Wb/nia/Esera/4

I. Lö latehe mado Yuda, orudu danga nudura andrö ba wolau osali.

I. 1 Ba me larongo udu mado Yuda ba udu mado Mbeniyami lalau gosali khö Yehowa, Lowalangi Ndraono Gizara'eli sangawuli andrö moroi ba ni'oloi'ö ya'ira,

2 ba möi ira khö Zerubabeli ba ba högö ngafu andrö, ba lamane khöra: Damalului wolau; sangalui Lowalangimi sa ndra'aga göi, si mane ya'ami, ba khönia mabe'e-be'e zumange, i'otarai luo Gasarabado andrö, razo Asiria, solohe ya'aga ba da'e.

3 Ba lamane khöra ira Serubabeli Yesua, awö högö ngafu Ndraono Gizeraeli bö'ö andrö: Tenga awöma ami, fa ta'orudugö ita ba wolau osali khö Lowalangida, ya'aga manö zolau khö Yehowa, Lowalangi Ndraono Gizeraeli, ha ya'aga, dali goroisa Giro, razo Weresia.

4 Ba adada zui danga mado Yuda labe'e niha ba danö andrö, latenaŵa ira ba wotomo andrö, lasölö niha,

5 samo'esuanö ya'ira, fa böi lafalua zi so ba dödöra, götö wa'ara Giro andrö, razo Weresia, ba irege razo Dario, razo Weresia.

II. Lafa'ohe'ö zura udura andrö, khö Gahasiwero, ba wanimba folau osali.

II. 6 Ba me razo Ahasiwero, me awena tobali razo ia, ba lafa'ohe'ö zura wangadu, la adugö mbanua mado Yuda ba banua Yeruzalema.

7 Ba me razo Aretazasa, ba lafa'ohe'ö zura ira Biselama, Miteredata, Tabe'eli, ba awöra, khö Aretazasa andrö, razo Weresia, Nisura ba li Ndrawa Garamo zura andrö ba ni'ali. Ba li Ndrawa Garamo:

8 Rehumi kumandru ba Simisai durutuli zama'ohe'ö sura khö razo Aretazasa, fangombakha banua Yeruzalema andrö, lamane:

9 "Rehumi no, kumandru ba Simisai, durutuli, ba awöra bö'ö andrö, banua Dina ba banua Yafarasatekha ba banua Darafela ba banua Gafarasa ba banua Garakhi ba banua Mbabilona ba banua Zusa ba banua Deha ba banua Gelama, ba soi bö'ö andrö,

10 nifawu'a Gasanafari andrö sebua ba sihöngö turia, ni'ohenia ba mbanua Zamaria ba ba danö bö'ö misa, yefo Oifarati tanö andre, ba tohu-tohunia.

11 Da'e nösi zura andrö, nifa'ohe'öra khö razo Aretazasa: "Enoniu andre, banua si yefo Oifarati tanö andre, ba tohu-tohunia.

12 Böi zi lö irongo razo, wa no larugi ndra'aga, ba Yeruzalema, niha Yehuda andrö, si no so moroi si tou khöu. Labörö-börötaigö lafuli lataru'ö mbanua si lö sökhi andrö, banua zolaŵalaŵa; la'asiwai göli ba lafuli lahaogö dayadaya.

13 Ba böi zi lö aboto ba dödö razo: na no mufuli mutaru'ö mbanua andrö dania ba na no awai göli, ba lö'ö sa'ae labe'e mbeo ba hua zago; ba rodi lala, ba lö'ö sa'ae la o'ö, ba tobali te'ambösi zinema razo labe'e.

14 Ba me no si manga-manga nasio ba gödo razo ndra'aga ba me tebai mafaigi-faigi na te'ala razo, andrö wa mafatenge, ba wangombakha da'ö khö razo,

15 ena'ö la'alu-alui ba zura hikaya ndra tuau andrö; ba ösöndra dania ba zura hikaya andrö ba aboto ba dödöu, wa no banua solaŵalaŵa mbanua andrö, banua samakao razo ba he niha ba danö, baero, misa, awö wa no götö-götö wa'ara lafobörö wolaŵa; ba da'ö göi mbörö, wa no mududugö mbanua andrö.

16 Andrö böi zi lö aboto ba dödöu: na lafuli lataru'ö mbanua andrö, ba na no awai göli dania, ba tobali börö da'ö, wa latimba manö ndra'ugö dania yefo Oifarati, tanö andre."

III. Ifa'ohe'ö mangawuli zura razo ba tetabi wotomo.

III. 17 Ba ifa'ohe'ö zura razo, fanema li ndra Rehumi kumandru, Simisai, durutuli, ba awöra bö'ö andrö, ba Zamaria ba ba danö yefo Oifarati, imane: "Ya ahowu! ba tohu-tohunia.

18 Sura andrö, nifa'ohe'ömi ehöma, ba no lahaogö wombaso khögu.

19 Ba no ube'e goroisa, ba no la'alui, ba no lasöndra, wa no samadaö li razo mbanua andrö, i'otarai götö föna sibai sa'ae, wa no tesaosao manö ba da'ö wolaŵa ba fa'erosa.

20 Ba no razo sabölö mege razo Yeruzalema andrö, ba no labe'e barö mbawara danö andrö fefu, yefo Oifarati, ba no la'o'ö khöra ba mbeo ba ba hua zago ba ba rodi lala.

21 Ba niŵa'ö sa'ae, labato halöŵöra niha andrö, fa böi lafuli lataru'ö mbanua andrö, irege ya'odo zanguma'ö.

22 Ba mifaigi-faigi, fa böi arörö ami, fa böi tumbu ba da'ö de'ala sebua, fa'ate'ala razo!"

23 Ba me no mubaso zura andrö, nifa'ohe'ö razo Aretazasa, khö Rehumi ba khö Zimisai durutuli ba ba nawöra bö'ö andrö, ba lata'i-ta'i we'amöi ba niha Yehuda, ba Yeruzalema, ba latenaŵa ira, la'anösö'ö.

24 Ba tebato halöŵö ba gosali Lowalangi, ba Yeruzalema, me luo da'ö, lö latohugö, irege no alua döfi razo Dario andrö, razo Weresia.

Famotokhi ba gahe

Fabaliŵa lala

Olayama Esera: 1 • 2 • 3 • 4 • 5 • 6 • 7 • 8 • 9 • 10

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö