Nikan tikitat ne apan kan panuk ken nemituya ashan 100 shiwit
Ini panuk nepa sujsul ajkuikpa, tik Canada.
Tik itajku se wey techan itukay Edmonton tik Alberta, Canada, nemi se wey apan. Sujsul sesek ne shupan wan ne at muchiwa set (hieloj). Ashkan kwak nemi ne primaveraj, ne apan sujsul tesajsay, ika tik sejse takutun kan wetztuk ne nievej tesu takwawak, wan su se nejnemi ka ijpak weli wetzi kalijtik, wan nemi ka itan tesu weli kisa kan nemi ne set.
Ne semanaj panutuk, ume siwapiltzin mawiltiat pak ne apan wan wetzket tik ne sesek at. Tesu welituyat kisat. Tetekia tzajtzit ma wiki ajaka kinpalewia.
Se takat nemituya pashalua iwan isiwaw, ipilawan wan ipelu (se itzkwinti labrador) te wejka, wan yejemet kinkakket tzajtzit ne sijsiwapipil. Ne takat yajki mutalua wan ajsik kan nemituyat. Yaja nusan wetzki, wan tesu welituya kisa.
Ne pelu kiski mutalua. Yajki ka ne wan kipalewij ne itekuyu kisa. Kwak kistuk ne apan, ne takat kinmutilia ne iilpika ne ipelu pal kitzkia se siwapil pero te ajsi, chiupi kutu wan ne siwapil nemituya wejka.
Kwakuni ne pelu kalak senpa tik ne sesek at. Ashan ne siwapiltzin welik kikwi ne ichti. Ne pelu kitilan ka tatenpan, kan kichia ne takat pal kipalewia.
Ne apan kiwikak ne seuk siwapiltzin wejka; yaja chuka wey, teuk tami tzajtzi. Ijisiwket ne pelu wan ne takat talul ka iipan pero ne siwapiltzin nemituya wejka ijtik ne apan. Kitajtanilij ne siwapiltzin su weli nejnemi chiupichin ijtik ne at pal weli ajsi ne iich ne pelu. Te welik ika sekmiki tetekia, achka tajku sekkalaktuya wan tea weli kijkwania ne imetzkuyu.
Kwakuni ne takat kituktij ne ipelu itech ne kunet iwan ne iilpika. Ne ipelu tzikwinik ijtik ne apan wan yajki itech. Achtu semaya welik kikwi ne ichti iwan se imey; ne takat kilwij ma kikwi iwan ne ume imey. Kichiwki ijkiuni wan ne pelu pejki kitilana pal kishtia tik ne apan kan nemituyat ne takat iwan ne ieltiw ne siwapiltzin.
Ne isiwaw ne takat kipiatuya itelefonoj celular wan kinnutzki uksejseuk itukay ne bomberos ma wikikan kinpalewiat. Ajsiket tik se ambulanciaj wan kinwikaket muchi yejemet (ne pelu nusan) hasta ne kaltapajtiani.
Muchi nakaket yek. Ne ukse tunal, ne Tatuktiani ipal ne Kalpuli pal ne techan kinhilwij “tashtawi” ne takat wan ne ipelu ipanpa tay kichiwtuyat.
Pal kitashtawia, kimakak ne takat se cascoj ken kitaliat ne bomberos. Wan pal ne pelu kalkwij se wey umit iwan nakat
Muchi inaket ka ne sijsiwapipiltzitzin kipishtuyat wey suertej. Suertej ika ne takat pashalua witz wan ipelu te wejka ne apan, wan kinkakket tzajtzit. Nusan suertej ika ini ipelu se labrador kipia wey itzunkal tik iweyka pal te sekmiki.
Ini clasej pelumet mawiltiat tik ne at. Su yaja ukse pelu ken se Doberman, ne te kineki ne at, yaja tesu tzikwintuskia tik ne apan.
Muita tel ka uni tesu ne tunal pal mikit uni kukunet, te atukiket, nakaket yujyultuk. Muchi ini tejkia, tesu sanka, panuk tik Edmonton ne tipan tunal pal ne Metzti Yey pal ini shiwit.
Ne 5 agostoj se kuat kinmiktij ume kunet tik ne techan itukay Campbellton, tik New Brunswik, Canada. Se masakuat majwey chuluj tik i
tepuskal wan panuk ijtik ne tuboj pal ventilacion itzalan ne ume
tajkukal wan ajsik kan kuchit nemit ne kujkunet. Yejemet kipiatuyat makwil shiwit wan chikume shiwit. Ne kuat kipia 4,5 metroj wan i
tamachijka 45 kg. Tesu kinkwaj, semaya kinmiktij ne kujkunet. Melka tesu panu sejsenpa, ne Piton sebae kinmiktijtuk uksejse tukniwan tik Africa wan tik ESA. Ini kujkuat walajkewit tik Africa, wan ashan muajsit nujme Africa itzinu ne Sahara wan nusan ken pestej tik ne Everglades, tik Florida, ESA.
Wey tepeat tik Tatzinu Alberta, Canada: Se ujti tik Calgary tentuk wan at.
Wetzki sujsul at tik Tatzinu Alberta, achka 200 mm wetzki ijtik yey tunal tik Calgary, High River, wan Lethbridge. Nemit miak
tepeat , yajika 100,000 chanej ipal Calgary wan sejseuk techan chulujket. Yey atukiket tik High River. Miak tatuk mupulujket ika wetzki
set nusan.
Yawit kiketzat se yankwik tepuspanuas ijtik Windsor (Canada) wan Detroit (ESA). Nemia se tepuspanuas wan yaja ne kan panut sujsul miak pal yawit wan witzet itzalan uni talmet, yajika munekit kichiwat se mas wey. Keski ipatiw? Mas que ume billon dolar. (BBC)
YSUES Radio Universitaria tik 660AM: "Cultura Latinoamericana" ne lujlunes ka 10 horaj ka peyna. Wejkatanutza: 2511-2020. Shiwi tuwan!
Curso de náhuat: Centro Cultural Ne Yawal (Av. Izalco casa 102A, Colonia Centroamérica), los sábados 9-11:30 am, $1 la sesión a partir del 11 de enero 2014. Niveles Básico y Avanzado. Tamachtiani: Werner Hernández.
Clases de náhuat (nivel básico): Escuela de Artes de la UES, los viernes 2-4 pm, $0.50 x clase. Cuando lleguen pregunten dónde es el salón o por Guishtemi (77132406).
Taller de náhuat. Centro de Artes Hermanos Aguilar. Sábados 3:00pm. Inicio: 6 de abril 2013. Info. tel. 2222-3418.
.svg)
.jpg)
