Wp/fit/Turkki

Turkki (turk. Türkiye), viralisesti Turkin tasavalta (turk. Türkiye Cumhuriyeti), on euraasialainen valtio, joka ulottuu Anatolian niemimaalta Lounais-Aasiasta Balkanin alueele Kaakkois-Euruuphaan. Turkila on kaheksan krannimaata: Bulgaria luotheessa, Kreeklanti lännessä, Georgia koilisessa, Armenia, Iran sekä Azerbaidjanin Nahitsevanin enklaavi iässä ja Irak sekä Syyria kaakossa. Lisäks Turkki rajautuu Mustaanmerheen pohjoisessa, Aigeianmerheen lännessä ja Välimerheen etelässä. Turkin alueela sijaittee kans Marmaranmeri, jonka kautta kulkee Euruupan ja Aasian välinen raja, joten valtiola on aluetta kahela manterheela.

Turkin alueela on syntyny usheita merkittäviä sivilisasuunia, niin kun Bysantti ja Osmanitten valtakunta. Maan kulttuuri on rikas sekotus itäistä ja läntistä perinettä, sillä Turkki sijaittee kahen manterheen ristheyskohassa. Kulttuuria onki ushein kuvattu sillaks kahen mailman välilä. Voimakhaan alueelisen olon vuoks Turkki on alkanu muoostua strateekisesti aina merkittävämäks valtioksi.

Turkki on temukraattinen, sekulaarinen ja perustuslailinen tasavalta. Sen puliittinen järjestys perustethiin vuona 1923 Mustafa Kemal Atatürkin johossa ensimäisen maailmansoan jälkiselvittelyitten aikana, kun osmanitten valtakunta oli kaatunu. Tämän jälkhiin Turkki on intekreerattu kasvamassa määrin läntheen, mutta on pitäny samanaikasesti yllä suhteithaan itäisheen mailmhaan. Maa on Yhtistyneitten kansakunnitten (FN), Islamilaisen konferensin, OECD:n ja Euruupan turvalisuus- ja yhteistyöjärjestön perustajajäsen, Euruupan neuvoston jäsen vuoesta 1949 ja NATO:n jäsen vuoesta 1952. Turkki on käyny jäsenyysneuvotteluja Euruupan unionin kans vuoesta 2005 lähtien, asosieerattu jäsenmaa on ollu vuoesta 1963. Turkki on jäsen kans G20:ssä, joka tuopi yhtheen mailman 20 suuriinta ekonomiita.

Aasian maat