi ira awögu misi yaŵa.

Famotokhi ba gahe

Fabaliŵa lala

Olayama Esera: 1 • 2 • 3 • 4 • 5 • 6 • 7 • 8 • 9 • 10

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö