Wb/nia/Danieli/2

I. Mangifi Nebukanesa

1 Ba me no töra döfi razö Nebukanesa, ba mangifi ia, ba humufa dödönia, ba lö'ö sa'ae i'ila mörö. 2 Ba ibe'e li razo, lakaoni zebua elemu ba si faeta ba sanoto ba Dawa Galedaia, ba wangombakha khö razo hadia wangifinia. Ba me so ira, me la'ondrasi razo, 3 ba imane khöra razo: No mangifi ndra'o, ba no humufa dödögu, ena'ö u'ila geluaha wangifi andrö. 4 Ba latema li razo Dawa Galedaia andrö, ba li Ndrawa Garamo, lamane: He razo, ya si lö aetu nosou! Tunö wangifi andrö ba genoniu, ena'ö ma'ombakha'ö geluahania! 5 Ba imane razo ba Ndrawa Galedaia anrdö: No u'etu'ö tödögu: Na tebai mitunö khögu wangifi andrö, fabaya eluahania, ba la'ö'ötö ami, ba labali'ö oboula nomomi. 6 Ba na mi'ila mitunö khögu wangifi, fabaya eluahania, ba oya ngawalö mbuala ba sumange sebua mitema khögu. Andrö mi'ombakha'ö khögu wangifi andrö, awö geluahania! 7 Ba lafuli latema linia, lamane: Yamutunö manö wangifi andrö razo, ba genoninia, ba ya'aga dania zanguma'ö hadia geluahania. 8 Ba imane khöra razo: Aboto sibai sa'ae ba dödögu, wa edöna mirörö ndra'odo, me no mirongo, no u'etu'ö tödögu: 9 Na lö'ö sa mi'ila mitunö khögu wangifigu andrö, ba lö tebulö huku, ni'etu'ögu khömi, me no mamagölö ami, ba wolau faya khögu, ba wolimo ya'o, irege no olifu ndra'ö. Andrö mitunö khögu wangifi andrö, ena'ö aboto ba dödögu, mi'ila göi miŵa'ö khögu, hadia geluahania. 10 Ba latema li razo Dawa Galedaia andrö, lamane: Samösa lö niha ba guli danö, sangila manguma'ö ni'andrö razo, ba lö'ö göi irai iŵa'ö ba zebua elemu ba ba zi faeta ba ba Ndrawa Galedaia zi mane da'ö razo sebua ba sabölö, fefu gofu heza. 11 No abölö afökhö ni'andrö razo, me samösa lö sangila mangombakha'ö da'ö khö razo, baero zi no motöi Lowalangi, ba tenga ba ngai niha si mate-mate so da'ö. 12 Ba mofönu sibai razo, abao dödönia, ba ibe'e li, ahori labunu zonekhe-nekhe ba Mbabeli. 13 Ba me no mube'e goroisa andrö, ba wamunu sonekhe-nekhe andrö, ba la'alui göi Danieli ba awönia andrö, ba wamunu ya'ira.

II. So Danieli. Mangandrö ira ndra awönia andrö, ba ifondrondrongo Lowalangi

14 Ba humede Danieli, si so era-era ba si so tödö, khö Gariokhi, kumandra wazuri, si möi mamunu sonekhe-nekhe ba Mbabali. 15 Humede ia, imane khö Gariokhi andrö, kumandra khö razo: Hadia mbörö goroisa sabe'e andrö, nibe'e razo? Ba me no i'ombakha'ö khö Danieli mbörö Ariokhi, 16 ba möi Danieli mangandrö famonoso khö razo, ba i'ombakha'ö khö razo geluaha [wangifi andrö] iŵa'ö. 17 Aefa da'ö, ba ifuli ia ba nahiania Danieli ba idunö-dunö ba nawönia andrö, khö ndra Hanania, Mizaeli, Asaria huhuo andrö, 18 ba iŵa'ö khöra la'agaröfi li Lowalangi ba zorugo, ba zi no tobini andrö, ena'ö ihakhösi tödö ira, fa böi lafao dania ba zonekhe-nekhe bö'ö ba Mbabeli Danieli ba awönia, wamunu ya'ira. 19 Ba tebokai khö Danieli zi no tobini andrö ba gangilata, ba zi bongi. Ba isuno Lowalangi ba zorugo Danieli. 20 Humede ia, imane: Nisuno döi Lowalangi, götö-götö wa'ara dania; me no khönia wa'atua-tua ba fa'abölö. 21 Ya'ia zamalalini nga'ötö ba inötö, itimba razo ba ifuli ifataro razo bö'ö; ba ya'ia zame'e fa'atua-tua ba zatuatu'a ba fa'aboto ba dödö ba zaboto ba dödö. 22 Ya'ia zamokai si no tobini sibai, ba i'ila nilau ba zogömi-gömi; ba haga andrö, ba ba khönia so. 23 U'andrö saoha gölö khöu, ya'ugö Lowalangi ndra tuagu, usuno ndra'ugö, me no öbe'e khögu wa'tua-tua ba fa'abölö, ba me no öbokai göi khögu iada'e ni'andröma khöu; noa sa öbokai khöma niŵa'ö razo andrö.

III. Itunö khö razo wangifinia Danieli

24 Ba möi sa'ae Danieli khö Gariokhi, ba niŵa'ö razo famunu sonekhe-nekhe ba Mbabeli; möi ia khönia, imane khönia: Böi bunu zonekhe-nekhe ba Mbabeli! Ohe ndra'o yomo khö razo, ba u'ombakha'ö geluaha [wangifi andrö] khö razo. 25 Ba i'aliogö i'ohe khö razo Danieli Ariokhi, imane khönia: No usöndra niha, ba Niha Yehuda, ni'oloi'ö moroi ba mbanuara, sedöna mangombakha eluaha [wangifi andrö] khö razo. 26 Ba humede razo, imane khö Danieli, si no mufotöi Belizasari: Hadia, ö'ila ö'ombakha'ö khögu hadia wangifigu andrö ba hadia geluahania? 27 Ba humede Danieli, imane khö razo: Ba zi no tobini andrö, ni'andrö razo, ba lö sonekhe-nekhe ba lö si faeta ba lö sebua elemu ba lö sangila eluaha ndröfi, sangila mangombakha khö razo; 28 ba so Lowalangi, ba zorugo, samokai si no tobini, ba no da'ö zama'ele'ö khö razo Nebukanesa, he wisa dania, furida. Ba da'ö wangifiu andrö ba angilata höröu ba wemöröu: 29 Ya'ugö razo, ba no mangerangera tödö ndra'ugö ba gasou, he wisa maö furida; ba samokai si no tobini, ba no ifa'ele'ö khöu he wisa. 30 Ba no tenga börö wa'atua-tua, si no so khögu taŵa'ö, ba si lö ba niha bö'ö fefu, wa no mu'oroma'ö khögu; börönia: ena'ö irongo geluaha razo, ba ena'ö te'ombakha'ö khöu hadia gera-era dödöu andrö. 31 Ya'ugö razo, ba no ö'ila, no so ba duduma höröu wamaedo niha, sebua sibai. No ebua wamaedo andrö, ba si no ebua sibai lakhömi göi; no musindro fönau ba sata'u ita wamaigi ya'ia. 32 Högö wamaedo andrö, ba no si ndruhu mbalaki, ba totonia, awö da'io, ba firö, ba talu ba lafoyo, ba töla garamba, ba fahania, ba si'öli, ba ahenia, 33 ba no matonga zi'öli, ba si matonga, ba la'uri. 34 Ba öfaigi, ba i'ogomuzaö abo'a gowe — tenga moroi ba danga niha — ba göna ba wamaedo niha andrö, ba gahenia si'öli ba la'uri, ba arasa ibe'e. 35 Ba i'ozumagö muzawili, he si'öli ba he la'uri, ba he töla garamba, ba he firö, ba he balaki, timba ndrami ba golayama mbasitö ba wamasi, ba i'oloi'ö angi, tobali ezai mutö lö musöndra sa'ae. Ba gowe andrö, same'e arasa wamaedo niha andrö, ba manöi ba tobali hili sebua, anönö guli danö ma'asagörö ibe'e.

IV. I'ombakha'ö geluaha: amatöröŵa andrö si öfa ba banua Lowalangi

36 Da'ö wangifi andrö, ba data'ombakha'ö khö razo hadia geluahania; 37 Ya'ugö razo, ba no razo yaŵa razo bö'ö ndra'ugö, nibe'e Lowalangi ba zorugo fa'asalaŵa ba fa'abölö ba fa'abe'e ba fa'ebua döi, 38 ba nibe'enia barö mbawa niha, fefu gofu heza so ira, awö zaliŵa-liŵa ba danö, awö wofo ba dalu mbanua, nibe'enia samatörö ya'ira fefu: ya'ugö högö balaki andrö. 39 Ba furiu dania, ba so gamatöröŵa bö'ö, sambö moroi ba khömö; ba aefa da'ö, ba so zui, si no töla garamba, ba irugi guli danö ma'asagörö famatörö. 40 Ba aefa da'ö, ba amatöröŵa fanete zi tölu, sabe'e timba zi'öli, si mane si'öli, sorasa fefu hadia ia, samoto, si manö wa ifufu dania da'ö no mege fefu ba irasa, si mane si'öli, forasa hadia ia. 41 Ba ahe andrö ba tuturu kahe ni'ilau, wa no matonga la'uri ba si matonga, ba si'öli, ba falöaro gamatöröŵa andrö [geluahania]. Ba so sa atö khönia göi wa'abe'e zi'öli; ya'ia wa no ö'ila, no fakhöyö ira zi'öli la'uri. 42 Ba fangilau, wa no faruka ira zi'öli la'uri, ba duturu kahe, ba ya'ia wa matonga aro, matoga lö aro gamatöröŵa andrö; 43 awö wa no faruka ira zi'oli la'uri, ö'ila: ba he lafakhöyö ira, na fahalö ira, ba lö'ö sa atö faböbö, si mane si'öli ba la'uri, si tebai göi tafaruka. 44 Ba na luo razo andrö, ba i'asogö gamatöröŵa Lowalangi ba zorugo, amatöröŵa si tebai adudu, götö-götö wa'ara, ba fa'asalaŵa da'ö, ba lö möi ba niha bö'ö; irasa dania gamatöröŵa no mege fefu, ba ihori, ba ya'ia, ba lö tebulö, irugi zi lö aetu. 45 Si mane fangilau, wa abo'a gowe ba hili — tenga moroi ba danga niha — sorasa si'öli ba töla garamba ba la'uri ba firö ba balaki. No Lowalangi sebua zama'ele'ö khö razo, he wisa dania. Ba fangifi andrö, ba no si ndruhu, ba eluahania, ba no si faduhu dödöda.

V. Ifosumange Danieli razo

46 Ba ifalögu tou ia razo Nebukanesa, ba mangalulu ia khö Danieli, ba ibe'e li, labe'e zumange khönia ba samohua. 47 Ba humede razo, imane khö Danieli: Si ndruhu: no Lowalangi yaŵa Lowalangi bö'ö Lowalangimi andrö, ba no So'aya razo fefu, ba no sangila mamokai si no tobini ia, me no ö'ila öfa'ele'ö zi no tobini andrö. 48 Ba ifosumange sibai Danieli razo; oya sibai ibe'e khönia buala sebua, ba ifataro salaŵa ia ba nöri Mbabeli ma'asara, ba ibe'e fondrege zatua zonekhe-nekhe ba Mbabeli fefu ia. 49 Ba me mangandrö Danieli khö razo, ba ibe'e ba danga ndra Saderakhi, Mezakhi Abedo-Nego wamatörö öri Mbabeli. Ba Danieli, ba lö aefa-aefa ba gödo razo.

Famotokhi ba gahe

Fabaliŵa lala

Olayama Danieli: 1 • 2 • 3 • 4 • 5 • 6 • 7 • 8 • 9 • 10 • 11 • 12

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö