Wp/rsk/Михайло Ковач
| Михайло Ковач | |
|---|---|
 | |
| Народзени | 27. октобра 1909. |
| Умар | 17. юния 2005. (95) |
| Державянство | австроугорске, югославянске, сербске |
| Язик творох | руски |
| Школа | Учительска школа, Крижевци |
| Период твореня | 1927—1995. |
| Жанри | просвита, литература, театер, публицистика |
| Поховани | на теметове у Новим Садзе |
| Припознаня | Награда „Невен“ за 1977,
Грамота Змайових дзецинских бавискох 1982, за животне дїло, Награда Дружтва писательох Войводини за животне дїло 1982, Фонд култури зоз Києва (Україна) награда „Винниченко“ 2003, Грамота Президента України з нагоди пейцрочнїци нєзависносци України 1997. З нагоди дзешецрочнїци нєзависносци України Орден за заслуги ІІІ ступня 2002. року |
Михайло Ковач (*27. октобер 1909—†17. юний 2005), учитель, писатель, драматурґ, автор вецей учебнїкох, публицист, всестрани културни дїяч.
Биоґрафия
Михайло Ковач ше народзел 27. октобра 1909. року у Шидзе, як єдно спомедзи єденацецерих дзецох у фамелиї Янка Ковача и Ани родз. Кулич. Основну школу закончел у Шидзе, а учительску у Крижевцох. Дипломовал 1929.року. Як учитель почал робиц у валалох Бапска Новак (при Шидзе), Мркушица и Антин.
Учитель у Руским Керестуре бул од 1931. по 1941. рок. У тим 'керестурским периодзе' Михайло Ковач ше окреме анґажовал на розвою драмскей дїялносци. Вон ше опробовал и як дириґент так же 1938. року керестурски хор, под його руководством, завжал друге место на змаганю хорох у Червинки.
Михайло Ковач 1933. року ступел до малженства зоз Маґдалену родз. Дудаш (владики Дионизия Нярадия шестрина дзивка) з Руского Керестура. У малженстве достали дзивче Ану (1934), а Маґдалена умарла на породзеню.
Снователь є и перши редактор часопису за дзеци Наша заградка (1937-1941). Як секретар РНПД (од 1936-1941) Михайло Ковач бул єден є з найактивнєйших дописовательох Руских новинох и Руского календара. Вєдно зоз др Мафтейом Винайом пририхтал до друку Руско-українски алманах бачванско-сримских писательох 1936. року и остарал ше о його друкованю у „Першей горватскей акцийней друкарнї“ у Осиєку.
Михайло Ковач ше 1935. року винчал зоз Єлену родз. Петриґала з Руского Керестура. У малженстве мали штверо дзеци, сина Ивана и дзивки Марию, Ирину и Олґу.
Як дїяч у култури, Михал Ковач записал 58 руски народни писнї по наших руских валалох у Сриме як и вецей писнї од рижних шпивачох у заґребскей грекокатолїцкей семинариї, и тот материял бул достаточни же би познати горватски музиколоґ др Винко Жґанец порихтал и видал кнїжку Писнї югославянских Русинох 1946. року зоз стихами писньох алє, по першираз, и з нотним записом истих.
Под час Другей шветовей войни Михайло Ковач бул примушени, як „странски державян“, напущиц Руски Керестур (котри окупировало мадярске фашистичне войско) и преселїц ше до родимого места Шиду, котри теди бул у гранїцох такволаней Независней держави Горватскей. Там спочатку робел як општински службенїк, а потим як учитель у Привиней Ґлави, т.є. у Бикич Долу у праве отвореней основней школи (1941-1952). У Бикичу Михайло Ковач здобул вельки угляд медзи жителями того валалу, дзе бул и дзияк у церкви и снователь Културно-просвитного дружтва Иван Котляревски, а после ошлєбодзеня, од 1945. року, постал єден з найактивнєйших сотруднїкох новооснованей Рускей матки, на место медзивойнового Руского народного просвитного дружтва. У 1952. року прешол на учительску службу до Нового Саду и активно ше уключел до роботи тедишнього руского КПД Максим Горки як театрални режисер и хорски дириґент. У 1966. року, кед на Радио Новим Садзе обновени бешедни емисиї на руским язику, Михайло Ковач прешол на службу до Рускей редакциї, дзе робел як лектор, новинар и редактор културней рубрики аж по одход до пензиї 1974. року.
Михал Ковач припадал, од вчасней младосци, до ґрупи проукраїнски ориєнтованих кадрох у рамикох РНПД. З тих позицийох вон творел и дїйствовал и пред войну, и по войни, и бул тримани та и нападани як єден з идеолоґох проукраїнскей ориєнтациї.
Литературна творчосц
Михайло Ковач єден з наших найплоднєйших писательох пред и после Другей шветовей войни. Обявйовал свойо твори под власним меном и презвиском и под псевдонимами Задунайов, Дїдо заградкар, Яни Мальовани, Иринка Калїнова, Бачи Дюра з Керестура, Кирил Пета. Єден є спомедзи перших членох Дружтва писательох Войводини и Здруженя писательох Сербиї. Першу приповедку (Атаманов син) обявел 1927. року у Руских новинох (числа 23. од 10. мая, боки 2-3, и 24. од 17. юния , боки 2-3). У периодзе од 1977. по 1992. рок придал до друку рукописи и обявени му 11 кнїжки прози и поезиї, 20 театрални фалати и векше число публицистичних написох у периодичних виданьох на руским язику. Заступени є у шицких потерашнїх руских антолоґийох поезиї и прози. Його твори прекладани на сербски, словенски, українски, словацки, румунски, мадярски язик и на есперанто.
Сучасни критичаре тримаю же Ковач утвердзел фундаменти рускей литератури и же його твори представяю саму сущносц рускей поетичней души. У його вчасних творох - у першей краткей приповедка Атаманов син хтора му обявена 1927. року як и у познєйших, мож обачиц значни уплїв українскей и русийскей литератури. У двох збиркох поезиї, Мой швет (1964) и Шветла вечарово (1985), Ковач описує прешлосц и терашньосц свойого народа зоз традицийну поетику, а з часу на час хаснує и моралистични и дидактични тони. Ковач писал и кратки приповедки (Перши радосци, 1977), написал и прейґ двасто писнї за дзеци (Писнї дїда заградкара, 1979; Хижочко стара, 1990). Його леґат у жанру фикциї и гумору представяю шейсц кнїжки, медзи хторима Цеглярня (1982), На окраїску (1983) и Глїбоки коренї (1987), як и збирка кратких приповедкох Цихи води (1970), хтора була добре прията. У шицких тих творох Ковач ше дотика проблема “оцох и синох”, чловека и його одношеня ґу роботи и борби за лєпши живот. По характеру баржей автобиоґрафска Капка по капку живот одцека (1988). Ковач и успишни драмски писатель; даскельо його комедиї и драми, як напр. На швитаню (1952) и Ораче (1954), нашли ше на репертоару войводянских руских аматерских театрох и ґрупох. На остатку, опробовал свойо моци и на роману, у жанру хтори вимага найвецей; у сотруднїцтву зоз Штефаном Гудаком написал Гриц Бандурик (1972), роман о судьби звичайного Руснака у Другей шветовей войни. Ковач бул окуповани и зоз давну прешлосцу своїх предкох, хторей пошвецел обсяжне дїло Дияспора (1992).
Припознаня и награди
Перши значнєйши припознаня за свою всестрану културну дїялносц ушлїдзели аж теди кед Ковач бул при концу седмей децениї свойого живота. Перша му була награда „Невен“ за 1977. року, котру достал у 1978. року. Потим шлїдзи Грамота Змайових дзецинских бавискох 1982, за животне дїло наменєне дзецом, награда Дружтва писательох Войводини за животне дїло тиж 1982. року. Потим, 2003. року, Фонд култури зоз Києва (Україна), додзелєл му награду „Винниченко“, наменєну писательом з українскей дияспори; 1997. достава Грамоту Президента України з нагоди пейцрочнїци нєзависносци України, а з нагоди дзешецрочнїци нєзависносци України, 2002. року достава Орден за заслуги ІІІ ступня.
Михайло Ковач умар у 96. року свойого живота, 17. юния 2005. року а поховани є на новосадским Новим теметове.
Библиоґрафия Михайла Ковача
Драма
- Зборнїк театралних фалатох, 1962.
Поезия
- Мой швет, 1964.
- Писнї Дїда Заградара, 1979.
- Шветла вечарово, 1985.
- Я дуб червоточни, 1989.
- Хижочко стара, 1990.
Проза
- Цихи води, 1970.
- Дзецински швет,1971.
- Гриц Бандурик, 1972 (роман, коавтор Штефан Гудак).
- Перши радосци, 1977.
- Цеглярня, 1982.
- Яни Мальовани, 1981
- На окраїску, 1983.
- Глїбоки коренї, 1987.
- Капка по капку живот одцека, 1988.
- Длугока драга номадска, 1990.
- Дияспора, 1992.
Значне число Ковачових писньох, окреме гевтих за дзеци, велїм композитором послужели як инспирация за музичне оформенє.
ТЕКСТИ ПИСНЬОХ
| У народним духу | Червене пупче | ||||||
|---|---|---|---|---|---|---|---|
Рок
|
Наслов писнї
|
Автор музики
|
Рок
|
Наслов писнї
|
Автор музики
| ||
| 1965. | Плїва хмарка | Яким Сивч | 1973. | Колїсанка (Чарни тащок лєци) | народна | ||
| 1969. | Ораче, ораче | Онуфрий Тимко | 1973. | Школски дзвон | Маґдалена Горняк-Лелас | ||
| 1969. | Хижочко стара | Ириней Тимко | 1974. | На пажички | Онуфрий Тимко | ||
| 1970. | О, врац ше, мили мой, врац | Яким Сивч | 1974. | На яр | Онуфрий Тимко | ||
| 1970. | О, врац ше, мили, врац | Юрий Цимбора | 1974. | Дзень младосци | Иван Ковач | ||
| 1970. | Як чежко знац любиц дакого | Микола Корпаш | 1975. | Дротар | Онуфрий Тимко | ||
| 1970. | Глєдаме щесца | Онуфрий Тимко | 1976. | Конїк | Онуфрий Тимко | ||
| 1972. | Ой, жалї пречежки | Ириней Тимко | 1977. | Лєтнї вечар | Юрий Цимбора | ||
| 1972. | Пойдзем, мамо, пойдзем | Ириней Тимко | 1977. | Заячки | Онуфрий Тимко | ||
| 1975. | Витор и тополя | Ириней Тимко | 1977. | Когуцик (Раз курочка когуцика...) | Онуфрий Тимко | ||
| 1986. | Вина, качмар | Владислав Надьмитьо | 1979. | Дюри (Заграл Дюри...) | Онуфрий Тимко | ||
| 1986. | Бежи вода, бежи бистра | Владислав Надьмитьо | 1979. | Заячок | Онуфрий Тимко | ||
| 1986. | Любел я дзивче | Владислав Надьмитьо | 1979. | Курка | Онуфрий Тимко | ||
| 1988. | Гей, Дунаю | Дубравко Слободянац | 1979. | Ловар | Онуфрий Тимко | ||
| 2002. | Чуєш, мой брату | Михал Лїкар | 1980. | Писня мацери (Мац) | Онуфрий Тимко | ||
| 1980. | Єшеньски витри | Онуфрий Тимко /
Ириней Тимко | |||||
| У забавним духу | 1981. | Моя Република | Яким Сивч | ||||
Рок
|
Наслов писнї
|
Автор музики
|
1983. | Плїва хмарка | Яким Сивч | ||
| 1980. | Преходзи час | Владислав Надьмитьо | 1985. | Козо, козо брадата | Иван Ковач | ||
| 1986. | Мраз | Михайло Бодянец | |||||
| Червене пупче | 1987. | Колїскова | Татиана Барна | ||||
Рок
|
Наслов писнї
|
Автор музики
|
1987. | Наша хижа | Татиана Холошняй | ||
| 1969. | Винчованка мацери | Владимир Тимко | 1988. | Мой валал | Дубравко Слободянац | ||
| 1969. | Тащок | Онуфрий Тимко | 2007. | Гунцут витор | Маґдалена Горняк-Лелас | ||
| 1969. | Качур рибар | Ириней Тимко | (?) | Амалка | Онуфрий Тимко | ||
| 1969. | Ганча и ластовки | Ириней Тимко | (?) | Школски ствари | Онуфрий Тимко | ||
| 1969. | Ми Титово пионире | Ириней Тимко | (?) | Шлїмак | Маґдалена Горняк-Лелас | ||
| 1970. | Моя лабдочка | Иван Ковач | (?) | Дзецинство злате (/Драґан Лукич) | Иван Ковач | ||
| 1970. | Май у лєше | Владимир Тимко | |||||
| 1970. | Студзенка | Онуфрий Тимко | Ружова заградка | ||||
| 1970. | Моєй Републики | Ириней Тимко | Рок
|
Наслов писнї
|
Автор музики
| ||
| 1971. | Гунцут витор | Ириней Тимко | 1993. | Шиви голуб | Тат’яна Колєсар-Ґвоїч | ||
| 1971. | Яр | Михайло Гайворонський | 1993. | За Дунайом | Михал Лїкар | ||
| 1971. | Хижочко стара | Ириней Тимко | 1994. | Молитва сучасного чловека | Владислав Надьмитьо | ||
| 1971. | Слунечко и дзивче | Иван Ковач | 2006. | Гей, Дунаю | Маґдалена Горняк-Лелас | ||
| 1972. | Дїдо Децембер | Яким Олеяр | |||||
| 1972. | Чудесни дзвон | Ксения Горняк | |||||
| 1972. | О, яки красни тот швет | Ириней Тимко | Стари салаши, | Дзива дзивка, Ютюб,
1. октобер, 2017. | |||
Ґалерия
-
Свадзба Михала Ковача и Маґдалени родз. Дудаш, дзивки шестри владики Нярадия, 1933. рок. -
Дзецинска школска представа Нєщешлїви пекар зоз 1932. лєбо 1934. року, режия Михала Ковача. Цалком на лїво стої Маґдалена Дудаш. То була перша жена учителя Михала Ковача (свадзба им була 1933. року). Кед же то 1932, вец вона ту вироятно як заручнїца учителя Ковача, а кед же то 1934. рок, вец му вона уж супруга. -
Учаснїки у Театралней представи у Руским Керестуре.
Литература
- Др Юлиян Тамаш: История рускей литератури, Завод за уџбенике и наставна средства – Београд, 1997, б. 117-124,172-191. и 535-540.
- Дюра Латяк: Театрални живот Руснацох, І часц, Театрални музей Войводини и НВУ Руске слово Нови Сад, 2003, боки 290-297.
- Руско-українски АЛМАНАХ бачванско-сримских писательох; Видатель Руске народне просвитне дружтво у Р. Керестуре, 1936, б. 9, 91.126.
- Дюра Варґа: Кратки исторични препатрунок кнїжовней творчосци у нашим народзе, Шветлосц ч. 1/1952, б. 1-32.
- Олександер Д. Дуличенко: Несколько слов о переводах прозы Михала Ковача на украинский язык, STUDIA RUTHENICA, 1988-1989, б. 41-47, видало Дружтво за руски язик и литературу. Цали рочнїк пошвецени литературному дїлу Михайла Ковача, подзелєному на два димензиї: язичну и литературну. Свойо написи обявели: у язичней димензиї мр Михайло Фейса, Юлин Рамач, мр Евґения Барич, Олександер Дуличенко и Ксения Сеґеди. У литературней димензиї свойо написи обявели Ирина Гарди-Ковачевич, Штефан Гудак, Владимир Ґарянски, Звонимир Няради, Стеван Константинович, Янко Рамач, Дюра Папгаргаї и Юлиян Тамаш.
- Михал Ковач, Длугока драга номадска:автобиоґрафски записи (Нови Сад, 1990);
- Юлиян Тамаш, Литературна творчосц Михала Ковача, Шветлосц, XVII, 1 (Нови Сад, 1979), б. 1-30;
- Юлиян Тамаш, Ковачова литература у контексту югославянских и українскей, Шветлосц, XXVII, 1 (Нови Сад, 1989), б. 563-571;
Вонкашнї вязи
- Швет Михайла Ковача, Маковчань, Ютюб, 21. септембер 2019.
- Учитель Михайло Ковач, ТВ Коперникус, РТВ Шид, 28. октобер 2022.
- Плоди першого заренка, ювилеї часопису Заградка, Маковчань, Ютюб, 11. юний 2017.
- Оцец и син, стихи Михала Ковача гутори Михайло Зазуляк, Маковчань, Ютюб, 23. януар 2010.