Yaja ne achtu siwat muchiwki achtutatuktiani ipal ne RS wan teuk nemik seuk. Yaja sujsul takwawak wan yajika kitukaytijket "ne Tepusnantzin". Yaja se wey politicoj ipal ne Yekkan (derechaj), kenha ken Ronald Reagan tik ne ESA tik uni shijshiwit.
Margaret Thatcher nesik tik 1925 tik ne ajkuikpa ipal Inglaterra, ken Margaret Hilda Roberts. Ne iteku kipiatuya se tiendaj. Yaja mumachtij tik ne Weytamachtiluyan ipal Oxford. Muchiwki abogadoj wan kalak tik ne Conservative Party. Munamiktij iwan ne empresarioj Denis Thatcher.
Tik 1959 muishpejpen pal nemi tik ne Sennemit Pal Muchi ("Casa de los Comunes"). Tik 1970, kwak Edward Heath muchiwki Achtutatuktiani ("primer ministro"), kitukaytij Thatcher ken Ministroj Ipal Tamachtilis (educacion) pal ne Kalpuli. Kwak panuket nawi shiwit tamik ne ikalpuli Heath. Tik ne oposicion, Thatcher pejki musuma iwan Heath pal tatuktia tik ne partidoj "Tory" o Conservador, wan kwak ini partidoj kichiwki ganar tik 1979 yajasan muchiwki Achtutatuktiani.
Yaja ne achtu siwat ne tatuktij tik se kalpuli ipal se pal ne mas wejwey techan ipal Ewropa. Muita ken se wey tatuktiani ipal ne Sentzunshiwit XX. Tatuktij ijtik majtakti-se shiwit, hasta ne shiwit 1990.
Inat katka ka yaja sujsul takwawak. Itan ne itatuktilis, ne Reinoj Senputzujtuk musunki iwan Argentina tik ne Guerraj pal ne Malvinas. Nusan kiajwak ne Musenputzulis Sovieticoj (MS), wan yajika yejemet kinutzket "Tepusnantzin". Melka uni, kitak yek Mijail Gorbachov, ne yankwik tatuktiani ipal ne MS.
Nusan kitak yek ukse wey politicoj ipal ne Yekkan, ne tatuktiani ipal ne Ejestadoj Senputzujtuk ipal America Ronald Reagan. Ne inhumeshtin kishijiat katka ne comunismoj.
Ijtik ne Reinoj Senputzujtuk, te muchi kitasujtat Margaret Thatcher wan ne ipoliticaj. Yaja kichiwki privatizar miak takutun ipal ne economiaj, musunki iwan ne sijsindicatoj, wan kichiwki se yankwik impuestoj itukay "poll tax".
Uni se impuestoj ne muchi ne tukniwan nemit pal tashtawiat, ne te kipiat wey tumin ken ne kipiat wey kenha. Miak kwalanket ipanpa, muchiwket wejwey protestaj, sejse inaket ka te yawit tashtawiat, wan Thatcher nemik pal ina ka nemi yek, ma tami uni impuestoj.
Nusan ijtik ne ipartidoj, sejse tamiket kwalanit iwan. Inat ka yaja kwalani katka iwan miak tik ne partidoj su te kitat kenha ken yaja. Tik ne Metzti Majtakti-Se ipal 1990, kilwijket tik ne partidoj ma yawi wan yaja kiajkaw ne ipuestoj, wan ipatka mutalij John Major ne muchiwki ne yankwik achtutatuktiani. Margaret Thatcher kiajkaw ne politicaj.
Kwak panuket sejse shiwit pejki kukuya wan inat ka te kipiatuya yek itzuntekun. Inat ka seujseujti te welituya kielnamiki ká yaja wan muchi tay kichiwki. Ashan mikik tik Londres iwan 87 shiwit. Ne ishulejyu Denis miktuya tik 2003. Kipishki ume ipilawan, se siwat (Carol) wan se ukich (Mark).
Tik ne Tajtal Chapachin (nusan munutza Holanda), yawit kipiat se yankwik rey. Yaja itukay Willem-Alexander (Guillermo Alejandro), ipiltzin ne ashan reinaj pal Holanda, Beatriz, ká kipiaya 75 shiwit wan inatuk ka tea kineki tatuktia. Uni yawi muchiwa ne tunal 30 witz. Pal kichiwat celebrar, se kichiwki se takwikalis. Pero kwak mukakik ne takwikalis tik ne radioj, sujsul miak Holandajchanej kwalanket, inat ka te yektzin uni takwikalis wan te kinekit. Ashan inatiwit ka nemi yek, wan te yawit kitaliliat uni takwikalis. Welit tikakit ne takwikalis tik Youtube wan nusan tik ini videoj. (BBC News)
Beyonce Knowles
Ne takwikani Beyonce nemi tik Habana wan ne ESA kwalanik iwan: tik ne kalpuli tesu pakit wan kitajtanit taika yajki pashalua ka ne, ika ne ESA kineki kichiwilia boycot ne Cuba. (BBC)
YSUES Radio Universitaria tik 660AM: "Cultura Latinoamericana" ne lujlunes ka 10 horaj ka peyna. Wejkatanutza: 2511-2020. Shiwi tuwan!
Curso de náhuat: Centro Cultural Ne Yawal (Av. Izalco casa 102A, Colonia Centroamérica), los sábados 9-11:30 am, $1 la sesión a partir del 11 de enero 2014. Niveles Básico y Avanzado. Tamachtiani: Werner Hernández.
Clases de náhuat (nivel básico): Escuela de Artes de la UES, los viernes 2-4 pm, $0.50 x clase. Cuando lleguen pregunten dónde es el salón o por Guishtemi (77132406).
Taller de náhuat. Centro de Artes Hermanos Aguilar. Sábados 3:00pm. Inicio: 6 de abril 2013. Info. tel. 2222-3418.
.jpg)
