Wb/nia/Tanömö zi Siŵa Motöi

From Wikimedia Incubator
< Wb‎ | niaWb > nia > Tanömö zi Siŵa Motöi

Hikaya Duada Hia: I. Böröta Niha Tou ba Danö. II. Böröta Danö. III. Fa'atumbu Duada Hia. IV. Lafailo Tou ba Danö. V. Tanömö zi Siŵa Motöi. VI. Fo'okhöta Duada Hia. VII. Fa'atua-tua Duada Hia. VIII. Irugi Inötö Wa'asatua. IX. Böröta Nadua Nuwu (Adu salahi zatua). X. Mofanö Dödö Hia. XI. Fa'atohare Lakhömi.

Nitöngöni[edit source]

  • Hikaya andre tou tehalö moroi ba zinura Martin Thomsen ba Grete Thomsen, Die Sage vom Stammvater Hija. Ein Gesang aus Mittelnias, Zeitschrift für Ethnologie, Bd. 104, H. 2 (1979), nga'örö 209-277.
  • Lala wanura no molo'ö dialek Nias Tengah, ba lö nifawu'a ya'ia ba da'e tou
  • No mufagölösi ila-ila zura/ejaan (j tobali y, ch tobali kh ba tj tobali c)
  • Bakha ba teks, itaria lafasahe ba itaria göi lafasafi wehede faoma tandra famasafi (-). No u'atulö'ö ia fefu tobali simane fanura ba Li Indonesia faoma tandra wamasafi.


V. Tanömö zi siŵa motöi[edit | edit source]

1.
Ba me lafailo tou Duada Hia Walangi Adu,
ba me lafailo tou Duada Hia Walangi Luo,

ba no lafaogö khönia danömö zi siŵa motöi,
ba no lafaogö khönia danömö zi siŵa ndroro,

ya'ia geu Tora'a Langi,
ya'ia geu Tora'a Luo,

da'ö danömö zi siŵa motöi,
andrö danömö zi siŵa ndroro.

Ya'ia danömö zi so tou ba danö,
ya'ia zi so ba guli danö;

khönia danömö mböwö oroisa Langi,
khönia danömö mböwö oroisa Luo,

si möi fogaoni nga'ötö zi hönö,
fogamö nga'ötö zato.

Khönia geu Tora'i Tora'a,
Tora'i Tora'a Mbaŵa,

andrö danömö zi siŵa motöi,
danömö zi siŵa ndroro.

10.
Siŵa zigaru ifa'oli,
siŵa zigaru ifangöna;

aboto zamba gogola,
tonia zambua gola-gola,

modonia zi samba gogola,
toföfö-föfö zagola,

atoru ba nuwu lali,
atoru ba nuwu ŵa'a;

ya'ia mbalaki ana'a wada,
ya'ia mbalaki Hulöndra,

ya'ia za'oi ba wondrali-ndrali,
ya'ia za'oi ba wanaba-naba,

me moma'uwu mo'ata,
ba mamadou mosilaöŵa.

Ya'ia geu Tora'i Tora'a,
Tora'i Tora'a Mbaŵa,

da'ö danömö zi siŵa motöi,
da'ö danömö zi siŵa ndroro,

ŵalu zigaru ifa'oli,
ŵalu zigaru ifangöna,

20.
aboto zamba gogola,
tonia zamba gola-gola,

modonia zi samba gogola,
ba oi toföfö-föfö zagola,

atoru ba nuwu lali,
atoru ba nuwu ŵa'a.

Ya'ia mbawi satabö so'era,
ya'ia mbawi sebua sohalasa,

ya'ia za'oi ba wogökhö-gökhö,
yaia za'oi ba wanaba-naba,

oi töi wa ono Zi'ulu,
oi töi wa ono zalaŵa,

me moma'uwu mo'ata,
me momadou mosilaöŵa.

Ya'ia geu Tora'i Tora'a,
Tora'i Tora'a Mbaŵa,

da'ö danömö zi siŵa motöi,
da'ö danömö zi siŵa ndroro;

fitu zigaru ifa'oli,
fitu zigaru ifangöna,

30.
aboto zamba gogola,
tonia zamba gola-gola,

modonia zi samba gogola,
modoföfö zagola,

atoru ba nuwu lali,
atoru ba nuwu ŵa'a;

ya'ia zahözi sabö'a böra,
ya'ia ziwae samölö-mölö'a,

sa'oi ba wanutu-nutu,
sa'oi ba wanekha-nekha,

bakha ba lösu angano gi'a,
ba halunia töla hulu baeŵa;

me moma'uwu mo'ata,
ba mamadou mosilaöŵa.

Ya'ia geu Tora'i Tora'a,
Tora'i Tora'a Mbaŵa,

da'ö danömö zi siŵa motöi,
da'ö danömö zi siŵa ndroro,

önö zigaru ifa'oli,
önö zigaru ifangöna,

40.
aboto zamba gogola,
tonia zamba gola-gola,

ba toföfö zagola,
ba oi tonia monga'öla,

atoru ba nuwu lali,
atoru ba nuwu ŵa'a.

Ya'ia döla nohi eziwala,
töla zai'ötö fanikha,

fanikha mbu Ziburuci,
fanikha mbu Zita'unga,

ba moma'uwu mo'ata,
ba momadou mosilaöŵa.

Ya'ia geu Tora'i Tora'a,
Tora'i Tora'a Mbaŵa,

da'ö danömö zi siŵa motöi,
da'ö danömö zi siŵa ndroro,

lima zigaru ifa'oli,
lima zigaru ifangöna,

aboto zamba gogola,
tonia zamba gola-gola,

50.
modonia zi samba gogola,
ba oi toföfö-föfö zagola,

atoru ba nuwu lali,
atoru ba nuwu ŵa'a,

ya'ia wa'elo niriga-riga,
ya'ia gadao wakhöyö-khöyö;

ma'uwunia nihaya nifölö,
nga'ötönia nihae nirorogö,

ba moma'uwu mo'ata,
momadou mosilaöŵa,

Ya'ia geu Tora'i Tora'a,
Tora'i Tora'a Mbaŵa,

ya'ia danömö zi siŵa motöi,
ya'ia danömö zi siŵa ndroro;

öfa zigaru ifa'oli,
öfa zigaru ifangöna,

aboto zamba gogola,
tonia zamba gola-gola,

modonia zi samba gogola,
ba oi toföfö-föfö zagola,

60.
atoru ba nuwu lali,
atoru ba nuwu ŵa'a;

ya'ia gowi ma'uwu lambana,
ya'ia madou zusugi'a,

ya'ia wangatabö'ö zo'era,
ya'ia wa'egebua zohalasa,

ba moma'uwu mo'ata,
ba momadou mosilaöŵa.

Ya'ia geu Tora'i Tora'a,
Tora'i Tora'a Mbaŵa,

da'ö danömö zi siŵa motöi,
da'ö danömö zi siŵa ndroro,

tölu zigaru ifa'oli,
tölu zigaru ifangöna,

aboto zamba gogola,
tonia zamba gola-gola,

modonia zi samba gogola,
modoföfö-föfö zagola,

atoru ba nuwu lali,
atoru ba nuwu ŵa'a;

70.
Ya'ia wino magigi magaga,
ya'ia wino magio ba harefa,

ya'ia zi lö molölö ba we'a,
ya'ia zi lö mo'a'oi ba wonganga,

ba moma'uwu mo'ata,
ba momadou mosilaöŵa.

Ya'ia geu Tora'i Tora'a,
Tora'i Tora'a Mbaŵa,

da'ö danömö zi siŵa motöi,
da'ö danömö zi siŵa ndroro;

dombua zigaru ifa'oli,
dombua zigaru ifangöna,

aboto zamba gogola,
tonia zamba gola-gola,

oi modonia zi samba gogola,
ba oi tonia gola-gola,

atoru ba nuwu lali,
atoru ba nuwu ŵa'a,

Ya'ia dawuo sini tawuo böla,
tawuo gombu-ombu ndrara,

80.
ba oi nitaba nafo somasi ita,
nisaombe nafo zaetu talinga,

me moma'uwu mo'ata,
ba momadou mosilaöŵa.

Ya'ia geu Tora'i Tora'a,
Tora'i Tora'a Mbaŵa,

da'ö danömö zi siŵa motöi,
da'ö danömö zi siŵa ndroro.

Ba sambua zigaru ifa'oli,
ba sambua zigaru ifangöna,

aboto zamba gogola,
tonia zamba gola-gola,

modoföfö zagola,
modonia ba nga'öla,

atoru ba nuwu lali,
atoru ba nuwu ŵa'a.

Ya'ia mbako mö'u, bako mö'a,
bako nilölö laehuwa,

ba ni'otö-otölu mbu göda,
ni'odua-dua gu'ö laŵa-laŵa,

90.
zadö'u ndra'o lö na u'a,
zabiha ndra'o lö na ubabaya.

Ya'ia mamesu högö zundruni,
ya'ia mamesu högö galifa,

famesu högö zahöra gaga,
fanie zabao gogowaya.



Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Nefeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior