Wb/nia/Korindro I/9

From Wikimedia Incubator
< Wb‎ | nia‎ | Korindro I
Wb > nia > Korindro I > 9

Heŵa'ae tola, lö i'andrö mbalazonia Faulo[edit | edit source]

I. 1 Hadia, tenga tola manö ulau zomasi ndra'o? Hadia, tenga sinenge ndra'o? Hadia, lö ni'ilagu Yesu, So'aya ya'ita? Hadia, tenga lua-lua halöŵögu ami, ba khö Zo'aya?[1] 2 Na tenga sinenge ndra'o ba danö bö'ö, ba ba khömi sa atö; famaduhu'ö halöŵögu, halöŵö zinenge andrö, ami, ba khö Zo'aya.[2] 3 Famu'agu da'ö, ba zanguhuku ya'o andrö.[3]

4 Hadia, lö tola manga ndra'aga, lö tola mabadu hadia ia?[4] 5 Hadia, lö tola ma'ohe-ohe awöma dalifusö alawe, fo'omoma, si mane sinenge bö'ö andrö göi ba talifusö Zo'aya ba Kefa?[5] 6 Ma ha daruaga Baranaba zi lö tola lö mohalöŵö?[6] 7 Ha niha zi möi sanuwö, sanaha göi balazonia? Ha niha zamazökhi kabu nagu, si lö manga mbua? Ba ha niha zokubaloi urifö, si lö mamadu susu gurifö andrö? 8 Hadia, tödö niha dali wehedegu andrö? Ma tenga si manö göi niŵa'ö ba goroisa? 9 Noa sa musura ba goroisa Moze: "Böi fosare'a mbawa göröbao samöbörö fakhe". Hadia, so ba dödö Lowalangi göröbao?[7]

10 Ma tenga ya'ita ato mbörö wanguma'önia da'ö? Ya'ita sa mbörö, wa tesura da'ö, wa lö tola lö idöna-döna lua-lua samaku tanö; ba si manö zamöbörö fakhe, idöna-döna wemanga.[8] 11 Na no mataru khömi zoroi ba Geheha, ba hadia, nikata'ö sibai, na mabasi ba khömi zoguna balazo mboto?[9] 12 Na so danö bö'ö sangokhögö göi hadia ia khömi, ba hadia, tenga mendrua manö ndra'aga? Ba lö ni'oguna'öma, wa tola da'ö mena'ö mataha manö sa'ae fefu hadia ia, fa lö mafobörö daha-taha ba duria somuso dödö andrö, khö Keriso.[10]

13 Hadia lö mi'ila, wa ba gosali lasöndra göra si so halöŵö ba gosali? awö wa ba naha wame'e sumange mo'urakha zi so halöŵö ba naha wame'e sumange?[11] 14 Si manö göi, no i'oroi'ö So'aya ba zangombakha turia somuso dödö andrö, ba duria somuso dödö andrö lasöndra göra.[12]

15 Ba ya'o, ba lö ni'oguna'ögu da'ö, ma'ifu lö'ö. Ba tenga andrö usura da'ö, ena'ö lafatörö khögu zi manö; sökhi na i matedo, moroi faya khögu mbörö wanuno ya'o, ibe'e niha, ha niha ia.[13] 16 Na u'ombakha'ö duria somuso dödö andrö, ba tenga börö wanuno khögu; lö'ö sa tola lö umanö, alai sa ndra'o, na lö u'ombakha'ö duria somuso dödö andrö![14] 17 Na nilau dödögu sa, ba so luogu; ba na sabua ölö ndra'o, ba no nibe'e ba dangagu halöŵö andrö.[15] 18 Ba hadia luogu ya'ö? Da'ö luogu, ube'e buala duria somuso dödö andrö, na u'ombakha'ö, fa lö u'oguna'ö zi tola ena'ö, ba halöŵö andrö, ba duria somuso dödö andrö.

Edöna manö ia tobali enoni zato[edit | edit source]

II. 19 He ŵa'ae tenga sawuyu niha ndra'odo, ba no ubali'ö sawuyu zato ndra'odo, ena'ö ato udönisi.[16] 20 Ba niha Yehuda, ba no tobali hulö niha Yehuda ndra'o, ena'ö udönisi niha Yehuda. Ba zi so barö mbawa goroisa, ba hulö zi so barö mbawa goroisa ndra'o, — ba tenga sa si so barö mbawa goroisa — ena'ö udönisi zi so barö mbawa goroisa.[17] 21 Ba zi lö oroisa, ba hulö zi lö oroisa ndra'o, — ba tenga sa si lö oroisa ba khö Lowalangi, solo'ö oroisa Keriso ndra'odo — ena'ö udönisi zi lö oroisa.[18] 22 Ba zambö fa'abe'e, ba no tobali sambö fa'abe'e ndra'o, ena'ö udönisi zambö fa'abe'e; fefu hadia ia, ba niha fefu ba no ugo'ö-go'ö, ena'ö fefu gofu heza, ba fasamösa na ato u'orifi.[19]

23 Ba börö duria somuso dödö andrö, wa ulau da'ö fefu, ena'ö mo'urakha göi ndra'o ba da'ö.

Iforege wangalui fangorifinia göi[edit | edit source]

III. 24 Hadia, lö mi'ila ba zi fagohi andrö, ba lala wagohisa andrö, wa dozi sa fagohi ira, ba ha samösa zanema luo andrö? Ba mimanö wagohisa, ena'ö mitema![20] 25 Ba dozi si fatandra töla andrö, ba laböhöli fefu hadia ia; ba ya'ira andrö, ena'ö latema dakula si tekiko dania, ba ya'ita, ena'ö tatema zi lö tebulö.[21] 26 Ba ya'o, ba si fagohi, tenga si mane ba zi lö ta'ila; si fasöndra ndra'o, ba tenga ba dalu mbanua manö.[22] 27 Ufakao mbotogu andre, ba u'osawuyu, fa böi si lö guna ndra'o, he no sangombakha lala ba danö bö'ö ndra'odo.[23]

Famotokhi ba gahe[edit | edit source]

  1. Faigi 15:8 b.t.; 4:15; HalZin 9:4
  2. KorII 3:2–3; 12:12
  3. Faigi 4:3
  4. Luk 10:7
  5. HalZin 1:14; Mat 8:14
  6. HalZin 13:2; TesII 3:8–9
  7. MozV 25:4; TimI 5:18
  8. Yak 5:7
  9. Rom 15:27
  10. KorII 12:13; HalZin 20:33 b.t.
  11. MozV 18:1 b.t.
  12. Faigi 9:4; Luk 10:7 b.t.
  13. KorII 11:7 b.t.
  14. Faigi 1:17
  15. Faigi 4:1 b.t.
  16. Faigi 10:33; Mat 20:27,28
  17. HalZin 16:3; 21:20 b.t.
  18. Gal 2:3; 6:2; Yak 2:12
  19. Faigi 9:19; KorII 11:29; HalZin 10:35; 10:32
  20. Fil 3:12 b.t.
  21. TimII 2:4; 4:8; FetI 5:4
  22. Faigi 15:58
  23. Rom 8:13 b.t.; 13:14

Fabaliŵa lala[edit source]

Olayama Zura Korindro I 12345678910111213141516

Amabu'ulali Sibohou: MataioMarekoLukaYohaneHalöŵö ZinengeRomaKorindro IKorindro IIGalatiaEfesoFilifiKoloseTesalonika ITesalonika IITimoteo ITimoteo IITitoFilemoHeberaioYakoboFetero IFetero IIYohane IYohane IIYohane IIIYudaFama'ele'ö

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö