Wp/rsk/Иван Чукляш
| Иван Чукляш | |
|---|---|
| Народзени | 31. децембра 1934. |
| Умар | 26. септембра 2002. (68) |
| Державянство | югославянске, сербске |
| Язик творох | руски, сербски |
| Школа | Штредня музична школа,
Сушак (Горватска) |
| Период твореня | 1955—1983 |
| Жанри | музика, компонованє,
дириґованє |
| Поховани | у Новим Садзе |
Иван Чукляш (*31. децембер 1934—†26. септембер 2002), професийни музичар, дириґент, композитор забавних мелодийох.
Биоґрафия
Иван Чукляш ше народзел 31. децембра 1934. року у Бєловаре (Горватска). Оцец Петар, мац Мария (дзивоцке презвиско Єндрашиц). Основну школу Ивица закончел у Бєловаре, а штредню музичну (удерни инструменти и гармоника) у Сушаку. Такой по законченю тей школи почал робиц у воєним оркестру, перше у Суботици, а од 1958. року у воєним оркестру Новосадского ґарнизона. Од 1963. року ше демобилизовал и робел як солист на гармоники у Радио Новим Садзе, а 1968. року прешол до Новосадскей опери Сербского народного театра, дзе грал як тимпанист по 1983. рок, кед пошол до инвалидскей пензиї.
Ище як член оркестра Новосадскей опери уключел ше до роботи у руским Културно-уметнїцким дружтве Максим Горки, дзе грал у оркестру. Уж 1970. року послал перши свойо композициї забавних мелодийох на конкурс Фестивала Червена ружа и такой освоює першу награду за композицию Врац ми ше, мила мамо на слова Дюри Латяка, у интерпретациї Владислава Надьмитї.
У периодзе 1970–1976 на спомнутим фестивалу му виведзени 14 композициї забавних мелодийох на слова вецей руских авторох. За свойо композициї на Червеней ружи 1972. року освоєл другу и трецу награду. У 1980. року у КУД Максим Горки основал хлопску шпивацку ґрупу Новосадски товарише, хтора исновала по 1995. рок (зоз краткима прервами). Под його дириґентску руку тота ґрупа зняла вецей руски народни шпиванки у Радио Новим Садзе, а мала и вельо наступи як у Новим Садзе так и у Петровцох, Дюрдьове, Руским Керестуре, Руменки, Валєве, Свиднїку (Словацка) и у Реґенсбурґу (Нємецка).
Остатнїраз хлопска шпивацка ґрупа под руководством Ивана Чукляша наступела 1995. року на ювилейним концерту КУД Максим Горки (Барвинок/РКПД) з нагоди 50-рочнїци роботи того дружтва и 60-рочнїци културней дїялносци Руснацох у Новим Садзе.
После того ше Иван Чукляш чежко похорел.
Иван Чукляш умар 26. септембра, а поховани є 27. септембра 2002. року на Новим теметове у Новим Садзе.
КОМПОЗИЦИЇ
| У забавним духу | ||
|---|---|---|
| Рок | Наслов композициї | Автор текста |
| 1970. | Врац ше, мила мамо | Дюра Латяк |
| 1970. | Розлука | Дюра Латяк |
| 1972. | Краю мой | Дюра Латяк |
| 1972. | Пребач ми | Дюра Латяк |
| 1973. | Любов и блуканя | Мирон Канюх |
| 1973. | Нїґда сами | Мирон Канюх |
| 1973. | Пребачце, пайташе | Мирон Канюх |
| 1973. | Твойо очи чарни | Мирон Канюх |
| 1975. | Ґимназиялка | Мирон Канюх |
| 1975. | Ми любови своєй дом | Мирон Канюх |
| 1976. | Пипинє | Михал Рамач |
| 1979. | Перши бочканя | Мирон Канюх |
| 1982. | Меркуй, най будзе нїжно | Мирон Канюх |
| У народним духу | ||
|---|---|---|
| Рок | Наслов композициї | Автор текста |
| 1974. | Камени чловек на памятнїку | Иван Чукляш Мирон Канюх |
Затрацени композициї у архиви Дома култури Руски Керестур
- 1973. Шерцо у гаю – музика: Иван Чукляш, слова Мирон Канюх, виведзена 1973. року
- 1974. Мали чарни пес, автор музики Иван Чукляш, а текста Мирон Канюх, шпивал Владислав Надьмитьо,
- 1974. Мали идеали, автор музики Иван Чукляш, текста Мирон Канюх, шпивал Владислав Надьмитьо
Вонкашнї вязи
- Иван Чукляш (биоґрафия и список композицийох), Червена ружа 1962-2011, Том II, Завод за културу войводянских Руснацох, Нови Сад, 2014., б. 546.
- Енциклопедија Српског народног позоришта: Оркестар - Иван ЧУКЉАШ, тимпани