Wb/nia/Sakharia/8

I. Amabu'ula li: mangawuli dania ira ba Yeruzalema

1 Ba ifuli so niŵa'ö Yehowa khögu, imane: 2 Da'ö niŵa'ö Yehowa ngahönö: Omasido sibai Ziona andrö, solohu ndra'odo, ba no tesao wönugu khöra, fönu sabölö-bölö. 3 Da'ö niŵa'ö Yehowa: Sangawuli ba Ziona ndra'odo, ba ba dalu Yeruzalema ube'e nahiagu; "banua si lö faröi" dania döi Yeruzalema, ba "hili ni'amoni'ö" döi hili Yehowa ngahönö. 4 Da'ö niŵa'ö Yehowa ngahönö: So na dania zidao-dao ba golayama ba Yeruzalema ira matua satua ba ira alawe satua, dozi so zi'o ba dangara, me no atua sibai ira. 5 Ba ewali yomo ba mbanua, ba anönö iraono, ono matua ba ono alawe, si famaimai baewali khöra. 6 Da'ö niŵa'ö Yehowa ngahönö: Na sahöli-höli dödö dania da'ö, na luo da'ö, wamaigi zi tosai so da'e, ba khögu göi, ba sahöli-höli dödö ia, iŵa'ö Yehowa ngahönö. 7 Da'ö niŵa'ö Yehowa ngahönö: Hiza, u'orifi mbanuagu, u'efa'ö ba danö tanö ba gatumbukha luo misa ba ba danö tanö ba gaekhula luo, 8 ba u'ohe mangawuli ira, ena'ö yomo ba Yeruzalema labe'e nahiara, ba banuagu ira, si lö tebulö ba si ndruhu, ba Lowalangira ndra'odo!

II. Ifahowu'ö ira Yehowa, na fa'atulö ba fa'omasi lafa'ua

9 Da'ö niŵa'ö Yehowa ngahönö: Mi'abe'e'ö dangami ya'ami samondrongo taroma li andre, ba götö da'e, taroma li nifa'ema zama'ele'ö andrö, sama'ele'ö me luo tebe'e tou doyo ba wolau omo Yehowa ngahönö, osali andrö. 10 Föna da'ö sa, ba lö böli gölö niha ba halöŵöra, ba he halöŵö gurifö, ba no zaya-zaya gölö; ba zofanö ba ba zangawuli, ba so gameta'uö emali, ba no ufadou manö niha fefu. 11 Ba iya'e, ba bö'ö dödögu ba zi tosai soi da'e, bö'ö me föna, iŵa'ö Yehowa ngahönö; 12 lö'ö sa'ae hadia ia ba zinanö khöra. Mowua nagu ba mowua danö, ba soso namo mbanua ba utehe manö da'ö fefu ba zi tosai soi andre. 13 Ba si mane mege, me no tobali fangelifi döimi ba niha baero, ya'ami ma'uwu Yuda ba ma'uwu Gizeraeli, si manö wanologu ya'ami, ena'ö tobali famahowu'ö döimi! Böi mibusi dödömi! 14 Mi'abe'e'ö dangami! Imane sa Yehowa ngahönö: Si mane mege, me uhonogöi wamakao ya'ami, me labaosi dödögu ira tuami, iŵa'ö Yehowa ngahönö, ba me lö aröuröu ba dödögu, 15 si manö göi wangohonogöigu ma'ökhö famatörö si sökhi ba Yeruzalema ba ba ma'uwu Yuda. 16 Böi mibusi dödömi! Ba da'ö nilaumi: Faoma si duhu milau khö nawömi ba böi mibila'ö wamatunö huhuo ba kato khömi, huku satulö mifatörö! 17 Böi mifakhai tödömi zi lö sökhi khö nawömi, ba böi omasi ami we'amöi ba hölu ba zi lö duhu, me no si fatuwu khögu da'ö fefu, iŵa'ö Yehowa.

III. Tobali baŵa wa'omuso dödö dania mbaŵa wamoni andrö khöra

18 Ba so niŵa'ö Yehowa ngahönö khögu, imane: 19 Da'ö niŵa'ö Yehowa ngahönö: Famoni andrö, na baŵa si öfa ba si lima ba si fitu ba si fulu, ba tobali fa'omuso dödö ba fa'iki ba si no amaedola walöŵa, ba ma'uwu Yuda: ba mi'omasi'ö zi duhu ba fa'atulömi khö nawömi! 20 Da'ö niŵa'ö Yehowa ngahönö: Falukha na dania, ba la'ondrasi ami soi bö'ö, sambusambua soi manö, ba oya banua zangondrasi ya'ami. 21 Faoma möi khö nawöra mbanuara ba lamane: Talabu, möi ita fakao khö Yehowa ngahönö! Ya'odo göi, ba si möi! 22 Ba oya soi, ato niha baero zangondrasi, ba wangalui Yehowa ngahönö, ba Yeruzalema, ba ba wakaosa, khö Yehowa. 23 Da'ö niŵa'ö Yehowa ngahönö: Na luo da'ö dania, ba hiza, ba dafitu niha, hadia lira fefu, li niha baero, zondra'u ahe mbaru niha Yehuda si ha samösa, ba sanguma'ö: Faoga khömi, me no marongo, wa lö aefa-aefa khömi Lowalangi!

Famotokhi ba gahe

Fabaliŵa lala

Olayama Zura Zakharia: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö