Wp/rsk/Дом култури Руски Керестур


Дом култури Руски Керестур

Снователь	Скупштина општини Кула
Основани	15. фебруара 1961. року
Шедзиско	Руски Керестур, Русинска 75
Веб презентация	Дом култури Руски Керестур
Контакт	Тел. 025 703-357

Дом култури у Руским Керестуре од самого снованя постал єдина институция при Руснацох хтора ше професионално занїмала зоз културну дїялносцу^[1]. Як установа култури Дом култури превжал подполну старосц о двох значних фестивалох - о Фестивалу култури Руснацох Червена ружа и Драмским мемориялу Петра Ризнича Дядї.

История наставаня

Приселєнци Русини зоз Горнїци принєсли зоз собу и часци духовней култури у форми народней шпиванки, народного танцу и народного скарбу. Тоти културни вредносци ше преношели з поколєня на поколєнє, чувало ше их и покус и збогацовало.

Познате же уж 1870. року основана перша читальня у Руским Керестуре хтору основал тедишнї учитель Михаил Джуня и Керестурец Ферко Пап-Радванї.

После 1885. року учитель Василь Каменца у школи робел зоз школярским хором котри мал у составе 18 дзивчата и 22 хлапцох. После вельорочней роботи и числених наступох школярски хор бул познати у штреднєй часци Бачки. Як коруна добрей роботи и значне припознанє його хору ушлїдзело 1896. року. Того року школярски хор зоз Бачкерестура шпивал на отвераню шветовей вистави у Будапешту!

Штредком остатнєй децениї 19. вику зоз церковним хором, такволану гармонию, руководзел учитель М. Манойла. Познєйше ше зявело и женске шпивацке дружтво у валалє.

После першей шветовей войни, а окреме после снованя Руского народного просвитного дружтва здобути нови можлївосци за розвой и пестованє и других формох културней дїялносци як цо то драмска и фолклорна. Учителє Евґений Няради и Маґдалена Дудаш пририхтую рижни програми, а на розвою драмскей дїялносци окреме ше анґажовал Михайло Ковач, теди учитель у Керестуре. Вон ше опробовал и як дириґент так же 1938. року керестурски хор, под його руководством, завжал друге место на змаганю хорох у Червинки. Од 1934. року активно робело Руске шпивацке дружтво под руководством Онуфрия Тимка, хторе познєйше превжал Ириней Тимко.

Медзи двома войнами розвита и театрална дїялносц хтора окремни пориви достала з приходзеньом Петра Ризнича Дядї, драмского педаґоґа, режисера и професора, хтори за вецей як 46 роки активней роботи у Руским Керестуре поставел коло 40 драмски фалати. Зазначени у тим перодзе и мена других режисерох - дзияка В. Еделинския, М. Нярадия, Михала Ковача, Мафтея Виная и Юрия Шереґия.

Запаметани и познати керестурски оркестри зоз фамелийох Ґовльових и Микитових хтори ше зявели на початку ХХ вику, пред початком першей шветовей войни. Бул теди познати и оркестер Якова Чизмара хтори пестовал, грал и ширел руски шпиванку у Керестуре. Познєйше ше зявели и оркестри под руководством Владимира Ґаднянского як и Якима Хоми хтори по законченю другей шветовей войни скоро нєпреривно робел при Доме култури.

Повойнови период

По ошлєбодзеню валала 1944. року почало формованє културних секцийох - читацка ґрупа, танєчна, хорска, музична, драмска секция хтори участвовали на велїх манифестацийох у валалє, у покраїни, на першомайскей паради у Беоґрадзе и на роботних акцийох.

Зоз снованьом културней и дружтвено-политичней орґанизациї Руска матка 21. октобра 1945. року достало ше нови способи орґанизованя и ширеня културно-просвитного живота жительох Руского Керестура.

По утаргованю Рускей матки як културней орґанизациї, 1948. року основане КПД Гавриїл Костелник у хторим робели хорска, фолклорна, музична секция, секция народного универзитета як и секция аматерского театра основана у януаре 1949. року.

З одлуку Скупштини општини Кула 15. фебруара 1961. року основани Дом култури Руски Керестур з цильом и задачу же би орґанизовал и унапрямовал културно-уметнїцки живот у валалє. Року 1968. Дом култури превжал орґанизованє Червеней ружи, 1969. року основани и отримани перши Драмски мемориял Петра Ризниича Дядї, хтори преросну до фестивалу драмскей дїялносци и обидва манифестациї теди достали покраїнску значносц.

Року 1967. при Доме култури основани и Завичайни музей, хтори 1990. обновени и поставени у просторе дакедишнєй Новей школи (Замку) хтора адаптована за потреби образованя, библиотеки, за музей и ґалерию.

Початком 1971. року дозрели условия же би керестурски Аматерски театер, хтори вироснул зоз драмскей секциї при КПД Гавриїл Костелник постал самостойни аматерски театер з двома сценами (у Новим Садзе и Руским Керестуре) и статусно змоцнєл до уровню професийного театра. Концом ХХ вику при Доме култури иницирована и културна манифестация Костельникова єшень.

Треба спомнуц и ентузиястох и фаховцох хтори од 1945. року робели у керестурским Доме култури як руководителє рижних секцийох

Хорска секция - Стеван Ґера, Микола Гайнал, Дюра Варґа, Йоаким Хома, Витомир Бодянєц, Марґита Лучечко, Я. Олеяр, Ириней Тимко, Иван Чукляш, Владимир Колбас, Михайло Бодянец, Юлиян Рамач

Фолклорна секция - В. Шанта, Я. Виславски, Лю. Медєши, Ф. Папуґа Бесерминьова, Е. Варґова, Я. Хромиш, В. Бодянєц, Силвестер Ґача, Михал Варґа, Жарко Миленкович, Юрий Прохаска, Миодраґ Цветкович Баняц, Юлиян Рац, Йоаким Рац, Михайло Стрибер,

Музична секция - Йоаким Хома, Витомир Бодянєц, Янко Олеяр, Яким Сивч, Михайло Бодянец, Юлиян Рамач

Подобова секция - Силвестер Макаї, Любомир Бабинчак, Дюра Папуґа

Фото-кино секция - Звонимир Сакач, Любомир Дудаш, Владимир Колєсар

Швитаня и рецитаторску секцию водзели Михал Варґа, Владимир Бесерминї, Михал Рамач, Юлиян Надь, Наталия Дудаш, Михайло Зазуляк.

Руководителє Дома култури були: Янко Олеяр, Витомир Бодянєц, Юлиян Рац, Михайло Бодянец, Силвестер Ґача, Йоаким Рац.

Награди и припознаня

Робота з аматерами и квалитет роботи и резултатох бул замерковани од ширшей дружтвеней заєднїци так же Дом култури ношитель Оредна заслугох за народ зоз стриберну гвизду, достал Награду ошлєбодзеня Войводини, Вукову награду од КПЗ Сербиї, Искри култури од КПЗ Войводини, Октоберску награду општини Кула, Майску награду, Зарї култури КПЗ Кула як и велї други припознаню хтори достали установа, роботнїки и аматере.

У вецей деценийох роботи Дома култури през його секциї и други форми дїялносци прешли на тисячи аматере, давани програми у шицких крайох бувшей Югославиї, аматере Дома култури указали красну нашого културного скарбу и у иножемстве - на вецей заводи госцовали у бувшим Совєтским Союзу, Чехословацкей, Польскей, у Нємецкей, Белґиї, Голандиї и Луксембурґу. Каждого року музично-танєчни секциї и рецитаторе участвую на покраїнских и републичних смотрох и манифестацийох.