Wb/nia/Yakobo/2

Add links
From Wikimedia Incubator
< Wb‎ | nia‎ | Yakobo
Wb > nia > Yakobo > 2

Famangelama fa böi ebua dödö zambuana[edit | edit source]

I. 1 Ya'ami ira talifusögu, böi mi'ebua'ö dödömi zambuana, ba wamati andrö, khö Zo'aya lakhömi andrö khöda, Yesu Keriso. 2 Na so ena'ö zi möi ba gowuloami niha solaeduru balaki, sobaru baru luo, ba na so göi zi möi, si numana, sobaru si lö sökhi-sökhi; 3 ba mifaigi ena'ö zobaru baru luo andrö, ba mimane ena'ö: Dadao ba da'e, ya'ugö faigi zi sökhi nahau; ba na mimane ba zi numana andrö: Ya'ugö, ba ba da'ö iagö, zizio, ba ma tou dadao, tou mbaku-baku gahegu andre! 4 ba tenga no mifonaha wanufa dödömi, ba tenga no sanguhuku, si so era-era si lö sökhi, ami? 5 Mifondrondrongo, ya'ami ira talifusögu, somasi ndra'o! Tenga no itutuyu Lowalangi zi numana ba guli danö andre, ena'ö fahöna khöra wamati andrö, ba ena'ö sanema ondröita ira, banua andrö, nifabu'unia ba zangomasi'ö ya'ia andrö? Ba ya'ami, ba no mi'ositengagö zi numana andrö[1] 6 Hadia, tenga so'ana'a andrö zamalangögö ya'ami, ba tenga ya'ira zanöbi ya'ami ba rafe? 7 Tenga ya'ira zango'aya töi si sökhi andrö, si no mube'e börö döimi andrö?[2] 8 Ba na mi'o'ö goroisa razo andrö, si so ba zura: "Omasi'ö zahatö khöu, si mane fa'omasiu ndra'ugö," ba no si sökhi milau.[3] 9 Ba na mi'ebua'ö dödömi zambuana, ba mamazökhi horö ami, ba ifaduhu'ö khömi oroisa, wa no sanawö ami.[4] 10 Na so sa ena'ö zolo'ö oroisa, ma'afefu, ba na isawö zambalö, ba no mo'ömö ia ba goroisa ma'afefu.[5] 11 Sanguma'ö: "Böi ohorö!" da'ö göi zanguma'ö: "Böi ange'e." Ba he lö mohorö'ö, ba na mange'e'ö, ba no tobali sanawö oroisa ndra'ugö.[6] 12 Mimanö wehede, ba mimanö wolau, si mane niha nihuku ba goroisa fangefa andrö dania.[7] 13 Lö'ö sa fa'ahakhö dödö ba wanguhuku si lö mangahakhösi tödönia; ba i'ositengagö wanguhuku fa'ahakhö dödö andrö.[8]

Famangelama fa böi zi lö bua-bua si sökhi ba wamati[edit | edit source]

II. 14 Hadia guna, ya'ami ira talifusögu, na so zanguma'ö, so khönia wamati, ba na lö bua-bua? Hadia, i'ila, i'orifi ia famati andrö?[9] 15 Ba na so dalifusö matua, ba ma talifusö alawe, si lö nukha ba sambö balazo, ndrege zi ma'ökhö; 16 ba na so ba khömi zanguma'ö khöra: Mi'ae'e, ya'ohahau dödömi, mi'oleu, ba mi'abusoi'ö ami! ba na lö mibe'e zoguna fangehao mbotora, ba hadia guna?[10] 17 Si manö göi wamati andrö, na lö bua-bua; no amaedola zi lö noso.[11] 18 Ba ma so zanguma'ö: khöu wamati, ba khögu mbua-bua. Oroma'ö khögu wamatimö andrö, si lö bua-bua, ba ba mbua-buagu u'oroma'ö khöu wamati andrö.[12] 19 Hadia, no faduhu dödöu, wa ha sambua Lowalangi? Si sökhi da'ö: faduhu göi dödö mbekhu ba da'ö, ba humokha mbura.[13] 20 Ba hadia, omasi'ö ö'ila, ya'ugö niha si lö tödö, wa lö guna wamati si lö bua-bua? 21 Tuada Aberahamo andrö, hadia, tenga moroi ba mbua-bua isöndra wangatulö, me ibe'e sumange nononia Iza'aki andrö?[14] 22 Ö'ila ba da'ö, itolo ba mbua-bua andrö famati, ba moroi ba mbua-bua andrö tefo'ahonoa wamati,[15] 23 ba itörö zi so ba zura andrö, imane: "Ba mamati Gaberahamo khö Lowalangi, ba tebe'e fa'atulö dödönia da'ö, ba si fahuwu khö Lowalangi döinia".[16] 24 Mi'ila ba da'ö, ba mbua-bua isöndra wangatulö niha, ba tenga ha ba wamati. 25 Si manö göi Rakhaba andrö, sohorö andrö, hadia, tenga ba mbua-bua isöndra wangatulö, me ifa'amöi yomo khönia zinenge andrö, ba me ifatörö ba lala bö'ö, wamofanö?[17] 26 Hulö si mane boto sa, si lö fa'auri, na lö noso, si manö göi wamati andrö, lö fa'auri, na lö bua-bua.

Famotokhi ba gahe[edit | edit source]

  1. ↑ KorI 1:26
  2. ↑ FetI 4:14
  3. ↑ MozIII 19:18; Gal 5:14; Mat 22:36 b.t.
  4. ↑ MozIII 19:15
  5. ↑ MozV 27:26; Mat 5:19
  6. ↑ MozII 20:13,14
  7. ↑ Faigi 1:25
  8. ↑ Mat 25:34 b.t., 41 b.t.; Mat 5:7
  9. ↑ Faigi 1:22; Mat 7:21; Rom 3:31; Tit 3:8
  10. ↑ Luk 3:11
  11. ↑ Faigi 2:26; Gal 5:6; KorI 13:2
  12. ↑ Mat 7:20
  13. ↑ Mar 1:24; HalZin 19:15
  14. ↑ MozI 22:9–12; Heb 11:17
  15. ↑ Rom 4:3; FetII 1:5–10
  16. ↑ MozI 15:6; Nga'ötII 20:7; Yes 41:8
  17. ↑ Yos 2:1 b.t.; Heb 11:31

Fabaliŵa lala[edit source]

Olayama Zura Yakobo: 1 • 2 • 3 • 4 • 5

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Yakobo/2&oldid=6229864"