Wp/rsk/Оркестер

Оркестер

Розпорядок музичарох у симфонийским оркестру

Оркестер подрозумює меншу лєбо векшу ґрупу инструменталистох хтори вєдно виводза музичне дїло,^[1] компоноване лєбо обробене за состав такей ґрупи.

Саме мено походзи зоз греческого слова ορχηστρα^[2] зоз хторим ше означує простор помедзи сцену и патрачох у театру у хторим ше находзи хор, музичаре инструменталисти и танцоше хтори тацовали у античних траґедийох и комедийох. У нєшкайшим смислу, тота назва за оркестер ше почала применьовац од 16. вику.

Историйски розвой оркестра

Историйски рoзвой оркестра почина зоз першима инструменталнима ґрупами хтори настали пре потреби заєднїцкого инструменталного граня. На початку розвою инструменталней музики состав ґрупи бул найчастейше случайни – а завишел од постояцого инструменталного фонду. Кед ше ма у оглядзе тото же як були ґруповани, то були баржей камерни ансамбли и нє даяки векши оркестри.

На розвой технїки оркестри, барз уплївовал и розвой технїки граня на поєдиних инструментох. Барок бул важна епоха за формованє оркестрох. То час винїмкового розвиваня смикових инструментох, час усовершованя солистичного музикованя.^[3] Сама основа, структури и функциї, сучасного симфонийского оркестра витворени под час бечких класичарох. Йозеф Гайдн и Волфґанґ Амадеус Моцарт звекшую число дуйних инструментох у оркестру, а розбиваю ґрупу континуа, и одстранюю чембало зоз оркестра. У Романтизму ше применюю специфични характеристики инструментох и инструменталних ґрупох. Зоз тим дочаровюю рижнородни романтични розположеня. Можлївосци инструментох у оркестру обробел композитор Гектор Берлиоз у своїм дїлу Наука о инструментациї. Рихард Ваґнер докончел формованє сучасного оркестра. Вон уводзи и нови инструменти до оркестру.

Файти оркестрох

Виоти-оркестер, Моцарт: Дивертименто у Де-дуру

Спрам инструментох зоз хторих є составени, оркестер може буц:^[4]

смикови - состої ше лєм зоз смикових инструментох. Вони ґруповани до ґрупох перши виолини, други виолини, виоли, виолончела и контрабаси.

дуйни – состої ше зоз дуйних инструментох (флаути, обои, кларинети, фаготи, труби, горни, тромбони (позауни) и ище даєдни файти плехових дуйних инструментох).
воєни - состої ше преважно зоз дуйних инструментох. Же би ше визначел ритем, додаваю ше му удерни инструменти (бубень (добош-буґна), чинели и др.)
симфонийски лєбо вельки оркестер (постої и филгармонийски) – состої ше зоз смикових инструментох, хторих числено єст найвецей и творя подлогу симфонийского оркестра, потим зоз древених дуйних инструментох (флаути, обои, кларинети, фаґоти и їм зродни инструменти), зоз плехових дуйних инструментох (труби, горни, тромбони и ище дєдни зоз їх ґрупи) и удерни (тимпани, мали бубень-буґна, вельки бубень, чинели, трианґли, ґонґ, дзвончки и други). Попри тих инструментох, у оркестру ше по потреби находзи и єдна, два лєбо и три гарфи, клавир и оргулї.
оперски - состав исти як и у симфонийским оркестру, розликує ше лєм по наменки.

Други вариянти оркестрох

A. Вивалди, Рочни часци - лєто; Кончерто 3.став у Ґе-дуру

Попри горе спомнутих оркестарох, можу ше зявиц и други вариянти оркестрох, як цо то:

Оркестер за танєц (Jazz-band) - векши лєбо менши состав зоз обавязним инструментом за визначованє ритма,^[5]^[6]
Тамбурови оркестер - оркестер составени зоз тамбурох рижних велькосцох и формох,
Оркестер гармоникох - оркестер составени зоз гармоникох розличних велькосцох и формох, характеристикох,
Народни оркестер - оркестер хтори може буц рижнородного составу,
Посмертни оркестер (оркестер за хованя) - оркестер хтори може буц розличного составу.

Камерни оркестер

Оркестер гармоникох: Йохан Штраус, Трич-трач полка

Поняце камерни оркестер,^[7]^[8] подрозумює инструментални оркестер меншого составу (од ит. Camera- хижа), вельо є менши од велького симфонийского оркестру. Найчастейше го творя: перши и други виолини, виоли, виолончела, контрабаси, 2 флаути, 2 обои, 2 кларинети, 2 фаґоти, 2 горни, 2 труби и тимпани.

Камерни оркестри можу буц рижнородного составу. Дакеди камерни оркестер лєм зоз самих смикових инструменатох.^[9] Теди ше наволує смикови оркестер. Може то буц ґрупа смикарох хторим ше додаваю даскельо други инструменти. Камерни оркестер ше часто стрета у композицийох концертного характера.

Даєдни состави ше находза на гранїци медзи оркестром и камерним ансамблом.

Року 2009. наша руска заєднїца оформела по першираз векши Национални оркестер зоз класичнима инструментами. Оркестер ше уж истого року представел нашей а и ширшей явносци..Од теди поряднє угаствовал на Централних преславох нашого Националного швета Руснацох, хтори ше орґанизую каждого року у другим месце дзе населєни и жию руснаци. На початку свойого иснованя репертоар националного оркестру бул виводзенє обробкох руских писньох а тиж и даскельо композициї з обласци класичней музики. Окрем же мал на програми самостойни наступ, оркестер провадзел на цаловечаршей програми солистох, дуети, квартети, хор. Найчастейше аранжмани писал, увежбовал оркестер и дириґовал наш познати музичар Мирон Сивч.

Инструменти стандардного симфонийского оркестру

Приказ-поставка инструментох стандардного симфонийского оркестру (спрам розпорядка по хторим су назначени у партитури): ^[10]


Ґрупа древених дуйних инструментох	Ґрупа плехових дуйних инструментох	Удерни инструменти зоз одредзену висину звука	Удерни инструменти зоз нєодредзену висину звука	Инши инструменти	Смиково инструменти
Флаута	Горна	Тимпани	Вельки бубень	Клавир	Перши виолини
Пиколо	Труба	Ксилофон	Мали бубень -буґна	Гарфа	Други виолини
Анґлийски рог	Тромбон-(Позауна)	Вибрафон	Чинели	Оргулї	Виоли
Кларинет	Туба	Ґонґ	Кастанєти	Гармоника	Виолончела
Бас кларинет		Челеста	Тамбурин	Чембало	Контрабаси
Саксофон		Дзвони	Дзвончки
Фаґот		Ґлокеншпил	Трианґл
Контрафаґот

==

Вонкашня вяза

Референци

↑ „Definition of instrumentalist” Архивоване з ориґиналу 13. 1. 2021. г.
↑ „Instrumental Musician” Government of Alberta.
↑ Musical Composition www.copyright.gov.
↑ Властимир Перичић
↑ Criswell, Chad.„What Is a Jazz Band?”
↑ „Roles of the Instruments”Jazzinamerica.org.
↑ Baron, John Herschel (1998).Intimate Music: A History of the Idea of Chamber Music Pendragon Press.
↑ Blum, David (1986).The Art of Quartet Playing: The Guarneri Quartet in conversation with David Blum New York: Alfred A. Knopf.
↑ Камерни оркестар: Гудачи Светог Ђорђа
↑ Распоред инструмената у симфонијском оркестру по партитури

[1] „Definition of instrumentalist” Архивоване з ориґиналу 13. 1. 2021. г.

[2] „Instrumental Musician” Government of Alberta.

[3] Musical Composition www.copyright.gov.

[4] Властимир Перичић

[5] Criswell, Chad.„What Is a Jazz Band?”

[6] „Roles of the Instruments”Jazzinamerica.org.

[7] Baron, John Herschel (1998).Intimate Music: A History of the Idea of Chamber Music Pendragon Press.

[8] Blum, David (1986).The Art of Quartet Playing: The Guarneri Quartet in conversation with David Blum New York: Alfred A. Knopf.

[9] Камерни оркестар: Гудачи Светог Ђорђа

[10] Распоред инструмената у симфонијском оркестру по партитури

[1]

[2]

[3]

[4]

[5]

[6]

[7]

[8]

[9]

[10]