Wp/fit/Kambodja

From Wikimedia Incubator
< Wp‎ | fitWp > fit > Kambodja
Jump to navigation Jump to search
Flag of Cambodia.svg
LocationCambodia.svg

Kambodjan kuningaskunta (khmeriksi ព្រះរាជាណាចក្រកម្ពុជា, Preăh réachéa nachâk Kâmpŭchéa) on yli 14 miljoonan asukhaan valtio Kaakkois-Aasiassa. Kambodja rajautuu iässä Vietnamhiin, pohjoisessa Laoshiin ja lännessä Thailanthiin, ja etelässä sillä on rannikkoa Siaminlahele. Maan läpi virtaa Mekongväylä pohjoisesta etelhään ja sen länsiosassa sijaittee suuri Tonle Sap -järvi. Pääosa maan asukhaista on theravada-buddhalaisia khmerejä, jokka puhuvat austroaasialaista khmerin kieltä. Kambofjan pääkaupunki on Phnom Penh.

Varhaiskeskiaijala Kambodjan aluetta hallitit intialaisen kulttuurin vaikutuksessa Funanin ja Chenlan kuninkaskunnat. Niitten tilale nousi 800-luvula Khmerien valtakunta, josta tuli alueelinen suurvalta ja jolla oli merkittävä vaikutus Kaakkois-Aasian kulttuurhiin. Valtakunnan lopettua Kambodja ajautui Thailantin ja Vietnamin alamaisvaltioksi ja joutui viimein 1800-luvun lopula Franskan siirtomaavallan alle. Maa ittenäistyi uuesti vuona 1953. Yhtysvallat pommitti Kambodjaa Vietnamin soan yhteyessä, ja vuona 1970 Kambodjan kuninkas syrjäytethiin vallankaappauksessa ja maahan perustethiin Yhtysvalloile ystävälismielinen sotilashallinto. Valthaan nousit kuitekki muutaman vuoen kuluttua Pol Potin johtamat Punaiset khmerit, joitten toteuttamassa kansanmurhassa kuoli ainaki yli miljoona kambodjalaista. Vuosikymmenen lopussa Vietnam hyökkäsi Kambodjhaan, punakhmerit syrjäytethiin vallasta ja maahan perustethiin kommunistinen Kamputsean kansantasavalta. Sisällissota punakhmerejä vasthaan päättyi 1990-luvun alussa ja munarki panthiin takashiin, minkä jälkhiin maan olot on olheet suhteelisen tasaset.

Kambodja on vieläki köyhä valtio, jonka väestö saapi pääosin elantonsa maatalouesta. Kambodjan kulttuuri tunnethaan muun muassa Khmer-valtakunnan jälkhiinsä jättämistä valtavista arkkitektyyrimonymentista, joista kuuluisin taitaa olla Angkor Watin tämppeli, ja ainutlaatuisesta keittiösthään.