Wp/cop/Ⲕⲉϣⲣⲱⲙⲓ

Ϯⲙⲏⲧⲣⲟⲡⲟⲗⲓⲥ

Ϯⲕⲉϣⲣⲱⲙⲓ

ϯⲙⲉⲧⲁ̀ⲣⲁⲃⲟⲥ: القاهرة
Ⲡⲓⲙⲏⲓⲛⲓ Ⲡⲓⲥⲓⲅⲛⲟⲛ
Ϯⲇⲓⲟⲓⲕⲏⲥⲓⲥ
Ϯⲭⲱⲣⲁ	Ⲭⲏⲙⲓ
Ⲡⲓⲑⲱϣ	ϮⲔⲉϣⲣⲱⲙⲓ
Ⲡⲓⲁ̀ⲫⲉ	Ⲓⲃⲣⲁϩⲓⲙ Ⲥⲁⲃⲏⲣ Ϧⲁⲗⲏⲗ
Ⲡⲓⲇⲉⲙⲟⲥ
Ϯⲏⲡⲓ ⲛ̀ⲇⲉⲙⲟⲥ	10,100,166
Ϯⲅⲉⲱ̀ⲅⲣⲁⲫⲓⲁ̀
Ⲡⲓϣⲁⲩ	2,734
Ϯⲍⲱⲛⲏ ⲛ̀ⲥⲏⲟⲩ	UTC+2

Ϯⲕⲉϣⲣⲱⲙⲓ (ϯⲙⲉⲧⲁ̀ⲣⲁⲃⲟⲥ: القاهرة) ⲧⲉ ϯⲙⲏⲧⲣⲟⲡⲟⲗⲓⲥ ⲛ̀ⲣⲉⲙⲛ̀ⲭⲏⲙⲓ ⲛⲉⲙⲧⲉⲥⲛⲓϣϯ ⲙ̀ⲃⲁⲕⲓ ϧⲉⲛⲡⲉⲓⲉⲃⲧ ⲉⲧϧⲉⲛⲑⲙⲏϯ. 10 ⲙ̀ⲙⲓⲗⲓⲱⲛ ⲛ̀ⲣⲱⲙⲓ ⲥⲉϩⲉⲙⲥⲓ ϧⲉⲛϯⲃⲁⲕⲓ ⲟⲩⲟϩ 22.1 ϧⲉⲛⲡⲓϣⲓ ⲙ̀ⲙⲏⲧⲣⲟⲡⲟⲗⲓⲥ ⲛ̀ⲧⲉϯⲔⲉϣⲣⲱⲙⲓ ϯⲛⲓϣϯ.

Ϩⲁⲛⲙⲏϣ ⲙ̀ⲙⲁ ⲛ̀ⲁⲣⲭⲉⲟⲥ ⲥⲉⲭⲏ ϧⲉⲛⲧⲉⲥⲡⲉⲣⲓⲭⲱⲣⲟⲥ ⲙ̀ⲫⲣⲏϯ ⲛ̀Ⲱⲛ ⲛⲉⲙⲘⲉⲛϥⲓ ϯⲙⲏⲧⲣⲟⲡⲟⲗⲓⲥ ⲛ̀ⲣⲉⲙⲛ̀ⲭⲏⲙⲓ ⲛ̀ⲁ̀ⲡⲁⲥ ⲉⲩⲥⲟⲡ ⲛⲉⲙⲚⲓⲡⲩⲣⲁⲙⲓⲥ ⲛⲁ ϯⲠⲉⲣⲥⲓⲟⲥ. Ϯⲃⲁⲕⲓ ⲣⲱ ⲁⲥⲁⲓⲁⲓ ⲉ̀ⲃⲟⲗ ϧⲉⲛⲛⲓⲃⲁⲕⲓ ⲛ̀ⲧⲉⲡⲉⲛⲉϩ ⲉⲧϧⲉⲛⲑⲙⲏϯ ⲛ̀ϫⲉⲂⲁⲃⲩⲗⲱⲛ ⲛⲉⲙⲡⲓⲪⲱⲥⲁⲧⲟⲛ.

Ⲟⲩⲟⲛⲧⲁⲥ ϯⲁⲣⲭⲉⲟⲥ ⲛⲉⲙϯⲛⲓϣϯ ⲙ̀ⲡⲣⲁⲅⲙⲁⲧⲓⲁ̀ ⲛ̀ϥⲓⲗⲙ ⲛⲉⲙⲙⲟⲩⲥⲓⲕⲟⲛ ϧⲉⲛⲠⲉⲓⲉⲃⲧ ⲉⲧϧⲉⲛⲑⲙⲧϯ ⲉⲩⲥⲟⲡ ⲛⲉⲙⲡⲓⲁⲣⲭⲉⲟⲥ ⲙ̀ⲙⲁ ⲛ̀ϭⲓⲥⲃⲱ ⲉⲧϭⲟⲥⲓ ⲛ̀ⲭⲏⲙⲓ ⲛ̀ϫⲉⲡⲓⲙⲁ ⲛ̀ⲑⲱⲟⲩⲧⲥ Ⲡⲉⲧⲉⲣⲟⲩⲱⲓⲛⲓ. Ϩⲁⲛⲙⲏϣ ⲙ̀ⲙⲏⲥⲟⲧⲏⲥ ⲛⲉⲙⲡⲣⲁⲝⲓⲥ ⲛⲉⲙⲥⲉⲛϯ ⲉⲧⲟⲩⲧⲉϣⲗⲱⲗ ⲟⲩⲟⲛⲧⲟⲩ ⲛⲟⲩⲧⲟⲧⲥ ⲙ̀ⲡⲉⲣⲓⲭⲱⲣⲟⲥ ϧⲉⲛϯⲡⲟⲗⲓⲥ.

Ⲡⲓⲙⲉⲑⲣⲱ ⲛ̀ⲧⲉϯⲔⲉϣⲣⲱⲙⲓ ⲉⲧⲁⲩⲟⲩⲏⲛϥ ϧⲉⲛ1987 ⲡⲉ ⲡⲓⲁⲣⲭⲉⲟⲥ ϧⲉⲛⲛⲓⲙⲉⲑⲣⲟ ⲛ̀ⲧⲉϯⲀ̀ⲫⲣⲓⲕⲏ.

Ⲡⲓⲣⲁⲛ

Ϩⲁⲛⲙⲏϣ ⲛ̀ⲥⲟⲡ ⲥⲉⲛⲓⲣⲉⲙⲛ̀ⲭⲏⲙⲓ ⲙⲟⲩϯ ⲉ̀ⲣⲟⲥ ϫⲉⲬⲏⲙⲓ ⲉⲑⲃⲉⲧⲉⲥⲙⲉⲧⲛⲓϣϯ ϧⲉⲛⲛⲓⲕⲉⲃⲁⲕⲓ ⲛ̀ϯⲭⲱⲣⲁ.

Ϩⲁⲛⲟⲩⲟⲛ ϧⲉⲛⲛⲓⲃⲁⲗⲓⲥⲧⲟⲣⲓⲁ̀ ⲥⲉⲙⲟⲕⲙⲉⲕ ϫⲉ ⲁⲩϩⲓⲥⲉⲛϯ ⲉ̀ϯⲃⲁⲕⲓ ⲉ̀ⲧⲓ ⲡⲓϣⲁⲓ ⲛ̀ⲧⲉϨⲁⲣⲑⲱϣ ⲡⲓⲥⲉⲣⲙⲏ ⲉ̀ⲡⲉϥⲣⲁⲛ ⲡⲉ ⲁⲗⲛⲁϫⲙ ⲁⲗⲕⲁϩⲓⲣ (ϯⲙⲉⲧⲁ̀ⲣⲁⲃⲟⲥ: النجم القاهر) ϧⲉⲛϯⲙⲉⲧⲁⲣⲁⲃⲟⲥ ⲛ̀ⲅⲗⲱⲧⲑⲓⲁ̀ ⲟⲩⲟϩ ⲕⲁⲧⲁⲫⲁⲓ ⲡⲉ ⲡⲓⲣⲁⲛ Ⲁⲗⲕⲁϩⲓⲣⲁ (ϯⲙⲉⲧⲁ̀ⲣⲁⲃⲟⲥ: القاهرة) (ⲧⲡⲟⲗⲓⲥ ϯⲣⲉϥϭⲣⲟ). Ⲟⲩⲟⲛⲧⲉⲥ ϩⲁⲛⲙⲏϣ ⲛ̀ⲕⲉⲣⲁⲛ ⲛ̀ϫⲉϯⲔⲉϣⲣⲱⲙⲓ ϧⲉⲛϯⲁⲥⲡⲓ ⲛ̀ⲣⲉⲙⲛ̀ⲭⲏⲙⲓ ⲛ̀ϫⲉⲂⲁⲃⲩⲗⲱⲛ ⲛⲉⲙⲬⲏⲙⲓ ⲛⲉⲙⲖⲓⲟⲩⲓ̀ ⲁⲗⲗⲁ ϯⲔⲉϣⲣⲱⲙⲓ ⲡⲉ ⲡⲓⲣⲁⲛ ⲛ̀ⲁⲩⲑⲉⲛⲧⲓⲕⲟⲥ ϧⲉⲛⲧⲁⲓⲃⲓⲕⲓⲡⲁⲓⲇⲉⲓⲁ̀ ⲑⲁⲓ‎. Ⲡⲁⲓⲣⲁⲛ ⲉⲧⲉⲙⲙⲁⲩ ⲁⲩϭⲓ ⲉ̀ⲡⲟⲩϣⲁⲡ ⲙ̀ⲡⲓⲣⲁⲛ ⲙ̀ⲙⲉⲧⲁ̀ⲣⲁⲃⲟⲥ ⲡⲓⲔⲁⲥⲧⲣⲟⲛ ⲛ̀ⲣⲱⲙⲁⲓⲟⲥ (ϯⲙⲉⲧⲁ̀ⲣⲁⲃⲟⲥ: قَصْر الرُوم) ⲉⲧⲁⲩⲇⲟⲕⲓⲙⲁⲍⲓⲛ ϧⲉⲛϮⲙⲁⲣⲧⲩⲣⲓⲁ ⲛ̀ⲧⲉⲡⲓⲁ̀ⲅⲓⲟⲥ Ⲓⲱⲁⲛⲛⲏⲥ ⲡⲓⲉ̀ⲃⲟⲗ ϧⲉⲛⲪⲁⲛⲓϫⲱⲓⲧ.

Ϯⲥⲧⲟⲣⲓⲁ̀

Ϯⲥⲉⲛϯ

Ⲁⲩϩⲓⲥⲉⲛϯ ⲛ̀ϯⲔⲉϣⲣⲱⲙⲓ ϧⲉⲛ969 (685 ⳥) ⲉ̀ⲃⲟⲗ ϩⲓⲧⲉⲛϪⲉⲩϩⲁⲣ ⲡⲓⲢⲉⲙⲥⲓⲕⲓⲗⲓⲁⲡⲓⲥⲧⲣⲁⲧⲏⲗⲁⲧⲏⲥ ⲛ̀ⲛⲓϣⲉⲛⲃⲁϯⲙⲁ. Ⲁⲩϭⲣⲟ ⲉ̀Ⲭⲏⲙⲓ ⲉ̀ⲃⲟⲗ ⲧⲟⲩⲃⲁⲥⲓⲥ ϧⲉⲛϯⲀ̀ⲫⲣⲓⲕⲏ ⲟⲩⲟϩ ⲁⲩϩⲓⲥⲉⲛϭ ϯⲃⲁⲕⲓ ⲙ̀ⲃⲉⲣⲓ ⲡⲁⲣⲁ ⲡⲓⲪⲱⲥⲁⲧⲟⲛ ⲉⲧⲁⲩϯⲣⲉⲛⲥ Ⲁⲗⲙⲁⲛⲥⲟⲩⲣⲓⲁ̀. Ⲁⲧⲁⲓⲃⲁⲕⲓ ⲉⲣ ⲙ̀ⲙⲏⲧⲣⲟⲡⲟⲗⲓⲥ ⲙ̀ⲃⲉⲣⲓ ⲛ̀ⲇⲓⲁ̀ⲇⲟⲭⲟⲥ. Ⲙⲉⲛⲉⲛⲥⲁ ϯⲉⲛⲧⲟⲗⲏ ⲙ̀ⲡⲓⲇⲓⲁ̀ⲇⲟⲭⲟⲥ Ⲁⲗⲙⲟⲩⲉ̀ⲓⲥ ⲁϪⲉⲩϩⲁⲣ ϩⲓⲥⲉⲛϯ ⲙ̀ⲡⲓⲁⲗⲙⲁⲥϭⲏⲧ ⲉⲧϯⲟⲩⲱⲓⲛⲓ ⲉⲧⲁϥⲣⲱⲧ ⲉ̀ϣⲱⲡⲓ ⲛ̀ϯⲙⲁϩϣⲟⲙϯ ⲛ̀ⲁ̀ⲡⲁⲥ ⲛ̀ⲙⲁ ⲛ̀ⲥⲱⲟⲩⲛ ϧⲉⲛⲡⲓⲑⲟ ⲧⲏⲣϥ. Ⲁⲗⲙⲟⲩⲉ̀ⲓⲥ ⲉⲧⲁϥⲓ̀ ⲓⲥϫⲉⲛϯⲙⲏⲧⲣⲟⲡⲟⲗⲓⲥ ⲛ̀ⲛⲓϣⲉⲛⲃⲁϯⲙⲁ ⲛ̀ⲁ̀ⲡⲁⲥ Ⲙⲁϩⲇⲓⲁ̀ ⲉⲧϧⲉⲛⲦⲩⲛⲓⲥ ⲉ̀Ⲭⲏⲙⲓ ϧⲉⲛ973 ⲁϥϯⲣⲉⲛⲥ Ⲁⲗⲕⲁϩⲓⲣⲁ ⲉ̀ⲧⲉ ⲫⲁⲓ ⲡⲉ ⲡⲓⲣⲁⲛ ⲛ̀ⲁ̀ⲣⲁⲃⲟⲥ ⲙ̀ⲫⲟⲟⲩ.

Ⲁⲗⲗⲁ ⲙⲉⲛⲉⲛⲥⲁⲑⲣⲟⲩϩⲓⲥⲉⲛϯ ⲛ̀ϯⲕⲉϣⲣⲱⲙⲓ ϯⲙⲏⲧⲣⲟⲡⲟⲗⲓⲥ ⲙ̀ⲡⲓⲙⲁⲛⲉⲣϣⲓϣⲓ ⲙ̀ⲙⲱⲥⲗⲏⲙ ⲥϣⲱⲡⲓ ϧⲉⲛⲡⲓⲪⲱⲥⲁⲧⲱⲛ ⲉ̀200 ⲛ̀ⲣⲟⲙⲡⲓ oⲩⲟϩ ⲛⲉϯⲔⲉϣⲣⲱⲙⲓ ⲡⲉ ⲡⲓⲡⲁⲗⲁⲧⲓⲟⲛ ⲛ̀ⲧⲉⲛⲓⲇⲓⲁ̀ⲇⲟⲭⲟⲥ. Ⲫⲁⲧⲣ Ⲉⲗϫⲉⲙⲁⲗⲓ ⲡⲓⲣⲉⲙⲛ̀ϫⲟⲙ ⲁϥⲟⲩⲁϩⲙⲕⲱⲧ ⲛ̀ⲛⲓϫⲱ ⲛⲉⲙⲛⲓⲡⲩⲗⲏ ⲙ̀Ⲡϭⲣⲟ ⲛⲉⲙⲚⲓⲕⲏ ⲛⲉⲙZⲁⲃⲟⲩⲗⲱⲛ.

Ϧⲉⲛ1168 ⲁϢⲁⲟⲩⲉⲣ ⲡⲓⲣⲉⲙⲛ̀ϫⲟⲙ ⲛ̀ⲛⲓϣⲉⲛⲃⲁϯⲙⲁ ϫⲱϥ ⲙ̀ⲡⲓⲪⲱⲥⲁⲧⲟⲛ ⲉϣⲑⲁⲙ ⲉ̀ϩⲣⲉⲛ ⲛ̀ⲛⲓϥⲁⲓⲥⲧⲁⲩⲣⲟⲥ ⲉⲧⲁⲩⲟⲩⲱϣ ⲉ̀ϭⲣⲟ ⲉ̀ⲣⲟⲥ. Ⲁⲩⲕⲓⲙ ⲛ̀ϯⲙⲏⲧⲣⲟⲡⲟⲗⲓⲥ ⲉ̀ϯⲔⲉϣⲣⲱⲙⲓ ⲉⲧⲁⲥⲫⲱⲣϣ ⲉ̀ϫⲉⲛ ⲡⲓⲪⲱⲥⲁⲧⲱⲛ ⲛⲉⲙⲘⲓⲥⲧⲣⲁⲙ (ⲁⲗⲁⲥⲕⲁⲣ) ⲛⲉⲙⲚⲓⲣⲁⲃⲏ (Ⲁⲗⲕⲁⲑⲁⲓ) ⲛⲓⲙⲏⲧⲣⲟⲡⲟⲗⲓⲥ ⲛ̀ⲁ̀ⲡⲁⲥ. Ⲁⲩⲥⲱⲟⲩⲛ ⲛ̀ⲧⲁⲓⲧⲟⲓ ⲛ̀ⲧⲉϯⲃⲁⲕⲓ ⲙ̀ⲫⲣⲏϯ «ϯⲔⲉϣⲣⲱⲙⲓ ⲛ̀ⲁ̀ⲡⲁⲥ» ⲙ̀ⲫⲟⲟⲩ.

Ⲡⲓⲭⲁⲣⲧⲏⲥ ⲛ̀ϯⲔⲉϣⲣⲱⲙⲓ ϧⲉⲛⲁⲩ1200 ⲕⲁⲧⲁⲤⲑⲉⲛⲗⲓ Ⲗⲏⲓⲛ-Ⲡⲟⲩⲗ.

Ⲁⲗⲗⲁ ϯⲁⲑⲗⲏⲥⲓⲥ ⲟⲩⲧⲉϢⲁⲩⲁⲣ ⲛⲉⲙⲀ̀ⲙⲟⲩⲣⲓ ⲁ̅ ⲡⲓⲟⲩⲣⲟ ⲙ̀ⲡⲓⲉⲣⲟⲩⲥⲁⲗⲏⲙ ⲛⲉⲙϢⲓⲣⲕⲟⲩϩ ⲡⲓⲥⲧⲣⲁⲧⲏⲧⲗⲁⲧⲏⲥ ⲛ̀ⲛⲓϣⲉⲛ̀ⲍⲉⲅⲅⲓ ⲁⲥⲉⲣϫⲱⲃ ⲙ̀ⲡⲓⲉⲣϣⲓϣⲓ ⲛ̀ⲛⲓϣⲉⲛ̀ⲃⲁϯⲙⲁ.

Ϧⲉⲛ1169 (885 ⳥) ⲛ̀ⲣⲟⲙⲡⲓ Ⲥⲁⲗⲁϩⲁⲧⲏⲛ ⲁⲩⲭⲁϥ ⲙ̀ⲡⲓⲣⲉⲙⲛ̀ϫⲟⲙ ⲙ̀ⲃⲉⲣⲓ ⲛ̀ⲧⲉⲬⲏⲙⲓ ⲉ̀ⲃⲟⲗ ϩⲓⲧⲉⲛⲛⲓϣⲉⲛ̀ⲃⲁϯⲙⲁ ⲟⲩⲟϩ ⲣⲟⲙⲡⲓ ⲥⲛⲟⲩϯ ⲙⲉⲛⲉⲛⲥⲁ ⲛⲁⲓ ⲁϥⲁⲙⲟⲛⲓ ⲛ̀ⲟⲩϫⲟⲙ ⲉ̀ⲃⲟⲗ ϧⲉⲛϯⲥⲩⲅⲅⲉⲛⲉⲓⲁ ⲛ̀Ⲉ̀ⲗⲁⲧⲏⲧ ⲡⲓϧⲁⲉ ⲛ̀ⲇⲓⲁ̀ⲇⲟⲭⲟⲥ ⲛ̀ⲛⲓϣⲉⲛ̀ⲃⲁϯⲙⲁ. Ⲁϥϩⲓⲥⲉⲛϯ ⲙ̀ⲡⲓⲏⲓ ⲙ̀ⲃⲉⲣⲓ ⲟⲩⲟϩ ⲁϥϣⲱⲡⲓ ⲙ̀ⲡⲓϣⲟⲣⲡ ⲙ̀ⲡⲓⲟⲩⲣⲟ ⲛ̀Ⲭⲏⲙⲓ ⲓⲥϫⲉⲛⲔⲗⲉⲟⲡⲁⲧⲣⲁ ϯⲙⲁϩⲍ̅. Ϧⲉⲛⲡⲉϥϫⲓⲛⲉⲣⲟⲩⲣⲟ ⲁⲩⲥⲉⲙⲛⲓ ⲙ̀ⲡⲓⲕⲁⲥⲧⲣⲟⲛ ⲛ̀ϯⲔⲉϣⲣⲱⲙⲓ ⲉⲧⲉ ⲁϥϣⲱⲡⲓ ⲛ̀ϯⲕⲁⲑⲉⲇⲣⲁ ⲙ̀ⲡⲓⲙⲁⲛⲉⲣϣⲓϣⲓ ϣⲁⲑⲙⲏϯ ⲛ̀ⲓ̅ⲑ̅ ⲛ̀ⲉ̀ⲱⲛ.

Ⲡⲓⲁ̀ⲙⲁϩⲓ ⲛ̀ⲧⲉⲛⲓⲕⲟⲩⲝ

Ϧⲉⲛ1250 ⲁ̀ⲛⲓⲙⲁⲧⲟⲓ ⲛ̀ⲛⲓⲉ̀ⲃⲓⲁⲓⲕ ⲉⲧⲁⲩⲙⲟⲩϯ ⲉ̀ⲣⲱⲟⲩ ϫⲉⲛⲓⲕⲟⲩⲝ ⲁ̀ⲙⲟⲛⲓ ⲛ̀ⲟⲩϫⲟⲙ ϧⲉⲛⲬⲏⲙⲓ ⲟⲩⲟϩ ⲁⲩⲥⲱⲧⲡ ⲛ̀ϯⲔⲉϣⲣⲱⲙⲓ ⲙ̀ⲫⲣⲏϯ ⲛ̀ⲧⲟⲩⲙⲏⲧⲣⲟⲡⲟⲗⲓⲥ. Ⲉⲩⲙⲏⲛ ⲉ̀ⲃⲟⲗ ϧⲉⲛⲛⲓϩⲃⲏⲟⲩⲓ ⲛ̀ⲧⲉⲛⲓϣⲉⲛⲓⲱⲃ ϩⲁⲛⲙⲏϣ ⲛ̀ⲧⲉⲡⲓⲕⲁϩⲓ ⲛ̀ⲧⲉⲛⲓⲡⲁⲗⲗⲁⲧⲓⲟⲛ ⲛ̀ⲛⲓϣⲉⲙ̀ⲃⲁϯⲙⲁ ⲁⲩⲧⲏⲓϥ ⲉ̀ⲃⲟⲗ ⲟⲩⲟϩ ⲁⲩⲉⲣϣⲉⲃⲓⲱ ⲛ̀ⲑⲱⲟⲩ ⲉ̀ϩⲁⲛⲕⲉⲕⲱⲧ ⲙ̀ⲃⲉⲣⲓ. Ⲛⲓϩⲱⲃ ⲛ̀ϫⲓⲛⲕⲱⲧ ⲉⲧⲁⲩⲉⲣϩⲏⲧⲥ ⲙ̀ⲙⲱⲟⲩ ⲛ̀ϫⲉⲛⲓⲕⲟⲩⲝ ⲁⲩⲟⲩⲉⲥⲑⲉⲛ ⲛⲓⲑⲱϣ ⲛ̀ⲧⲉϯⲃⲁⲕⲓ ⲟⲩⲟϩ ⲁⲩⲓⲛⲓ ⲛ̀ϩⲁⲛⲡⲉⲧⲥⲁⲡⲉⲥⲏⲧ ⲙ̀ⲃⲉⲣⲓ ⲉ̀ⲑⲙⲏϯ ⲛ̀ϯⲃⲁⲕⲓ. Ϧⲉⲛⲡⲁⲓⲥⲏⲟⲩ ⲛ̀ⲟⲩⲱⲧ ϯⲃⲁⲕⲓ ⲁⲥⲉⲣⲟⲩⲟⲧ ⲙ̀ⲫⲣⲏϯ ⲛ̀ⲟⲩⲙⲁ ⲛ̀ⲥⲱⲟⲩⲛ ⲙ̀ⲙⲱⲥⲗⲏⲙ ⲟⲩⲟϩ ⲟⲛ ⲙ̀ⲫⲣⲏϯ ⲛ̀ⲟⲩⲙⲁ ⲛ̀ⲓⲉⲃϣⲱⲧ ⲛ̀ⲁ̀ⲣⲱⲙⲁ. Ϧⲉⲛ1340 ⲛⲉϯⲔⲉϣⲣⲱⲙⲓ ⲧⲉ ϯⲛⲓϣϯ ⲙ̀ⲃⲁⲕⲓ ⲥⲁⲡⲉⲙⲉⲛⲧ ⲛ̀Ⲁ̀ⲙⲓⲧⲱⲛ ⲉ̀ⲧⲉⲟⲩⲟⲛⲧⲁⲥ ⲙ̀ⲡⲓⲇⲉⲙⲟⲥ ⲉϥⲟⲓ ⲛ̀ⲟⲩⲙⲓⲗⲓⲱⲛ ⲛ̀ⲣⲱⲙⲓ.

Ⲛⲁⲣⲉⲡⲓⲕⲗⲏⲣⲟⲥ ⲛ̀ⲧⲉⲡⲓⲑⲣⲟⲛⲟⲥ ϧⲉⲛⲟⲩⲭⲁⲱⲥ, ⲁⲗⲗⲁ ⲟ̀ⲙⲱⲥ ϯⲙⲉⲧⲟⲩⲣⲟ ⲛ̀ⲕⲟⲩⲝ ⲁⲥϣⲱⲡⲓ ⲛ̀ϯⲛⲓϣϯ ⲛ̀ⲉ̀ⲝⲟⲩⲥⲓⲁ ϧⲉⲛϯⲡⲉⲣⲓⲭⲱⲣⲟⲥ ⲟⲩⲟϩ ⲁⲥⲧⲁϩⲛⲟ ⲙ̀ⲡⲓϭⲓⲛⲙⲟϣⲓ ⲉ̀ϧⲟⲩⲛ ⲛ̀ⲧⲉⲛⲓⲙⲟⲅⲅⲱⲗ ϧⲉⲛⲡⲓⲡⲟⲗⲉⲙⲟⲥ ⲛ̀ⲧⲉⲡⲓϩⲟⲙⲃⲉ ⲛ̀Ⲅⲟⲗⲓⲁⲑ ϧⲉⲛ1260.

Ⲫⲙⲟⲩ ⲛ̀ⲭⲁⲙⲉ ⲁϥϣⲱϥ ⲛ̀ϯⲃⲁⲕⲓ ⲛ̀ⲟⲩⲙⲏϣ ⲛ̀ⲥⲟⲡ ⲓⲥϫⲉⲛ1348 ϣⲁ1517. Ⲁⲡⲁⲓϣⲱⲛⲓ ϧⲱⲧⲉⲃ ⲛ̀ⲁⲩ200.000 ⲛ̀ϣⲟ ⲛ̀ⲣⲱⲙⲓ ⲟⲩⲟϩ ϧⲉⲛⲡⲓⲙⲁϩⲓ̅ⲉ̅ ⲛ̀ⲉⲱⲛ ⲁϥⲑⲣⲉⲡⲓⲇⲏⲙⲟⲥ ⲛ̀ⲧⲉϯⲔⲉϣⲣⲱⲙⲓ ⲉⲣⲕⲟⲩϫⲓ ϣⲁ150.000-300.000 ⲛ̀ⲣⲱⲙⲓ. Ⲁⲧⲓⲙⲏ ⲛ̀ϯⲃⲁⲕⲓ ⲉⲣⲕⲟⲩϫⲓ ⲙⲉⲛⲉⲛⲥⲁ ⲉⲧⲁBⲁⲥⲕⲟ ⲇⲁ Ⲅⲁⲙⲁ ϫⲓⲙⲓ ⲛ̀ⲟⲩⲙⲱⲓⲧ ⲙ̀ⲃⲉⲣⲓ ⲉ̀ⲡⲓϨⲉⲛⲧⲟⲩ ⲉ̀ⲃⲟⲗ ϩⲓⲧⲉⲛⲫⲓⲟⲙ ⲙ̀ⲡⲕⲱϯ ⲛ̀ϯⲀⲫⲏ ⲛ̀Ϩⲉⲗⲡⲓⲥ Ⲉⲑⲛⲁⲛⲉⲥ ⲟⲩⲧⲉ1497 ⲛⲉⲙ1499 ⲫⲁⲓ ⲉⲧⲁϥⲓⲛⲓ ⲛ̀ϩⲁⲛϣⲟϯ ⲉ̀ⲃⲟⲗ ϧⲉⲛϯⲔⲉϣⲣⲱⲙⲓ.

Ϩⲁⲛⲟⲩⲣⲱⲟⲩ ⲛ̀ⲧⲉⲡⲁⲓⲥⲏⲟⲩ ⲙ̀ⲫⲣⲏϯ ⲙ̀Ⲡⲁⲣⲥⲉⲫⲁⲓ ⲛⲉⲙⲬⲁⲓⲧⲫⲁⲓ ⲁⲩⲉⲣⲟⲩⲣⲟ ⲛ̀ⲟⲩⲛⲓϣϯ ⲛ̀ⲥⲏⲟⲩ.

Ⲡⲓⲁ̀ⲙⲁϩⲓ ⲛ̀ⲛⲓϣⲉⲛ̀ϩⲟⲩⲑⲙⲉⲛ

Ϯⲉ̀ⲡⲟⲓⲣⲟⲓⲁ̀ ⲛ̀ϯKⲉϣⲣⲱⲙⲓ ⲁⲥⲥⲱⲣⲉⲙ ⲙⲉⲛⲉⲛⲥⲁ ⲑⲣⲉⲛⲓϣⲉⲛ̀ϩⲟⲩⲑⲙⲉⲛ ϭⲣⲟ ⲉ̀Ⲭⲏⲙⲓ ϧⲉⲛ1517. Ⲁϯⲕⲉϣⲣⲱⲙⲓ ϣⲱⲡⲓ ⲛ̀ϯⲙⲏⲧⲣⲟⲡⲟⲗⲓⲥ ⲙ̀ⲡⲓⲑⲱϣ ⲛ̀Ⲭⲏⲙⲓ ⲉⲧⲁⲩⲁⲙⲁϩⲓ ⲓⲥϫⲉⲛⲔⲱⲥⲧⲁⲛⲧⲓⲛⲟⲩⲡⲟⲗⲓⲥ. Ⲁⲗⲗⲁ ⲉϩⲣⲏⲓ ϧⲉⲛⲓⲒ̅Ⲋ̅ ⲛⲉⲙⲒ̅Z̅ ⲛ̀ⲉ̀ⲱⲛ ⲁⲥⲟϩⲓ ⲉ̀ⲣⲁⲧⲥ ⲙ̀ⲡⲓⲛⲓϣϯ ⲙ̀ⲙⲁ ⲛ̀ⲟⲩⲱϩ ⲛ̀ⲧⲉϯⲟⲓⲕⲟⲛⲟⲙⲓⲁ̀ ⲛⲉⲙⲡⲓϫⲓⲛⲱⲛϧ. Ⲕⲉⲡⲉⲣ ⲛⲉⲥⲭⲏ ⲁⲛ ϩⲓⲡⲓⲙⲱⲓⲧ ⲛ̀ⲁ̀ⲣⲱⲙⲁ ⲁⲥⲑⲣⲉ ⲡⲓϫⲓⲛⲙⲟϣⲓ ⲙ̀ⲡⲓⲡⲟⲛ ⲛ̀ⲓⲁⲙⲁⲛ ⲛⲉⲙϩⲁⲛϩⲃⲱⲥ ⲛ̀ϩⲉⲛⲧⲓⲕⲏ ⲉ̀ϯⲀ̀ⲛⲁⲧⲟⲗⲓⲁ̀ ⲛⲉⲙϯⲀ̀ⲫⲣⲓⲕⲏ̀ ⲙ̀ⲡⲉⲙϩⲓⲧ ⲛⲉⲙⲡⲓⲠⲁⲗⲭⲁⲛ ⲙⲧⲟⲛ ⲛ̀ϩⲟⲩⲟ ⲛ̀ϫⲉϯⲃⲁⲕⲓ. Ϩⲁⲛϣⲟϯ ⲛ̀ⲕⲉϣⲣⲱⲙⲓ ⲛⲁⲩⲓ̀ⲛⲓ ⲛ̀ϩⲁⲛⲁⲅⲁⲑⲟⲛ ⲉ̀ϧⲟⲩⲛ ⲉ̀ⲡⲓⲕⲁϩⲓ ⲛ̀ⲉ̀ⲣⲏⲙⲟⲥ ⲛ̀ⲧⲉⲠⲁⲗϩⲓϭⲁⲥ ⲙⲁⲗⲓⲥⲧⲁ ϧⲉⲛⲡⲁⲛⲓⲅⲓⲣⲓⲥ ⲉⲧⲧⲉⲛⲣⲟⲙⲡⲓ.

Ϯⲕⲉϣⲣⲱⲙⲓ ϧⲉⲛⲒ̅Ⲑ̅ ⲛ̀ⲉ̀ⲱⲛ.

Ⲉϩⲣⲏⲓ ϧⲉⲛϯⲙⲉⲧϭⲟⲓⲥ ⲛ̀ⲛⲓϣⲉⲛ̀ϩⲟⲩⲑⲙⲉⲛ ⲁⲥⲟⲩⲟⲥⲑⲉⲛ ⲛ̀ϫⲉϯⲃⲁⲕⲓ ⲛ̀ⲛⲉⲥϭⲓⲏ ⲉ̀ⲡⲥⲁⲣⲏⲥ ⲛⲉⲙⲥⲁⲡⲉⲙⲉⲛⲧ. Ⲁⲥϣⲱⲡⲓ ⲛ̀ϯⲙⲁϩⲥⲛⲁⲩ ⲛ̀ⲛⲓϣϯ ⲙ̀ⲡⲟⲗⲓⲥ ϧⲉⲛϯⲙⲉⲧⲁⲩⲧⲟⲕⲣⲁⲧⲱⲣ.

Ϧⲉⲛ1798 Ⲛⲁⲡⲟⲗⲉⲱⲛ ⲁϥϭⲣⲟ ⲉ̀Ⲭⲏⲙⲓ ⲁⲗⲗⲁ ⲡⲓⲁ̀ⲙⲁϩⲓ ⲙ̀ⲫⲣⲁⲅⲅⲟⲥ ⲁϥϫⲱⲕ ⲉ̀ⲃⲟⲗ ϧⲉⲛ1801. Ⲁⲛⲓⲣⲉⲙⲛ̀ⲃⲣⲉⲧⲁⲛⲓⲁ̀ ⲛⲉⲙⲛⲓϣⲉⲛ̀ϩⲟⲩⲑⲙⲉⲛ ⲛⲉⲙϩⲁⲛⲧⲁⲝⲓⲥ ⲛ̀ⲣⲉⲙⲛ̀ⲁⲗⲃⲁⲛⲓⲁ̀ ⲁⲩϩⲓ ⲛⲓⲫⲣⲁⲅⲅⲟⲥ ⲉ̀ⲃⲟⲗ. Ⲁⲛⲓⲣⲉⲙⲛ̀ⲃⲣⲉⲧⲁⲛⲓⲁ̀ ⲁⲩⲟⲩⲟⲧⲉⲃⲟⲩ ⲉ̀ⲃⲟⲗ ϩⲁⲬⲏⲙⲓ ⲙⲉⲛⲉⲛⲥⲁ ⲣⲟⲙⲡⲓ ⲥⲛⲟⲩϯ ⲟⲩⲟϩ ⲛⲓϣⲉⲛ̀ϩⲟⲩⲑⲙⲉⲛ ⲛⲉⲙⲛⲓⲣⲉⲙⲛ̀ⲁⲗⲃⲁⲛⲓⲁ̀ ⲛⲉⲙⲛⲓⲕⲟⲩⲝ ⲛⲁⲩϯ ⲟⲩⲃⲉ ⲛⲟⲩⲉⲣⲏⲟⲩ ⲉⲑⲃⲉⲡⲓⲉⲣϣⲓϣⲓ. Ⲡⲁⲓⲡⲓⲣⲁⲥⲙⲟⲥ ⲁϥⲑⲣⲉ Ⲙⲟϩⲁⲙⲉⲧ Ⲁⲗⲓ Ⲡⲁϣⲁ ⲡⲓⲣⲉⲙⲛ̀ⲁⲗⲃⲁⲛⲓⲁ̀ ϣⲱⲡⲓ ⲛ̀ϩⲏⲅⲉⲙⲱⲛ ϧⲉⲛ1805.

Ⲡⲓⲉ̀ⲛⲉϩ ⲙ̀ⲃⲉⲣⲓ

Ⲡⲓⲡⲗⲁⲕⲟⲩⲧⲟⲥ ⲛ̀ⲧⲉⲡⲓⲏⲓ ⲛ̀Ⲱ̀ⲡⲉⲣⲁ ⲛⲉⲙⲡⲓⲑⲟⲩⲱⲧ ⲛ̀Ⲓⲃⲣⲁϩⲓⲙ Ⲡⲁϣⲁ ⲛⲉⲙⲡⲓⲡⲁⲛⲧⲟⲭⲓⲟⲛ "Ⲣⲱⲥⲓⲁ̀".

Ϣⲁⲡⲉϥⲙⲟⲩ ϧⲉⲛ1848 ⲁⲘⲟϩⲁⲙⲉⲧ Ⲁⲗⲓ Ⲡⲁϣⲁ ⲑⲁⲛⲛⲟ ⲛ̀ϩⲁⲛⲙⲏϣ ⲛ̀ϣⲉⲃⲓⲥⲉⲙⲛⲓ ⲛ̀ⲟⲓⲕⲟⲛⲟⲙⲓⲁ̀ ⲛⲉⲙⲡⲟⲗⲓⲧⲓⲕⲏ ⲉⲧⲁⲩϯϥ ⲙ̀ⲡⲓⲧⲓⲧⲗⲟⲥ ⲛ̀ⲧⲉⲡⲓⲣⲉϥϩⲓⲥⲉⲛⲧ ⲛ̀ⲧⲉⲬⲏⲙⲓ ⲙ̀ⲃⲉⲣⲓ. Ϩⲁⲛϣⲓⲃϯ ⲉⲧⲉⲣⲛⲓϣϯ ⲛ̀ϩⲟⲩⲟ ⲁⲩϣⲱⲡⲓ ⲉϩⲣⲏⲓ ϧⲉⲛϯⲙⲉⲧϭⲟⲓⲥ ⲛ̀Ⲓⲥⲙⲁⲏⲗ Ⲡⲁϣⲁ ⲡⲉϥϣⲉⲛ̀ϣⲏⲣⲓ (1863-1879). Ⲁϥϭⲓ ⲙ̀ⲡⲓⲡⲛⲉⲩⲙⲁ ⲛ̀ⲧⲉⲠⲁⲣⲏⲥ ⲛⲉⲙⲛⲉⲥⲛⲓϣϯ ⲙ̀ⲡⲗⲁⲧⲓⲁ̀ ⲛⲉⲙⲡⲗⲁⲕⲟⲩⲧⲟⲥ ⲁⲗⲗⲁ ⲉⲑⲃⲉⲡⲓϣⲱⲧ ⲛ̀ⲧⲉⲛⲓⲭⲣⲏⲙⲁ ⲁϥϣ̀ϫⲉⲙϫⲟⲙ ⲉ̀ⲕⲱⲧ ⲛ̀ϩⲁⲛⲟⲩⲟⲛ ⲙ̀ⲙⲁⲩⲁⲧⲟⲩ ϧⲉⲛⲑⲙⲏϯ ⲛ̀ⲧⲉϯⲡⲟⲗⲓⲥ. Ⲁϥⲓⲛⲓ ⲙ̀ⲡⲅⲁⲍ ⲛⲉⲙⲡϫⲓⲛⲉⲣⲟⲩⲱⲓⲛⲓ ⲉ̀ϯⲃⲁⲕⲓ ⲟⲩⲟϩ ⲁϥⲟⲩⲱⲛ ⲙ̀ⲡⲓⲑⲉⲁⲧⲣⲟⲛ ⲛⲉⲙⲡⲓⲏⲓ ⲛ̀ⲱ̀ⲡⲉⲣⲁ.

Ⲡⲓⲛⲓϣϯ ⲛ̀ⲭⲣⲉⲟⲥ ⲉⲧⲁϥⲓ̀ ⲉ̀ⲃⲟⲗ ϧⲉⲛⲛⲓⲉ̀ⲡⲓⲭⲉⲓⲣⲏⲙⲁ ⲛ̀ⲧⲉⲒⲥⲙⲁⲏⲗ ⲁϥϯ ⲛ̀ⲟⲩⲗⲱⲓϫⲓ ⲉ̀ϯⲁⲓⲁⲓ ⲛ̀ϯⲉⲝⲟⲩⲥⲓⲁ̀ ⲛ̀ⲧⲉⲛⲓⲣⲉⲙⲛ̀ⲉⲩⲣⲱⲡⲁ ⲑⲏⲉⲧⲁⲥϫⲱⲕ ⲉ̀ⲃⲟⲗ ϧⲉⲛⲡⲓϫⲓⲛⲓ̀ ⲛ̀ⲧⲉⲛⲓⲣⲉⲙⲛ̀ⲃⲣⲉⲧⲁⲛⲓⲁ̀ ϧⲉⲛ1882. Ⲁⲭⲏⲙⲓ ϣⲱⲡⲓ ⲟⲩⲭⲱⲣⲁ ⲉⲥϭⲓⲥⲕⲉⲡⲏ ⲙ̀ⲃⲣⲉⲧⲁⲛⲓⲁ̀ ϧⲉⲛ1914. Ϧⲉⲛⲥⲟⲩ9 ⲛ̀ⲓⲟⲩⲗⲓⲟⲥ 1919 (30 ⲙ̀ⲙⲉϣⲓⲣ 1635 ⳥) ϩⲁⲛⲁⲡⲟⲇⲉⲓⲝⲓⲥ ⲛ̀ϣⲗⲟⲗ ⲁⲩϣⲟⲡⲓ ϧⲉⲛϯⲔⲉϣⲣⲱⲙⲓ ⲉⲧⲁⲩⲧϩⲫⲟ ⲉ̀ϯⲙⲉⲧⲣⲉⲙϩⲉ ⲛ̀Ⲭⲏⲙⲓ ϧⲉⲛ1922. Ⲙ̀ⲡⲁⲓⲥⲏⲟⲩ ⲁⲩⲕⲱⲧ ⲛ̀ϩⲁⲛϫⲓⲛⲓⲟⲣ ⲛⲉⲙϩⲁⲛⲙⲓⲧⲱⲟⲩⲓ ⲟⲩⲟϩ ϯⲃⲁⲕⲓ ⲁϥϭⲓⲙⲁⲓⲏ ϣⲁⲛⲓⲣⲁⲃⲏ ⲛ̀Ⲅⲁⲣⲇⲉⲛ Ⲥⲓⲧⲓ ⲛⲉⲙⲦⲥⲉⲙⲁⲗⲓⲕⲏ ⲛⲉⲙϨⲉⲗⲓⲟⲩⲡⲟⲗⲓⲥ. Ⲟⲩⲧⲉ1882 ⲛⲉⲙ1937 ⲁϥⲣⲱⲧ ⲛ̀ϫⲉ ⲡⲓⲇⲉⲙⲟⲥ ⲓⲥϫⲉⲛ347.000 ϣⲁ1.3 ⲙ̀ⲙⲓⲗⲓⲱⲛ.

Ϧⲉⲛϯⲧⲁⲣⲁⲭⲏ ⲛ̀ⲧⲉ1952 ⲉⲧⲁⲩⲙⲟⲩϯ ⲉ̀ⲣⲟⲥ ϫⲉ ⲡⲭⲣⲱⲙ ⲛ̀ϯⲔⲉϣⲣⲱⲙⲓ ϣⲁⲛⲠⲥⲁⲃⲃⲁⲧⲟⲛ ⲛ̀ⲭⲁⲙⲉ ⲁⲩⲧⲁⲕⲟ 7000 ⲛ̀ⲕⲉϩⲛⲓ ⲛⲉⲙⲥⲓⲛⲉⲙⲁ ⲛⲉⲙⲕⲁⲥⲓⲛⲱ ⲛⲉⲙⲡⲁⲛⲧⲟⲭⲓⲟⲛ. Ⲙⲉⲛⲉⲛⲥⲁ ⲡⲓϣⲑⲟⲣⲧⲉⲣ ⲛ̀ⲣⲉⲙⲛ̀ⲭⲏⲙⲓ ⲛ̀1952 ⲉⲑⲣⲉϥϯⲙⲁ ⲙ̀ⲡⲓⲁ̀ϣⲁⲓ ⲛ̀ⲧⲉⲡⲓⲇⲉⲙⲟⲥ ⲁϪⲁⲙⲁⲗ Ⲁⲡⲧⲉⲛⲛⲁⲥⲉⲣ ⲟⲩⲁϩⲙⲕⲱⲧ ⲙ̀ⲡⲓⲠⲗⲁⲕⲟⲩⲧⲟⲥ ⲛ̀ⲧⲉⲦⲉⲩⲗⲉⲥⲓⲁ̀ ⲛⲉⲙⲡⲓⲔⲟⲣⲛⲓϣ ⲙ̀ⲫⲓⲁⲣⲟ.

Ϧⲉⲛ1992 ⲁϥϣⲱⲡⲓ ⲛ̀ϫⲉⲟⲩⲙⲟⲛⲙⲉⲛ ϧⲉⲛϯⲔⲉϣⲣⲱⲙⲓ ⲉ̀ⲁϥϧⲱⲧⲉⲃ 545 ⲛ̀ⲣⲱⲙⲓ ⲟⲩⲟϩ ⲁϥϫⲱⲧϩ 6512 ⲛ̀ⲣⲱⲙⲓ ⲟⲩⲟϩ ⲁϥⲭⲱ 50.000 ⲛ̀ⲣⲱⲙⲓ ⲙ̀ⲫⲣⲏϯ ⲛ̀ⲁⲑⲙⲁ ⲛ̀ⲟⲩⲱϩ.

Ϯⲇⲏⲙⲟⲅⲣⲁⲫⲓⲁ̀

Ⲡⲓⲇⲉⲙⲟⲥ

Ⲙⲏⲧ ⲙ̀ⲙⲓⲗⲓⲱⲛ ⲛ̀ⲣⲱⲙⲓ ⲥⲉϩⲉⲙⲥⲓ ⲙ̀ⲙⲁⲩ.

Ϯⲁⲥⲡⲓ

Ⲙ̀ⲫⲟⲟⲩ ϯⲁⲥⲡⲓ ⲛ̀ⲣⲉⲙⲫⲙⲁ ⲧⲉ ϯⲙⲉⲧⲁⲣⲁⲃⲟⲥ.

Ϯⲑⲣⲉⲥⲕⲓⲁ̀

Ⲡϩⲟⲩⲟ ⲛ̀ⲣⲉⲙⲫⲙⲁ ⲡⲉ ⲟⲩⲙⲱⲥⲗⲏⲙ ⲛⲉⲙϯⲙⲉⲧⲕⲟⲩϫⲓ ⲛ̀ⲭⲣⲓⲥϯⲁⲛⲟⲥ. Ⲟⲩⲟⲛⲟⲩⲙⲏϣ ⲛ̀ⲣⲉⲙⲛ̀ⲭⲏⲙⲓ ⲛ̀ⲭⲣⲓⲥϯⲁⲛⲟⲥ ϧⲉⲛϯⲔⲉϣⲣⲱⲙⲓ ⲛ̀ⲁ̀ⲡⲁⲥ ⲛⲉⲙⲡⲓⲘⲁ ⲛ̀ϫⲓⲛⲑⲱⲟⲩϯ ⲛ̀ⲧⲉⲛⲓⲭⲣⲓⲥϯⲁⲛⲟⲥ.

Ϩⲁⲛⲡⲉⲣⲓⲃⲗⲉⲡⲧⲟⲥ

ⲡⲓⲘⲟⲩⲥⲉⲓⲟⲛ ⲛ̀ⲣⲉⲙⲛ̀ⲭⲏⲙⲓ.

Ⲡⲓⲙⲟⲩⲥⲉⲓⲟⲛ ⲛ̀ⲣⲉⲙⲛ̀ⲭⲏⲙⲓ

Ⲟⲩⲟⲛⲧⲉϥ ϯⲛⲓϣϯ ⲛ̀ⲑⲱⲟⲩⲧⲥ ⲛ̀ⲧⲉⲡⲓϫⲓⲛⲱⲛϧ ⲛ̀ⲁ̀ⲡⲁⲥ ⲛ̀ⲣⲉⲙⲛ̀ⲭⲏⲙⲓ ϧⲉⲛⲡⲓⲕⲟⲥⲙⲟⲥ ⲧⲏⲣϥ. Ⲟⲩⲟⲛ 136,000 ⲛ̀ϩⲃⲏⲟⲩⲓ ϧⲉⲛⲡϫⲓⲛⲃⲱϣ ⲉ̀ⲃⲟⲗ ⲟⲩⲟϩ ϩⲁⲛⲙⲏϣ ϧⲉⲛⲛⲉϥⲁϩⲱⲣ.

Ⲃⲁⲃⲩⲗⲱⲛ ⲛ̀Ⲭⲏⲙⲓ ⲛⲉⲙⲡⲓⲪⲱⲥⲁⲧⲟⲛ

Ⲟⲩⲟⲛⲛⲓⲣⲁϧⲧ ⲙ̀ⲡⲓⲕⲁⲥⲧⲣⲟⲛ ⲛ̀ⲣⲱⲙⲉⲟⲥ Ⲃⲁⲃⲩⲗⲱⲛ ⲛⲉⲙϯϩⲟⲩⲓϯ ⲙ̀ⲡⲟⲗⲓⲥ ⲛ̀ⲁ̀ⲣⲁⲃⲟⲥ ⲡⲓⲪⲱⲥⲁⲧⲟⲛ. Ⲟⲩⲙⲏϣ ⲛ̀ⲉⲕⲕⲗⲏⲥⲓⲁ̀ ⲛ̀ⲭⲣⲓⲥϯⲁⲛⲟⲥ ⲙ̀ⲫⲣⲏϯ ⲛ̀ϯⲉⲕⲕⲗⲏⲥⲓⲁ ⲛ̀ⲧⲉⲐⲉⲟⲇⲟⲕⲟⲥ ϯⲁⲅⲓⲁ Ⲙⲁⲣⲓⲁ ϧⲉⲛⲂⲁⲃⲩⲗⲱⲛ ⲛ̀Ⲭⲏⲙⲓ, ϯⲉⲕⲕⲗⲏⲥⲓⲁ ⲛ̀ⲟⲩⲉⲓⲛⲓⲛ ⲛ̀ⲧⲉⲁ̀ⲅⲓⲟⲥ Ⲅⲉⲱⲣⲅⲓⲟⲥ ⲛⲉⲙϯⲉⲕⲕⲗⲏⲥⲓⲁ ⲛ̀ⲧⲉⲛⲓ⳥ Ⲥⲉⲣⲅⲓⲟⲥ ⲛⲉⲙⲂⲁⲭⲟⲥ ϧⲉⲛⲡⲓⲥⲡⲉⲗⲉⲱⲛ ⲥⲉⲭⲏ ⲙ̀ⲡⲁⲓⲙⲁ. Ⲡⲓⲙⲟⲩⲥⲉⲓⲟⲛ ⲛ̀ⲕⲩⲡⲧⲓⲟⲥ ⲉϥⲟⲩⲱⲛϩ ⲉ̀ⲃⲟⲗ ϯⲥⲧⲟⲣⲓⲁ̀ ⲛ̀ⲧⲉϯⲓⲟⲡⲏ ⲛ̀ⲕⲩⲡⲧⲓⲟⲥ ⲛⲉⲙϯⲥⲩⲛⲁⲅⲱⲅⲏ ⲛ̀ⲧⲉⲠⲉⲛ Ⲉⲍⲣⲁ ⲉϥⲱⲗⲓ ⲡⲓⲑⲱⲟⲩⲧⲥ ⲛ̀Ⲅⲉⲛⲓⲍⲁ ⲥⲉⲭⲏ ϧⲉⲛⲡⲁⲓⲙⲁ ⲛⲑⲱⲟⲩ. Ⲥⲁⲡⲉⲙϩⲓⲧ ⲟⲩⲟⲛⲡⲓϣⲟⲣⲡ ⲛ̀ⲙⲁⲥϭⲏⲧ ϧⲉⲛϯⲀⲫⲣⲓⲕⲏ ⲡⲁⲗⲙⲁⲥϭⲏⲧ ⲛ̀ⲧⲉⲀⲙⲃⲣⲟⲥ ⲡϣⲏ Ⲁ̀ⲗⲁⲥ ⲉⲧⲁⲩⲕⲟⲧϥ ϧⲉⲛ642.

ϯⲙⲏϯ ⲛ̀ⲛⲓⲕⲁⲥⲧⲣⲟⲛ ⲛⲉⲙϯⲁⲛⲍⲏⲃ ⲛ̀ⲧⲉⲔⲁⲗⲁⲃⲟⲩⲛ ⲟⲩⲟϩ ⲡⲓⲙⲁⲥϭⲏⲧ ⲛ̀ⲧⲉⲡⲓⲟⲩⲣⲟ Ⲡⲁⲣⲕⲟⲩⲕ ϧⲉⲛⲡⲓϧⲓⲣ ⲛ̀ⲧⲉⲀⲗⲙⲟⲩⲉⲥ.

Ⲡⲓⲏⲓ ⲛ̀ⲧⲉⲰⲡⲉⲣⲁ ⲛ̀ϯⲔⲉϣⲣⲱⲙⲓ

Ⲁⲏⲕⲟⲧϥ ϧⲉⲛϯⲣⲁⲟⲩⲏ ϯⲤⲉⲙⲁⲗⲓⲕⲏ ⲁⲛⲧⲓⲡⲓⲏⲓ ⲛ̀ⲧⲉⲰ̀ⲡⲉⲣⲁ ⲙ̀ⲃⲁⲥⲓⲗⲓⲕⲟⲥ ϧⲉⲛ1988 ⲙⲉⲛⲉⲛⲥⲁ ⲡⲉϥⲙⲟⲩⲛⲕ ⲉⲑⲃⲉⲡⲓⲭⲣⲱⲙ.

Ⲡⲓϧⲓⲣ ⲛ̀Ⲁⲗⲙⲟⲩⲉⲥ

Ⲡⲓⲛⲓϣϯ ⲛ̀ϧⲓⲣ ⲛ̀ⲁ̀ⲡⲁⲥ ⲛ̀ⲧⲉϯⲔⲉϣⲣⲱⲙⲓ ⲛ̀ⲛⲓϣⲉⲛⲃⲁϯⲙⲁ. Ϩⲁⲛⲙⲏϣ ⲛ̀ⲁ̀ⲅⲟⲣⲁ ⲥⲉⲭⲏ ⲙ̀ⲙⲁⲩ. Ⲡⲓϧⲓⲣ ϥ̀ϣⲉ ⲓⲥϫⲉⲛⲡⲓⲣⲟ ⲛ̀ⲧⲉⲡⲓϭⲣⲟ ϣⲁⲡⲓⲣⲟ ⲛ̣̀Zⲁⲃⲩⲗⲱⲛ.

Ϯⲫⲟⲣⲁ

Ⲡⲓⲙⲁ ⲛ̀ϫⲱⲓⲗⲓ Ⲣⲁⲙⲥⲏⲥ ϧⲉⲛϯⲔⲉϣⲣⲱⲙⲓ.

Ϯⲕⲉϣⲣⲱⲙⲓ ⲛⲉⲙⲡⲉⲥⲡⲗⲁⲕⲟⲩⲧⲟⲥ Ⲣⲁⲙⲥⲏⲥ ⲛⲉ ⲑⲙⲏϯ ⲛ̀ⲧⲉⲧϫⲉⲗⲓ ⲙ̀ⲫⲟⲣⲁ ⲛ̀ⲧⲉⲬⲏⲙⲓ. Ⲟⲩⲟⲛⲧⲉⲥ ϩⲁⲛϫⲓⲛⲓⲟⲣ ⲉⲩⲧⲱⲙⲓ ⲛⲓⲙⲉⲣⲟⲥ ⲛ̀ⲧⲉϯⲃⲁⲕⲓ ⲛⲉⲙϯⲠⲉⲣⲥⲓⲥ ⲙ̀ⲫⲣⲏϯ ⲙ̀ⲡⲓϫⲓⲛⲓⲟⲣ ⲛ̀ⲧⲉⲡⲓⲔⲁⲥⲧⲣⲟⲛ ⲙ̀ⲫⲓⲁ̀ⲣⲟ, ⲡⲓϫⲓⲛⲓⲟⲣ ⲛ̀ⲧⲉⲡⲓⲥⲟⲩⲋ̅ ⲛ̀ⲟⲕⲧⲱⲃⲣⲓⲟⲥ ⲛⲉⲙⲡⲓϫⲓⲛⲓⲟⲣ ⲛ̀ⲧⲉⲡⲓⲘⲁ ⲙ̀ⲡⲟⲩⲃⲁ.

Ϯⲥⲩⲥⲧⲏⲙⲁ ⲙ̀ⲙⲉⲑⲣⲟ ⲥϩⲱⲃⲥ Ϩⲁⲗⲟⲩⲁⲛ ⲛⲉⲙϩⲁⲛⲕⲉⲑⲟϣ. Ⲁⲩⲙⲟⲩⲛⲕ ⲛ̀ⲑⲣⲁⲙ ϧⲉⲛ2014.

Ⲟⲩⲟⲛⲡⲓⲙⲁⲛϩⲁⲗⲁⲓ ⲉⲧⲟⲩⲧⲉϣⲗⲱⲗ.

Ⲛⲓⲗⲱⲟⲩ ⲙ̀ⲃⲟⲗ

• Ⲡϩⲟ ⲛ̀ⲁⲩⲑⲉⲛⲧⲓⲕⲟⲥ ⲛ̀ϯⲕⲉϣⲣⲱⲙⲓ