Wb/nia/Korindro I/15

Add links
From Wikimedia Incubator
< Wb‎ | nia‎ | Korindro I
Wb > nia > Korindro I > 15

Famaduhu'ö wemaoso zi mate[edit | edit source]

I. 1 Ba lö ubini'ö khömi, ya'ami ira talifusö, duria somuso dödö andrö, ni'ombakha'ögu khömi, nihalömi khömi göi, ba zaro ami göi,[1] 2 ba nisöndrami fangorifi göi, na mi'o'ö zi mane ni'ombakha'ögu khömi, na lö miböhöli; ato na zaya-zaya gölömi, wa no mamati ami.

3 Da'ö sa zi a'a nifa'emagu khömi, nitemagu göi, wa no mate Keriso, börö horöda andrö; wa no itörö zi so ba zura andrö;[2] 4 awö wa no muko'o ia, awö wa no mususugi ia, me no irugi tölu ngaluo, wa no itörö zi so ba zura;[3] 5 awö wa no i'oroma'ö ia khö Gefa andrö, ba aefa da'ö, ba ba zi felendrua.[4] 6 Aefa da'ö, ba i'oroma'ö ia ba dalifusö andrö, si töra lima ngaotu, i'osamuzaigö; so sa zi no mate ösa, da'ö, ba ato zauri.[5] 7 Aefa da'ö, ba i'oroma'ö ia khö Yakobo andrö, ba aefa da'ö, ba ba zinenge andrö fefu.[6]

8 Ba ba gafuriata sibai, ba no i'oroma'ö ia göi khögu, si hulö zi lö irugi baŵa ba wa'atumbu.[7] 9 Fondrege zide-ide sa ndra'odo, ba zinenge andrö, tenga sa si nangea labe'e töigu zinenge, me no ugohi mbanua Lowalangi andrö.[8] 10 Ba börö wa'ebua dödö Lowalangi, wa si manö ndra'odo iada'e, ba tenga sa zaya-zaya gölö wa'ebua dödönia ba khögu andre, tobali sa ebua halöŵö nihalögu, moroi ba nihalöra fefu, ba tenga sa ya'odo, no fa'ebua dödö Lowalangi andrö, fanolo ya'odo.[9]

11 Ba he ya'odo, ba he ya'ira andrö, ba si manö wangombakha'öma, ba si manö wamatimi.[10]

12 Ba na teturiagö Keriso, wa no mususugi ia moroi ba ngai zi mate, ba hana wa so ösa ba khömi sanguma'ö, lö femaoso zi mate?[11] 13 Na lö femaoso zi mate sa, ba lö'ö göi mususugi Keriso. 14 Ba na lö mususugi Keriso, ba no zaya-zaya gölö göi wangombakha'öma, ba zaya-zaya gölö göi wamatimi. 15 Ba no tobali sasi sofaya ndra'aga ba khö Lowalangi, me no maböbögö khö Lowalangi, no isusugi Keriso si tenga nisusuginia; na duhu, lö tesusugi zi mate. 16 Na lö'ö sa tesusugi zi mate, ba lö mususugi Keriso. 17 Ba na lö mususugi Keriso, ba si lö boto wamatimi andrö, ba lö si tebulö ami ba horömi; 18 tobali si no tetiko göi zi no mate andrö, ba khö Keriso.[12]

19 Na ha ba götöda andre manötöna ita, khö Keriso, ba no numana ita, moroi ba niha bö'ö fefu.[13] 20 Ba iada'e, ba no mususugi Keriso, moroi ba ngai zi mate, no si a'a ia ba zi no mate andrö.[14] 21 Me no moroi ba niha sa wa'amate andrö, ba moroi ba niha göi wemaoso zi mate andrö.[15]

22 Hulö si mane ba khö Gadamo sa, wa ahori mate ira ba da'ö, si manö göi ba khö Keriso, ahori te'orifi ira dania. 23 Ba oi niföfö'ö: Si a'a, ba Keriso, ba fanetenia, ba tana khö Keriso andrö, na so ia.[16]

24 Ba awena dania gamozua andrö, na ibe'e ba danga Lowalangi Ama wamatörö andrö, na no iheta wamatörö fefu ba fa'asalaŵa fefu ba fa'abölö fefu. 25 Lö'ö sa tola lö'ö, salaŵa ia, irege no ibe'e barö gahenia zi fa'udu, fefu,[17]

26 Safuria zi fa'udu, niheta, ba ya'ia wa'amate andrö.[18] 27 "Fefu hadia ia, ba no ibe'e barö gahenia." Ba na laŵa'ö, no mube'e barö mbawa fefu hadia ia, ba no ta'ila, baero zame'e barö mbawania fefu hadia ia.[19] 28 Ba na no mube'e barö mbawania fefu hadia ia, ba awena möi göi Nono barö mbawa zi no mame'e barö mbawania fefu hadia ia, ena'ö ha sambalö Lowalangi ba khöra fefu.[20]

29 Na tenga si manö, ba hadia nilau zamabayagö'ö idanö ya'ira salahi zi no mate? Na lö'ö manö tesusugi zi mate, ba hana wa lafabayagö'ö ira idanö, salahira?

30 Ba ya'aga göi, ba hana wa lö mamalö-malö, wa lö ma'ila nosoma.[21] 31 Ero ma'ökhö matedo; ya lö usuno ndra'o ba khömi andrö, ya'ami ira talifusö, ba khö Keriso Yesu, So'aya ya'ita, na fayagu.[22]

32 Na dali niha, wa no fasöndra ndra'o ba gutu ndru'u andrö ba Nefeso, ba hadia gunania khögu? Na lö tesusugi zi mate, ba "datalau manga-manga ba datalau mamadu-madu hadia ia, mahemolu mate sa atö ita."[23] 33 Böi mibe'e nifaelungu ami. Ifakiko mböwö si sökhi huhuo si lö sökhi. 34 Miböhöli sibai wemabu andrö ba böi mifazökhi horö; so sa ösa zi lö aboto ba dödö Lowalangi; ba wangailasi ya'ami uŵa'ö da'ö.[24]

Amuata wemaoso andrö[edit | edit source]

II. 35 Ba te so zanguma'ö: ba he wisa wanusugi si mate andrö? He wisa mbotora, na so ira?[25] 36 He si lö mangila watahögö! tanömö nitarumö andrö, ba lö auri, na lö mate ua.[26] 37 Ba nitarumö andrö, ba tenga boto andrö si so dania ötaru, he sambalö ulitö, ta'ila na gandru, ba ma hadia ia mbö'önia. 38 Ba Lowalangi zame'e khönia boto, somasi ia; ba sambalö danömö, ba sambalö mboto dania.[27]

39 Lö'ö sa oi fagölö-gölö nösi hadia ia; sambua sa nösi niha, ba sambua nösi gurifö niha, ba sambua nösi wofo, ba sambua nösi gi'a. 40 Ba so mboto yaŵa, ba so mboto ba guli danö, ba sambua lakhömi zi so yaŵa, ba sambua lakhömi zi so ba guli danö.[28] 41 Sambua haga luo, ba sambua haga mbaŵa, ba sambua haga ndröfi; a'oi sa faehu na i wa'abölö haga ndröfi.

42 Si manö göi wemaoso zi mate andrö. Sobou nitanö, ba si lö obou nisusugi. 43 Si lö töi nitanö, ba si so lakhömi nisusugi; si lö abölö nitanö, ba sabölö nisusugi.[29] 44 Boto si so noso nitanö, ba boto si so Eheha nisusugi. Na so mboto si so noso, ba so göi mboto si so Eheha. 45 Si manö göi ba zura: "No tobali sonoso niha si föföna andrö, Adamo", ba Adamo safuria andrö, ba no tobali Eheha sangorifi,[30]

46 Ba tenga si föföna zi so Eheha, si so noso zi föföna, awena zi so Eheha. 47 Moroi ba guli danö niha si föföna andrö, tanö, ba moroi ba zorugo niha si sambua.[31] 48 Si mane si otarai ba danö andrö, si manö fefu zi otarai ba danö, ba si mane si otarai zorugo andrö, si manö fefu mbanua zorugo; 49 ba si mane foloheda famaedo zi otarai ba danö andrö, si manö göi dania woloheda famaedo zi otarai zorugo andrö.[32]

50 Ba da'ö niŵa'ögu, ya'ami, ira talifusö, tebai isöndra mbanua Lowalangi ösi niha andrö, ba tebai isöndra wa lö obou sobou andrö.[33] 51 Hiza, si no tobini u'ombakha'ö khömi: Lö ahori mate ita, ba ahori tobali,[34] 52 i'ogomuzaö, ha mamö'i hörö wa'ara, na telau dorofe safuria andrö; telau sa ia dania, ba maoso zi no mate andrö, tebai sa'ae obou, ba ya'ita, ba si tobali.[35]

53 Lö'ö sa tola lö i'onukha wa tebai obou sobou andre, ba lö tola lö i'onukha wa tebai mate si mate andre.[36] 54 Ba na no i'onukha wa tebai obou sobou andre, ba na no i'onukha wa tebai mate si mate andre, ba awena itörö daroma li andrö, si so ba zura: No alömö wa'amate andrö ba wemöna.[37] 55 Hezo wemönau, fa'amate? Hezo duomö, fa'amate?[38] 56 Ba tuo wa'amate andrö, ba ya'ia horö andrö, ba fa'abölö horö andrö, ba ya'ia goroisa.[39] 57 Ba nisuno Lowalangi same'e khöda femöna andrö, moroi khö Zo'aya ya'ita andrö, Yesu Keriso.[40]

58 Andrö, ya'ami ira talifusögu, somasi ndra'o, ya'abe'e ami, si lö humeu-heu, ya'a'oi so khömi wangai halöŵö Zo'aya andrö, böi yamamalö-malö, me no mi'ila, tenga zaya-zaya gölö wa'erege dödömi andrö, ba khö Zo'aya.[41]

Famotokhi ba gahe[edit | edit source]

  1. ↑ Gal 1:11–12
  2. ↑ Faigi 11:23; Yes 53:8 b.t.; Dan 9:26; HalZin 17:2 b.t.
  3. ↑ Sin 16:10; Hos 6:2; Mat 12:40
  4. ↑ Luk 24:34–36
  5. ↑ Mat 28:10
  6. ↑ Luk 24:50
  7. ↑ Faigi 9:1; HalZin 9:3 b.t.
  8. ↑ Efes 3:8; TimI 1:13
  9. ↑ TimI 1:14; KorII 5:23
  10. ↑ Faigi 3:7
  11. ↑ TimII 2:17–18; Mat 22:23
  12. ↑ TesI 4:14
  13. ↑ Faigi 15:32; 4:9
  14. ↑ HalZin 26:23; Kol 1:18
  15. ↑ Rom 5:12; 18:21
  16. ↑ TesI 4:15–16
  17. ↑ Sin 110:1; Heb 10:12–13
  18. ↑ Fam 20:14
  19. ↑ Sin 8:7; Mat 28:18; Heb 2:8
  20. ↑ Faigi 3:23; 11:3
  21. ↑ Rom 8:36
  22. ↑ KorII 1:8–9; 4:10 b.t.
  23. ↑ HalZin 19:29 b.t.; Yes 22:13
  24. ↑ TesI 5:6–8
  25. ↑ Hes 37:3; Yes 26:19
  26. ↑ Yoh 12:24
  27. ↑ Faigi 12:8; MozI 1:11
  28. ↑ Mat 22:30; HalZin 12:7
  29. ↑ Fil 3:21; Kol 3:4
  30. ↑ MozI 2:7; Yob 19:25
  31. ↑ MozI 3:19; Yoh 3:13–31
  32. ↑ Rom 8:29
  33. ↑ Yoh 1:13
  34. ↑ TesI 4:15 b.t.
  35. ↑ Mat 24:31
  36. ↑ KorII 5:4
  37. ↑ Yes 25:8
  38. ↑ Hos 13:14
  39. ↑ Rom 5:12; 13:20; 7:9 b.t.
  40. ↑ Rom 7:25; 8:37; YohI 5:4–5
  41. ↑ Nga'ötII 15:7; Mat 25:13; Kol 2:6–7

Fabaliŵa lala[edit source]

Olayama Zura Korindro I 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Korindro_I/15&oldid=6272377"