Wp/rsk/Иван Ковач
|
Иван Ковач | |
|---|---|
 | |
| Народзени | 1. авґуста 1937. року |
| Умар | 18. априла 1992. року |
| Державянство | югославянске |
| Язик творох | сербски, руски |
| Школа | Ґимназия и Штредня музична школа у Новим Садзе |
| Универзитет | Музична академия у Беоґрадзе |
| Период твореня | 1963—1992 |
| Жанри | педаґоґ, композитор |
| Поховани | Городски теметов у Новим Садзе |
Иван Ковач (*1. авґуст 1937—†18. април 1992), визначни югославянски композитор, педаґоґ, аутор велїх оркестрових, хорских и соло композицийох.
Биоґрафия
Иван Ковач[1] народзени 1. авґуста 1937. року у Руским Керестуре. Родичи оцец Михайло и Єлена (родз. Петриґала) Ковач. Його оцец Михайло Ковач робел у Руским Керестуре як учитель од 1931. року, основал фамилию и службовал аж по 1941. рок кед, пре пременки цо их принєсла Друга шветова война, бул примушени зоз фамилию преселїц ше до Сриму до родимого Шиду, дзе нєодлуга достал службу у Бикич Долу. Там Иван зоз своїма шестрами жил и роснул аж по 1952. рок, кед його оцец достал службу у Новим Садзе. Иван теди уж мал 15 роки и праве дороснул уписац ше до ґимназиї. Иван Ковач ше уписал до ґимназиї и после велькей матури, за нєполни два роки, закончел перше нїзшу, а вец и клавирски оддїл штреднєй музичней школи Исидор Баїч тиж у Новим Садзе.
Почал студиї клавира на Музичней академиї у Беоґрадзе (у класи Властимира Шкарки), а вец прешол на студиї композициї (у класи Предраґа Милошевича) дзе и дипломовал 1969. року. Под час студийох робел як сотруднїк Радио Беоґрада.
Службовац започал у Новим Садзе. Спочатку кратши час робел у Рускей редакциї Радио Нового Саду як спикер, алє пошвидко є вибрани за редактора озбильней музики у Музичней редакциї Радио Нового Саду. Кратши час од 1971. року Иван Ковач бул шеф уметнїцкей продукциї РТВ Нови Сад, потим директор Музичне школи Исидор Баїч, а 1976. року преходзи на Академию уметносцох у Новим Садзе, дзе робел як доцент на музичним оддїлу дзе преподавал Структуралну анализу музичного дїла. За декана тей Академиї вибрани є 1982. року (Иван Ковач бул на два заводи виберани за декана на Академиї). Професийни анґажман предлужує як секретар Союзу здруженьох композиторох Югославиї. Орґанизацийно консолидовал Союз, а окреме на информатичним осучасньованю його дїялносци.
Композиторски опус
То бул и период його творчого розмаху. Ковачовим творчим идейом найбаржей одвитовали звуки камерних составох. За камерни смикови оркестер вон написал Koncert, Serenadu bukoliku (1971) , Preludijum, varijacije i fugu (зоз хором и клавиром, 1976), и Funerailles. Спомедзи камерних композицийох треба спомнуц сонати за обоу и клавир (1967-72), за виолину и клавир (1978), Sonatu - torzo за кларинет и клавир (1974), Три смутни народни писнї за виолончело и клавир, Смикови квартет (1973). Значна часц його творчосци пошвецена клавиру: Preludijum i fuga, Svita, Sonata (hommage à I. Kassowic) 1971, Toccata quasi una sonata, Варияциї и фуґа за два клавири. Його композициї за оркестер то Симфония (1969) и Клавирни концерт и oratorijum Branim наградзени на конкурсу з нагоди ювилея Билечанки 1980.
Музични теоретичаре тримали же його сензибилитет найбаржей одражує композициї писани за камерни состави. Иван Ковач писал и соло писнї, хорски композициї и композициї за вельки оркестри. Окремне место забера його ораторийна фреска „АПОТЕОЗА 41” котру премиєрно виведол хор и оркестер Музичного центру Войводини у Новим Садзе.
Иван Ковач бул през цали час вязани и за руску музичну творчосц, окреме за фестивал Червена ружа. Так Иван Ковач свойо композициї пошвецел нашому подростку и виводзени су на манифестациї Червене пупче од 1970. року надалєй.
Значни допринос рускому музичному животу представя збирка його композицийох за глас и клавир, наменєна дзецом, под назву Чудесни дзвон. Векше число писньох зоз тей збирки интерпретовала и зняла за радио оперска шпивачка Ирина Давосир-Матанович
Иван и Ружица Ковач мали у малженстве двойо дзеци, сина Владимира и дзивку Катарину.
Нєсподзивана хорота застала Ивана Ковача на функциї секретара Союзу здруженьох композиторох Югославиї. После барз краткого хорованя умар у Новим Садзе 18. априла 1992. року, у полней творчей узретосци. Поховани є 21. априла 1992. року на новoсадским Городским теметове
ЧЕРВЕНЕ ПУПЧЕ
| Рок | КОМПОЗИЦИЇ | Автор текста |
|---|---|---|
| 1970. | Моя лабдочка | Михайло Ковач |
| 1971. | Слунечко и дзивче | Михайло Ковач |
| 1974. | Дзень младосци | Михайло Ковач |
| 1978. | Веє | Микола М. Кочиш |
| 1983. | Витор | Гавриїл Костельник |
| 1985. | Козо, козо брадата | Михайло Ковач |
| (?) | Цале лєто | С. Ракита |
| (?) | Дзень женох | аноним |
| (?) | Уж нам пришла яр | аноним |
| (?) | Дзецинство злате | Драґан Лукич /
Михал Ковач |
КОМПОЗИЦИЇ ИВАНА КОВАЧА НА ИНТЕРНЕТУ
ВИТОР - Дзивоцки хор зоз Дюрдьова
ДУГА - Дзивоцки хор зоз Дюрдьова
ДУГА - Женска ґрупа РКЦ Нови Сад
ПАНОНИЯ - Ирина Давосир МАТАНОВИЧ
СТАРИ САЛАШИ - Михайло ОНЕЩУК
ТРИ СМУТНИ ПИСНЇ - (виривок)
ТРИ СМУТНИ ПИСНЇ, Перша - Мартина ГРУБЕНЯ и Кристина ЗИМА
ТРИ СМУТНИ ПИСНЇ, Друга - Мартина ГРУБЕНЯ и Кристина ЗИМА
ТРИ СМУТНИ ПИСНЇ, Треца - Мартина ГРУБЕНЯ и Кристина ЗИМА
ЯК ЛЇСЦЕ (виривок) - Новосадски камерни оркестер
МОЯ ЛАБДОЧКА - Кристина АФИЧ
ЛАБДОЧКА - Агнета ТИМКО
ЛЕҐЕНДА - Катарина КОВАЧ, виолина
SERENATA BUCOLICA II stav GRAVE - Видео зняти на Фрушкей гори, на викендици Михайла Ковача, оца Ивана Ковача
Литература
- Єлена Перковичова, Шветлосц число 4/ 2017. Бок 565-568.
- Душан Михалек, Шветлосц 2/2017. бок 265-278.
- Иван Ковач, Доприношенє Руснацох розвою Нового Саду, аудио сериял, Новинарска асоцияция Руснацох, продукция 2016.
Вонкашнї вязи
- Osnovni podaci, Vikipedija Ivan Kovač, kompozitor
- Иван Ковач:Три смутни писнї (виривок)
- Dushan Mihalek Ivan Kovač - kompozitor, pijanista, pedagog. Tekst povodom 80-godišnjice rođenja.]
Референци
- ↑ Иван Ковач, биоґрафия - Руски вертикали, Новинарска Асоцияция Руснацох