Wb/nia/Danieli/11

Tohu-tohu:

I. Fama'ele'ö he wisa dania gamatöröŵa Ndrawa Weresia ba amatöröŵa Ndrawa Heleni

1 Ba ya'odo, me ambö döfi na razo Dario andrö, Dawa Media, si iagö awögu, ba wanolo ya'o ba ba womba'a khögu hadia ia. 2 Ba iya'e, ba si duhu u'ombakha'ö khöu: Datölu tö na dania razo Ndrawa Weresia; ba fanete da'ö, ba ana'a sebua moroi ba gana'ara fefu isöndra, ba na sabölö sibai sa'ae ia dania, ba i'owuloi zabölö fefu, ba wanuwö amatöröŵa Ndrawa Heleni. 3 Ba so dania razo sabölö, samatörö amatöröŵa sebua, ba ifalua zomasi ia. 4 Ba si mane fa'asonia, si manö göi wa'adudu gamatöröŵania [wa'alio], ni'o'öfa, mangohia'ö mata angi si öfa. Ba sambua lö möi ba nga'ötönia, ba sambua göi lö sogamö fa'abölö khönia mege. Fa'asalaŵania ba ni'osi sa'ae, ba ba mbö'ö möi, tenga ba nga'ötönia.

II. Ba he wisa gamatöröŵa Ndrawa Miserayi ba amatöröŵa Ndrawa Garamo

5 Ba abölö dania razo raya, ba sabölö na moroi khönia gumandra khönia, samösa, ba salaŵa da'ö, salaŵa gamatöröŵa, tanö sebolo ibe'e barö mbawania. 6 Ba mato mendrua fakhe, ba fahuwu ira, ba möi fo'omo razo yöu nono razo raya, ba wahuwusa, ba lö anau gölö dolo-tolo da'ö; ba he tolo-tolo bö'ö khönia, ba si lö boto, tebe'e nifakiko dania ia [ira alawe andrö], awö zolohe ya'ia mege, awö namania, awö zanolo ya'ia mege. 7 Ba so dania wangalinia, lewiö ba lali andrö, si otarai ira alawe andrö, mege; da'ö dania zi möi fasuwö ba zabölö andrö, ba atu'a ia ba mbanua saro andrö, khö razo yöu, ba ilau khöra zomasi ia ba sabölö ia. 8 Numalö adura ba famaedo nifahele khöra, awö gama-gamara sebua böli, firö ba ana'a, ba i'ohe ahulua, ba danö Miserayi; ba irege mato mendrua fakhe dania, ba lö'ö sa'ae isuwö razo yöu; 9 ba da'ö dania zi möi ba danö razo raya, ba wanuŵo ya'ira, ba ifuli sa atö ia ba khöra. 10 Ba iraononia dania zanohugö fanuwö-nuwö andrö, ba ato sibai la'owuloi sabölö. Da'ö dania zi so, timba molö sebua, ba lanönöi danö; ba lafuli lalau, larugi mbanua saro andrö khönia. 11 Ba abao sibai dania dödö razo raya, ba so ia moroi si tou, ba wasuwöta khö razo yöu. Ato sibai sa ba da'ö sabölö, ba möna zui razo raya. 12 Ba ahori zanuwö andrö; ba fayaŵa razo raya, ba ngafulu ngahönö ibunu niha, ba tenga sa atö sabölö ia dania. 13 Ifuli i'owuloi zabölö razo yöu, sato moroi ba zi föföna mege; ba na no mato mendrua fakhe zui, ba ifuli so ia, ato sibai zabölö khönia, ba fangöna, ba si no fahöna. 14 Ba ba da'ö dania, ba ato zi maoso udu razo raya, ba molaŵa göi zabölö andrö, soimi, ena'ö itörö wama'ele'ö andrö, ba si te'ala ira. 15 So razo yöu, ifako'o'ö mba'a-ba'a ba atu'a ia ba mbanua saro; lö'ö sa manaha zaradadu moroi raya, ba fondrege zabölö khönia, ba no sambö fa'abölö, ba wanimba ya'ira ena'ö. 16 Ba solau khönia andrö, ba ilau manö zomasi ia, me lö sabe'e. Ba i'aro'ö naha ba wondrege zi sökhi tanö andrö; famakiko nilau dangania. 17 Ba da'ö nifaiginia dania, ena'ö khönia manö gamatöröŵa razo raya, ma'asagörö, ba i'atulö'ö ia khönia ba ibe'e khönia nononia alawe, ba ba wamakiko; ba lö itörö [nifakhainia], lö fozu. 18 Ba ifaigi wangai tanö ba mbewe nasi ba ebolo ihalö khönia; ba so dania gumandra sebua, samadöhö fango'ayania andrö, isulöni sa'ae khönia wango'ayania andrö. 19 Ba awena dania ifaigi mbanua saro ba danönia, ba amaedola zanendre ia ba da'ö, ba alau ia, ba lö ya'ia sa'ae. 20 Ba fanalinia, ba ifatenge ba wondrege zi sökhi tanö andrö zanugi beo; ba lö ara, ba mate nibunu ia, ba tenga ba wönu ba tenga ba wanuwö.

III. Razo Andriokho Efifane, razo Ndrawa Garamo ba famakaonia banua Lowalangi

21 Ba fangalinia, ba si lö ngaroro, si tenga ni'odödögö famataro razo; ba so manö ia, lö mudöna-döna ba ba walimolimosa i'okhögö wa'asalaŵa. 22 Ba sanuwö sato sibai, ba amaedola ihanigö manö, ba ihori, ba ibunu göi zatua ba wawu'usa li andrö, samösa. 23 Ba he na so zi no fahuwu khönia, ba ilimo; lö ato sibai khönia zabölö, na möi ia manuwö, ba ya'ia zui zi möna. 24 Ihawui manö danö fondrege zatabö sinanö, lö mudöna-döna, ba ilau zi tenga nilau ndra amania, ba he ira tuania föna; nirabunia ba ahuluania, ba ifaosa ba nawönia, tenga ha ma'ifu, ba ifakhai wolau ba mbanua saro misa; ba lö ara sibai. 25 Ba ilau khö razo raya wa'abölönia andrö ba fa'abe'e dödönia, ato sibai i'ohe niha, ba no maulu göi wa'ato khö razo raya, ba no sabölö sibai, ba ifaondragö, ba wasuwöta, ba tebai ilaŵa, börö me so zi manga mböli. 26 Sorudu manga khönia zamufu ya'ia; timba nihanigö zabölö andrö khönia fefu, ba ato nibunu si'öli. 27 Falimosa dödö razo andrö si darua; ha sambua naha wemanga ba faoma lalimo nawöra; ba lö fozu, me awena amozua, na no irugi inötö. 28 Ba tobali ifuli ia ba danönia, ba no ebua sibai gahulua, ba awena dania ifaigi ba wolau ba zi no fawu'u li andrö, ni'amoni'ö, ba ifalua ba ifuli ia ba danönia. 29 Ba na no irugi inötö, ba isaŵa zui danö si raya, ba bö'ö lua-lua ba zi samuza andrö, bö'ö me föna. 30 Lalau khönia si so ba nowo Giti, ba ata'u ia labe'e, ba tobali mangawuli, ba ba zi no fawu'u li andrö, ni'amoni'ö, itandrösaigö wönunia. Ba ifuli ia ba khöra, ba i'otarai da'ö, ba itandrösaigö ba zi no mangawuli furi, si no mondröi fawu'usa li ni'amoni'ö andrö. 31 Ifatenge zabölö, si iagö da'ö, ba solau salakha ba ni'amoni'ö andrö, ba hati andrö, ba sanenaŵa sumange andrö, nibe'e-be'e ba samedadao sogoro ita andrö, fanudugö [huku Lowalangi]. 32 Ba zi no manawö fawu'usa li andrö, ba ilimo, ena'ö la'erogö [huku Lowalangi]; ba si no aboto ba dödö Lowalangira, balö mangiwa, latandro. 33 Satua-tua ba khöra, ba labotokhi ba dödö zato, ba mato mendröfa fakhe wa'ara tefakiko ira bawa zi'öli ba alitö ba fokuru ba foraburabu si so khöra. 34 Ba na luo wa'ate'alara andrö, ba falukha ira wanolo side-ide, fangorifira; ba ato dania zi fao khöra, samini tödö. 35 Ba so zi mate, ösa, satua-tua khöra, ba wameta si fabaya, si lö göna, ba si no amaedola gadaya, ba wangehao, gasa-gasa gamozua; ba ginötö sa dania da'ö.

IV. Fa lö ba dödönia Lowalangi ba folaunia bö'önia ba fa'amatenia

36 Ba razo andrö, ba ilau zomasi ia; sohokha ia ba si fayaŵa ia ba zi no motöi Lowalangi, fefu, ba khö Lowalangi Fondrege zalaŵa, ba ilau huhuo sihokha mbuda, ba mofozu wolaunia, irege no alö wönu Lowalangi [ba Ndraono Gizeraeli], me no mufalua nihonogöi. 37 Ba he Lowalangi ndra tuania mege, ba lö ba dödönia, ba he "fa'omasi ndra alawe" andrö, ba he hadia ia Lowalangi bö'ö, ba lö ba dödönia, fayaŵa manö ia khöra fefu. 38 Ba nifosumangenia, salahi, ba Lowalangi hati andrö, Lowalangi si lö murongo khö ndra tuania, ifosumange firö ba ana'a ba mani-mani ba barasi. 39 Ba ba mbanua saro misa, ba ifaigi khönia zolo'ö huku Lowalangi bö'ö; ba ba nitutuyunia andrö, ba i'ebua'ö zumange ba ifataro salaŵa ira, ato ibe'e barö mbawara, ba ifakhoi khöra danö, böli gölöra. 40 Ba ba götö safuria andrö, ba fatandra fa'abölö khönia razo raya, ba ilau khönia razo yöu, i'ohe gureta ba si fakudo, ba oya göi nowo, lasaŵa danönia ba lahawui, lanönöi. 41 Ba möi ia göi ba wondrege zi sökhi tanö andrö, ba ba ngafulu ngahönö zi mate ibe'e. Ba si lö ibabaya, ba Iraono Gedomo ba Iraono Moabi ba tuho Ndraono Gamoni. 42 I'oro'ö dangania yaŵa danö andrö misa, ba he tanö Miserayi göi, ba lö aefa khönia; 43 ana'a ba firö ba hadia gama-gama sebua böli ba danö Miserayi, ba ihalö khönia, ba solo'ö khönia göi Ndrawa Libia ba Dawa Khusi. 44 Ba so dania duria moroi ba gatumbukha luo ba moroi yöu, si tokea ia; ba maoso ia, isaŵa, ena'ö atö ifakiko ba ihori. 45 Ba ba gotaluara nasi hili andrö, si so famoadu andrö, ni'amoni'ö, ibe'e nosenia, amaedola gödonia; ba ba da'ö ikhamö ia fa'amate, ba lö sangorifi ya'ia.

Famotokhi ba gahe

Fabaliŵa lala

Olayama Danieli: 1 • 2 • 3 • 4 • 5 • 6 • 7 • 8 • 9 • 10 • 11 • 12

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö