Wb/nia/Danieli/10

I. I'ila mala'ika Danieli

1 Ba me no töra mendrua fakhe razo Ndrawa Weresia andrö, Kiro, ba so nifa'ele'ö khö Danieli andrö, nifotöi Belizasari. Si ndruhu nifa'ele'ö andrö, ha no famakao sebua nifa'ele'ö. Ba itanö ba dödönia nifa'ele'ö andrö ba itöngöni gangilatania. 2 Ba ya'odo Danieli, ba sabu tödö, me luo da'ö, tölu migu wa'ara: 3 Lö u'a gö sami, ba he diwo, ba lö ubadu nagu, ba samuza lö ubayoini ndra'o, irugi alua zi tölu migu. 4 Ba ba zi dua wulu a öfa ba mbaŵa si föföna, ba ba mbewu nidanö sebua andrö, Tigeri, sodo. 5 Ba ufaöga hörögu, ufakhölödo, ba hiza niha, nukha tarafali nukhania, ba böbö löwi-löwinia, ba balaki sa'usö, balaki Ufasa. 6 Ba botonia, ba no timba weremata wirusa, ba sihaga mbawania, hulö gari mbanua, ba hörönia, ba hulö zulu, ba ta'ionia ba ahenia, ba nö töla garamba si no mudukhu, si takile, wamaigida, ba linia, ba no hulö goso-goso sabölö-bölö. 7 Ha ya'odo, Danieli, zangila angilata andrö, ba awögu, ba ma'ifu lö la'ila; ba noa sa ihawui ira fa'ata'u sabölö-bölö, ba moloi ira, ba wamini'ö ya'ira. 8 Ha ya'o zi toröi, ba me u'ila gangilata sebua andrö, ba atata manö dölagu, ba afusi mbawagu, tobali, ba lö döladölagu sa'ae. 9 Urongo linia, ba me urongo da'ö, ba alau tou ndra'o, hulö zi ono matelö, telögudo tou ba danö. 10 Ba i'ogomuzaö itufa ndra'o tanga ba ifahisi ndra'odo; ba ubalöduhini danö, ba utundreheni ndra'o tangagu.

II. Ibörötaigö ibokai khönia mala'ika andrö, he wisa dania mitou

11 Ba imane khögu: He Danieli omasiö! Fondrondrongo ligu, niŵa'ögu khöu ba zizio, me no iya'e sibai tefatenge ndra'o khöu. Ba me iŵa'ö khögu da'ö, ba muzizio ndra'o, manizi-nizido. 12 Ba imane khögu: Böi busi dödöu, Danieli, i'otarai luo, me ibörötaigö omasi'ö ösöndra wa'aboto ba dödö ba me ö'ide-ide'ö ndra'ugö föna Lowalangiu, ba no tefondrondrongo wangandröu, ba no fangandröu andrö mbörö wa'asogu. 13 Dua wulu a sara wongi wa'ara iba'a ndra'o mala'ika samaigi-maigi amatöröŵa Ndrawa Weresia andrö; ba hiza, ba so Mikhaeli, salaŵa mala'ika, sebua, itolodo, me no ha ya'odo ba wasöndrata ba razo Ndrawa Weresia. 14 Ba no sodo, ba wangombakha khöu, he wisa ba madomi, ba götö furi; noa sa zui angilata, nitandrösaigö ba götö mitou dania. 15 Ba me imanö khögu, ba ufatugu ndra'o, ba lö hede-hedegu. 16 Ba hiza zi hulö niha, wamaigigu, sanufa bewegu tuturunia; ba ubokai mbawagu, humede ndra'o, umane ba zi so fönagu andrö: He Tuha! No göna ndra'o faniri, börö ni'ilagu andrö, ba lö döladölagu sa'ae. 17 Ba he uwisa göi, ya'odo enoni zokhö ya'o, he uwisa fahuhuo khö Duha, si mane ya'ugö? Lö döladölagu sa'ae ba ambö manö nosogu! 18 Ba ifuli itufa ndra'odo tangania, si hulö niha, wamaigigu, i'abe'e'ö ndra'o. 19 Ba imane: Böi busi dödöu, ya'ugö omasiö, ya ohahau dödöu! Abe'e'ö ndra'ugö, ya'ia, ö'abe'e'ö ndra'ugö! Ba me iŵa'ö khögu da'ö, ba abe'e ndra'odo, ba u'ila uŵa'ö: Hede Tuha, me no ö'abe'e'ö ndra'odo! 20 Ba imane: Hadia, ö'ila, hana wa möido khöu? Mangawuli ndra'o iada'e, möido fasöndra ba mala'ika samaigi-maigi Dawa Weresia, ba na aefado ba da'ö, ba no so sa'ae mala'ika Ndrawa Heleni. 21 Ba u'ombakha'ö atö khöu zi so ba zura zi duhu andrö, he ŵa'ae lö awögu, ba wolau ba khöra andrö, baero mala'ikami andrö, Mikhaeli.

Famotokhi ba gahe

Fabaliŵa lala

Olayama Danieli: 1 • 2 • 3 • 4 • 5 • 6 • 7 • 8 • 9 • 10 • 11 • 12

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö