Wb/nia/Danieli/9

Add links
From Wikimedia Incubator
< Wb‎ | nia‎ | Danieli
Wb > nia > Danieli > 9

I. Fangandrö Danieli[edit | edit source]

1 Ba me lö döfi na Dario andrö, Dawa Media, ono Gahasiwero, si no tobali razo Ndrawa Galedaia, me lö'ö na döfi razo ia, 2 ba ufaigi, ya'odo Danieli, ba zura, ha me uga fakhe, niŵa'ö Yehowa khö Yeremia sama'ele'ö, si lö tebulö, wa adudula Yeruzalema, 70 fakhe.[1] 3 Ba u'otahögö Lowalangi So'aya, mamoni ndra'o, u'obaru gonigoni ba mudadaodo bawu, ena'ö usöndra wangandrö ba fakaosa khönia.[2] 4 Mangandrö ndra'o khö Lowalangigu Yehowa, u'ombakha'ö lalöda, umane: "He So'aya, Lowalangi sebua ba sata'u ita, si lö mowu'ai fawu'usa li andrö ba fa'ahakhö dödö ba zomasi ya'ugö, ba zolo'ö oroisamö![3] 5 No mamazökhi horö ndra'aga ba no malau zi lö atulö; no sebua horö ndra'aga ba no malaŵa ndra'ugö, no masawö goroisamö ba amakhöitamö.[4] 6 Noa göi lö nifondrondrongoma li genonimö, sama'ele'ö andrö, sama'ema niŵa'öu ba razoma ba ba zalaŵama ba khö ndra tuama ba ba niha ba danö, fefu. 7 Ba ya'ugö So'aya, ba si no a'oi so fa'atulö, ba no safusi bawa fa'aila mado Yuda ba banua Yeruzalema ba Iraono Gizeraeli fefu, he ba zahatö, ba he ba zaröu, ba danö andrö fefu misa, ba nifazaeweu ya'ira, börö wa no la'erogö ndra'ugö. 8 He So'aya, saila ndra'aga, ya'aga ba razoma ba salaŵama ba ira tuama, me no molalöga khöu. 9 Ba no khö Zo'aya, Lowalangima, so wa'ahakhö dödö ba fangefa horö. Noa sa molaŵa ndra'aga khönia, 10 ba lö nifondrondrongoma li Lowalangima Yehowa, ba wanörö ena'ö lala nifakhoinia nifarongogönia khöma ba genoninia sama'ele'ö andrö. 11 Iraono Gizeraeli fefu, ba no lasaŵö goroisamö, no lö ni'o'öra khöu, no la'erogö ndra'ugö. Ba no göna ndra'aga fangelifi andrö ba fahölusa, si so ba zura goroisa andrö khö Moze, enoni Lowalangi, me no molalö ndra'aga khönia.[5] 12 No ifatörö ba niŵa'önia, fameta'u ya'aga ba salaŵama, samatörö ya'aga, wa ifatörö dania khöma wamakao sebua, si lö murai mulau ba guli danö, ha ba Yeruzalema.[6] 13 Itörö manö zi so ba zura goroisa andrö khö Moze, no gönaga famakao andrö, fefu. Ba lö ni'alösima tödö Lowalangima Yehowa, lö nifalalinima era-erama, lö nibatoma wanao horö ba lö nitöngönima si duhu andrö khöu. 14 Andrö wa no itörö tödö Yehowa wamakao andrö, ba no ifatörö khöma, me no satulö Lowalangima Yehowa, ba nilaunia fefu; ba ya'aga, ba no si lö molo'ö linia.[7] 15 Ba iya'e, ya'ugö So'aya, Lowalangima, me no öfawu'a mbanuau, me no öheta ira ba danö Miserayi tangau sabölö ba me no ebua döimö öbe'e, irugi ma'ökhö andre; no molalö ndra'aga, no molauga si lö atulö. 16 He So'aya, alösi wönumö ba mbanuau Yeruzalema, ba hili ni'amoni'ö andrö khöu, dali wa'ahakhö dödöu andrö, ni'oromaroma'ömö, götö-götö wa'ara sa'ae! Börö sa horöma andrö ba olalöŵa ndra tuama, wa no tobali fama'iki niha si tefasui ya'aga fefu Yeruzalema ba banuamö andre. 17 Ba iya'e, ya'ugö Lowalangima, ba fondrondrongo wangandrö genoniu ba fakaosania, ba fehaga mbawau yaŵa ni'amoni'ö andrö khöu, si no adudu, börö ndra enonimö andrö, ya'ugö So'aya![8] 18 Be'e mbörö dalingau, ya'ugö Lowalangigu, ba fondrondrongo! Fehaga'ö ba faigi wa'adudu andrö khöma ba banua andrö, sotöi töimö. Tenga sa börö wanötönama ba wa'atulöma, ni'oroma'öma, wa ma'ohe khöu wakaosama andrö, börö wanötönama fa'ahakhö dödöu andrö, si no ebua sibai. 19 He So'aya, fondrondrongo! be'e aefa khöma horöma, Soaya! be'e mbörö dalingau, So'aya, ba ta'i-ta'i, börö ndra'ugö, ya'ugö Lowalangigu; me no sotöi töimö mbanua andrö khöu ba banuau [niha]!"

II. Fama'ele'ö wa'ato'ele Mesia ba fanudugö Yeruzalema, fabaya osali[edit | edit source]

20 Ba me lö saetu na wehedegu ba fangandrögu, me u'ombakha'ö horögu, awö horö mbanuama Iraono Gizeraeli ba me u'ohe khö Lowalangigu Yehowa wangandrögu fanolo ba hili ni'amoni'ö andrö khö Lowalangigu, 21 me mangandröngandrö na ndra'odo, ba i'ondrasido Gaberieli andrö — ni'ilagu ba gangilata andrö no — me inötö wame'e sumange na tanö owi so ia, me no erege sibai dödögu.[9] 22 Möi ia fahuhuo khögu, ba imane: He Danieli, ba wamotokhi sibai ba dödöu so ndra'odo iada'e. 23 Me öbörötaigö mangandrö mege, ba tebe'e li, ba no sodo, ba wangombakha khöu, wa no omasiö ndra'ugö. Ba fondrondrongo, ba aboto ba dödöu dania gangilata andrö![10] 24 Fitu ngafulu migu (mewitu fakhe zi samigu) nihonogöi ba niwami ba ba mbanua ni'amoni'ö andrö khöu, ba wango'ozui fanao horö andrö ba ba wamönui su'a-su'a horö ba ba wangeheta olalöŵa ba ba wangasogö fa'atulö dödö si lö aetu, ba ba wamotandro angilata zama'ele'ö andrö ba ba we'amoni'ö fondrege ni'amoni'ö andrö.[11] 25 Ba böi zi lö örongo, ba ya aboto ba dödöu: I'otarai mbaŵa me tefabu'u, lafuli lataru'ö Yeruzalema, irege so Mesia, salaŵa, ba fitu migu, ba 62 migu wa'ara la'angazökhi'ö ewali ba bandra [ba Yeruzalema], ba lö aefa wamakao ba götö da'ö.[12] 26 Ba na no aefa zi 62 migu andrö, ba tetimba Mesia lö horönia, ba banua, fabaya ni'amoni'ö andrö, ba sabölö khö razo si so moroi sa zanudugu, ba timba na itörö oloro gamozuania; irugi gamozua, ba fanuwö ba famakao ba fanudugu.[13] 27 Ba ato nibe'enia oroisa sabe'e dania, samigu wa'ara, ba ba dalu zi samigu andrö dania, ba itenaŵa wame'e sumange nitaba ba sumange ni'a, ba börö wondrege zogoro ita andrö, ba so zanudugö ba irugi wangohori, si no muhonogöi sibai, si hawui dania sanudugö.[14]

Famotokhi ba gahe[edit | edit source]

  1. ↑ Yer 25:11,12; 27:7; 29:10
  2. ↑ Sanguhuk 20:26
  3. ↑ MozV 7:9; Neh 1:5
  4. ↑ Sin 106:6; Yes 64:5
  5. ↑ MozIII 26:14 b.t.; MozV 27:15 b.t.; 28:15 b.t.; 29:20 b.t.; 30:18; 32:19 b.t.
  6. ↑ Ngenu 1:12; 2:13
  7. ↑ Yer 1:12; 31:28; 24:27
  8. ↑ MozIV 6:25
  9. ↑ Faigi 8:16; Luk 1:19
  10. ↑ Faigi 10:12
  11. ↑ Faigi 8:23; Heb 9:12, Mat 5:17
  12. ↑ Eser 7:11 b.t.; 9:9; Neh 9:36
  13. ↑ Yes 53:8; Mat 26:66
  14. ↑ Faigi 11:31; 12:11; Mat 24:15; Mar 13:14; Luk 24:20

Fabaliŵa lala[edit source]

Olayama Danieli: 1 • 2 • 3 • 4 • 5 • 6 • 7 • 8 • 9 • 10 • 11 • 12

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Danieli/9&oldid=6272433"