Wp/fit/Bangladesh

From Wikimedia Incubator
< Wp‎ | fitWp > fit > Bangladesh
Jump to navigation Jump to search
Flag of Bangladesh.svg
LocationBangladesh.svg

Bangladesh, viralisesti Bangladeshin kansantasavalta, on valtio Etelä-Aasiassa. Lukhuun ottamatta lyhyttä raijaa Myanmarin kans maan kaakkoisosassa ja Bengalinlahtea maan eteläpuolela Bangladesh on kokonaisuuesshaan Intian ympäröimä. Yhessä Intian Länsi-Bengalin osavaltion kans maa muoostaa Bengalin etnis-kielelisen alueen. Nimi Bangladesh tarkottaa ”Bengalin valtiota” ja kirjoitethaan bengaliksi বাংলাদেশ.

Bangladeshin rajat määritelthiin Intian jaon yhteyessä, kun siit´tä tuli Pakistanin itänen osa (Itä-Pakistan), 1 600 kilometrin päässä emämaasthaan. Huolimatta yhteisestä uskonosta alueitten etniset ja kieleliset eroavaisuuet, Länsi-Pakistanin apaattisen hallituksen lisäks, johtivat Bangladeshin ittenäistymisheen vuona 1971 sheikki Mujibur Rahmanin hallinassa. Verisessä Bangladeshin ittenäisyyssoassa maata tuki Intia. Ittenäistymisen jälkiset vuoet on olheet puliittisesti epävarmoja, ja maassa on ollu kolmetoista eri valtionpäämiehen lisäks ainaki neljä vallankaappausta.

Bangladeshin väkiluku on mailman seittemäneks suuriin, mutta maan 144 000 kvatraattikilometrin suurunen alue sijottuu mailmassa vasta 94. sijale. Bangladesh onki yks mailman tihheimiin asutuista valtioista, ja pieniä kaupunki- tai saarivaltioita lukhuun ottamatta kaikhiin tihheimiin asuttu. Se on kans mailman kolmaneks suuriin muslimienemistöinen valtio, mutta Bangladeshin muslimiväestö on kuitekki jonkin verran Intian muslimivähemistöä pienempi. Maantietheelisesti Bangladeshia hallittee hetelmälinen Gangesin-Brahmaputran suisto: maa kokkee vuosithaisia monsuunitulvia ja trooppiset sykloonit on ylheisiä.