Wb/nia/Fa'atumbu Duada Hia
III. Fa'atumbu Duada Hia
[edit | edit source]1.
Tumbu Hia Walangi Adu,
tumbu Hia Walangi Luo,
lö itörö lala zi hönö,
lö itörö lala zato,
itörö fela-fela dödö,
itörö narö galogo.
Tumbu lö abasö mboto,
tumbu lö faruka ndro,
lö labe famondri mowa hoya,
lö lafemondri ba mowa wino;
famondri dödö wiga lame,
famondri wiga adulo,
labe folölönia dalu zotöra,
labe folölönia dalu muko.
Me tumbu ia baero falawu zu'a,
me tumbu ia no falawu noso;
ifanöi höwa mbanua,
ifanöi höwa ndraso.
10.
Me tumbu Hia Walangi Adu,
me tumbu Hia Walangi Luo,
labe'e ia ba lamaeha tefaö,
labe ba lamaeha rao,
labe ba mböröwa tefaö,
ba lamaeha fondrino.
Ba lö ariri mbu mbö'ötö,
lö ariri mbu da'io.
Me mo manöi hulö höwa mbanua,
me mo manöi hulö höwa ndraso,
me mo ebua tohare nga'eu,
me mo ebua tohare mboto,
Tuada Hia Walangi Adu,
Tuada Hia Walangi Luo,
me falalaŵatö ba zatua,
me falalaŵa ba ndroro,
möi ia cumuyu mbaluse,
möi cumuyu doho;
itaoka zi sandrohu mbuluse,
itaoka zi sandrohu toho.
20.
Me falalaŵa ba zatua,
me falalaŵa ba ndroro,
möi fasi'ulu fambombatö ba zatua,
möi fasi'ulu fala'o
khö Mali moroi ba rege-rege,
khö Mali moroi ba mboto dao,
saniagö fasulöna danö,
saniagö fasulöna dao,
ya'ia zanofi töla si Lölöu,
sanofi töla Si faedo.
Andrö gere Mali sauli alölö,
andrö gere sauli asao,
zi auli mate mangawuli,
si auli acua no monoso.
Me möi faulu fambombatö,
me möi faulu fala'o,
möi ia waigi mufazei,
möi ia waigi mutandro.
Möi waigi Zi Buruci Huna,
möi ia mufaigi Zi Mohuo Gao;
30.
No so ia ba hörö lawa-lawa,
no tumaro ia ba defaoso,
mama'a-ma'anö nalu nukha,
mama'anö nalu muko.
Me nihonogöi tambali döla,
no nihonogöi awö mboto,
andrö lö cimba-cimba lö famaehu,
andrö lö ba'a-ba'a wa'aso;
andrö wa te'o'ozui luo,
andrö wa mohohou gego,
alua wondroro Si Buruci Huna,
alua walöŵa fondroro;
Aweda Futi Ta'oranö,
Aweda Futi Fa'urao,
ono Mali ba wasulöna danö,
ono Mali ba wasulöna dao,
donga Duada Hia Walangi Adu,
donga Duada Hia Walangi Luo.
Me mo tedoro lafasao banua,
me mo ladoro la'ohe baomo,
40.
humede Duada Hia Walangi Adu,
humede Duada Hia Walangi Luo.
Nitöngöni
[edit source]- Hikaya andre tou tehalö moroi ba zinura Martin Thomsen ba Grete Thomsen, Die Sage vom Stammvater Hija. Ein Gesang aus Mittelnias, Zeitschrift für Ethnologie, Bd. 104, H. 2 (1979), nga'örö 209-277.
- Lala wanura no molo'ö dialek Nias Tengah, ba lö nifawu'a ya'ia ba da'e tou
- No mufagölösi ila-ila zura/ejaan (j tobali y, ch tobali kh ba tj tobali c)
- Bakha ba teks, itaria lafasahe ba itaria göi lafabali wehede faoma tandra famabali (-). No u'atulö'ö ia fefu tobali simane fanura ba Li Indonesia faoma tandra wamabali.
Angolifa nösi
[edit source]I. Böröta Niha Tou ba Danö. II. Böröta Danö. III. Fa'atumbu Duada Hia. IV. Lafailo Tou ba Danö. V. Tanömö zi Siŵa Motöi. VI. Fo'okhöta Duada Hia. VII. Fa'atua-tua Duada Hia. VIII. Irugi Inötö Wa'asatua. IX. Böröta Nadua Nuwu (Adu salahi zatua). X. Mofanö Dödö Hia. XI. Fa'atohare Lakhömi.